Dìtɔ̀wáɖánámɛ̀ 1 - Ɓǎsɔ́ɔ̀ Báɓòɔ̀

Ɖɛ-da-zà-zà

¹ Wuɖu ɓě nìà céè-ɖɛ̀ nìà kɛ múɛɛ mɔ̀ wuɖu ɓě ɓɛ́ Mózè cɛ̃ ma Éézùɖùɛ̀-nyɔ̀ ɓěɔ̀ gbo ti ɓɛ́ wa nì ma ɖé gbǎùn-fúɖúáɔ̀ kɔ̃, hwɔ ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ dyíɛ. Ɓó tia ɓaɖaa, wa ɓɛ̀ɖɛ̀ìn ma ɖé Jɔ́nì Bɔɔ-kpàɔ̀ kɔ̃ dyí, ké wa nì ma Súfì-hwɔ̀ɖɔ̀ɔ̀ wĩín. Ké wa nì ma Páwàɖàùn-hwɔ̀ɖɔ̀ɔ̀ kè hwɔɖɔ ɓě mɔ̀ Tófèò kè Ɖéɓɛ̀ìn kè Hàzéwòɖò ɔ kè Dìzáhà kɛɛ pṹa.

² Nyɔ ɖò dyi hwìè zĩ̀àìn ɖé Séì-tòɖòɔ̀ gboɛɛ kpa ní, sɔ̀ Hówèɖè-tòɖòɔ̀ gbo ɓɛ́ ɔ kéà Káɖɛ̀-Bànéà-hwɔ̀ɖɔ̀ɔ̀ mú nyiniɛɛ ɖú wé ɓaɖa-bùè sè dyúáɖò dyí, kɛɛ Éézùɖùɛ̀-nyɔ̀ ɓěɔ̀ ɖú ma zɔ̃ kpáɖá-nyɔ sɔ̃́ dyí ɓó hwìèɔ̀ kɔ̃.

³ Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma Íjè-ɓòɖòɔ̀ kɔ̃, ké wa ɖǎ ma gbǎùn-fúɖúáɔ̀ kɔ̃ muɛɛ, zɔ̃ɔ̀ kpáɖá-nyɔ sɔ̃́ nììnɔ̀ dɛ̀nɛ̀ɔ̀ ɓaɖa-bùè sè dyúáɖò nììnɔ̀ wé kĩ́ín-kĩ́ínɔ̀ ɓaɖaa, Mózè zaìn ma ɖɛ séín ɓɛ́ Bounɓoɔ̀ cɛ̃ ma kà ɔ gbo ɓá wa jè dyíɛɛ wa gbo kɔ̃in.

⁴ Mózè wùɖù ma Éézùɖùɛ̀-nyɔ̀ ɓěɔ̀ gbo ti ɓɛ́ ɔ ɖǎ ma Ámɔ̀-nyɔ̀ ɓěɔ̀ kã́á mɔ̀ Síhɔ̃̀ ɓɛ́ ɔ cĩ́ ma ɖé Hɛ́ɓɔ̀ùn-hwɔ̀ɖɔ̀ɔ̀ múɛ kè Básàùn-nyɔ̀ ɓěɔ̀ kã́á mɔ̀ Ógì ɓɛ́ ɔ cĩ́ ma ɖé Àtáwòɖò-hwɔ̀ɖɔ̀ɔ̀ kè Ɛ̀dɛ́ɖɛ́ì-hwɔ̀ɖɔ̀ɔ̀ múɛɛ toún ɖuɛ.

⁵ Ti ɓɛ́ Éézùɖùɛ̀-nyɔ̀ ɓěɔ̀ nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀, ɖé Móà-ɓòɖòɔ̀ kɔ̃ɛɛ, Mózè dè ma gma nìà kɛ kɔ̃in zaìn gbɔ, ké ɔ ɖá,

⁶ “Bounɓo mɔ̀à à Gèɖèpɔ́ɔ̀ kɛɛ cɛ̃ɛ ma à gbo ɖé Hówèɖè-tòɖòɔ̀ gbo, ké ɔ ɖá, ‘Ɓě ɖǎ dà toɖo nìà kɛ gbo hwèɖèìn.

⁷ Ɓě sɔ̀ dyí, ɓɛ́ ɓě ké hwìè xwíníín kpá. Ké ɓě mɛ mu ɖé Ámɔ̀-nyɔ̀ ɓěɔ̀ ɓóɖó mɔ̀à toɖo-ɓòɖòɔ̀ kɛ kè ɓóɖó séín ɓě nì ɔ ɖeiɛɛ kɔ̃. Ɔ mɔ̀ ɖé Jɔ́nì Bɔɔ-kpàɔ̀ kɔ̃ kè ɖé Kénà Toɖo-ɓòɖòɔ̀ kɔ̃ kè ɖé bɔɔ-kpà hwɔà ɖé Kénà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛɛ kɔ̃ kè ɖé Nɛ́gà-ɓòɖòɔ̀ kɔ̃ ɔ kè ɖé ɓóɖó nìà ɖé Mɛ́ɖɛ̀tɔ̀wéɖénìà-dyòǒɔ̀ wĩin nyɛɛ kɔ̃. Ɓě mɛ mu ɖé Kénà-ɓòɖòɔ̀ kè Ɖɛ́ɓèɖɔ́ùn-ɓòɖòɔ̀ kɔ̃, ké ɓě mɛ mu tee, ɓɛ́ ɓě ké ní vɛ̀nɛ̀ mɔ̀à Dyùféɖétì kɛɛ dyɛ̀ìn.

⁸ Gmɔ̀ nɔ̄, ḿ ɖǎ ɓě ɓóɖóɔ̀ nyí. Ɓě mu, ɓɛ́ ɓě ké ɓóɖó ḿ ɖǎ ma kà ɓě ɓǎ nììn ɓǎ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kè waà xwíníín-dyù ɓě nyɛ́nɛ́ín ɖáìn nyɛɛ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ.’ ”

Mózè gã tɔ̀ɔ̀-ɓìɔ̀ ɓě

⁹ Sɔ̀ìn ɓóɛ gboɛɛ, Mózè cɛ̃ɛ ma nyɔ ɓěɔ̀ gbo ɖe, ké ɔ ɖá, “Ti ɓɛ́ ɓěà nì ma ɖé Hówèɖè-tòɖòɔ̀ gboɛɛ, ḿ cɛ̃ɛ ma ɓě gbo, ké ḿ ɖá, ‘Ɓěɛ̀ nàìn-nàìnɔ̀ mɔ̀ kũ̀à vɛ̀nɛ̀ ɓó ḿ bìì, ké ḿ ɖòǔn seɛ nyuɛ ɓɛ́ìn.

¹⁰ Dyéɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓě dúún zaìn, ké ɓě ɖǎ dyí vò kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛɛ vòà dyíɛ.

¹¹ Ké Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ mɛ zaìn ɓě mú ɖe mìɔ, ɓɛ́ ɓě ké kà ɓě jĩ̀à kɛɛ dyí zi. Ké ɔ mɛ po ɓě mana kɔ̃ kà ɔ nyuɛ ma kà ɓě nyɛ́nɛ́ín ɖáìn nyɛ.

¹² Kà ɔ nìà náa, ḿ ɖòǔn se ɓě nàìn ɓɛ́ìn, ké ḿ ɖòǔn se ɓěɛ̀ zaa-wɔ̃-po-kũ̀àɔ̀ nyuɛ ɓɛ́ìn.

¹³ Ɓó kàǔn wɛ̃ɛ, ɓě mɛ gã gàa ɓě sɔ̀ìn ɖé ɓěɛ̀ xwéɖé-dù ɓěɔ̀ hwìɛ̀, ké ní mu wa kũ̀à kɔ̃ún poùn, ɓɛ́ wa ké ɓěɛ̀ tɔ̀ɔ̀-ɓìɔ̀ ɓě jǔ. Wa mɛ mɔ̀ gàa ɓě ɓɛ́ wa fɔ̀nɔ̀ hwòɖǒ, ké wa wɔ̃́ ɖɛ múin, ké wa dyuò nyɔǔn-dyù jèɛ.’

¹⁴ Ké ɓě cɛ̃ɛ ma ḿ gbo, ké ɓě ɖá, ‘Ɖɛ m̀ cɛ̃à kɛɛ nɔ̀mɔ̀ dyíin ɓó à bìì, ɓɛ́ à kéɛ nyu.’

¹⁵ Ɔ jèɛɛ, ḿ zà ma ɓěɛ̀ nàìn-nyɔ̀ ɓě ɓɛ́ wa fɔ̀nɔ̀ hwòɖǒ, ké wa dyuò nyɔǔn-dyù jèɛɛ ɖé ɓěɛ̀ xwéɖé-dù ɓěɔ̀ hwìɛ̀, ké ḿ nyu ma wa ɓěɛ̀ tɔ̀ɔ̀-ɓìɔ̀ ɓě mú. Wa mɔ̀ ma tɔ̀ɔ̀-ɓìɔ̀ ɓó nyɔ táázĩ̀ìn ɓě kè nyɔ hɔ̃dɛ̀ɖɛ̀ ɓě kè nyɔ kpáɖá-nyɔ sɔ̃́ ɓaɖa-bùè ɓě ɔ kè nyɔ ɓaɖa-bùè ɓě bìì.

¹⁶ “Ɓo tia ɓaɖaa, ḿ po ma tɔ̀ɔ̀-ɓìɔ̀ ɓěɔ̀ náún, ké ḿ ɖá, ‘Ɓě cɛ̃ ɓěɛ̀ ɖíí ɓěɔ̀ zaa ɓě nì wa kè waà mǔè ɖò mɔɔ ɖíà ɖò pṹa kɛ. Ké ɓě mɛ po waà zaa ɓěɔ̀ wɔ̃ dyí-sɛ́ɖɛ́ìn-kà.

¹⁷ Ɓě ní ɖá ɓɛ́ ɓě ké nyɔ ɖò hwòɖǒǔn gbo zĩ̀ìn ɖé ɓěɛ̀ zaa-wɔ̃-po-poɔ̀ mú. Ɓě mɛ tò dyú mɛ́nɛ́ɛ́ kè vɛ̀nɛ̀ ɖùǔ gbo. Ɓě mɛ ɓɔ́ nyɔǔn-dyùɛ̀ dyéɖé peɖeɛ, sepóɛɖé Gèɖèpɔ́ɔ̀ mɔ̀ nyɔ kɔ̃̀ zaa-wɔ̃-po-po. Ké zaa ɓɛ́ ɔ mu wɔ̃ kuùn mìɔ ɓó ɓě bììɛɛ, ɓě mɛ dyàà ḿ gbo, ké ní muɛ cɛ̃ìn.’

¹⁸ Ti ɓɛ́ ḿ ɖǎ ma tɔ̀ɔ̀-ɓìɔ̀ ɓěɔ̀ náún poɛ hwɔɛɛ, ḿ cɛ̃ ma ɖɛ séín ɓě ké ma nyuɛɛ ɓě gbo.

Wa ɖoɓo dyéɖé-dyi-kpaìn-nyɔ̀ ɓě sɔ̀ìn ɖé Káɖɛ̀-Bànéà-hwɔ̀ɖɔ̀ɔ̀ mú

¹⁹ “Sɔ̀ìn ɓóɛ gboɛɛ, kà Bounɓo mɔ̀à à Gèɖèpɔ́ɔ̀ kɛɛ nyuɛ ma kà à gbo cɛ̃ɛ kɛɛ, kǎà à nyuɛ ma. À sɔ̀ ma ɖé Hówèɖè-tòɖòɔ̀ gbo, ké à zĩ̀ìn ma gbǎùn-fúɖúá vɛ̀nɛ̀ nyìnììn gboiɔ̀ mú ti ɓɛ́ à nì ma ɖé Ámɔ̀-nyɔ̀ ɓěɔ̀ toɖo-ɓòɖòɔ̀ kɔ̃ muɛń nyɛ, ké ɓěà dyi ma ɖé Káɖɛ̀-Bànéà-hwɔ̀ɖɔ̀ɔ̀ mú.

²⁰ Ké ḿ cɛ̃ɛ ma ɓě gbo, ké ḿ ɖá, ‘Ɓě ɖǎ Ámɔ̀-nyɔ̀ ɓěɔ̀ toɖo-ɓòɖòɔ̀ wĩín nyini. Ɔ mɔ̀ ɓóɖó ɓɛ́ Bounɓo mɔ̀à ɓěà Gèɖèpɔ́ɔ̀ kɛɛ nìà ɓěà nyíɛń nyɛ.

²¹ Ɓě gmɔ̀ nɔ̄, Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓě ɓóɖóɔ̀ xwaún dyi po. Ɓě mu, ɓɛ́ ɓě ké ɓóɖóɔ̀ dyí ɖú kà Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ nyuà ɓě gbo cɛ̃ɛ kɛ. Ɓě mɛ ɓɔ́ fɛ̃̀ìn, mɔɔ ké ɓěɛ̀ hwòɖǒ mɛ ɓɔ́ ɖé ɖei kpáa.’

²² “Hwɛ̀ ké ɓě séín dyi ma ḿ gbo, ké ɓě ɖá, ‘À mɛ ɖoɓo gàa ɓě ɖé à dyúa, ɓɛ́ wa ké ɓóɖóɔ̀ dyéɖé gboi kpaìn ɓó à bìì, ɓɛ́ wa ké à wuɖu gbo ɖe dyà ɓó hwìè à ké ɓóɖóɔ̀ mú kpaa kè hwɔɖɔ ɓě à ké mú muɛɛ jè.’

²³ “Ké ɖɛ ɓě cɛ̃à ná kɛɛ dè ma ḿ hwìɖǐi, ké ḿ gã ma ɓěɛ̀ gàa ɓaɖa-bùè sè sɔ̃́. Gàa dyúáɖò sɔ̀ ma ɖé ɓěɛ̀ xwéɖé-dù ɖò-ɖò ɓěɔ̀ hwìɛ̀.

²⁴ Ké wa sɔ̀ ma dyí, ké wa mu ma ɖé toɖo-ɓòɖòɔ̀ kɔ̃, ké wa nyini ma ɖé Ɛ́kò Bɔɔ-kpàɔ̀ kɔ̃, ké wa kpaìn ma ɓóɖóɔ̀ dyéɖé gboi.

²⁵ Ké wa kpã́ ma ɓóɖóɔ̀ cu-ɓò ɓě, ké wa dyà ma wa à gbo, ké wa ɖá, ‘Ɓóɖó ɓɛ́ Bounɓo mɔ̀à à Gèɖèpɔ́ɔ̀ kɛɛ nìà à nyíɛń nyɛɛ mɔ̀ ɓóɖó nɔ̀mɔ̀ dyíin.’

²⁶ “Kɛɛ ɓě po ma Bounɓo mɔ̀à ɓěɛ̀ Gèɖèpɔ́ɔ̀ kɛɛ wuɖuɔ̀ kɛ́ɛ́ dyí, ké ɓě se ma ɖé ɓóɖóɔ̀ kɔ̃ mu.

²⁷ Ɓě jɛ ma ɖé ɓěɛ̀ jàɖàìn-gbò ɓěɔ̀ mú, ké ɓě ɖá, ‘Bounɓoɔ̀ nyɛ́ à mú jèɛɛ, ɔ ɖǎà ɖé à Íjè-ɓòɖòɔ̀ kɔ̃ zà, ɓɛ́ ɔ ké à Ámɔ̀-nyɔ̀ ɓěɔ̀ xwaún dyi po, ɓɛ́ wa ké à mú gbɔɔ̀.

²⁸ Xwɛ̌ à ɓɛ́ìn ɖé ɓóɖóɔ̀ kɔ̃ muɛ kɛ́? À ɖíí ɓěɔ̀ ɖǎà nyu ké hwòɖǒ se à xwíníín nì ɖe. Wa cɛ̃ɛ, ké wa ɖá, “Nyɔ ɓě nìà ɖé ɓóɖóɔ̀ múɛɛ ɓúá dyai, ké wa tɔ̀mɔ̀ dya ké wa zi à dyí. Waà hwɔɖɔ ɓěɔ̀ ɓúá kɔ̃in, ké gmɔ ɓě nì waà hwɔɖɔ ɓěɔ̀ ɖeiɛɛ nyini dyɔún. Ké ɓó kɔ̃in ɖeɛɛ, à dyé ɖé Ánàkìɛ̀ xwíníín-dyù ɓě.” ’

²⁹ “Hwɛ̀ ké ḿ cɛ̃ɛ ma ɓě gbo, ké ḿ ɖá, ‘Ɓě ɓɔ́ nyɔ ɓěɔ̀ dyi fɛ̃̀ìn.

³⁰ Bounɓo mɔ̀à ɓěɛ̀ Gèɖèpɔ́ɔ̀ mɔ̀ nyɔ nìà ɓě gboɛɛ mìɔùn mu ɓě bìì vɔ̃ùn kà ɔ nyuɛ ma kà ɓě bìì ɖé Íjè-ɓòɖòɔ̀ kɔ̃ ɓó ɓě dyéɖé waí kɛ.

³¹ Ké ɖé gbǎùn-fúɖúáɔ̀ kɔ̃ɛɛ, ɓě dyéɛ ma kà Bounɓo mɔ̀à ɓěɛ̀ Gèɖèpɔ́ɔ̀ kɛɛ nyu ma ɓě ɓéɖéɛ kɛ. Ɔ kpɔ̃ ma ɓě kà gàa ɖò kpɔ̃à ɔ mìɔùn nììn dyúɛ. Ɔ nàìn ma ɓě tee ké ɓě ɖǎà pá nìà kɛ mú dyiɛ̀.’

³² Kɛɛ dyììn ɖé wuɖu ɓěɛ̀ múɛɛ, ɓě seɛ ma jǎà po kà Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓɛ́ìn ɓě gbo kpáa kɛ.

³³ Ɔ mɔ̀ nyɔ nì ma kà ɓě dyúa, ké ɔ mɔ́ ma pá dyi ɓó ɓěɛ̀ jàɖàìn-gbò ɓěɔ̀ dyi-nyànàìn-naín jèɛ. Máaún ní, ɔ mɔ̀ ma nyɛ-mìɔ̀, ké ɓó dyóɖóaún ní, ɔ mɔ̀ ma ní-kpò, ɓɛ́ ɔ ké ma ɓě hwìè ɓě kéà kpaa da zàìn.

Bounɓoɔ̀ tò Éézùɖùɛ̀-nyɔ̀ ɓěɔ̀ gǎ kɔ̃

³⁴ “Ti ɓɛ́ Bounɓoɔ̀ wɔ̃́ ma ɓěɛ̀ jɛ-wùɖù ɓěɔ̀ kɛɛ, ɔ kpáìn ma ɓě dyoɖoún, ké ɔ gboò ma, ké ɔ ɖá,

³⁵ ‘Ɓě mɔ̀ xwéɖé-dù mɔ̀à hwòɖǒ-kɔ̃in-nyìnììn-nyɔ̀ ɓěɛ̀ kɛɛ, ɓě ɖò se ɓóɖó nɔ̀mɔ̀ dyíin ɓɛ́ ḿ ɖǎà ɓě ɓǎ ɓěɔ̀ nyɛ́nɛ́ín ɖáìn nyɛɛ dyéɛ mu.

³⁶ Kɛɛ nyɔ ɖòùn mu ɓě hwìɛ̀ sɔ̀ùn, ɓɛ́ ɔ ké ɓóɖóɔ̀ dyéɛɛ mɔ̀ Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛ. Ké ní mu ɔ kè ɔ xwíníín-dyù ɓěɔ̀ pá ɓɛ́ ɔ ɖǎà kɔ̃in nà ɖé ɓóɖóɔ̀ kɔ̃ɛɛ nyíìn, sepóɛɖé ɔ ɖǎ mɔ̄ mɔ̀ Bounɓoɔ̀ kíɖíí sí hwòɖǒɛ̀-ɖé-hwɛ̀-kà.’

³⁷ Ké ɓó ɓě jèɛɛ, Bounɓoɔ̀ kpáìn ma mɔ́ún dyoɖoún ɖekè, ké ɔ cɛ̃ɛ ma ḿ gbo, ké ɔ ɖá, ‘Mózè, m̀ se ɖé ɓóɖóɔ̀ kɔ̃ muɛ́ mu ɖekè.

³⁸ Kɛɛ Jasúé mɔ̀à Núùnɛ̀ dyú-gàà, ɓɛ́ ɔ mɔ̀à nì sɔ̃-xwíɖíi-dè-nyɔ̀ɔ̀ kɛɛ mɔ̀ nyɔ mu ɖé ɓóɖóɔ̀ kɔ̃ muùn. Kùìn ɔ hwòɖǒǔn, sepóɛɖé ɔ muɛ nyuùn ɓɛ́ Éézùɖùɛ̀-dyù ɓěɔ̀ ké ɓóɖóɔ̀ dyí ɖú, ɓɛ́ ɔ ké waà kɔ̃̀ɔ̀-ɖɛ̀ jǔ.’

³⁹ “Ɓó kɔ̃in ɖeɛɛ, Bounɓoɔ̀ cɛ̃ɛ ma ɓěà séín gbo, ké ɔ ɖá, ‘Ɓěɛ̀ dyú mɛ́nɛ́ɛ́ ɓě ɓɛ́ wa seà ɖɛín-ɖɛ̀ kè ɖɛ gbà zaìn gboi dyí dyuò, ké ɓě ɖá wa muà to-gbo-zà-ɖɛ̀ jǔùn wɛ̃ɛ mɔ̀ nyɔ mu ɓóɖóɔ̀ kɔ̃ muùn. Ní muɛ wa nyíìn, ɓɛ́ ɔ ké waà kɔ̃̀ɔ̀-ɖɛ̀ jǔ.

⁴⁰ Kɛɛ ɓě mɛ cáɖá xwa, ɓɛ́ ɓě ké ɖé gbǎùn-fúɖúáɔ̀ kɔ̃ ɖe mu. Ɓě mɛ mùìn hwɔ ɖé Dyóó Zĩ-zãɔ̀ wĩín dyí.’

⁴¹ “Hwɛ̀ ké ɓě cɛ̃ɛ ma ḿ gbo, ké ɓě ɖá, ‘Mózè, à ɖǎ nàmàǔn Bounɓoɔ̀ bũ̌ nyu. À nì ɖé ɓóɖóɔ̀ kɔ̃ muɛń, ɓɛ́ à ké wa gbo vɔ̃ kà Bounɓo mɔ̀à à Gèɖèpɔ́ɔ̀ kɛɛ nyuà à gbo cɛ̃ɛ kɛ.’ Ké ɓě séín bɛ̃̀ìn ma to-vɔ̃-kà, sepóɛɖé ɓěɛ̀ hwòɖǒ ɖá ɔ mu ma xwa fɛ̃́ìn, ɓɛ́ ɓě ké ma ɖé toɖo-ɓòɖòɔ̀ kɔ̃ mu.

⁴² “Hwɛ̀ ké Bounɓoɔ̀ cɛ̃ɛ ma ḿ gbo, ké ɔ ɖá, ‘Cɛ̃ɛ wa gbo, ɓɛ́ wa ké se ɖé ɓóɖóɔ̀ kɔ̃ mu, ɓɛ́ wa ké nyɔ ɓěɔ̀ gbo vɔ̃, sepóɛɖé ḿ se ɓó wa gbo nìɛ̌ mu. Wa dyi ɖé mu ní, waà mú-nyɛ́-nyɔ̀ ɓěɔ̀ mu wa toún ɖuùn.’

⁴³ Ké ḿ cɛ̃ ma ɖɛ Bounɓoɔ̀ cɛ̃ ma kà ḿ gboɛɛ ɓě gbo, kɛɛ ɓě se ma ɖùǔ tò. Ɓě po ma Bounɓoɔ̀ wuɖuɔ̀ kɛ́ɛ́ dyí, ké ɓě jìnìɛ̀n ma kɔ̃, ɓɛ́ ɓě ké ɖé toɖo-ɓòɖòɔ̀ kɔ̃ mu wɛ̃́ɛ́.

⁴⁴ Ké Ámɔ̀-nyɔ̀ ɓě ɓɛ́ wa cĩ́ ma kà ɖé ɓóɖóɔ̀ kɔ̃ɛɛ vɔ̃ ma ɓě gbo, ké wa kúmú ma ɓě xwíɖíi dyi kà ɖo-dyùà ɓě nyuà kɛ, ké wa gã̀ ma ɓě ɖáɓáuń dyi tee sɔ̀ìn ɖé Séì-ɓòɖòɔ̀ kɔ̃, ɓɛ́ ɔ kéà ɖé Hɔ́mà-hwɔ̀ɖɔ̀ɔ̀ gbo dyiɛ.

⁴⁵ Hwɛ̀ ké ɓě kɔ́ìn ma ɖe, ké ɓě pòìn ma Bounɓoɔ̀ kpéi, ɓɛ́ ɔ ké ma ɓě gbo kpá. Kɛɛ Bounɓoɔ̀ se ma ɓěɛ̀ wuɖuɔ̀ ɖùǔ gbo tò fɔɔ cá.

⁴⁶ Ké ɓě nyu ma wé ɓáún-ɓáún ɓó Káɖɛ̀-Bànéà-hwɔ̀ɖɔ̀ɔ̀ mú.