Kɔ̀ɖɔ́sĩ̀à 4 - Ɓǎsɔ́ɔ̀ Báɓòɔ̀

¹ Ɓě mɔ̀ gbo-nì-ɓǎ ɓěɛɛ, kà ɓě mu ɓěɛ̀ gǐì ɓěɔ̀ kpɔ̃ùn wɛ̃ɛ, ɔ mɛ sɛ́ɖɛ́ìn dyí, ké wa séín mɛ ɓɛ́ìn wɔ̃ ɖé ɓě dyéɖéín. Ɔ mɛ nì ɓě hwìɖǐi kà ɓɛ́ ɓě mɔ̀ùn ɓéɖé Wuɖuí-kɔ̃̀-nyɔ̀ ɖò ɖé dyɔún wɛ̃.

² Ɓě mɛ ku dúún, ɓɛ́ ɓě ké ɓaà tee. Ɓě mɛ nì ɓɛ́ɖɛ́ kɔ̃, ɓɛ́ ɓě ké ɓaà, ɓɛ́ ɓě ké Gèɖèpɔ́ɔ̀ zùo po.

³ Ɓó ti dyúáɖòɔ̀ xwíníín nyɛɛ, ɓě mɛ ɓaà à bìì ɖekè, ɓɛ́ Gèɖèpɔ́ɔ̀ ké hwìè kaà, ɓɛ́ à ké ɔ wuɖuɔ̀ cɛ̃, ɓɛ́ à ké ɖɛ vǐè ma kĩ́ín ɓá Kɛ́ɖɛ́ì dyíɛɛ jè cɛ̃. Ɖɛ kɔ̃̀ jè ḿ nìà kpɔɖɔ ɖeín kàǔn wɛ̃ɛ, ɔ nìàǒ wɛ̀.

⁴ Ɓě mɛ ɓaà, ɓɛ́ ḿ ké Gèɖèpɔ́ɔ̀ wuɖuɔ̀ cɛ̃ nɔ̀mɔ̀ dyíin, ɓɛ́ nyɔǔn kéɛ múin wɔ̃́, kà ḿ ɓéɖé ɓɛ́ ḿ kéɛ nyuɛ.

⁵ Ɓě mɛ ma mú ɓó kà ɓě mu nìɛ̀ nyuùn ɓó píé-nyɔ̀ ɓě gboɛ. Ɓě mɛ nyùìn ti ɓě ɓéɖéà kɛɛ kũ̀à mú nɔ̀mɔ̀ dyíin.

⁶ Kà ɓě mu nyɔ ɓě gbo wùɖùɛ̀ nyuùn wɛ̃ɛ, ɔ mɛ nɔ̀mɔ̀ dyíin ti séín, ké ɓěɛ̀ wuɖu mɛ ɖéè, ɓɛ́ nyɔ ɖò dyi ɓě gbo wùɖùǐn, ɓě ké ɖé wuɖu zàà dyuò nɔ̀mɔ̀ dyíin.

Cuò-wùɖù

⁷ À ɖɛ̀ɓɛ̀-ɖìǐ Tíkíkà mɔ̀à kũ̀à-nyu-nyɔ̀ ɓɛ́ nyɔǔn ɓɛ́ìn hwòɖǒ kɔ̃ dèɛ̀ kɛ kè à mǔè gbo-nì-nyɔ̀ ɖé Bounɓoɔ̀ múɛɛ mu ɖɛ séín ɓá ḿ dyíɛɛ jè ɓě gbo cɛ̃ìn.

⁸ Ɖɛ kɔ̃̀ jè ḿ nìà ɔ ɖé ɓě gbo ɖoɓoɛń nyɛɛ, ɔ nìàǒ wɛ̀. Ɔ mu kà à nyu nìɛ̀ kɛɛ ɓě gbo cɛ̃ìn, ɓɛ́ ɔ ké ɓě hwòɖǒ dyi dè.

⁹ Ɔ kè Ònɛ́símɔ̀ mu ɖé dyiìn. Ònɛ́símɔ̀ mɔ̀ hwòɖǒ-kɔ̃-dè-nyɔ̀ kè à ɖɛ̀ɓɛ̀-ɖìǐ. Ɔ mɔ̀ ɓě ɖò. Wa mu ɖɛ séín ɓě kpá nɔ̄ kɛɛ jè ɓě gbo cɛ̃ìn.

¹⁰ Àwèɖèsákà ɓɛ́ ḿ kèɔ̀ kè nìà kpɔɖɔ ɖeín nyɛɛ zà ɓě nyíɔún. Ké Máà mɔ̀à Bànábàà ɖíí kɛɛ zà ɓě nyíɔún ɖekè. Ɓě ɖǎ ná-wùɖù ɓá ɔ dyíɛɛ dyi kpɔ̃ kĩ́ín. Ɔ mɔ̀, ɔ jǔ ké ɔ dyi ɖé ɓě gbo dyiín, ɓě ké ɔ jè dyi kpɔ̃.

¹¹ Ké Jízɛ̀ ɓɛ́ wa ɖáìn Jásàɖà kɛɛ zà ɓě nyíɔún ɖekè. Nyɔ tã ɓě nìà kɛɛ, wa ɖòùn mɔ̀ Júù-nyɔ̀ ɓě ɓɛ́ ḿ kè wa kè nyu kũ̀à ɓó Gèɖèpɔ́ɔ̀ kã́á-ɓòɖòɔ̀ jè kɛ. Wa po ma ḿ kpéí nɔ̀mɔ̀ dyíin.

¹² Ìpáfàɖà ɓɛ́ ɔ mɔ̀à ɓě ɖò, ké ɔ mɔ̀à Kɛ́ɖɛ́ì Jízɛ̀ɛ̀ gbo-nì-nyɔ̀ kɛɛ zà ɓě nyíɔún. Ɔ dyi ɓaà ní, ɔ ɓaà hwòɖǒɛ̀-ɖé-hwɛ̀-kà, ɓɛ́ ɓě ké dyi nyànà gãun-gãun, ɓɛ́ ɓě ké gbɔ hwɛ̀, ɓɛ́ ɓě ké Gèɖèpɔ́ɔ̀ mɔ́ɔ́-ɖɛ̀ dyí dyuò jɛ́ɛ́ cá.

¹³ Ḿ nyu ɔ zàse kà ɓɛ́ ɔ nyu ma ɓě kè nyɔ ɓě nìà ɖé Ɖéòdùsíà-hwɔ̀ɖɔ̀ɔ̀ mú ɔ kè ɖé Hìwáɖápóɖè-hwɔ̀ɖɔ̀ɔ̀ múɛɛ bìì kũ̀à mìɔ kɛ.

¹⁴ Ɖúù mɔ̀à à hwǒò-nyɔ̀ ɓɛ́ à ɖɛ̀ɓɛ̀à mú kɛ kè Dímà zà ɓě nyíɔún.

¹⁵ Ḿ zà à ɖíí ɓě nìà ɖé Ɖéòdùsíà-hwɔ̀ɖɔ̀ɔ̀ múɛ kè Nífà ɔ kè cɔ́cì-nyɔ̀ ɓě poàìn ɖé ɔ ɓíɖí-taún dyíɛɛ nyíɔún.

¹⁶ Ɓě ɖǎ céè-ɖɛ̀ nìà kɛ wuɖuún zàà hwɔín, ɓě mɛ nyuɛ ɓɛ́ wa kéɛ wuɖuún zà ɖé cɔ́cì nìà ɖé Ɖéòdùsíà-hwɔ̀ɖɔ̀ɔ̀ múɛɛ mú ɖekè. Ké ɓě mɔ̀ùn mɛ zà ɔ nyɔ ɓɛ́ nyɔ ɓě nì ɖé Ɖéòdùsíà-hwɔ̀ɖɔ̀ɔ̀ múɛɛ muà ɓě gbo tòùn wɛ̃ɛ wuɖuún.

¹⁷ Ɓě mɛ cɛ̃ɛ Ákípà gbo, ɓɛ́ ɓě ké níiń, “Nì hwòɖǒ mɛ nì kũ̀à ɓɛ́ m̀ ɖǎà dyé ɖé Bounɓoɔ̀ múɛɛ gbo, ɓɛ́ m̀ kéɛ nyuɛ hwɔ.”

¹⁸ Mɔ̄ Pɔ́ɔ̀, ḿ mìɔùn nì nyíɔún-zà-zà nyɔà céèɛ̌n. Dyɔ̀ɔ̌ ɓě ḿ nìà múɛɛ jè mɛ nì ɓě hwìɖǐi. Mana mɛ nì ɓě kɔ̃.