Kɔ̀ɖɔ́sĩ̀à 3 - Ɓǎsɔ́ɔ̀ Báɓòɔ̀

¹ Ɓě kè Kɛ́ɖɛ́ì ɖǎ gĩɔ wóɖó. Ɔ jèɛɛ, ɖɛ ɓě mɛ kpɔ̃ ɓě hwòɖǒ kɛɛ mɛ mɔ̀ ɖɛ ɓě nì ɖé dyɔún, dɛ̀ ɓɛ́ Kɛ́ɖɛ́ì dèɖěà ɔ zèèɔ̀ kɔ̃ dya ɖé Gèɖèpɔ́ɔ̀ ɖiaún wɛ̃.

² Ɓě mɛ poìn ɖɛ ɓě nì ɖé kɛɛ jè hwìɖǐi tee. Ɓě ní poìn ɖɛ ɓě nì nɔ̄ ɓóɖó-kpàà kɔ̃ɛɛ jè hwìɖǐi.

³ Sepóɛɖé ɓě ɖǎ mɛ́, ké ɓě fɛ̀ɛ̀ɔ̀ dèìn ɖé Kɛ́ɖɛ́ì gboi, ɖé Gèɖèpɔ́ɔ̀ mú.

⁴ Ɓě fɛ̀ɛ̀ jɛ́ɛ́ɔ̀ mɔ̀ Kɛ́ɖɛ́ì, ké ti ɔ mu xwáɖáún wóɖóùn wɛ̃ɛ, ɓě kèɔ̀ kè mu xwáɖáún wóɖóùn, ké ɓě kèɔ̀ kè mu ɔ dĩ́ín-dĩ̀ìnɔ̀ mú peɖeìn.

Cĩ́-cĩ́ sùàɔ̀ kè ɔ ɖieɔ̀

⁵ Ɔ jèɛɛ, ɓě mɛ zĩ̀ìn ɖɛ ɓě nìà ɓóɖó-kpàà kɔ̃, ké ɓě mɔ́à kɛɛ jè dyi. Wa mɔ̀ gbàɖàùn-po-po kè kpeɖe gbà kè hwòɖǒɛ̀-mɔ́ɔ́-ɖɛ̀ kè ɖɛ-gbà-nyu-tò ɔ kè ɖɛ séín mɔ́-mɔ́ ɓɛ́ ɔ mɔ̀à kũùn-kpò ɓiè-ɓiè kɛ.

⁶ Sepóɛɖé ɖɛ ɓě nìà kɛ jèɛɛ, Gèɖèpɔ́ɔ̀ dyoɖoɔ̀ muà dyiìn nyɛ̀.

⁷ Ɓě mìɔùn ɖɛ̀ɓɛ̀ ɓɛ́ ɓě ké ma ɖɛ ɓěɛ̀ nyu kĩ́ín, ti ɓɛ́ ɓě nì ma waà kpé xwíɖíiɛ.

⁸ Kɛɛ kàǔn wɛ̃ɛ, ɓě mɛ táà ɖɛ séín ɓěɛ̀ dyi. Wa mɔ̀ dyoɖo kè cɛ̃́-dyá-dyá ɔ kè hwòɖǒ-kɔ̃in-nyìnììn-nyìnììn. Nyɔ ɖò ní ɖá ɓɛ́ ɔ ké nyɔǔn nyɛ́nɛ́ gbà ɖá-ɖá kè dɔ́ɔ́ gbà ɖò ɓě wĩín wɔ̃́.

⁹ Ɓěǐn ɖá ɓɛ́ ɓě ké se wĩin tɔ́mɔ́ìn tɔ̀mɔ̀ìn, sepóɛɖé ɓě ɖǎ nyɔ ɓě jǔ ma kĩ́ín nyɛ ɔ kè ɔ kpeɖe ɓěɔ̀ dyi táà.

¹⁰ Ké ɓě ɖǎ nyɔ ɖìèɔ̀ dyí ɖú. Ɔ mɔ̀ nyɔ ɖìè ɓɛ́ Gèɖèpɔ́ɔ̀ mɔ̀ nyɔ nyu ma kà ɔ kɛɛ nìà nyuɛń ɖe ɖie, ɓɛ́ ɔ kéà ɔ hwɔìn-ɖɛ̀ jǔ, ɓɛ́ ɔ kéɛ nyu ɓɛ́ ɓě ké ɔ dyí dyuò gàná kɛ.

¹¹ Ké ɔ nyuɛ ké gbo-zaìn-zaìn ɖò se ɓó Júù-nyɔ̀ ɓě kè nyɔ ɓě se Júù-nyɔ̀ ɓěɛ ɔ kè nyɔ ɓě ɖǎ sàà mɛ́ɛ kè nyɔ ɓě se sàà mɛ́ɛ ɔ kè ɖíà ɓě kè kɔ́nɛ̀-nyɔ̀ ɓě ɔ kè gǐì ɓě kè nyɔ ɓě se gǐì kɛɛ pṹa nì. Kɛɛ Kɛ́ɖɛ́ì mɔ̀ɔ̀ séín, ké ɔ nì nyɔǔn séín mú.

¹² Ɓě mɔ̀ Gèɖèpɔ́ɔ̀ nyɔ ɓě. Ɔ ɖɛ̀ɓɛ̀ ɓě mú, ké ɔ gã ɓě. Ɔ jèɛɛ, ɖɛ ɓě mɛ po mú kà nyɔǔn poà ɖɔ múɛɛ mɛ mɔ̀ wìì kè hwòɖǒ-kɔ̃in-nɔ̀mɔ̀-nɔ̀mɔ̀ kè nyɔ-mìɔùn-ɓíɖíi-dyà-dyà kè hwòɖǒ-dyùà ɓɛ̀ɖɛ̀ɛ̀-ɓɛ̀ɖɛ̀ɛ̀ ɔ kè hwòɖǒ-ku-ku.

¹³ Ɓě mɛ kuìn kùìn kpeɖe hwòɖǒ, ké ɓě dyi ɖɛ ɖò ɓá nyɔ ɖò dyíɛɛ ɓéɖéín, ɔ jè mɛ hwɛ̀ ɓě hwìɖǐi. Kà Bounɓoɔ̀ ɖǎà ɓě nììn ɖɛ gbà kɔ̃in zĩ̀ìn nyɛɛ, kǎà ɓě mɛ zĩ̀ìn nyɔ ɖò nììn ɖɛ gbà kɔ̃in ɖekè.

¹⁴ Ké ɓó ɖɛ ɓěɛ̀ kɔ̃in nyɛɛ, ɓě mɛ ɓéɖé ɖɛ̀ɓɛ̀ǐn-ɖɛ̀ɓɛ̀ǐn. Ɖɛ̀ɓɛ̀ǐn-ɖɛ̀ɓɛ̀ǐn nyuɛ ké ɖɛ séín ɓěɔ̀ poìn dyí, ké wa nì dyúáɖò nyɛ̀nɛ̀ɛ̀.

¹⁵ Gìɖìǐ ɓɛ́ Kɛ́ɖɛ́ì nyíà nyɔǔn wɛ̃ɛ mɛ kɔ̃̀ ɓěɛ̀ hwòɖǒ-dyùà ɓěɔ̀ wuɖuí, sepóɛɖé gìɖìǐ nìà kɛ jè Gèɖèpɔ́ɔ̀ ɖǎà ɓě ɖá, ké ɓě mɔ̀à kpóɖó-dyùà dyúáɖò kɛ̀. Ké ɓě mɛ po Gèɖèpɔ́ɔ̀ zùo.

¹⁶ Kɛ́ɖɛ́ìɛ̀ wuɖuɔ̀ mɛ cĩ́ ɖé ɓě mú, ɓɛ́ ɔ ké ɖé bã. Ɓě mɛ tɛmɛìn tɛ̀mɛ̀ìn ɖɛ, ɓɛ́ ɓě ké náún poìn pòìn ɖé hwòɖǒ-fɔ̀nɔ̀-fɔ̀nɔ̀ séín mú. Ɓě mɛ ɓeɖe wɛ́ɖɛ́ ɓě céèà ɖé dèè-wùɖù sùàɔ̀ múɛ kè ɓàìn-wɛ̀ɖɛ̀ ɓě ɔ kè Gèɖèpɔ́ɔ̀-wɛ̀ɖɛ̀ ɓě. Ɓě mɛ po Gèɖèpɔ́ɔ̀ zùo ɖé ɓěɛ̀ hwòɖǒ-dyùàɔ̀ mú, ɓɛ́ ɓě ké ɔ gbo ɓèɖèìn.

¹⁷ Ké ɖɛ séín ɓě ɓɛ́ ɓě mu cɛ̃ìn, ké ɓě mu nyuùn wɛ̃ɛ, ɓě mɛ nyu wa ɖé Bounɓo Jízɛ̀ɛ̀ nyɛ́nɛ́ɔ̀ mú, ké ɓě mɛ po Gèɖèpɔ́ɔ̀ mɔ̀à Ɓǎɔ̀ kɛɛ zùo dyììn ɖé ɔ mú.

À dyi fɛ̀ɛ̀ ɖìè ɓéɖéín, kà à ké nyɔǔn kpɔ̃ɔ nyuɛ

¹⁸ Ɓě mɔ̀ màa ɓěɛɛ, ɓě mɛ nì ɓěɛ̀ dyú-ɓǎ ɓě xwíɖíi, sepóɛɖé ɓě dyi ɖé Bounɓoɔ̀ mú nìǐn, ɔ mɔ̀ ɖɛ nɔ̀mɔ̀ dyíin ɓɛ́ ɓě kéɛ náa nyu.

¹⁹ Ɓě mɔ̀ nyɔ́nɔ́-ɓǎ ɓěɛɛ, ɓě mɛ ɖɛ̀ɓɛ̀ ɓěɛ̀ gmàà ɓěɔ̀ mú. Ɓěǐn kpɔ̃ wa gbà-kà.

²⁰ Dyú ɓě, ɓě mɛ nyu ɓěɛ̀ wóɖóìn-nyɔ̀ ɓě wuɖu ɖé ɖɛ séín mú, sepóɛɖé ɔ dè Bounɓoɔ̀ hwìɖǐi.

²¹ Ɓě mɔ̀ ɓǎ ɓěɛɛ, ɓěǐn ɖá ɓɛ́ ɓě ké ɓě dyú ɓěɔ̀ hwòɖǒ-ɖé-ɖei-po-ɖɛ̀ ɖò bũ̌ nyu, ɓɛ́ waà hwòɖǒ ní kɔ̃̀ ɖà ɖé ɖei kpá.

²² Ɓě mɔ̀ gǐì ɓěɛɛ, ɓě mɛ nyu nyɔ ɓě ɓɛ́ wa kɔ̃̀à ɓě nɔ̄ ɓóɖó-kpàà kɔ̃ɛɛ wuɖu ɖé ɖɛ séín mú. Ɔ se ɖɛ ɓɛ́ ɓě ké nyɔɔ̀ dyiɛ dyé hwɛ̀ ɓě kéɛ nyu kà nyɔ mɔ́ ɓɛ́ wa kéɔ́ kà nyɔǔn-dyùɛ̀ hwòɖǒ dyi dèɛ. Kɛɛ ɓě mɛ nyuɛ ɖéɛ hwòɖǒ wáɖáá mú, ɖé Bounɓoɔ̀ fɛ̃̀ìn-fɛ̃̀ìn mú.

²³ Ɖɛ séín ɓě nyuɛɛ, ɓě mɛ nyuɛ ɖéɛ ɓěɛ̀ hwòɖǒ-dyùà séín mú, kà ɓɛ́ ɓě nìà Bounɓoɔ̀ bìì kũ̀à nyuɛń, ké ɓě seà nyɔǔn-dyù bìì nyuɛń nìɛ.

²⁴ Ɔ mɛ nì ɓě hwìɖǐi kà ɓɛ́ Bounɓoɔ̀ mu ɓě pɛ́ɛ̀ìn nyɛ. Ɓě mu ɖɛ ɓě ɓɛ́ ɔ dèà dyi ɓó ɔ nyɔ ɓěɔ̀ bììɛɛ ɖò ɓéɖéìn, sepóɛɖé ɓě nì Bounɓo Kɛ́ɖɛ́ì bìì kũ̀à nyuɛń.

²⁵ Ɖɛ-gbà-nyu-nyɔ̀ɔ̀ mu ɔ ɖɛ-gbà-nyu-nyuɔ̀ pɛ́ɛ̀-ɖɛ̀ kɔ̃ún dyéìn. Gèɖèpɔ́ɔ̀ se nyɔ ɖò mɔ̀ùn ɖɛ ɖá, ɓɛ́ ɔ ké se nyɔ tɔ̀ɔ̀ ɖò mɔ̀ùn ɖɛ ɖá.