Kɔ̀ɖɔ́sĩ̀à 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ mɔ̀ nyɔ ɓɛ́ Gèɖèpɔ́ɔ̀ ɖǎà gã, ɓɛ́ ḿ kéà Kɛ́ɖɛ́ì Jízɛ̀ɛ̀ àpɔ́sò jǔ kɛɛ gbo. Ḿ kè Tímétè mɔ̀à à ɖíí-gàà kɛɛ

² zà ɓě mɔ̀à Gèɖèpɔ́ɔ̀-nyɔ̀ ɓě, mɔ̀à à ɖíí ɓě, ké ɓě mɔ̀à hwòɖǒ-kɔ̃-dè-nyɔ̀ ɓě ɖé Kɛ́ɖɛ́ì mú, ké ɓě nìà ɖé Kɔ̀ɖɔ́sì-hwɔ̀ɖɔ̀ɔ̀ múɛɛ nyíɔún. Gèɖèpɔ́ɔ̀ mɔ̀à à Ɓǎ kɛɛ mɛ po ɓě mana kɔ̃, ɓɛ́ ɔ ké ɓě gìɖìǐ nyí.

Ɖɛ kɔ̃̀ jè Pɔ́ɔ̀ ɓaà maa

³ À dyi ɓě bìì ɓaàǔn nìǐn, nìí, à po Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ì Ɓǎ kɛɛ zùo ti séín,

⁴ sepóɛɖé à ɖǎ kà ɓě nyu Kɛ́ɖɛ́ì Jízɛ̀ hwìɖǐǐ taɓaa kɛ ɔ kè kà ɓě ɖɛ̀ɓɛ̀ Gèɖèpɔ́ɔ̀-nyɔ̀ séín ɓěɔ̀ mú kɛɛ jè wɔ̃́.

⁵ Ti ɓɛ́ wa dyà ma jǎà-wùɖù mɔ̀à bɔ̃̌ nɔ̀mɔ̀ dyíinɔ̀ kɛɛ ɓě gbo kĩ́ín nyɛɛ, ɓě wɔ̃́ ma hwòɖǒ-kɔ̃-dè-ɖɛ̀ɔ̀ jè. Ɓě ɓéɖé hwìɖǐǐ-taɓa-taɓa kè ɖɛ̀ɓɛ̀ǐn-ɖɛ̀ɓɛ̀ǐn ɓó ɖɛ ɓě dèà hwòɖǒ kɔ̃ kɛɛ jè. Ɔ mɔ̀ ɖɛ ɓɛ́ ɔ dèà ɖé dyɔún dyi nɔ̀mɔ̀ dyíin ɓó ɓě bììɛ.

⁶ Ɔ hwɔìn kà bɔ̃̌ nɔ̀mɔ̀ dyíinɔ̀ nì ɓo tòɖòɛ̌n, ké ɔ nì ɓóɖó-kpàà dà séín dyi ɓeɛ̌n nyɛ, kà ɔ nyuɛ ma kà ɖé ɓě hwìɛ̀, sɔ̀ìn wé ɓɛ́ ɓě wɔ̃́ ma Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ jè, ké ɓě dyuò ma kà ɔ nyu nìɛ̀ jɛ́ɛ́ kɛ dyíɛɛ gboɛ.

⁷ Ìpáfàɖà mɔ̀à à mú-ɖɛ̀ɓɛ̀-nyɔ̀, ké ɔ mɔ̀à à mǔè gbo-nì-nyɔ̀ kɛɛ tɛ̀mɛ̀ìn ma ɓě. Ɔ mɔ̀ Kɛ́ɖɛ́ì bìì kũ̀à-nyu-nyɔ̀ ɓɛ́ nyɔǔn ɓɛ́ìn hwòɖǒ kɔ̃ dèɛ̀ kɛɛ ɓó à bɛ̃̌ǐn.

⁸ Ɔ cɛ̃ ma ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Zùùɔ̀ nyíà ɓě kɛɛ jè à gbo.

⁹ Ɔ jèɛɛ, ti ɓɛ́ à wɔ̃́ó ɓě jèɛɛ, à séè ɓaà ɓɔ́ ɖò ɓó ɓě jè. À diè Gèɖèpɔ́ɔ̀ dyi, ɓɛ́ ɔ ké ɓě hwòɖǒ-fɔ̀nɔ̀-fɔ̀nɔ̀ nyí ɓá ɖɛ ɔ mɔ́ɛɛ jè dyí, ɓɛ́ ɔ ké ɓě múin dyíìn dyììn ɖé hwòɖǒ-fɔ̀nɔ̀-fɔ̀nɔ̀ kè ɖɛ-múin-wɔ̃́-wɔ̃́ séín ɓě ɓɛ́ ɔ Zùùɔ̀ nyíà nyɔǔn wɛ̃ɛ mú.

¹⁰ Nìí, ɓě mu kpé ɓɛ́ìn ɓɛ́ ɓě ké cĩ́ kà Bounɓoɔ̀ mɔ́ɔ kɛ, ɓɛ́ ɓě ké ɖɛ ɓɛ́ ɔ dè ɔ hwòɖǒ dyiɛɛ nyu ti séín. Ké ɔ hwɔìn ɓě mu ɓo mɔ̀à nyuu-ɖɛ̀ nɔ̀mɔ̀ dyíin kã̀ìn séín nyɛɛ tòɖòùn, ké ɓěɛ̀ Gèɖèpɔ́ɔ̀ dyí-dyuò-dyuòɔ̀ mu dyí ɓúáùn tee.

¹¹ Gèɖèpɔ́ɔ̀ mɛ nyu ɓɛ́ gana ɓɛ́ ɔ sɔ̀àìn ɖé ɔ kpé dĩ́ín-dĩ̀ìnɔ̀ múɛɛ ké ɓě dyi kùìn, ɓɛ́ ɓě ké hwòɖǒ-ku-ku ɓéɖé, ɓɛ́ ɓě ké ɖɛ séín hwòɖǒ kùìn ɖé múà mú.

¹² Ɓě mɛ po Ɓǎɔ̀ zùo. Ɔ mɔ̀ nyɔ ɖǎà nyu ké ɓě ɖǎà ɖɛ kpa, ɓɛ́ ɓě ké ɖɛ ɔ ɖǎà dyi dè ɓó ɔ nyɔ ɓě nìà ceɔ̀ múɛ bììɛɛ ɖò ɓéɖé.

¹³ Ɔ gbǎà à ɖé tíe-kpòɔ̀ kpéɔ̀ xwaún, ké ɔ dyà à ɔ Ɖɛ̀ɓɛ̀-dyùɔ̀ kã́á-ɓòɖòɔ̀ mú.

¹⁴ Dyììn ɖé ɔ Dyúɔ̀ múɛɛ, à ɓéɖé gbǎà-gbǎà, ké Gèɖèpɔ́ɔ̀ ɖǎ à nàmàǔn ɓěɔ̀ kɔ̃in zĩ̀ìn.

Gèɖèpɔ́ɔ̀ gbɔ-hwɛ̀-hwɛ̀ɔ̀ nì ɖé Kɛ́ɖɛ́ì mú

¹⁵ Kɛ́ɖɛ́ì mɔ̀ Gèɖèpɔ́ɔ̀ ɓɛ́ nyɔǔn seà dyéɛ ɓɛ́ìn nyɛɛ hwɔìn-ɖɛ̀. Ɔ mɔ̀ Dyú kĩ́ín-kĩ́ínɔ̀, ké ɔ nì mɛɛ-ɖɛ̀ séín kɔ̃in.

¹⁶ Sepóɛɖé dyììn ɖé ɔ múɛɛ, Gèɖèpɔ́ɔ̀ mɛ ma ɖɛ séín ɓě nìà ɖé dyɔún wɛ̃ kè ɔ nyɔ ɓě nìà ɓóɖó-kpàà kɔ̃ɔ. Ɔ mɛ ma ɖɛ ɓě ɓɛ́ nyɔǔn ɓɛ́ìn dyéɛ ɔ kè ɖɛ ɓě ɓɛ́ wa se dyéɛ ɓɛ́ìn nyɛ. Kɛbì wa mɛ mɔ̀ ínjà kè nyɔ-kɔ̃in-nì-nyɔ̀ ɓě kè nyɔ-wuɖuí-kɔ̃̀-nyɔ̀ ɓě ɔ kè kpé ɓěɛɛ, Gèɖèpɔ́ɔ̀ mɛ ma ɖɛ séín dyììn ɖé ɔ mú kè ɓó ɔ bìì.

¹⁷ Ɔ nì ma, hwɛ̀ ké ɖɛ séín ɓě nìà kɛ nì, ké ɖé ɔ múɛɛ, ɖɛ séín ɓěɔ̀ ɓéɖé wa pá ɓě ɖò-ɖò.

¹⁸ Ɔ mɔ̀ kpóɖó-dyùà ɓɛ́ ɔ mɔ̀à ɔ cɔ́cì-nyɔ̀ ɓěɔ̀ kɛɛ dú. Ɔ mɔ̀ dɛ̀ ɓɛ́ kpóɖó-dyùàɔ̀ dèìn gbɔɛ. Ɔ mɔ̀ nyɔ ɓě kéà gĩɔ wóɖóɛɛ kĩ́ín-kĩ́ínɔ̀, ɓɛ́ ɔ ɖòùn ké ɖɛ kpa ɖé ɖɛ séín mú.

¹⁹ Ɔ mɔ̀ Gèɖèpɔ́ɔ̀ mìɔùn nììn mɔ́ɔ́-ɖɛ̀ ɓɛ́ ɔ gbɔ-hwɛ̀-hwɛ̀ gànáɔ̀ ké ɖé ɔ Dyúɔ̀ mú nì,

²⁰ ɔ kè ɓɛ́ dyììn ɖé ɔ Dyúɔ̀ múɛɛ, ɔ ké ɖɛ séín ɓě ɔ mìɔùn gbo dyà ɖe. Gèɖèpɔ́ɔ̀ nyuɛ ké gìɖìǐ nì à kèɔ̀ kè pṹa dyììn ɖé nyɔmɔɔ ɓɛ́ ɔ Dyúɔ̀ wáɖáìn ma kà dyi ɖé ɔ kɔ́ɖɔ́sìɔ̀ kɔ̃ mɛ́ìn-mɛ́ìn múɛɛ mú. Ké kǎà ɔ nyu ma kǎa ɖɛ séín kè nyɔǔn séín ɓě nì ɓóɖó-kpàà kɔ̃ ɔ kè ɖé dyɔún wɛ̃ɛ ɔ mìɔùn gbo ɖe dyàà.

²¹ Ti kĩ́ín-kĩ́ín múɛɛ, ɓě kè Gèɖèpɔ́ɔ̀ tɔmɔìn ma gboi, ké ɓěɛ̀ ɖɛ gbà ɓě ɓɛ́ ɓě poìn ma hwìɖǐi, ɓɛ́ ɓě nyu maa nyuɛ ké ɓě mɔ̀ ma Gèɖèpɔ́ɔ̀ mú-nyɛ́-nyɔ̀ ɓě.

²² Kɛɛ kàǔn wɛ̃ɛ, dyììn ɖé Kɛ́ɖɛ́ìɛ̀ nyɔǔn-dyù-kpòɖò-dyùà ɓɛ́ ɔ tò ma, ké ɔ mɛ́ ma kà kɛ múɛɛ, Gèɖèpɔ́ɔ̀ ɖǎa nyu ké ɓě mɔ̀ǎ ɔ ɓǎto, ɓɛ́ ɔ kéɛ nyu ɓɛ́ ɓě ké se kɛɛ kè bɛ̃̌ ɖò bũ̌ nì, ɓɛ́ ɓě ké dyí sɛ́ɖɛ́ìn, ɓɛ́ ɔ ké ɓě ɔ mìɔùn dyúa dyà,

²³ ɔ jǔ ké ɓě dyi hwìɖǐǐ-taɓa-taɓa ɓéɖé kánáá pū, ɓɛ́ ɓě ké ɓěɛ̀ hìɖì-kpàɔ̀ kɔ̃in nyànà gãun-gãun ní. Ɓěǐn ɖá ɓɛ́ ɓě ké wɔ̃́ ɓɛ́ ɓě ké hwòɖǒ-kɔ̃-dè-ɖɛ̀ nìà ɖé bɔ̃̌ nɔ̀mɔ̀ dyíin ɓɛ́ ɓě wɔ̃́à kɛ múɛɛ gbo sɔ̀. Mɔ̄ Pɔ́ɔ̀ nìà kɛɛ, ḿ jǔ ma bɔ̃̌ nɔ̀mɔ̀ dyíin nìà kɛ kũ̀à-mú-nyùìn-nyɔ̀. Wa ɖǎ bɔ̃̌ nɔ̀mɔ̀ dyíinɔ̀ nyɔǔn séín nì ɓóɖó-kpàà dà séín nyɛɛ gbo cɛ̃.

Ɖɛ Pɔ́ɔ̀ nyu cɔ́cì-nyɔ̀ ɓěɔ̀ bììɛ

²⁴ Kàǔn wɛ̃ɛ, ḿ kpá múàǔn ɓó gǎ ɓě ɓɛ́ ḿ dyéà ɓó ɓě jèɛɛ jè. Dyììn ɖé fũ̀à-fṹá ɓě ɓɛ́ ḿ dyéà dyí ɖé ní kpóɖó-dyùàɔ̀ múɛ múɛɛ, ḿ nìɛ̀ nyuɛń ɓɛ́ gǎ ɓě ɓɛ́ Kɛ́ɖɛ́ì nìà dyéɛń ke ɓó ɔ kpóɖó-dyùà ɓɛ́ ɔ mɔ̀à cɔ́cì-nyɔ̀ ɓěɔ̀ kɛ jèɛɛ ké gbɔ hwɛ̀.

²⁵ Gèɖèpɔ́ɔ̀ ɖǎa nyu ké ḿ mɔ̀ǎ cɔ́cì-nyɔ̀ ɓěɔ̀ gbo-nì-nyɔ̀ ɖò. Ɔ nyí ḿ kũ̀à nìà kɛ, ɓɛ́ ḿ kéɛ nyu ɓɛ́ ɔ ké ɓě gbo kpá. Kũ̀àɔ̀ mɔ̀ ɓɛ́ ḿ ké Gèɖèpɔ́ɔ̀-wùɖùɔ̀ cɛ̃ gàná cá.

²⁶ Ɔ mɔ̀ ɖɛ ɓɛ́ ɔ vǐè ma kĩ́ín sɔ̀ìn ɖé ti sùà séín ɓěɔ̀ múɛ. Ɔ vǐèɛ̀ ma nyɔ-dù séín dyí, kɛɛ kàǔn wɛ̃ɛ, Gèɖèpɔ́ɔ̀ ɖǎa ɔ nyɔ ɓěɔ̀ dyí tɛ̀mɛ̀ìn.

²⁷ Ɖɛ Gèɖèpɔ́ɔ̀ mɔ́ ma kɛɛ, ɔ kɛ̀. Ɔ mɔ̀, ɓɛ́ ɔ kéɛ nyu ɓɛ́ ɔ nyɔ ɓěɔ̀ ké ɖɛ vǐè ma kĩ́ín nyɛɛ dyí dyuò. Ɖɛ vǐè ma kà kĩ́ín nyɛɛ, ɔ mɔ̀ bã-ɖɛ̀ dĩ́ín-dĩ̀ìn ɓɛ́ ɔ ɓéɖéà ɓó nyɔ-dù séín bììɛ. Ɖɛ vǐè ma kà kɛɛ, ɔ kɛ̀. Ɔ mɔ̀, Kɛ́ɖɛ́ì nì ɖé ɓě mú, ké ɓě dè ɔ hwòɖǒ kɔ̃, ɓɛ́ ɓě ké dĩ́ín-dĩ̀ìn ɓéɖé.

²⁸ Ɔ jèɛɛ, à po Kɛ́ɖɛ́ì jè zio ɖé nyɔǔn séín gbo. À po nyɔǔn séín náún, ké à tɛ̀mɛ̀ìn wa ɖɛ ɖé hwòɖǒ-fɔ̀nɔ̀-fɔ̀nɔ̀ séín mú, ɓɛ́ à ké nyɔǔn séín Gèɖèpɔ́ɔ̀ dyúa dyà, kà wa hwɛ̀à gbɔ ɖé Kɛ́ɖɛ́ì múɛ.

²⁹ Ḿ vɔ̃ ké ḿ nyu kũ̀à ɓó ɖɛa jè. Ḿ nyùìn kũ̀àɔ̀ ɖé kpé vɛ̀nɛ̀ ɓɛ́ Kɛ́ɖɛ́ì nyíà ḿ, ké ɔ nìà kũ̀à nyuɛń ɖé ḿ múɛɛ mú.