Àzédyà 9 - Ɓǎsɔ́ɔ̀ Báɓòɔ̀

Kã́á mu nììn ɖé dyúa kɛ

¹ Kɛɛ fũ̀à-fṹá kè tíe-kpò-tìɔ̀ se ná sèɛ̌ mu kánáá pū. Ɓó ti ɖǎ dyi ziɛ múɛɛ, Bounɓoɔ̀ zàìn ma Zɛ́ɓíúɖɔ̀ùn ké Náfátàɖìɛ̀ xwéɖé-dù ɓěɔ̀ nììn ɓóɖó ɓěɔ̀ zùǔn, kɛɛ ti nì ɖé dyúa kɛɛ, ɔ mu waà gbɛ̌ɛ̀ gàná sɔ̀àìn ɖé Mɛ́ɖɛ̀tɔ̀wéɖénìà-dyòǒɔ̀ wĩín, muà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ dya-dè-dè nyíìn. Gáɖàɖíì-ɓòɖò kɔ̃̀ kɔ̃ ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ cĩ́à kɛɛ mu ɖé waà gbɛ̌ɛ̀ɔ̀ mú nììn.

² Nyɔ ɓě ɓɛ́ wa nà ɖé tíe-kpò múɛɛ mu ce vɛ̀nɛ̀ ɖò dyéìn. Ceɔ̀ mu nyɔ ɓě ɓɛ́ wa cĩ́à ɖé tíe-kpò kpɛ̃̀ múɛɛ fã̀ìn.

³ Bounɓo, nì mu nì nyɔ ɓěɔ̀ dúún zaìn, ké nì mu waà múàɔ̀ kɔ̃ poùn. Wa mu múàǔn kpáùn ɓó m̀ dyúa kà nyɔ kpáà múàǔn ɓó mɔɔ́-kɔ́-ɓàɖà kɛ. Wa mu múàǔn kpáùn kà gàa ɓě kpáà múàǔn ɓó ɖɛ ɓě wa zà to gboɛɛ geìn-tìǐn nyɛ.

⁴ Sepóɛɖé nì mu gɛ̀ɛ̀ ɓɛ́ ɔ maà wa kɛɛ wa ɖɔ jaɖaùn. Nì mu ɓà-cù nìà wa kɔ̃ún wɛ̃ɛ jaɖaùn. Nì mu nyɔ ɓě pĩ́àà wa dyiɛɛ toún ɖuùn, kà m̀ nyu zɔ̃̌ɔ̀ kà Míɖìàùn-nyɔ̀ ɓěɔ̀ toún ɖuɛ kɛ.

⁵ To-vɔ̃-nyɔ̀ ɓěɔ̀ ɓoún-po-bà ɓěɔ̀ kè waà mú-po-ɖɔ̀ ɓɛ́ nyɔmɔɔ dèìn múɛɛ séín ɓěɔ̀ mu sĩìn. Wa mu sĩɛ hwɛ̀ìn.

⁶ Dyú ɖò ɖǎ wóɖó ɓó à bìì. Gèɖèpɔ́ɔ̀ ɖǎ à gàa-dyù ɖò nyí. Ɔ mu gɔ̌mànàɔ̀ jǔùn. Ɔ nyɛ́nɛ́ mu Nyɔ-náún-po-nyɔ̀ dĩ́ín-dĩ̀ìn kè Kpé-séín-ɓéɖé-Gèɖèpɔ́ɔ̀ kè Sè-ná-sèɛ̀-ɓǎ ɔ kè Kã́á ɓɛ́ ɔ dyà gìɖìǐɛɛ jǔùn.

⁷ Ɔ nyɔ-wuɖuí-kɔ̃̀-kpèɔ̀ kè ɔ gìɖìǐɔ̀ mu kɔ̃ kpáùn kánáá pū, ké ɔ se sèìn-naín ɖò kɔ̃̀ɔ̌ mu. Ɔ mu Dèɓéɛ̀ zèèɔ̀ kɔ̃ kòùn, ɓɛ́ ɔ ké ɔ kã́á-ɓòɖòɔ̀ dyií dyi kpɔ̃ ɖé jǎà kè dyí-sɛ́ɖɛ́ìn-sɛ́ɖɛ́ìn mú, sɔ̀ìn ɓó tia gbo ké dyúa muɛ. Bounɓo mɔ̀ nyɔ nìà ɖɛ séín kɔ̃in nyɛɛ ɖǎa gbɔ po kà ɔ mu ɖɛ nìà kɛ nyuùn wɛ̃́ɛ́ kɛ.

Bounɓoɔ̀ mu Éézùɖùɛ̀-nyɔ̀ ɓěɔ̀ gǎ kɔ̃ tòùn

⁸ Bounɓoɔ̀ ɖǎ zaa-dúún-wáɖá-wáɖá Éézùɖùɛ̀-nyɔ̀ ɓě mɔ̀à Jékɔ̀ɛ̀ xwíníín-dyù ɓěɔ̀ kɛɛ kɔ̃ dyà.

⁹ Ké Éézùɖùɛ̀-nyɔ̀ séín ɓě ɓɛ́ wa cĩ́ ɖé Sɛ̀mɛ́ɖìà-hwɔ̀ɖɔ̀ɔ̀ mú kè ɖé Ífèɖèìn-ɓòɖòɔ̀ kɔ̃ɛɛ muɛ dyuòùn. Wa cɛ̃ɛ ɖé wa mìɔùn dyí-ɓúáìn-ɓúáìn kè hwòɖǒ-dyùà vɛ̀nɛ̀ɔ̀ mú, ké wa ɖá,

¹⁰ “Bèɖěkè-gbò ɓěɔ̀ ɖǎ wáɖá dyɛo, kɛɛ à mu wa sɔ́ɔ́ wa bũ̌in pòìn ɖe. Wa ɖǎ síkímɔ̀-cù ɓěɔ̀ ɖaɓa dyɛo, kɛɛ à mu síɖà-cù ɓě ɓáùn ɖe ɓó wa bɛ̃̌ǐn.”

¹¹ Ɔ jèɛɛ, Bounɓoɔ̀ dyà ma Wɛ́ɖɛ́zììnɛ̀ gbo-vɔ̃-nyɔ̀ ɓěɔ̀ kè waà mú-nyɛ́-nyɔ̀ tɔ̀ɔ̀ ɓěɔ̀ wa kɔ̃.

¹² Síwíɖíà-nyɔ̀ ɓěɔ̀ sɔ̀ìn ma ɖé dyóɖó-xwáɖáún-wóɖóìn-naínɔ̀, ké Féɖésìà-nyɔ̀ ɓěɔ̀ sɔ̀ìn ma ɖé dyóɖó-dyi-kpáìn-naínɔ̀. Wa dyi ma, ké wa ɓáà ma wɔ̃, ké wa mana ma Éézùɖùɛ̀-nyɔ̀ ɓěɔ̀. Ɖɛ séín ɓěɛ̀ ɖǎ ná nì dyɛo, kɛɛ Bounɓoɔ̀ dyoɖo-hwòɖòɔ̀ séè wáɖá ke. Ɔ sɔ̃ɔ̀ pɛ́ɛ̀ ní ke, ɓɛ́ ɔ ké wa gǎ kɔ̃ tò.

¹³ Bounɓo mɔ̀ nyɔ nìà ɖɛ séín kɔ̃in nyɛɛ tò ma Éézùɖùɛ̀-nyɔ̀ ɓěɔ̀ gǎ kɔ̃, kɛɛ wa se ma ɖé ɔ gbo gmɔ̀ìn. Wa se ma ɔ gbo ɖe dyi.

¹⁴ Ɔ jèɛɛ, Bounɓoɔ̀ mu Éézùɖùɛ̀-nyɔ̀ ɓěɔ̀ nàìn-nyɔ̀ séín ɓěɔ̀ mú gbɔɔ̀ùn ɓó wé dyúáɖò xwíníín. Ɔ mu wa ɓó hwìǐ zàùn kà nyɔ cɛ̃à ɓó ɖɛ ɖòɛ̀ dú kèɛ̀ vɔ̃ kɛ.

¹⁵ Ɓóɖó-nyɔ̀ vɛ̀nɛ̀ ɓěɔ̀ kè nyɔ kpa ɖɛ ɓěɔ̀ mɔ̀ dúɔ̀, ké kpáá-ɖɛ̀-cɛ̃-nyɔ̀ ɓě ɓɛ́ wa mɔ̀à nyɔ ɓěɔ̀ se-wĩin-tɔ́mɔ́ìn-nyɔ̀ kɛɛ mɔ̀ vɔ̃ɔ̀.

¹⁶ Nyɔ ɓěɔ̀ nàìn-nyɔ̀ ɓěɔ̀ ɖǎ wa hwìǐ zàìn, ké nyɔ ɓěɔ̀ ɖǎ mú gbɔɔ̀.

¹⁷ Ɔ jèɛɛ, Ɖɛɓíɔ́ɔ̀ hwòɖǒ se waà gàa-dyù gmɔ̀ ɓěɔ̀ múin dèɛ̌n mu, ké ɔ se waà xwíè-dyù ɓěɔ̀ kè waà jɔ̌ɔ̀-màà ɓěɔ̀ wìǐn dyéɛ mu. Sepóɛɖé wa ɖò-ɖò séín mɔ̀ hwòɖǒ-kɔ̃in-nyìnììn-nyɔ̀ kè ɖɛ-gbà-nyu-nyɔ̀, ké ɖɛ gbà mɔ̀ ɖɛ wóɖó ɖé wa wĩín kánáá pū. Bounɓoɔ̀ mu wa gǎ kɔ̃ tòùn dyɛo, kɛɛ ɔ dyoɖo-hwòɖòɔ̀ se wáɖáa mu. Ɔ mu ɔ sɔ̃ɔ̀ pɛ́ɛ̀ìn, ɓɛ́ ɔ ké wa gǎ kɔ̃ tò ke.

¹⁸ Nyɔ ɓěɔ̀ hwòɖǒ-kɔ̃in-nyìnììn-nyìnììnɔ̀ nì wãuń kà nyɛ wãà kɛ. Nyɛɔ̀ fɔ̃ ɓó pìǐ-kpò kè wí-gbǎ ɓěɔ̀ dyi, ké ɔ po xwáɖá-kpòòɔ̀ dyéɖé, ké nyànà-sò-kpòɔ̀ nì dyií muɛń.

¹⁹ Bounɓo mɔ̀ nyɔ nìà ɖɛ séín kɔ̃in nyɛɛ dyoɖoɔ̀ ku wɔ̃ mìɔ, ké ɔ mu nyɔ ɓěɔ̀ mú gbɔɔ̀ùn ɖé ɓóɖóɔ̀ dà séín. Ɔ mu nììn kà nyɛ nì wãuń nìà kɛ, ké nyɔ ɓěɔ̀ mu nyɛ-kpóɖó ɓɛ́ wa po dyéɖéɛɛ jǔùn. Nyɔ ké ɔ mǔè ɖò póìn nyɛɛ ɖò se nìɛ̌ mu.

²⁰ Wa mu ɖɛ séín wa ɓɛ́ìn dyéɛ ɓó ɖi jèɛɛ bǎùn, ɓɛ́ wa kéɛ ɖi, kɛɛ mɔ́ mu wa nyuùn ke kánáá pū. Ɔ seɛ ɖòùn, kɛɛ wa mu waà dyú ɓě tàùn ɖekè.

²¹ Mànásì-nyɔ̀ ɓěɔ̀ mu Ífèɖèìn-nyɔ̀ ɓěɔ̀ gbo vɔ̃ùn, ké Ífèɖèìn-nyɔ̀ ɓěɔ̀ mu Mànásì-nyɔ̀ ɓěɔ̀ gbo vɔ̃ùn. Kɛɛ wa sɔ̃́ɔ̀ mu dyí poìn, ɓɛ́ wa ké Júɖà-nyɔ̀ ɓěɔ̀ to kɔ̃ kpa. Bounɓoɔ̀ mu wa gǎ kɔ̃ tòùn dyɛo, kɛɛ ɔ dyoɖo-hwòɖòɔ̀ se wáɖáa mu, ɔ mu ɔ sɔ̃ɔ̀ pɛ́ɛ̀ìn, ɓɛ́ ɔ ké wa gǎ kɔ̃ tò ke.