Àzédyà 6 - Ɓǎsɔ́ɔ̀ Báɓòɔ̀

Gèɖèpɔ́ɔ̀ gã Àzédyà ɓɛ́ ɔ ké kpáá-ɖɛ̀-cɛ̃-nyɔ̀ jǔ

¹ Zɔ̃ kɔ̃̀ xwíníín ɓɛ́ Kã́á Dyùzíà mɛ́à kɛɛ, mɔ̄ Àzédyà gmɔ̀ ma ɖéé ɖé dyií, ké ḿ dyé ma Ɖɛɓíɔ́ɔ̀. Ɔ kò ma ɔ zèèɔ̀ kɔ̃, ké ɔ ɓéɖé ma dya-dè-dè vɛ̀nɛ̀. Ɔ mú-po-ɖɔ̀ nìà ɔ múɛɛ dyíìn ma ɔ gbǒɔ̀ múin.

² Ké mɛɛ-ɖɛ̀ hwɔìn ínjà ɓěɛɛ nyanaìn ma ɓó ɔ kɔ̃in. Wa ɖò-ɖò ɓéɖé ma pìɔ̌-kpà mɛ̀nɛ̌ìn-ɖò. Pìɔ̌-kpà sɔ̃́ ɓáìn ma ɔ dyúa-kpàɔ̀ kɔ̃in, ké sɔ̃́ ɓáìn ma ɔ ɓoɔ̀ kɔ̃in, ké ɔ wã̀ìn ma sɔ̃́ sèà ɓóɛ.

³ Mɛɛ-ɖɛ̀ ɓěɔ̀ poìn pòìn ma wuɖu gbo, ké wa ɖá, “Bounɓo mɔ̀ nyɔ nìà ɖɛ séín kɔ̃in nyɛɛ hwɛ̀ mú. Ɔ hwɛ̀ mú. Ɔ hwɛ̀ mú. Ɔ dĩ́ín-dĩ̀ìnɔ̀ dyíìn ɓóɖó-kpà gànáɔ̀ kɔ̃ dyi.”

⁴ Waà wuɖuɔ̀ túò ma Gèɖèpɔ́ɔ̀ gbǒɔ̀ hìɖì-kpàɔ̀ dyi, ké nyànà-sò dyíìn ɖé gbǒɔ̀ múin.

⁵ Hwɛ̀ ké ḿ ɖá, “Gǎ ɖǎ ḿ kɔ̃ dyi. Ḿ ɖǎ mú gbɔɔ̀, sepóɛɖé ḿ ɖǎ Bounɓo mɔ̀ Kã́á mɔ̀ nyɔ nìà ɖɛ séín kɔ̃in nyɛɛ dyéɖéí dè. Mɔ̄ mɔ̀ nyɔ kɔ̃̀ wĩín-wùɖù seà mú hwɛ̀, ké ḿ cĩ́à ɖé nyɔ ɓě kɔ̃̀ wĩín-wùɖù seà mú hwɛ̀ kɛɛ hwìɛ̀ kɛ.”

⁶ Púɛɛ, mɛɛ-ɖɛ̀ hwɔìn ínjà ɓěɔ̀ ɖò wã ma, ké ɔ dyi ma ɓó ḿ gbo. Ɔ ɓéɖé ma nyɛ-kɛ̀nɛ̀ nì kpa-kpa-tã́ wɔ̃ún, ɓɛ́ ɔ zà ma ɓó sáa-kɔ̃-zàìn-gbààɔ̀ kɔ̃ɛɛ xwa.

⁷ Ké ɔ tìnììn ma nyɛ-kɛ̀nɛ̀ɔ̀ ní wɔ̃-kpũ̀àɔ̀ dyi, ké ɔ ɖá, “Dyéɛ kà ɖɛ nìà kɛ ɖǎ nì wɔ̃-kpũ̀àɔ̀ dyi tìnììn nyɛ. Nì zaa-dúún-wáɖá-wáɖáɔ̀ ɖǎ m̀ ɖɔ sɔ̀, ké nì nàmàǔn ɓěɔ̀ ɖǎ kɔ̃in zĩ̀ìn.”

⁸ Hwɛ̀ ké ḿ wɔ̃́ ma Ɖɛɓíɔ́ɔ̀ wuɖuɔ̀, ké ɔ ɖá, “Nyɛ́ ní mu ɖoɓoùn wɛ̃́? Nyɛ́ mu à bìì muùn wɛ̃́?” Hwɛ̀ ké ḿ ɖá, “Mɔ̄ kɛ̀, ɖoɓo ḿ.”

⁹ Ké Ɖɛɓíɔ́ɔ̀ ɖá, “Mu, ɓɛ́ m̀ kéɛ ní nyɔ ɓěɔ̀ gbo cɛ̃, ɓɛ́ m̀ ké níiń, ‘Ɓěɛ̀ wɔ̃́ ɖɛ ɓě jǎà dyɛo, kɛɛ ɓě ní wɔ̃́ɔ múin. Ɓěɛ̀ gmɔ̀ ɖɛ dya dyɛo, kɛɛ ɓě ní dyéɛ múin.’

¹⁰ Nyuɛ ɓɛ́ nyɔ ɓěɔ̀ hwòɖǒ-dyùà ké kùmù, ɓɛ́ waà ɖùǔ ké mú ku, ɓɛ́ waà dyéɖé ké kɔ̃in kpè, wa ní kɔ̃̀ ɖà waà dyéɖéɔ̀ dyi dyéìn, wa ní kɔ̃̀ ɖà waà ɖùǔɔ̀ dyi wɔ̃́ìn, waà hwòɖǒ-dyùàɔ̀ ní kɔ̃̀ ɖà ɖɛ múin wɔ̃́, wa ní kɔ̃̀ ɖà ḿ gbo gmɔ̀ìn, wa ní kɔ̃̀ ɖà dyi káná.”

¹¹ Hwɛ̀ ké ḿ diè ɖɛi, ké ḿ ɖá, “Ɓɔ̌ɔ̀, ti jĩ̀ xwɛ̌ ɖɛ nìà kɛ mu dyúa muùn wɛ̃́?” Ké Ɖɛɓíɔ́ɔ̀ ɖá, “Ɔ mu ná nììn tee ɓɛ́ hwɔɖɔ ɓěɔ̀ ké wáɖá, ɓɛ́ wa ké se mú-cĩ́-nyɔ̀ ɖò kɔ̃̀, ɓɛ́ nyɔ ɖò ké se gbǒ ɓěɔ̀ mu cĩ́ ɖe, ɓɛ́ ɓóɖó gànáɔ̀ ké fóɖóún kpá hwɛ̀.

¹² Ní mu nyɔ ɓěɔ̀ dà vɛ̃in tòùn, ɓɛ́ nyɔǔn ké ɓóɖóɔ̀ jè dyi táà gàná cá, ɓɛ́ pá fóɖóún ɓáún-ɓáún ké ɖé ɓóɖóɔ̀ hwòɖǒǔn nì.

¹³ Kɛbì nyɔ ɓěɔ̀ ɓàɖàìn-bùè nììnɔ̀ mɛ sè ɓóɖóɔ̀ kɔ̃ɛɛ, wa mu mú gbɔɔ̀ùn. Kɛɛ kà nyɔ dyià cu vɛ̀nɛ̀ ɖaɓa ní, ɔ gmùnùù sèà ɓóɛɛ mɛà kɔ̃ɛɛ, kǎà wa mu nììn.”