Àzédyà 16 - Ɓǎsɔ́ɔ̀ Báɓòɔ̀

Hwòɖǒ-po-naín ɖò se nì ɓó Móà-nyɔ̀ ɓěɔ̀ bìì

¹ Móà-nyɔ̀ ɓě ɓɛ́ wa nì ɖé Sɛ́ɖà-hwɔ̀ɖɔ̀ɔ̀ múɛɛ tò ɓáɖáá-dyù ɖò ɖé nyɔ kɔ̃̀ Júɖà-ɓòɖòɔ̀ wuɖuíɛɛ gbo, ɓɛ́ ɔ ké ɔ nyíí-ɖɛ̀ jǔ. Wa péɖéɛ̀n gbǎùn-fúɖúáɔ̀, ké wa dyàà ɖéɛ Zádyɔún-tòɖòɔ̀ dya.

² Móà-nyɔ̀ ɓěɔ̀ nì ɓó Áánɔ̀-nìɔ̀ wĩín mu nya dyi ɖe nyuɛń kà naà-dyù kɔ̃̀ pìɔ̌-mì séè tɔ̀mɔ̀ ɓɛ́ ɔ ɖe dyi ɔ téɖéɔ̀ mú zàa nìà kɛ.

³ Wa cɛ̃ɛ Júɖà-nyɔ̀ ɓěɔ̀ gbo, ké wa ɖá, “Ɓě kpá à gbo. Ɓě cɛ̃ à ɖɛ ɓě mɔ́ ɓɛ́ à ké nyuɛɛ gbo. Ɓě zĩ̀ìn à dyí kà cu-gɔ̃̀ ɖò dyià dyóɖóɔ̀ dyí zĩ̀ìn ní, ɔ zùùɔ̀ dyàà nyɔ nyànà ɓóɛ xwíɖíi dyiɛɛ pɛ̀ɛ̀ kɔ̃ kɛ. À mɔ̀ to-peɖe-nyɔ̀ ɓě. Ɓě vǐè à dɛ̀ ɓɛ́ nyɔ ɖò se à dyéɛ ɓɛ́ìn nyɛ. Ɓě ɓɔ́ à à mú-nyɛ́-nyɔ̀ ɓěɔ̀ xwáɖáún zàìn.

⁴ À mɛ nì nɔ̄ ɓěɛ̀ ɓóɖóɛ̀ mú, ɓɛ́ ɓě ké à dyí gmɔ̀ sɔ̀ìn ɖé nyɔ ɓě mɔ́à à mú gbɔɔ̀ dyiɛɛ xwaún.” Ti ɖò mu dyiìn, ɓɛ́ nyɔ-dyi-pĩ́à-pĩ́à kè mú-gbɔɔ̀-gbɔɔ̀ ké dyi zi, ɓɛ́ nyɔ ɓě ɓɛ́ wa nìà Móà-nyɔ̀ ɓěɔ̀ kɔ̃in síɛ̌n nyɛɛ ké dyi pa.

⁵ Sɔ̀ìn ɓóɛ gboɛɛ, nìí, Dèɓéɛ̀ xwíníín-dyù ɓěɔ̀ ɖò mu kã́á jǔùn, ké ɔ mu Móà-nyɔ̀ ɓěɔ̀ wuɖuí kɔ̃̀ùn ɖé ɖɛ̀ɓɛ̀ǐn-ɖɛ̀ɓɛ̀ǐn kè jǎà-ɖɛ̀-nyu-nyu mú. Ɔ mu zaa wɔ̃ poùn dyí-sɛ́ɖɛ́ìn-kà. Ɔ se ti zĩ̀ɛ̌n mu ɓó ɖɛ mɔ̀ dyí-sɛ́ɖɛ́ìn-ɖɛ̀ kɛɛ nyu jè.

⁶ À ɖǎa wɔ̃́ kà Móà-nyɔ̀ ɓěɔ̀ nyu wa mìɔùn dyí ɓúáìn nyɛ. À dyuòɛ̀ dyí kà wa ɖú wa mìɔùn dyií ɖé wa hwòɖǒ bũ̌ɛ. Kɛɛ waà ɓɔ́ɖɔ́-ɓɔ́ɖɔ́ séín ɓěɔ̀ mɔ̀ ɖɛ fóɖóún.

⁷ Ɔ jèɛɛ, Móà-nyɔ̀ séín ɓěɔ̀ vĩ̌ mìɔ ɓó gǎ-ɖɛ̀ jĩ̀ kà ɓɛ́ wa dyéà dyíɛɛ jè. Wa vĩ̌ ɓó géɖéè-hwàɖà dyɛ-dyɛ ɓě ɓɛ́ wa nyu ma ɖé Kíì-Hàwáɖásɛ̀-hwɔ̀ɖɔ̀ɔ̀ múɛɛ jè. Waà hwòɖǒ zi ɖé ɖei kpáuń mìɔ.

⁸ Geɖe ɓě nìà ɖé Hɛ́ɓɔ̀ùn-hwɔ̀ɖɔ̀ɔ̀ wĩín nyɛ kè géɖéè-gbǎ ɓě nìà ɖé Símà-hwɔ̀ɖɔ̀ɔ̀ gbɔɛɛ ɖǎ mú gbɔɔ̀ hwɛ̀. Ɓóɖó-dù ɓěɔ̀ wuɖuí-kɔ̃̀-nyɔ̀ ɓěɔ̀ ɖǎ géɖéè-gbǎ ɓěɔ̀ ɖɔ́ séín dyai kɔɖɔɔ hwɔ. Waà ɖɔ́ ɓěɔ̀ nyinió zɔ̃̌ɔ̀ ɖé Jázè-hwɔ̀ɖɔ̀ɔ̀ mú ɔ kè ɖé gbǎùn-fúɖúáɔ̀ kɔ̃. Wa kpa ma dyi bũɛ tee, ké wa nyini ɖé Tɔ̃́ Dòùnɓìǎɔ̀ dyóɖó-dyi-kpáìn-naínɔ̀.

⁹ Ɔ jèɛɛ, ḿ nì vĩ̌ɛń ɓó Símà-hwɔ̀ɖɔ̀ɔ̀ nììn géɖéè-gbǎ ɓěɔ̀ jè kà ḿ nyuà vĩ̌ɛ ɓó Jázè-hwɔ̀ɖɔ̀ɔ̀ jèɛ. Ní mícɛ̃̀ɔ̀ nì dyi síɛń ɓó Hɛ́ɓɔ̀ùn-hwɔ̀ɖɔ̀ɔ̀ kè Ɛ̀ɖɛ̀áɖè-hwɔ̀ɖɔ̀ɔ̀ jè, sepóɛɖé wa se ɓáá-ɖɛ̀ ɖò ɓéɖé, ɓɛ́ wa kéɛ ɓo kpã́, nìí ɓɛ́ ɔ ké wa múàǔn po.

¹⁰ Geɖe bã-bã mɔɔ géɖéè-gbǎ mɔɔ géɖéè-ɓò ɓɛ́ wa ké mú píníɛɛ ɖò se nì ɖe, ɔ jèɛɛ, múà-kùɖǔ-kuɖu ɖò ní dyi ɖe. Bounɓoɔ̀ ɖǎ wa séín ɓɔ́í po.

¹¹ Ní hwòɖǒ-dyùàɔ̀ kpá wìǐn mìɔ ɓó Kíì-Hàwáɖásɛ̀-hwɔ̀ɖɔ̀ɔ̀ kè Móà-nyɔ̀ tɔ̀ɔ̀ ɓěɔ̀ bìì, kà wa dyià xwɛ́-gbà-ɖùǔ ɓaɖa ní, ɔ wuɖuɔ̀ nyùàìn nyɔ wìì kɛ.

¹² Móà-nyɔ̀ ɓěɔ̀ mu ɖé waà kũùn-kpò ɓièìn-naín ɓěɔ̀ ɖé toɖo ɓěɔ̀ dya, ké wa sa. Wa mu ɖé waà kũùn-kpò-gbò ɓěɔ̀ mú, ɓɛ́ wa ké ɓaà, kɛɛ ɔ se wa kpáná ɖò dyí nyu.

¹³ Ɖɛ nìà kɛ mɔ̀ ɖɛ Bounɓoɔ̀ cɛ̃ zɔ̃̌ɔ̀ ɓá Móà-nyɔ̀ ɓěɔ̀ jè dyíɛ.

¹⁴ Kɛɛ ɓó kàǔn wɛ̃ɛ, Bounɓoɔ̀ ɖá, “Ɔ mu kũ̀à-nyùìn-zɔ̃̀ tã nyɛ̀nɛ̀ɛ̀ dyí ɖúùn, ɓɛ́ Móà-ɓòɖòɔ̀ dĩ́ín-dĩ̀ìnɔ̀ kèɛ̀ nyɔ kúɖúú ɓěɔ̀ ké zùǔn sɔ̀ìn. Ké nyɔ ɓě ɓɛ́ wa muɛ xwaún póùn wɛ̃ɛ se dyí vòɛ̌ mu, ké kpé ɖò se wa dyí nìɛ̌ mu.”