Àzédyà 15 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Móà-ɓòɖòɔ̀ wáɖáùn

¹ Wuɖu ɓɛ́ ɔ sɔ̀ìn ɖé Bounɓoɔ̀ gbo ɓá Móà-ɓòɖòɔ̀ jè dyíɛɛ kɛà kɛ̀. Móà-ɓòɖòɔ̀ hwɔɖɔ ɓě mɔ̀à Áà kè Kíì kɛɛ wáɖá ní ɓó máaún-hwùɖù dyúáɖò mú. Móà-ɓòɖò gànáɔ̀ ɖǎ mú gbɔɔ̀.

² Díɓɔ̀ùn-hwɔ̀ɖɔ̀ɔ̀ nyɔ ɓěɔ̀ dyá toɖo ɓěɔ̀ dya, ké wa vĩ̌ìn ɖé waà kũùn-kpò ɓièìn-naín ɓěɔ̀. Ké Móà-nyɔ̀ ɓěɔ̀ nì ma vĩ̌ɛń mìɔ ɓó Néɓò-hwɔ̀ɖɔ̀ɔ̀ kè Mɛ̀ɖéɓà-hwɔ̀ɖɔ̀ɔ̀ jè. Wa séín zà mí dú, ké wa kpana waà vɛ̃̌ ɓěɔ̀.

³ Ké wa po ɖɔ-zɔ̃̀ mú, ké wa nì hwɔɖɔ-gboi-hwìè ɓěɔ̀ kɔ̃ dyi nàǔn. Wa nì ɖé gbǒ ɓěɔ̀ dya kè ɖé ɖɛ-pèɖèìn-naín ɓěɔ̀, ké wa nì vĩ̌ɛń hwòɖǒɛ̀-nɛɛ̀-kà.

⁴ Hɛ́ɓɔ̀ùn-hwɔ̀ɖɔ̀ɔ̀ kè Ɛ̀ɖɛ̀áɖè-hwɔ̀ɖɔ̀ɔ̀ nyɔ ɓěɔ̀ páná mú, ké nyɔ ɓě nì ɖéé ɖé Jáhàzì-hwɔ̀ɖɔ̀ɔ̀ múɛɛ wɔ̃́ waà wuɖuɔ̀. Ɔ jèɛɛ, Móà-ɓòɖòɔ̀ sójà ɓěɔ̀ ɖú mú páná kpàǐ, ké hwòɖǒ ɖò se wa xwíníín sè.

⁵ Ní hwòɖǒ-dyùà nì kpé poɛń ɓó Móà-nyɔ̀ ɓěɔ̀ jè. Móà-nyɔ̀ ɓěɔ̀ ɖǎ xwáɖáún kpá, ké wa ɖǎ ɖé Zóà-hwɔ̀ɖɔ̀ɔ̀ kè Ɛ́gàɖàfì-Sɛ́ɖìsíà-hwɔ̀ɖɔ̀ɔ̀ mú mu. Wa nì vĩ̌ɛń, ti wa nì Ɖúhì-hwɔ̀ɖɔ̀ɔ̀ dyáuń wɛ̃. Ti wa nì ɖé Hɔ́wòɖònáì-hwɔ̀ɖɔ̀ɔ̀ mú muɛń nyɛɛ, wa kpa vĩ̌ɛ ɓó mú-gbɔɔ̀-gbɔɔ̀ dyià wa kɔ̃ɛɛ jè.

⁶ Níwìɖììn-nìɔ̀ ma ɓó dyi. Pìǐ kè ɓáá-ɖɛ̀ séín hwɛ̀ mɛ́ɛ. Nyɔ ɖò se dyi gmɔìn ɓɛ́ìn, ɓɛ́ ɔ ké vàǎ-mì dyɔ̀ɔ̀ ɖò dyé ɖe.

⁷ Ɔ jèɛɛ, Móà-nyɔ̀ ɓěɔ̀ kpáìn waà kɔ́mɔ́-ɖɛ̀ kúɖúú ɓě ɓɛ́ wa ɖúó kɔ̃in mɔ́ǐn dyíɛɛ xwáɖáún, ké wa péɖé Wéɖò-Gbǎ-nìɔ̀.

⁸ Waà vĩ̌-wùɖù nì dyiɛń ɖé Móà-ɓòɖòɔ̀ kɔ̃ dà séín. Kpé-po-wùɖùɔ̀ nyini ɖé Ɛ̀gáɖáìn-hwɔ̀ɖɔ̀ɔ̀ kè Béè-Éɖììn-hwɔ̀ɖɔ̀ɔ̀ mú.

⁹ Sepóɛɖé ní ɓɛ́ ɔ nì ɖé Díɓɔ̀ùn-hwɔ̀ɖɔ̀ɔ̀ wĩín nyɛɛ mɔ̀ǎ nyɔmɔɔ saá-saá. Kɛɛ ɓó seɛ sèìn-naín. Bounɓoɔ̀ mu Díɓɔ̀ùn-hwɔ̀ɖɔ̀ɔ̀ gǎ ɖò kɔ̃ tòùn ɖe. Nyɔ ɓě ɓɛ́ wa kpá xwáɖáún, ké wa vǐè ɖé ɓóɖóɔ̀ kɔ̃ɛɛ, ganìǎ mu wa kpɔ̃ùn nyɛ̀nɛ̀ɛ̀.