Àzédyà 14 - Ɓǎsɔ́ɔ̀ Báɓòɔ̀

Toɛ̀-kpɔ̃-nyɔ̀ ɓěɔ̀ dyi wa ɓíɖí ɖe

¹ Bounɓoɔ̀ mu Jékɔ̀ɛ̀ xwíníín-dyù ɓě mɔ̀à Éézùɖùɛ̀-nyɔ̀ ɓěɔ̀ kɛɛ wìǐn dyéìn ɖe. Ɔ mu wa gãùn, ɓɛ́ ɔ ké wa ɖé wa mìɔùn nììn ɓíɖí-ɓòɖòɔ̀ kɔ̃ dyà ɖe. Ké ɓóɖó-dù kà kò ɖò ɓěɛ̀ nyɔ ɓě mu ɖé wa gbo dyiìn, ɓɛ́ wa kè wa ké ɖé cĩ́.

² Ɓóɖó-dù kà kò ɖò ɓěɛ̀ nyɔ ɓěɔ̀ mu Éézùɖùɛ̀-nyɔ̀ ɓěɔ̀ gbo kpáùn, ɓɛ́ wa ké wa ɓíɖí ɖe dyi. Ké Éézùɖùɛ̀-nyɔ̀ ɓěɔ̀ mu ɓóɖó-dù kà kò ɖò ɓěɛ̀ nyɔ ɓěɔ̀ wuɖuí kɔ̃̀ùn ɖé ɓóɖó ɓɛ́ Bounɓoɔ̀ nyíà wa kɛɛ kɔ̃. Ké ɓóɖó-dù kà kò ɖò ɓěɛ̀ nyɔ ɓěɔ̀ mu waà kũ̀à nyuùn. Ɓó tia ɓaɖaa, Éézùɖùɛ̀-nyɔ̀ ɓěɔ̀ mu nyɔ ɓě kpɔ̃̀ìn zɔ̃̌ɔ̀ kà wa ganaún wɛ̃ɛ mɔ̀ùn ganaún kpɔ̃̀ìn. Wa muá nyɔ ɓě mɔ̀ zɔ̃̌ɔ̀ kà wa dyi-pĩ́à-nyɔ̀ɛɛ mɔ̀ùn wuɖuí kɔ̃̀ùn.

Báɓèɖɔ́ùn-kã̀ǎɔ̀ nì ɖé dɛ̀ nyɔ ɓě ɖǎà mɛ́ɛ nìà kɛ

³ Ɓó tia ɓaɖaa, Bounɓoɔ̀ mu Éézùɖùɛ̀-nyɔ̀ ɓěɔ̀ fɔ̀-fɔ̀ nyíìn sɔ̀ìn ɖé waà bũ̌in-puà-puàɔ̀ kè waà gǎ-dyé-dyéɔ̀ ɔ kè waà ganaún-kpɔ̃̀ìn-kũ̀à nyu-nyuɔ̀ mú.

⁴ Ɔ ɖǎ ná nìǐn, nìí, wa mu Báɓèɖɔ́ùn-kã̀ǎɔ̀ dyɔ́ ɓaɖa kpàǐ ɖúùn, ɓɛ́ wa ké níiń, “Hwòɖǒ-kɔ̃in-nyìnììn-kã̀ǎɔ̀ ɖǎ dyi kpá wà! Ɔ se nyɔ ɖò dyi pĩ́àǎ mu ɖe fɔɔ cá.

⁵ Bounɓoɔ̀ ɖǎ ɓóɖó-wuɖuí-kɔ̃̀-nyɔ̀ nyìnììn hwòɖǒ kɔ̃in ɓěɔ̀ kpé xwa zà.

⁶ Wa mɔ̀ ɓóɖó-wuɖuí-kɔ̃̀-nyɔ̀ ɓě ɓɛ́ wa pĩ́à ma ɓóɖó-dù kà kò ɖò ɓě dyi ɖé dyoɖo mú, ké wa nì ma ɓóɖó-dù ɓěɔ̀ gǎ dyéɛ̌n kánáá pū kɛ.

⁷ Ɓó kàǔn wɛ̃ɛ, ɓóɖó-kpàà nyɔ séín ɖǎ gìɖìǐ ɓéɖé. Wa kpá múàǔn, ké wa nìǎ ɓeɖeɛń.

⁸ Pã́ìn-cù ɓěɔ̀ kè síɖà-cù ɓě nìà ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ kpá múàǔn sɔ̀ìn ɓó ti ɓɛ́ mɔ̀ Báɓèɖɔ́ùn-kã̀ǎɔ̀ ɖǎ ma ɓíɖíi dyi kpá kɛ, sepóɛɖé cu-ɖaɓa-nyɔ̀ ɖò ní mu wa ɖò ɖaɓauń ɖe.

⁹ “Dɛ̀ ɓɛ́ nyɔ ɓě ɖǎà mɛ́ɛ nìà kɛɛ ɖǎ ti dyé, ɓɛ́ ɔ ké m̀ hwìǐ kpɔ̃. Nyɔ ɓě ɓɛ́ wa mɔ̀ zɔ̃̌ɔ̀ kpé-ɓéɖé-nyɔ̀ ɓě ɓóɖó-kpàà kɔ̃, ɓɛ́ wa ɖǎ mɛ́ɛ nì m̀ jè hwìǐ gmɔ̀ǔn. Wa mɔ̀ nyɔ ɓě ɓɛ́ wa mɔ̀ǒ zɔ̃̌ɔ̀ ɓóɖó-dù ɓěɔ̀ kã́á ɓě kɛ.

¹⁰ Wa séín cɛ̃ɛ m̀ gbo, ké wa ɖá, ‘Mɔ̀ùn ɖǎ kpéí hwɛ̀ ɖekè kà à mɔ̀ùn nìà kɛɛ wà! À kè mɔ̀ mɔ̀ǎ nyɔ dyúáɖò wà!

¹¹ Nì dĩ́ín-dĩ̀ìnɔ̀ ɖǎ nɔ̄ gĩɔ nì ɓó kàǔn. Gbǎɖí-wùɖù ɖò ní dè m̀ dya ɖe. Nimiìn ɓě mɔ̀ǎ nì kɔ̃-pɛ̃́-ɖɛ̀, ké sɔ̀mɔ̀ɔ̌ ɓě mɔ̀ǎ nì kɔ̃in-wáɖá-ɖɔ̀.’

¹² “Kē, Báɓèɖɔ́ùn-kã̀ǎ wè, mɔ̀ kè gànà-kṹún-dɛ̀nɛ̀-dyù mɔ̀à zɔ̃-wĩín-cè kɛɛ hwɔìn ma kà kɛɛ, dyé kà m̀ ɖǎ dyi kpá kɛɛ wà! Mɔ̀ mɔ̀ zɔ̃̌ɔ̀ kà ɓóɖó-dù ɓěɔ̀ toún-ɖu-nyɔ̀ kɛ̀. Kɛɛ ɓó kàǔn wɛ̃ɛ, wa ɖǎ m̀ ɓíɖíi po.

¹³ M̀ cɛ̃ɛ ma ɖé m̀ hwòɖǒ bũ̌, ké m̀ ɖá, ‘Ní mu ɖéé ɖé dyií muùn ɖé Gèɖèpɔ́ɔ̀ nììn dɛ̀nɛ̀ mɛ́nɛ́ɛ́ ɓěɔ̀ kɔ̃in, ɓɛ́ ḿ ké ɖé ní zèèɔ̀ dyi dè. Ní mu ɖé toɖo kɔ̃̀ dya ɓɛ́ gèɖèpɔ́ɔ̀ ɓěɔ̀ poìn kà dyíɛɛ dyi kòùn ɖéé ɖé xwía.

¹⁴ Ní mu ɖéé ɖé ní-kpò ɓěɔ̀ kɔ̃in nììn. Ní mu ḿ mìɔùn nyuùn ɓɛ́ ḿ ké nì kà Ɖɛɓíɔ́ nìà kɛ.’

¹⁵ Kɛɛ dyéɛ, wa ɖǎ m̀ ɓíɖíi dyi po ɖé dɛ̀ ɓɛ́ nyɔ ɓě ɖǎà mɛ́ɛ nìà kɛɛ gbɔ.

¹⁶ “Nyɔ ɓě ɓɛ́ wa dyé ɖé m̀ wɛ̃ɛ, wa síìn m̀ dyéɖé gãa, ké wa dièìn dìèìn dyi, ké wa ɖá, ‘Má, gàa nìà kɛ mɔ̀ nyɔ túò ma kà ɓóɖó-kpà gànáɔ̀ dyi, ké ɔ nyuɛ ké kã́á-ɓòɖò ɓě tɛɖɛ ma kà kɔ̃in nyɛ̀e?

¹⁷ Má, gàa nìà kɛ mɔ̀ nyɔ wáɖá ma kà hwɔɖɔ ɓěɔ̀, ké ɔ nyuà ɓóɖó-kpà gànáɔ̀ gbǎùn-fúɖúá múɛ̀e? Má, ɔ mɔ̀ nyɔ ní zàà nyɔ ɓě ɔ po kpɔɖɔ ɖeín nyɛɛ sɔ̃ kɔ̃, ké wa ní muà wa ɓíɖíɛ̀e?’

¹⁸ “Ɓóɖó-kpàà kã́á ɓěɔ̀ ɖò-ɖò séín pɛ̃́ ɖé waà xwɛ́-gmàà nɔ̀mɔ̀ kɔ̃in ɓěɔ̀ mú dyi.

¹⁹ Kɛɛ dyéɛ, wa po mɔ̀ùn xwáɖáún kà sĩ̀ɔ̌ nìà kɛ. M̀ se xwɛ́-gmàà ɖò kɔ̃̀. Wa gbǒìn sójà ɓě ɓɛ́ wa sè toɛɛ nììn xwɛ́ ɓěɔ̀ ɓó nììn xwɛ́ɔ̀ kɔ̃ ɖé sɔ́ɔ́-ɓì ɖò mú, ké nyɔǔn-dyù nàà kɔ̃in.

²⁰ Wa se nì xwɛ́ dyóɖóún zà kà wa zàà kã́á tɔ̀ɔ̀ ɓěɛ̀ xwɛ́ dyóɖóún wɛ̃, sepóɛɖé m̀ ɖǎ nì nyɔ ɓěɔ̀ ɖáɓá, ké m̀ ɖǎ nì ɓóɖóɔ̀ mú gbɔɔ̀. “Hwòɖǒ-kɔ̃in-nyìnììn-nyɔ̀ wè, nì xwíníín-dyù ɓěɛ̀ nyɛ́nɛ́ mɛ pa nyɔǔn hwìɛ̀ dyi.

²¹ À mu nì gàa-dyù ɓěɔ̀ ɖáɓáùn, ɓó wa ɓǎ nììn ɓǎ ɓěɛ̀ nàmàǔn ɓěɔ̀ jè, ɓɛ́ wa ní kɔ̃̀ ɖǎ ɓóɖó-kpàà wuɖuí kɔ̃̀, ɓɛ́ waà dèè-hwɔ̀ɖɔ̀ ní kɔ̃̀ ɖà ɓóɖó-kpàà dà séín nì.”

Gèɖèpɔ́ɔ̀ mu Báɓèɖɔ́ùn-hwɔ̀ɖɔ̀ɔ̀ wáɖáùn

²² Ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Ní mu Báɓèɖɔ́ùn-hwɔ̀ɖɔ̀ɔ̀ to kɔ̃ poùn, ɓɛ́ ḿ kéɛ wáɖá. Ḿ se ɖé nyɔ ɖò mɔɔ dyú ɖò sèɛ̌ mu fɔɔ cá, ɓɛ́ wa jè ké toɖo-kpàà kɔ̃ dyi zi.

²³ Ké ní muɛ nyuùn ɓɛ́ Báɓèɖɔ́ùn-hwɔ̀ɖɔ̀ɔ̀ ké kùnǔù ɓěɛ cĩ́-naín kè bàɖà gbo jǔ. Ní mu wúò-ɖɛ̀ ɓɛ́ ɔ ɓɛ́ìn ɖɛ séín kpaa kɛɛ dyí ɖúùn, ɓɛ́ ḿ ké Báɓèɖɔ́ùn-hwɔ̀ɖɔ̀ɔ̀ ɓóɖó-kpàɔ̀ kɔ̃ dyi wúò. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”

Gèɖèpɔ́ɔ̀ mu Àsíwíɖíà-nyɔ̀ ɓěɔ̀ mú gbɔɔ̀ùn

²⁴ Ké Bounɓo mɔ̀ nyɔ nìà ɖɛ séín kɔ̃in nyɛɛ gboò ma ɔ mìɔùn dyí, ké ɔ ɖá, “Kà ḿ nyuà dyí sɔ́ɔ kɛɛ, kǎà ɔ mu nììn. Kà ní hwòɖǒ nyuà gbɔ poɛ kɛɛ, kǎà ɔ mu nììn.

²⁵ Ní mu Àsíwíɖíà-nyɔ̀ ɓě nìà ní ɓóɖóɔ̀ kɔ̃ɛɛ mú gbɔɔ̀ùn, ké ní mu wa kɔ̃in síìn ɖé ní toɖo ɓěɔ̀ dya. Ní mu Àsíwíɖíà-nyɔ̀ ɓěɔ̀ gɛ̀ɛ̀ɔ̀ ní nyɔ ɓěɔ̀ ɖɔ zàùn. Ní mu waà gbɛ̌ nìà ní nyɔ ɓěɔ̀ dúɛɛ dú zàùn.”

²⁶ Ɖɛ nìà kɛ mɔ̀ ɖɛ Bounɓoɔ̀ ɖǎ gbɔ po ɓá ɓóɖó-kpà gànáà jè dyíɛ. Bounɓoɔ̀ ɖǎ ɔ sɔ̃ɔ̀ pɛ́ɛ̀, ɓɛ́ ɔ ké ɓóɖó-dù séín ɓěɔ̀ gǎ kɔ̃ tò.

²⁷ Ɖɛ nìà kɛ mɔ̀ ɖɛ ɓɛ́ Bounɓo mɔ̀ nyɔ nìà ɖɛ séín kɔ̃in nyɛɛ ɖǎ gbɔ poɛ, ké nyɛ́ ɓɛ́ìn dyí zàìn nyɛ́? Ɔ ɖǎ ɔ sɔ̃ɔ̀ pɛ́ɛ̀, ké nyɛ́ ɓɛ́ìn ɖe jiɖiɛ kɛ́?

Gèɖèpɔ́ɔ̀ mu Féɖésìà-nyɔ̀ ɓěɔ̀ mú gbɔɔ̀ùn

²⁸ Zɔ̃ kɔ̃̀ xwíníín ɓɛ́ Kã́á Áhàzì mɛ́ ma kàa, wuɖu ɓɛ́ Bounɓoɔ̀ tòìn ma ḿ múɛɛ kɛà kɛ̀. Ɔ ɖá,

²⁹ “Féɖésìà-nyɔ̀ séín ɓě, ɓě nyɔ ɖò ní ɖá ɓɛ́ ɔ ké múàǔn kpá kà ɓɛ́ ɓěɛ̀ ɓàɖàìn-ɓà-cùɔ̀ ɖǎ jɛ̀ɖɛ̀ kɛ. Sepóɛɖé cɛ̃́-sɛ̀ ɖò dyi mɛ́ ní, sɛɔ̀ nyɔ kɔ̃̀ cɛ̃́ ku wɔ̃ ɖe mìɔ kɛɛ dyi ɓóɛ bɛ̃̌ǐn. Sɛɔ̀ dyi ɔ gɛ̃ɔ̀ wa ní, ɔ wóɖóìn ɖɔ-sɛ̀ nì pìɔ̌-kpà gbɔɛ, ké ɔ wã.

³⁰ Bounɓoɔ̀ mu gǎ-dyé-nyɔ̀ ɓě nì ɖé ɔ nyɔ ɓěɔ̀ hwìɛ̀ kɛɛ dyí gmɔ̀ùn kà nyɔ gmɔ̀à ɓáɖáá dyíɛ, ké wa mu ɖé gìɖìǐ mú cĩ́ìn. Kɛɛ ɔ mu mɔ́ vɛ̀nɛ̀ ɖò ɓě mɔ̀à Féɖésìà-nyɔ̀ ɓěɔ̀ kɛɛ kɔ̃ tòùn, ké mɔ́ɔ̀ mu ɓě séín ɖáɓáa hwɔùn nyɛ̀nɛ̀ɛ̀.

³¹ “Féɖésìà-hwɔ̀ɖɔ̀ ɓě, ɓě vĩ̌, ɓɛ́ ɓě ké kpé po. Fã̀à mɛ nyu ɓě séín mìɔ. Sepóɛɖé púu-púu sɔ̀ dyí kà nyànà-sò nìà kɛ, ké ɔ nì ɖé xwía sɔ̀ǐn. Ɔ mɔ̀ sójà kúɖúú ɓě ɓɛ́ wa mɔ̀ gàa-zà-nyɔ̀ saá-saá kɛɛ púu-púu.

³² “Ɖɛ́ mɔ̀ gɔ̃̌-jǔ-wùɖù à mɛ nyí kíá ɓě ɓɛ́ Féɖésìà-nyɔ̀ ɓěɔ̀ ɖoɓoà à gbo ɓó gbo kpá jèɛɛ kɛ́? À muɛ wa gbo cɛ̃ìn kà Bounɓoɔ̀ ɖǎ Zádyɔún-hwɔ̀ɖɔ̀ɔ̀ po, ké kà ɖé mɔ̀ ɔ nyɔ ɓě ɓɛ́ wa nì gǎ dyéɛń nyɛɛ pèɖèìn-naín nyɛ.”