Àzédyà 13 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu Báɓèɖɔ́ùn-hwɔ̀ɖɔ̀ɔ̀ gǎ kɔ̃ tòùn

¹ Dyí-tɛ̀mɛ̀ìn-ɖɛ̀ ɓɛ́ Gèɖèpɔ́ɔ̀ tɛ̀mɛ̀ìn ma mɔ̄ Àzédyà mɔ̀à Ámɔ̀zìɛ̀ dyú-gààɔ̀ kɛɛ dyí ɓá Báɓèɖɔ́ùn-hwɔ̀ɖɔ̀ɔ̀ jè dyíɛɛ kɛà kɛ̀.

² Ɓě po và ɖé toɖo dyɛ dyai ɖò dya. Ɓě páná mú ɖé sójà ɓěɔ̀ gbo, ɓɛ́ ɓě ké ɓěɛ̀ sɔ̃ɔ̀ dyií tò, ɓɛ́ dyììn ɖéɛ múɛɛ, sójà ɓěɔ̀ kéɛ dyuò kà ɔ mɔ̀ǎ ti ɓɛ́ wa ké Báɓèɖɔ́ùn-hwɔ̀ɖɔ̀ ɓɛ́ ɔ ɓɔ́ɖɔ́ìn kà ɔ mìɔùn dyíɛɛ to kɔ̃ poɛ.

³ Bounɓoɔ̀ mìɔùn ɖǎ sójà ɓě ɓɛ́ ɔ po wáká kɛɛ wuɖu kɔ̃ zà. Ɔ ɖǎ ɔ gàa-zà-nyɔ̀ ɓěɔ̀ dyí poìn, ɓɛ́ wa ké nyɔ ɓě ɓɛ́ ɔ kpáìn dyoɖoún wɛ̃ɛ gǎ kɔ̃ tò. Wa mɔ̀ nyɔ ɓě ɓɛ́ wa ɓɔ́ɖɔ́ ɓó Bounɓoɔ̀ jèɛ.

⁴ Ɓě tò ɖùǔ kà kuɖu-kuɖu nì ɖé toɖo ɓěɔ̀ dya dyiɛń nyɛ. Ɔ mɔ̀ vòò-nyɔ̀ kúɖúú ɓěɛ̀ kuɖu-kuɖu. Ɔ mɔ̀ ɓóɖó-dù ɓě nì dyí poɛ̌n nyɛɛ kuɖu-kuɖu. Bounɓo mɔ̀ nyɔ nìà ɖɛ séín kɔ̃in nyɛɛ nì sójà kúɖúú dyí poɛ̌n ɓó to vɔ̃ jè.

⁵ Bounɓoɔ̀ kè ɔ to-vɔ̃̀ìn-ɖɛ̀ ɓě ɓá ɔ dyoɖo-hwòɖòɔ̀ dyíɛɛ sɔ̀ ɖé ɓóɖó vɛ̃in ɓɛ́ ɔ nì ɖé ɓóɖó-kpàà sèìn-naín nyɛɛ kɔ̃, ké wa dyi, ɓɛ́ wa ké ɓóɖó-kpà gànáà mú gbɔɔ̀.

⁶ Ɓě po kpé ɖé wuɖu zoo mú, sepóɛɖé Bounɓoɔ̀ wéɔ̀ ɖǎ dyi xwɛ̃́ìn. Ɔ mɔ̀ wé kɔ̃̀ ɓaɖa mú-gbɔɔ̀-gbɔɔ̀ sɔ̀ ɖé kpé-séín-ɓéɖé-Gèɖèpɔ́ɔ̀ gboɛɛ mu dyiìn nyɛ.

⁷ Ɔ jèɛɛ, hwòɖǒ mu nyɔ séín xwíníín dyi ɓaɖaùn, ké hwòɖǒ-dyùà séín mu ɖeìn.

⁸ Fã̀à mu wa nyuùn mìɔ, ké bũ̌in-puà-puà kè pòìn-hwìɖǐi mu wa múin dyíìn kà màa ɓɛ́ ɔ nì póó-gbò ɖeín nyɛɛ nìà kɛ. Wa mu dya gmɔìn gmɔ̀ìn fã̀à-kà, ké dɛ̃ mu wa nyuùn mìɔ.

⁹ Gmɔ̀ nɔ̄, Bounɓoɔ̀ wéɔ̀ nì dyiɛń. Ɔ mɔ̀ wé nyìnììn dyíin ɖò. Ɔ mɔ̀ wé kɔ̃̀ ɓaɖa ɓɛ́ Bounɓoɔ̀ mu ɔ dyoɖo ku wɔ̃ɔ̀ púèìn, ɓɛ́ ɓóɖó-kpàà ké fóɖóún kpá kɛ. Ɔ mu nàmàǔn-nyɔ̀ ɓě ɓɛ́ wa nìɛ̀ kɔ̃ɛɛ mú gbɔɔ̀ùn ɖekè.

¹⁰ Dɛ̀nɛ̀ mɛ́nɛ́ɛ́ kò-kò ɓěɔ̀ ɖò se fãá mu, ké tíe mu dyóɖóɔ̀ kɔ̃ dyi kpɔ̃ùn ɓóɛ xwáɖáún-wóɖó-tìɔ̀ ɓaɖa, ké dɛ̀nɛ̀ɔ̀ se ce ɖò tòɛ̌ mu.

¹¹ Ké Bounɓoɔ̀ ɖá, “Ní mu ɓóɖó-kpàɔ̀ gǎ kɔ̃ tòùn ɓó ɖɛ gbà nìɛ̀ múɛɛ jè. Ní mu hwòɖǒ-kɔ̃in-nyìnììn-nyɔ̀ ɓěɔ̀ gǎ kɔ̃ tòùn ɓó waà nàmàǔn ɓěɔ̀ jè. Ké ní mu nyɔ ɓě ɓɛ́ wa ɖú wa mìɔùn dyiíɛɛ ɓɔ́ɖɔ́-ɓɔ́ɖɔ́ɔ̀ jè dyi zĩ̀ìn, ké ní mu hwòɖǒ-kɔ̃in-nyìnììn-nyɔ̀ ɓě ɓɛ́ wa ɓɔ́ɖɔ́ìn wa mìɔùn dyíɛɛ ɓíɖíi dyàùn.

¹² Ní muɛ nyuùn ɓɛ́ nyɔǔn-dyùɛ̀ gǎ ké kpá kà góò hwɛ̀ zɛ̀nɛ̌ǐn gǎ nyuà kpáa kɛ, hwɛ̀ ḿ po níiń, góò sɔ̀à ɖé Ófì-ɓòɖòɔ̀ kɔ̃ɛ.

¹³ Ti ɓɛ́ mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ muà dyoɖoún kpáùn mìɔ kɛɛ, ní muɛ nyuùn ɓɛ́ dyɔɔ̀ ké kɔ̃in tɛɖɛ, ké ɓóɖó-kpàɔ̀ mu dyi túòùn, ɓɛ́ ɔ ké daí sɔ̀ìn.

¹⁴ “Ɓóɖó-dù kà kò ɖò ɓěɛ̀ nyɔ ɓě ɓɛ́ wa nìà ɖé Báɓèɖɔ́ùn-ɓòɖòɔ̀ kɔ̃ cĩ́ɛń nyɛɛ mu nììn kà déɖé ɓɛ́ xwáɖá-nyɔ̀ ɖò kpá kíɖííɛɛ nìà kɛ, mɔɔ kà ɓáɖáá ɓě ɓɛ́ wa se dyí-gmɔ̀-nyɔ̀ ɖò ɓéɖéɛɛ nìà kɛ. Wa ɖò-ɖò séín mu ɖé wa mìɔùn nììn nyɔ ɓě gbo gmɔ̀ìn. Wa ɖò-ɖò séín mu xwáɖáún kpáùn, ɓɛ́ wa ké wa mìɔùn nììn ɓíɖí-ɓòɖò ɓě kɔ̃ ɖe mu.

¹⁵ Nyɔ mɔ̀ nyɔ ɓɛ́ wa mu kpɔ̃ùn wɛ̃ɛ, wa mu ɔ gàsíà dyí ɖáɓáùn.

¹⁶ Wa mu Báɓèɖɔ́ùn-nyɔ̀ ɓěɔ̀ dyú-pɛ̀ɖɛ̀ ɓěɔ̀ ɓíɖíí nàmàìn, ɓɛ́ wa ké dyi wɛ̀ìn ɓó wa dyéɖé waí. Ké wa mu waà gbǒ ɓěɔ̀ hwuùn, ké wa mu waà gmàà ɓěɔ̀ ganaún kpɔ̃̀ìn.”

¹⁷ Ké Bounɓoɔ̀ cɛ̃ɛ ɖe, ké ɔ ɖá, “Gmɔ̀ nɔ̄, ní mu Míì-nyɔ̀ ɓěɔ̀ vã kɔ̃ poùn, ɓɛ́ wa ké Báɓèɖɔ́ùn-nyɔ̀ ɓěɔ̀ to kɔ̃ dyà. Ɔ mɔ̀ Míì-nyɔ̀ ɓě seà séɓàɖà kè góò ti ɖò ɓéɖéɛ.

¹⁸ Wa mu gàa-dyù gmɔ̀ ɓěɔ̀ sé-kpìì dyí ɖáɓáùn. Wa se dyú-gbɔ́ɔ́ ɖò wìǐn dyéɛ mu, hwɛ̀ ḿ po níiń, dyú-pɛ̀ɖɛ̀.

¹⁹ Báɓèɖɔ́ùn-ɓòɖò ɓɛ́ ɔ ɓéɖéà dĩ́ín-dĩ̀ìn ɖé kã́á-ɓòɖò ɓě hwìɛ̀, kɔ̃̀ jè ɓɛ́ ɔ nyɔ ɓěɔ̀ ɓɔ́ɖɔ́ìn kà dyíɛɛ mu nììn kà Sáɖɔ̀ùn-hwɔ̀ɖɔ̀ɔ̀ kè Gòmɔ́ɖɔ̀-hwɔ̀ɖɔ̀ɔ̀ nyu zɔ̃̌ɔ̀ kà nìɛ̀ ti ɓɛ́ mɔ̄ Bounɓoɔ̀ wáɖá zɔ̃̌ɔ̀ kà wa kɛ.

²⁰ Nyɔ ɖò se ɖé cĩ́ɛ mu ɖe fɔɔ cá. Àwéɖéɓìà-nyɔ̀ ɖò se ɖé ɔ jàɖàìn-gbò dyi nyànàǐn mu ɖe, ké ɓáɖáá-dyí-gmɔ̀-nyɔ̀ ɖòɛ̀ ɓáɖáá ɓě se ɖé dyi pɛ̃́ɛ mu ɖe.

²¹ Kɛɛ xwáɖá-xwíɖíi-nìmìì ɓěɔ̀ mɔ̀ ɖɛ mu ɖé dyi pɛ̃́ìn. Kùnǔù ɓěɔ̀ mɔ̀ ɖɛ mu ɖé waà gbǒ ɓěɔ̀ mú dyíìn, ké zògǐì ɓěɔ̀ mɔ̀ ɖɛ mu ɖé ɓóɖóɔ̀ kɔ̃ cĩ́ìn, ké ɖé mu xwáɖá-xwíɖíi-wìɖì ɓěɔ̀ dyi-dyeìn-naín jǔùn.

²² Ké xwáɖá-xwíɖíi-nìmìì ɓěɔ̀ mu ɖé hwɔɖɔ-dyí-gmɔ̀ìn-gbò ɓěɔ̀ kè kã́á-mú-cĩ́-gbò nɔ̀mɔ̀ kɔ̃in ɓěɔ̀ mú kuɖu-kuɖu nyuɛń nììn. Báɓèɖɔ́ùn-ɓòɖòɔ̀ wáɖá-tì ɖǎ dyi xwɛ̃́ìn. Ɔ wé ɖǎ hwɛ̀.”