Àzédyà 11 - Ɓǎsɔ́ɔ̀ Báɓòɔ̀

Gìɖìǐ-kã̀ǎ-ɓòɖòɔ̀

¹ Ti ɖò nì dyiɛń, ɓɛ́ kã́á ɖò ké ɖé Jɛséɛ̀ xwíníín-dyù ɓěɔ̀ hwìɛ̀ dyí sɔ̀ kà cu-gmùnùù ɖò dyià kɔ̃ mɛ ní, ɔ ɖíɔ̀ nyuà nìɛ̀ kɛ. Ɖíɔ̀ mu ɓó ɔ gmɛ̀nɛ̀ɛ̀ ɓěɔ̀ dyí mɛìn.

² Ké Bounɓoɔ̀ Zùùɔ̀ mu ɔ kɔ̃ nììn. Ɔ mɔ̀ Zùù ɓɛ́ ɔ dyà hwòɖǒ-fɔ̀nɔ̀-fɔ̀nɔ̀ kè ɖɛ-múin-wɔ̃́-wɔ̃́ kɛ. Ɔ mɔ̀ Zùù ɓɛ́ ɔ mɔ̀ nyɔ-náún-po-nyɔ̀ kè nyɔ-kpé-nyí-nyɔ̀ kɛ. Ɔ mɔ̀ Zùù ɓɛ́ ɔ dyà nyɔ ɖɛ-dyuò-dyuò kè Bounɓoɔ̀ dyi-fɛ̃̀ìn-fɛ̃̀ìn nyɛ.

³ Ké ɖɛ kã́áɔ̀ hwòɖǒ mu múin dèìn nyɛɛ mɔ̀ Bounɓoɔ̀ dyi-fɛ̃̀ìn-fɛ̃̀ìn. Ɔ se ɖɛ wɔ̃ poɛ́ mu dyììn ɖé ɖɛ ɔ dyéɛɛ mú, ké ɔ se ɖɛ dyí sɔ́ɔ mu dyììn ɖé ɖɛ ɔ wɔ̃́ɛɛ mú.

⁴ Kɛɛ ɔ mu gǎ-dyé-nyɔ̀ ɓěɔ̀ zɔ̃́ín wɔ̃ poùn dyí-sɛ́ɖɛ́ìn-kà, ɓɛ́ ɔ ké nyɔ ɓě ɓɛ́ wa se ɖɛ ɖò ɓéɖéɛɛ kɔ̃-zàà zi ɓó dyí-sɛ́ɖɛ́ìn-kà. Ɔ mu ɓóɖó-kpàà gǎ kɔ̃ tòùn dyììn ɖé ɔ wĩín-wùɖùɔ̀ mú, ké hwòɖǒ-kɔ̃in-nyìnììn-nyɔ̀ ɓěɔ̀ mu mɛ́ìn.

⁵ Ɔ mu ɔ nyɔ ɓěɔ̀ wuɖuí kɔ̃̀ùn, ɖé dyí-sɛ́ɖɛ́ìn-ɖɛ̀ kè jǎà-ɖɛ̀-nyu-nyu mú.

⁶ Ɓó tia ɓaɖaa, hwɔ-ji kè ɓáɖáá-dyù mu dà dyúáɖò cĩ́ìn, ké ji kè wiɖi-dyù mu dà dyúáɖò pɛ̃́ìn. Ké ɓìɖǐ-dyù kè ganìǎ mu dà dyúáɖò ɖɛ ɖììn, ké dyú-gbɔ́ɔ́ mɔ̀ nyɔ mu wa dyí gmɔ̀ùn.

⁷ Ɓìɖǐ kè kìɖìǒ mu dà dyúáɖò dyi ɖiìn, ké waà dyú ɓěɔ̀ mu dà dyúáɖò dyi pɛ̃́ìn. Ké ganìǎ mu pìǐ ɖiìn kà ɓìɖǐ ɖià pìǐɛ.

⁸ Dyú-pɛ̀ɖɛ̀ mu ɓó cɛ̃́-sɛ̀ wáún péé nyùìn, hwɛ̀ ḿ po níiń, dyú-gbɔ́ɔ́ mu cɛ̃́-sɛ̀ɔ̀ ɓíɔ̀ mú sɔ̃ kpaùn, ké ɖɛ gbà ɖò se ɔ nyuɛ́ mu.

⁹ Nyɔ-puà-ɖɛ̀ ɖò mɔɔ ɖɛ-mú-gbɔɔ̀-ɖɛ̀ ɖò se ɖé Bounɓoɔ̀ toɖo hwɛ̀ǐn-hwɛ̀ǐnɔ̀ dya nìɛ̌ mu. Bounɓoɔ̀ dyí-dyuò-dyuò mu ɓóɖóɔ̀ kɔ̃ dyi dyíìn kà ní dyíàìn ɖé dyóó kɔ̃ dyiɛ.

Toɛ̀-kpɔ̃-nyɔ̀ ɓěɔ̀ mu ɖe kɔ́ìn

¹⁰ Ɓó tia ɓaɖaa, kã́á ɓɛ́ ɔ sɔ̀à ɖé Jɛséɛ̀ gbǒ-xwíníínɔ̀ múɛɛ mu ɖɛ-da-zàìn-kɔ̀ɖɔ̀ jǔùn ɓó ɓóɖó-dù ɓěɔ̀ bìì, ké wa mu ɔ gbo muùn, ké ɔ cĩ́-naínɔ̀ mu pá dĩ́ín-dĩ̀ìn jǔùn.

¹¹ Ɓó tia ɓaɖaa, Ɖɛɓíɔ́ɔ̀ mu ɔ sɔ̃ɔ̀ pɛ́ɛ̀ìn kpa sɔ̃́ nììn ɖe, ɓɛ́ ɔ ké ɔ nyɔ ɓěɔ̀ xwéɖé wè sè ɓóɛɛ ɖé Àsíwíɖíà-ɓòɖòɔ̀ kè Íjè-ɓòɖòɔ̀ xwía kèɛ̀ zɔ̃̌in kè Kúsì-ɓòɖòɔ̀ kè Éɖàùn-ɓòɖòɔ̀ kè Báɓèɖɔ́ùn-ɓòɖòɔ̀ kè Hámà-ɓòɖòɔ̀ ɔ kè ɓóɖó ɓě nìà Mɛ́ɖɛ̀tɔ̀wéɖénìà-dyòǒɔ̀ wĩin nyɛɛ kɔ̃ zà, ɓɛ́ ɔ ké wa ɖe dyà.

¹² Ɔ mu nyɔ-ɖɛ-da-zàìn-kɔ̀ɖɔ̀ dyií poùn, ɓɛ́ ɔ ké Éézùɖùɛ̀-nyɔ̀ ɓě nìà ɓóɖó-dù ɓěɔ̀ kɔ̃ɛɛ dyí poìn. Ɔ mu Júɖà-nyɔ̀ ɓě ɓɛ́ wa gbɛ̀ìn kà dyiɛɛ dyí poìn sɔ̀ìn ɖé ɓóɖó-kpàà sèìn-naín.

¹³ Éézùɖùɛ̀-nyɔ̀ ɓěɔ̀ se Júɖà-nyɔ̀ ɓěɔ̀ hwɛ̀nɛ̌ dyéɛ̌n mu ɖe, ké Júɖà-nyɔ̀ ɓěɔ̀ mɔ̀ùn se Éézùɖùɛ̀-nyɔ̀ ɓěɔ̀ gbo vɔ̃ɔ́ mu ɖe.

¹⁴ Kɛɛ wa mu gbo poìn, ɓɛ́ wa ké Féɖésìà-nyɔ̀ ɓě nìà ɖé dyóɖó-dyi-kpáìn-naín nyɛɛ to kɔ̃ kpa. Ké wa mu gbo poìn, ɓɛ́ wa ké nyɔ ɓě ɓɛ́ wa cĩ́à ɖé dyóɖó-xwáɖáún-wóɖóìn-naín nyɛɛ hwu. Wa mu Íɖɔ̀ùn-nyɔ̀ ɓěɔ̀ kè Móà-nyɔ̀ ɓěɔ̀ toún ɖuùn, ké Ámànà-nyɔ̀ ɓěɔ̀ mu wa xwíɖíi nììn.

¹⁵ Ké Bounɓoɔ̀ muɛ nyuùn ɓɛ́ Íjè-dyòǒɔ̀ ké ɓó dyi ma, ké ɔ muɛ nyuùn ɓɛ́ zùzù-pìɔ̌ ɖò ké dyi, ɓɛ́ ɔ kéɛ nyu ɓɛ́ Dyùféɖétì-nìɔ̀ ké ɓó dyi ma, ɓɛ́ ní-dyù mɛ́nɛ́ɛ́ mɛ̀nɛ̌ìn-sɔ̃́ ké ɓó sè, ɓɛ́ nyɔǔn-dyù kéɛ gboi nàà ɓɛ́ìn, ɓɛ́ wa kéɛ péɖé.

¹⁶ Bounɓoɔ̀ mu hwìè ɖò zàùn ɓó ɔ nyɔ xwéɖé wè sèà ɖé Àsíwíɖíà-ɓòɖòɔ̀ kɔ̃ɛɛ bìì, ɓɛ́ wa ké ɖé sɔ̀ kà ɔ nyuɛ zɔ̃̌ɔ̀ kà ɓó wa ɓǎ nììn ɓǎ ɓěɔ̀ bìì ti ɓɛ́ wa sɔ̀ zɔ̃̌ɔ̀ kà ɖé Íjè-ɓòɖòɔ̀ kɔ̃ɛ.