Àzédyà 10 - Ɓǎsɔ́ɔ̀ Báɓòɔ̀

¹ Ɓě mɔ̀ nyɔ ɓě ɓɛ́ ɓě poà gma se dyí sɛ́ɖɛ́ìn nyɛɛ, gboò-wùɖù nì ɓě kɔ̃. Ɓě céè gma ɓě ké nyɔ tɔ̀ɔ̀ ɓě dyi pĩ́à kɛɛ kánáá pū.

² Ɓě nyuɛ náa ɓɛ́ ɓě ké dyí-sɛ́ɖɛ́ìn-ɖɛ̀ wɔ̃-po-po hwìǐ zàìn ɓó gǎ-dyé-nyɔ̀ ɓěɔ̀ bìì, ɓɛ́ ɓě ké wa gɔ̃̌ xwa zà, nìí ɓɛ́ ɓě ké jɔ̌ɔ̀-màà ɓěɔ̀ kè xwíè-dyù ɓěɔ̀ kɔ̃̀ɔ̀-ɖɛ̀ ɓě dyí ɖú.

³ Ti ɓɛ́ Bounɓoɔ̀ muà ɓě gǎ kɔ̃ tòùn wɛ̃ɛ, ɖɛ́ ɓě mu nyuùn wɛ̃́? Ti ɓɛ́ ɔ muà mú-gbɔɔ̀-gbɔɔ̀ ɓě kɔ̃ dyàùn sɔ̀ìn ɖé ɓóɖó vɛ̃in ɖò kɔ̃ɛɛ, xwɛ̌ ɓě muɛ nyuùn wɛ̃́? Dɛ̌ ɓě mu gbǔìn, ɓɛ́ ɓě ké gbo-kpá-kpá dyéɛ́? Dɛ̌ ɓě mu ɓěɛ̀ kɔ́mɔ́-ɖɛ̀ ɓěɔ̀ sèìn nyɛ́?

⁴ Ɖɛ sè ɓó nyɛ̀nɛ̀ɛ̀ kɛɛ mɔ̀ ɓě mu toɛ̀-kpɔ̃-nyɔ̀ ɓě jǔùn, mɔɔ ɓě mu to sèìn. Kɛbì ɔ mɛ nì náa, Bounɓoɔ̀ dyoɖo-hwòɖòɔ̀ se wáɖáa mu, kɛɛ ɔ mu ɔ sɔ̃ɔ̀ pɛ́ɛ̀ìn, ɓɛ́ ɔ ké ɓě gǎ kɔ̃ tò ke.

Àsíwíɖíà-ɓòɖòɔ̀ kã́áɔ̀ mɔ̀ Gèɖèpɔ́ɔ̀ kũ̀à-mú-nyùìn-ɖɛ̀

⁵ Bounɓoɔ̀ cɛ̃ɛ, ké ɔ ɖá, “Gboò-wùɖù nì Àsíwíɖíà-ɓòɖò ɓɛ́ ɔ mɔ̀à ní nyɔ-ɓàɖàìn-ɓà-cùɔ̀ kɛɛ kɔ̃. Ɔ mɔ̀ nyɔ ɓɛ́ ní ɓàɖàìn kà nyɔ ɓě ɓɛ́ ḿ kpáìn dyoɖoún wɛ̃.

⁶ Ḿ tò ɔ, ɓɛ́ ɔ ké ní nyɔ ɓě ɓɛ́ wa nyɛ́à ḿ múɛɛ to kɔ̃ kpa. Wa mɔ̀ nyɔ ɓě ɓɛ́ ḿ kpáìn dyoɖoún wɛ̃. Ḿ ɖoɓo ɔ wa kɔ̃, ɓɛ́ ɔ ké wa hwu, ɓɛ́ ɔ ké waà kɔ̃̀ɔ̀-ɖɛ̀ ɓěɔ̀ dyí ɖú, ɓɛ́ ɔ ké nyɔ ɓěɔ̀ kɔ̃in síìn kà nyɔ síìn kà bàɖà nì ɖé hwìè gba kɛɛ kɔ̃in nyɛ.

⁷ “Kɛɛ ɖɛ nìà kɛ se Àsíwíɖíà-kã̀ǎɔ̀ hwòɖǒɛ̀-mɔ́ɔ́-ɖɛ̀ɔ̀. Ɔ se ɔ hwòɖǒɛ̀-gbɔ-po-ɖɛ̀ɔ̀. Ɖɛ ɔ hwòɖǒ po gbɔɛɛ mɔ̀ ɓɛ́ ɔ ké ɓóɖó-dù ɓáún-ɓáún mú gbɔɔ̀.

⁸ Sepóɛɖé ɔ cɛ̃ɛ ɖé ɔ mìɔùn dyí-ɓɔ́ɖɔ́ìn-ɓɔ́ɖɔ́ìn mú, ké ɔ ɖá, ‘Má, ní sójà-wuɖuí-kɔ̃̀-nyɔ̀ ɖò-ɖò séín ɓěɔ̀ mɔ̀ kã́áe?

⁹ Má, ḿ ɖu Kánò-hwɔ̀ɖɔ̀ɔ̀ kè Kákɛ̀mì-hwɔ̀ɖɔ̀ɔ̀ toúne? Má, ḿ ɖu Hámà-hwɔ̀ɖɔ̀ɔ̀ kè Áápà-hwɔ̀ɖɔ̀ɔ̀ toúne? Má, ḿ ɖu Sɛ̀mɛ́ɖìà-hwɔ̀ɖɔ̀ɔ̀ kè Dìmásìkɔ̀-hwɔ̀ɖɔ̀ɔ̀ toúne?

¹⁰ Má, ḿ ɖǎ sɔ̃ pɛ́ɛ̀, ké ḿ ɖǎ kã́á-ɓòɖò ɓě kɔ̃̀ kũùn-kpò vò dyí mìɔ ké wa zi Jùɖúsɛ̀ɖɛ̀ìn-hwɔ̀ɖɔ̀ɔ̀ kè Sɛ̀mɛ́ɖìà-hwɔ̀ɖɔ̀ɔ̀ nììn ɓěɔ̀ dyíɛɛ mú gbɔɔ̀e?

¹¹ Kà ḿ nyuà Sɛ̀mɛ́ɖìà-hwɔ̀ɖɔ̀ɔ̀ kèɛ̀ kũùn-kpò ɓěɔ̀ mú gbɔɔ̀ kɛɛ, kà dyúáɖòɔ̀ kǎà ní mu Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɔ nììn kũùn-kpò ɓěɔ̀ nyuùn ɖekè.’

¹² “Kɛɛ ti ɓɛ́ mɔ̄ Ɖɛɓíɔ́ɔ̀ mu ɖɛ ní mɔ́ ní nyɔ ɓě nìà ɖé Zádyɔún-tòɖòɔ̀ dya ɔ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ bũ̌ nyuɛ dyiɛɛ wa bũ̌ nyuɛ hwɔùn wɛ̃ɛ, nìí, ní mu Àsíwíɖíà-kã̀ǎɔ̀ gǎ kɔ̃ tòùn ɓó ɔ ɓɔ́ɖɔ́-ɓɔ́ɖɔ́ kè ɔ mìɔùn dyí-ɓúáìn-ɓúáìnɔ̀ jè.

¹³ Sepóɛɖé Àsíwíɖíà-kã̀ǎɔ̀ cɛ̃ɛ, ké ɔ ɖá, ‘Ḿ ɖǎ ɖɛ ɓěɛ̀ nyu ɖé ḿ mìɔùn nììn kpé mú. Ḿ nyuɛ ɖé ní fɔ̀nɔ̀-hwòɖǒ mú, sepóɛɖé ḿ ɓéɖé ɖɛ-múin-wɔ̃́-wɔ̃́. Ḿ ɖǎ ɓóɖó ɓěɛ̀ bã̀à ɓě ɓó zà, ké ḿ ɖǎ nyɔ ɓěɔ̀ dyi-dè-ɖɛ̀ ɓěɔ̀ dyí ɖú. Ḿ ɖǎ nyɔ ɓě ɓɛ́ wa kò ma ɖé waà zèè ɓě kɔ̃ɛɛ ɓíɖíi dyi po kà ɓìɖǐ ɓíɔ́ ɖò nyuà kɛ.

¹⁴ Ɓóɖó-dù ɓě nì toɖo-kpà gànáà kɔ̃ɛɛ hwɔìn naà-téɖé pū ɓó ḿ bìì. Ḿ zà waà kɔ́mɔ́-ɖɛ̀ ɓěɔ̀ wa xwai pū kà nyɔ zàà naà-gɛ̃̀ ɓě ɖé naà-téɖé múɛ, ké ɖɛ ɖò se ḿ dyí ɓaɖa. Naà ké ḿ pìɔ̌-kpà dyi ɓàɖàìn mɔɔ ɔ ké ḿ gɛ́ɛ́ taɓa kɛɛ ɖò se nì fóɖóún.’ ”

¹⁵ Àsíwíɖíà-kã̀ǎ wè, nì hwòɖǒ ɖá jùɛ̀ ɖò ɓɛ́ìn ɓɔ́ɖɔ́ɔ ɖé nyɔ mɔ̀ nyɔ nìà ɔ kũ̀à nyùɛ̌n nyɛɛ xwaúne? Sɔ́ɔ̀ ɖò ɓɛ́ìn ɓɔ́ɖɔ́ɔ ɖé nyɔ nìà ɔ kũ̀à mú nyùɛ̌n nyɛɛ xwaúne? Ɓà-cù ɖò ɓɛ́ìn ɔ mìɔùn poɛ, ɔ jǔ ké sɔ̃ ɖò seɛ ɖeín nìǐne? Kùì-kpà ɖò ɓɛ́ìn hwòɖǒ nyuɛ ɓɛ́ ɔ mìɔùn ké nàe?

¹⁶ Ɔ jèɛɛ, Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ mu nì gàa-zà-nyɔ̀ ɓěɔ̀ gǎ kɔ̃ tòùn dyììn ɖé wɛ́ nyìnììn dyíin ɖò mú. Waà kpóɖó-dyùà mú mu wo-wo nyuùn kà nyɛ nìà nyɔ fɔ̃uń wɛ̃.

¹⁷ Gèɖèpɔ́ɔ̀ mɔ̀à Éézùɖùɛ̀-nyɔ̀ ɓěɔ̀ ceɛɛ mu nyɛ mú zɛ̃̀ìn. Éézùɖùɛ̀ɛ̀ Mú-hwɛ̀-Gèɖèpɔ́ɔ̀ mu nyɛ-mìɔ̀ mú zɛ̃̀ìn, ɓɛ́ ɔ ké nì ɖɛ séín ɓěɔ̀ ɓó dyi fɔ̃ ɓó wé dyúáɖò xwíníín, hwɛ̀ ḿ po níiń, pìǐ-kpò kè wí-gbǎ ɓěɔ̀.

¹⁸ Nì xwáɖá-kpòòɔ̀ dĩ́ín-dĩ̀ìnɔ̀ kè nì ɓóɖó bùɛ̀-bùɛ̀ɔ̀ mu mú gbɔɔ̀ùn nyɛ̀nɛ̀ɛ̀ kà wɛ́ nyìnììn dyíin ɖò dyià nyɔ ɖò kpɔ̃ ní, ɔ nyuà ɔ mú gbɔɔ̀ kɛ.

¹⁹ Cu-gɔ̃̀ ɖò-ɖò ɓɛ́ dyú-gbɔ́ɔ́ ɓɛ́ìn zɛɖɛɛ kɛɛ mɔ̀ ɖɛ mu ɖé nì xwáɖá-kpòòɔ̀ mú sèìn.

Nyɔ xwéɖé wè mu ɖe kɔ́ìn

²⁰ Ti ɖò mu dyiìn, ké Éézùɖùɛ̀-nyɔ̀ ɓě mɔ̀à Jékɔ̀ɛ̀ xwíníín-dyù ɓěɔ̀ kɛɛ xwéɖé wè sè ɓíɖíiɛɛ se nyɔ ɓě ɓɛ́ wa dyéàìn wa gǎ kɛɛ hwòɖǒ kɔ̃ dèɛ̌ mu ɖe, kɛɛ wa muá Bounɓo mɔ̀à Éézùɖùɛ̀ɛ̀ Mú-hwɛ̀-nyɔ̀ɔ̀ kɛɛ hwòɖǒ kɔ̃ dèìn jǎà jɛ́ɛ́ cá.

²¹ Éézùɖùɛ̀-nyɔ̀ ɓěɔ̀ nyɔ xwéɖé wè sè ɓóɛɛ mu kpé-séín-ɓéɖé-Gèɖèpɔ́ɔ̀ gbo ɖe dyiìn.

²² Éézùɖùɛ̀-nyɔ̀ ɓěɔ̀ vò dyí kà pĩ́ɔ nìà dyóóɔ̀ wĩin nyɛɛ vòà dyíɛɛ dyɛo, kɛɛ waà nyɔ xwéɖé wè mɔ̀ nyɔ mu ɖe dyiìn. Mú-gbɔɔ̀-gbɔɔ̀ pɛ̃́ ɖé dyúa dyi ɓó nyɔ ɓěɔ̀ bìì, ké wa kɔ̃̀ wa kéɛ dyé.

²³ Sepóɛɖé Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ mu mú-gbɔɔ̀-gbɔɔ̀ dyàùn ɖé ɓóɖóɔ̀ dà séín kà ɔ nyuà cɛ̃ɛ kɛ.

Bounɓoɔ̀ mu Àsíwíɖíà-ɓòɖòɔ̀ gǎ kɔ̃ tòùn

²⁴ Ké Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ cɛ̃ɛ ma, ké ɔ ɖá, “Óó ní nyɔ ɓě, ɓě mɔ̀ nyɔ cĩ́à ɖé Zádyɔún-hwɔ̀ɖɔ̀ɔ̀ múɛ, ɓěǐn ɖá ɓɛ́ ɓě ké Àsíwíɖíà-nyɔ̀ ɓěɔ̀ dyi fɛ̃̀ìn kɛbì wa mɛ nyìnììn ɓě bũ̌in, ɓɛ́ wa ké ɓě ɓà-cù ɓàɖàìn kà Íjè-nyɔ̀ ɓěɔ̀ nyuɛ zɔ̃̌ɔ̀ kà kɛ,

²⁵ sepóɛɖé ɔ se hwèɖèɛ̌n mu ɖe, ɓɛ́ ní dyoɖoɔ̀ ké ɓě kɔ̃ sɔ̀, ɓɛ́ ɔ ké wa kɔ̃ dyi, ɓɛ́ ḿ ké wa mú gbɔɔ̀.

²⁶ Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mu Àsíwíɖíà-nyɔ̀ ɓěɔ̀ ɓà-cù ɓàɖàìn kà ḿ nyu ma kà Míɖìàùn-nyɔ̀ ɓěɔ̀ ɓaɖaa ɖé Ówèɖè-sɔ̀ɔ̌-kpòɔ̀ wáún wɛ̃. Ní mu Àsíwíɖíà-nyɔ̀ ɓěɔ̀ gǎ kɔ̃ tòùn kà ḿ nyu ma kà Íjè-nyɔ̀ ɓěɔ̀ gǎ kɔ̃ tòɛ̀ ɖé dyóóɔ̀ wĩín nyɛ.

²⁷ Ké ní mu Àsíwíɖíà-nyɔ̀ ɓěɔ̀ gbɛ̌ɔ̀ ɓě dú zàùn. Ní mu waà gɛ̀ɛ̀ɔ̀ ɓě ɖɔ zàùn, ɓɛ́ ɔ ké se gbɛ̌ jǔ ɖe ɓó ɓě bìì.”

Àsíwíɖíà-ɓòɖòɔ̀ dyà Júɖà-ɓòɖòɔ̀ to kɔ̃

²⁸ Júɖà-nyɔ̀ ɓěɔ̀ mú-nyɛ́-nyɔ̀ ɓěɔ̀ sójà ɓěɔ̀ ɖǎ Éà-hwɔ̀ɖɔ̀ɔ̀ dyí ɖú. Wa ɖǎ Mígɔ̀nɔ̀-pàɔ̀ mú zĩ̀ìn. Wa sè waà ɖɛ séín ɓěɔ̀ ɖé Mímàsì-hwɔ̀ɖɔ̀ɔ̀ mú.

²⁹ Wa ɖǎ toɖo ɓěɔ̀ pṹa zi, ké wa pɛ̃́ ɖé Géɓà-hwɔ̀ɖɔ̀ɔ̀ mú. Wáɖámà-hwɔ̀ɖɔ̀ɔ̀ ɖú tɛɖɛ kpàǐ. Nyɔ ɓě nì ɖé Gíɓìà mɔ̀à Kã́á Sɔ́ɔ̀ ɓíɖí-hwɔ̀ɖɔ̀ɔ̀ kɛ múɛɛ ɖǎ gbǔɛ hwɛ̀.

³⁰ Ɓě mɔ̀à Gáɖììn-hwɔ̀ɖɔ̀ɔ̀ nyɔ ɓěɛɛ, ɓě páná mú. Ɓě mɔ̀à Ɖáísà-hwɔ̀ɖɔ̀ɔ̀ nyɔ ɓěɛɛ, ɓě tò ɖùǔ. Ɓě mɔ̀à Ànáfò-hwɔ̀ɖɔ̀ɔ̀ nyɔ ɓěɛɛ, ɓě jǔ wa gɔ̃̌.

³¹ Màménà-hwɔ̀ɖɔ̀ɔ̀ nyɔ ɓěɔ̀ kè Géɓììn-hwɔ̀ɖɔ̀ɔ̀ nyɔ ɓěɔ̀ ɖǎ gbǔ, ké wa nì pèɖèìn-naín dyi mɔ́uń.

³² Mú-nyɛ́-nyɔ̀ ɓěɔ̀ nì ɖé Nɔ́ɓì-hwɔ̀ɖɔ̀ɔ̀ mú fɔ̀ǐn ke ɓó zɛ̃̌ɛ̀. Wa nì Zádyɔún-tòɖòɔ̀ kè Jùɖúsɛ̀ɖɛ̀ìn-nyɔ̀ ɓěɔ̀ ɓɔ̀táà dyéɖéín tòɛ̌n.

³³ Gmɔ̀ nɔ̄, Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in nyɛɛ mu mú-nyɛ́-nyɔ̀ ɓěɔ̀ dyií cɛ̃ìn ɖé ɔ kpé vɛ̀nɛ̀ɔ̀ mú kà nyɔ cɛ̃à cu-ɖɔ́ ɖò dyiíɛ. Waà nyɔ ɓě ɓɛ́ wa ɓúáìn kà wa mìɔùn dyí mìɔ kɛɛ, Bounɓoɔ̀ mu wa ɓíɖíi dyàùn kà nyɔ dyià cu vɛ̀nɛ̀ ɖò ɖaɓa ní, ɔ ɓuɖuà kɛ.

³⁴ Bounɓoɔ̀ mu wa ɓíɖíi dyàùn kà nyɔ dyià cu vɛ̀nɛ̀ ɓě nì ɖé xwáɖá-kpòò hwìɛ̀ kɛɛ jùɛ̀ ɖàɓàìn ní, wa nyuà ɓuɖuɛ kɛ. Wa mu nììn kà cu vɛ̀nɛ̀ ɓě nìà ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ nyuà ɓuɖuɛ kɛ.