Àzédyà 1 - Ɓǎsɔ́ɔ̀ Báɓòɔ̀

¹ Ti ɓɛ́ Dyùzíà kè Jótàùn kè Áhàzì ɔ kè Hɛ́sèkádyà wa ɖò-ɖò mɔ̀ ma Júɖà-ɓòɖòɔ̀ kã́á kɛɛ, Bounɓoɔ̀ tɛ̀mɛ̀ìn ma mɔ̄ Àzédyà mɔ̀à Ámɔ̀zìɛ̀ dyú-gààɔ̀ kɛɛ ɖɛ ɓě ɓá Jùɖúsɛ̀ɖɛ̀ìn-hwɔ̀ɖɔ̀ɔ̀ kè Júɖà-ɓòɖòɔ̀ jè dyíɛɛ dyí.

Gèɖèpɔ́ɔ̀ wùɖù ɔ nyɔ ɓěɔ̀ gbo gana-kà

² Bounɓoɔ̀ cɛ̃ɛ ma, ké ɔ ɖá, “Ɓóɖó-kpà kè dyɔɔ̀, ɓě tò ɖùǔ, sepóɛɖé mɔ̄ Bounɓoɔ̀ mɔ̀ nyɔ nìà wùɖùɛ̌n nyɛ̀. Ḿ ɖǎ dyú ɓě nɛɛ̀ wɔ̃ po, ké ḿ ɖǎ wa gmɛ̀ìn, kɛɛ wa ɖǎ ḿ kɛ́ɛ́-mú-nyu-nyɔ̀ jǔ ɓó zɛ̃̌ɛ̀.

³ Ɓìɖǐ dyuò ɔ kɔ̃̀-nyɔ̀ dyí, ké jǎkasì dyuò dɛ̀ ɔ gbo-nì-ɓǎɔ̀ nyíìn ɔ kɛɛ dyí. Kɛɛ Éézùɖùɛ̀-dyù ɓě mɔ̀à ní nyɔ ɓěɔ̀ kɛɛ se ḿ dyí dyuò. Wa ní wɔ̃́ ɖɛ múin.”

⁴ Aké, nàmàǔn-ɓòɖò-dù, ɓě mɔ̀ nyɔ ɓě ɓɛ́ nàmàǔn nì mauń kà gbɛ̌ maà nyɔ kɛ. Ɓě mɔ̀ ɖɛ-gbà-nyu-nyɔ̀ ɓěɛ̀ dyú ɓě. Ɓě mɔ̀ hwòɖǒ-kɔ̃in-nyìnììn-nyɔ̀ ɓěɛ̀ dyú ɓě. Ɓě ɖǎ Bounɓoɔ̀ dyi táà. Ɓě ɖǎ ɓěɛ̀ Mú-hwɛ̀-nyɔ̀ɔ̀ ɓɔ́. Ɓě ɖǎ ɔ kɔ̃ín pòìn.

⁵ Ɖɛ́ kɔ̃̀ jè ɓě ní saà ɓaɖa-ɓaɖa dyí kɛ́? Ɖɛ́ kɔ̃̀ jè ɓě nìà Bounɓoɔ̀ kɛ́ɛ́ mú nyuɛń kánáá pū kɛ́? Ɓěɛ̀ dú gànáɔ̀ ɖǎ puà, ké ɓěɛ̀ hwòɖǒ-dyùà gànáɔ̀ ɖǎ wɛ́.

⁶ Ɓěɛ̀ kpóɖó-dyùà gànáɔ̀, sɔ̀ìn ɖé ɓo xwíɖíi ké ɖé dú-hwìɛ̀ nyiniɛɛ, dà ɖò se dyi káná fɔɔ cá. Ɔ sèìn puà-bɛ̃̀ kè jě nì hwuɖu ɓě kè jě fɔ̀nɔ̀ wĩín dyi ɓě ɓɛ́ wa se dyí dèɖè, mɔɔ ɓɛ́ wa se cáná dyí po, mɔɔ ɓɛ́ wa se ɖɛ ɖò dyí jìnììn nyɛ.

⁷ Ɓěɛ̀ ɓóɖóɔ̀ ɖǎ fóɖóún kpá, ké ɓěɛ̀ hwɔɖɔ ɓěɔ̀ ɖǎ sĩ. Ké ɖíà-nyɔ̀ ɓě ɖǎ ɖɛ ɓě nì ɓěɛ̀ geɖe ɓěɔ̀ gboɛɛ ɖé dyi zà ɓó ɓě dyéɖé waí. Ɖíà ɓě ɖǎ ɓěɛ̀ ɓóɖóɔ̀ dyí ɖú, ké wa ɖǎ ɖɛ séín dyíin nyìnììn.

⁸ Zádyɔún-hwɔ̀ɖɔ̀ɔ̀ nì kà gbáá ɓɛ́ wa sè ɖé géɖéè-gbǎɔ̀ múɛɛ nìà kɛ. Ɔ nì kà ɖɛ-dyí-gmɔ̀-nyɔ̀ɔ̀ vàà-ɖɛ̀ nìà ɖé kpɛ̀ɖɛ̀-kpɔ̀-gbǎ ɖò múɛ. Ɔ nì kà hwɔɖɔ ɓɛ́ wa gbǎìn wɔ̃, ɓɛ́ wa kéɛ zà kɛɛ nìà kɛ.

⁹ Ɔ jǔ ké Bounɓo mɔ̀ nyɔ nìà ɖɛ séín kɔ̃in nyɛɛ seɔ́ má nyɔ xwéɖé wè ɓíɖíi sè ní, nìí, à muɔ́ nììn kà Sáɖɔ̀ùn-hwɔ̀ɖɔ̀ɔ̀ kè Gòmɔ́ɖɔ̀-hwɔ̀ɖɔ̀ɔ̀ nìà kɛ.

¹⁰ Ɓě mɔ̀à Júɖà-ɓòɖòɔ̀ wuɖuí-kɔ̃̀-nyɔ̀ ɓě, ɓɛ́ ɓě kè Sáɖɔ̀ùn-hwɔ̀ɖɔ̀ɔ̀ wuɖuí-kɔ̃̀-nyɔ̀ ɓěɔ̀ hwɔìn kà kɛɛ, ɓě tò Bounɓoɔ̀ wuɖuɔ̀ ɖùǔ gbo. Ɓě mɔ̀à Júɖà-nyɔ̀ ɓě, ɓɛ́ ɓě kè Gòmɔ́ɖɔ̀-hwɔ̀ɖɔ̀ɔ̀ nyɔ ɓěɔ̀ hwɔìn kà kɛɛ, ɓě tò à Gèɖèpɔ́ɔ̀ gmaɔ̀ ɖùǔ gbo.

¹¹ Bounɓoɔ̀ ɖá, “Ɖɛ́ ɓěɛ̀ sáa-zà-zà séín ɓěɔ̀ kpa ɖé ḿ gboɛ́? Fɔ̃ɔ-sàǎ-zàìn-ɖɛ̀ ɓě mɔ̀à ɓáɖáá ɓíɔ́ ɓěɛ kè nyúà-ɖɛ̀ ɓúá-ɓúá ɓěɛ̀ cáná ɓɛ́ ɓě ɖǎ ḿ nyíɛɛ ɖǎ dyí vòɛ̌n zi. Ní hwòɖǒ se ɓìɖǐ ɓíɔ́ɛ̀ nyɔmɔɔ kè ɓáɖáá-nyɔ̀mɔ̀ɔ̀ ɔ kè wiɖi-nyɔ̀mɔ̀ɔ̀ ɓě múin dèìn.

¹² Ti ɓɛ́ ɓě mu ɓó ḿ dyúa dyiìn nyɛɛ, nìí, nyɛ́ cɛ̃ɛ ɓě gbo, ɓɛ́ ɓě ké ḿ ɖɛ ɓěà dyà kɛ́? Nyɛ́ cɛ̃ɛ ɓě gbo, ɓɛ́ ɓě ké dyi-dyeìn-dyeìn jĩ̀ kàà nyu ɖé ní gbǒɔ̀ múɛ́?

¹³ Ɓě ɓɔ́ ɓěɛ̀ sáa-zàìn-ɖɛ̀ ɓě ɓɛ́ wa se ɖɛ kpaa ḿ gbo dyàà. Ɓěɛ̀ nyɔ́ún-nɔ̀mɔ̀-ɖɛ̀ ɓěɔ̀ nyàìn ḿ dyi. Ḿ se nàmàǔn ɓě ɓɛ́ ɓě nyu ɖé Dɛ̀nɛ̀-Ɖìè-Hwèɖè-hwɔ̀ɔ̀ kè ní fɔ̀-wèɔ̀ ɔ kè ɓěɛ̀ dyí-poìn-hwɔ̀ tɔ̀ɔ̀ ɓěɔ̀ ɓaɖaa hwìɖǐi kùɛ̀n ɓɛ́ìn.

¹⁴ Ḿ nyɛ́ ɓěɛ̀ Dɛ̀nɛ̀-Ɖìè-Hwèɖè-hwɔ̀ ɓěɔ̀ kè ɓěɛ̀ dyi-dè-hwɔ̀ ɓěɔ̀ mú. Wa ɖǎ gbɛ̌ jǔ, ké ḿ se wa xwa ɓɛ́ìn ɖe.

¹⁵ “Ɔ jèɛɛ, ti ɓɛ́ ɓě mu ḿ sɔ̃ dyí tòùn wɛ̃ɛ, ní mu ɓě dyúa xwáɖáún pòìn. Kɛbì ɓě mɛ nyu ɓaà-wùɖù kúɖúúɛɛ, ḿ seɛ wɔ̃́ɔ mu, sepóɛɖé nyɔmɔɔ dyí ɓě xwa.

¹⁶ Ɓě dèɖè ɓě mìɔùn, ɓɛ́ ɓě ké ɓě mìɔùn mú hwɔ. Ɓě zà ɓěɛ̀ kpeɖe gbà ɓěɔ̀ ɓó ḿ dyúa. Ɓě táà kpeɖe-gbà-nyu-nyu dyi.

¹⁷ Ɓě cɛ̃́ ɖɛín-ɖɛ̀ nyu-nyu. Ɓě nyu dyí-sɛ́ɖɛ́ìn-ɖɛ̀. Ɓě po nyɔ-dyi-pĩ́à-pĩ́à ɓɔ́í. Ɓě po xwíè-dyù ɓěɔ̀ zaa wɔ̃ dyí-sɛ́ɖɛ́ìn-kà. Ɓě nyí jɔ̌ɔ̀-màà ɓě kɔ̃̀ ɓíɖí ɓɛ̀ɖɛ̀ìn dyíɛɛ gɔ̃̌.”

¹⁸ Ké Bounɓoɔ̀ cɛ̃ɛ ɖe, ké ɔ ɖá, “Ɓě dyi, ɓɛ́ ɓěà ké ɓěɛ̀ zaaɔ̀ cɛ̃. Kɛbì ɓěɛ̀ nàmàǔn ɓěɔ̀ mɛ bo mìɔ kà táɓòtíì nìà kɛɛ, ní mu wa nyuùn ɓɛ́ wa ké séɖéé tá-tá nì. Kɛbì wa mɛ bo kà nyɔmɔɔ nìà kɛɛ, ní mu wa nyuùn ɓɛ́ wa ké nì kà ɓáɖáá-fíɖí nìà kɛ.

¹⁹ Ɔ jǔ ké ɓě dyi wɔ̃́, ké ɓě dyi ní wuɖu nyu ní, nìí, ɓě mu ɖɛ kpa ɖɛ ɓě nìà ɖé ɓóɖóɔ̀ múɛɛ ɖò ɖiìn.

²⁰ Kɛɛ ɓě dyi nɔ́ɔ̀, ké ɓě se ní wuɖu nyu ní, nìí, ɓě mu gàsíà dyúa sèìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Nàmàǔn-hwɔ̀ɖɔ̀ɔ̀ jè

²¹ Dyéɛ kà hwɔɖɔ ɓɛ́ ɔ taɓa ma Bounɓoɔ̀ hwìɖǐǐ kóɖó-kóɖóɛɛ ɖǎ gbàɖàùn-màà mú zɛ̃̀ìn nyɛ. Dyí-sɛ́ɖɛ́ìn-ɖɛ̀ dyíìn ma ɖé ɔ múin. Dyí-sɛ́ɖɛ́ìn-nyɔ̀ ɓě cĩ́ ma ɖé ɔ mú, kɛɛ ɓó kàǔn wɛ̃ɛ, kú-ɖáɓá-nyɔ̀ saá-saá mɔ̀ nyɔ nìǎ ɖé.

²² Jùɖúsɛ̀ɖɛ̀ìn-nyɔ̀ ɓě, ɓě nì ma kà séɓàɖà nìà kɛ, kɛɛ ɓě ɖǎ zɛ̀nɛ̌ mú zɛ̃̀ìn. Ké ɓě nì ma kà wã́ìn nɔ̀mɔ̀ dyíin nìà kɛ, kɛɛ ɓě ɖǎ ní saá-saá jǔ.

²³ Ɓěɛ̀ wuɖuí-kɔ̃̀-nyɔ̀ ɓěɔ̀ mɔ̀ǎ Bounɓoɔ̀ kɛ́ɛ́-mú-nyu-nyɔ̀ ɓě kè dyíɖíí-nyɔ̀ ɓěɛ̀ ɓǎto ɓě. Wa séín ɖɛ̀ɓɛ̀ nyɔ-gbo-pa-wìɖì mú, ké wa nì ɖɛ ɓě nyɔǔn ké wa nyíɛɛ dyi mɔ́uń kánáá pū. Wa ní po xwíè-dyù ɓěɛ̀ zaa wɔ̃ dyí-sɛ́ɖɛ́ìn-kà, mɔɔ ké wa ní tò jɔ̌ɔ̀-màà ɓěɛ̀ zaa-dè-wùɖù ɖùǔ gbo.

²⁴ Ɔ jèɛɛ, Bounɓo Ɖɛɓíɔ́ mɔ̀ nyɔ nìà ɖɛ séín kɔ̃in, ɓɛ́ ɔ mɔ̀à Éézùɖùɛ̀ɛ̀ kpé-séín-ɓéɖé-nyɔ̀ɔ̀ kɛɛ ɖá, “Ɛ̃̀hɛ̃́ɛ̀, ní muá ní dyoɖo-hwòɖòɔ̀ Jùɖúsɛ̀ɖɛ̀ìn-nyɔ̀ ɓě mɔ̀à ní mú-nyɛ́-nyɔ̀ ɓěɔ̀ kɛɛ kɔ̃ púèìn, ɓɛ́ ḿ kéá ɓě kpa kɔ̃in zàìn.

²⁵ Ní mu ɓě sɔ̃ kɔ̃ poùn. Ní mu ɓě ɖeìn, ɓɛ́ ḿ ké ɓě zɛ̀nɛ̌ mú zà kà nyɔ zàà góò zɛ̀nɛ̌ǐn nyɛ.

²⁶ Sɔ̀ìn ɓóɛ gboɛɛ, nìí, ní mu ɓěɛ̀ tɔ̀ɔ̀-ɓìɔ̀ ɓěɔ̀ kè ɓěɛ̀ náún-po-nyɔ̀ ɓěɔ̀ páún poùn ɖe kà ɔ nyuó zɔ̃̌ɔ̀ kà nìɛ̀ kĩ́ín nyɛ. Ɔ ɖǎ ná nìǐn, nìí, wa mu ɓěɛ̀ hwɔɖɔɔ̀ hwɔɖɔ ɓɛ́ dyí-sɛ́ɖɛ́ìn-sɛ́ɖɛ́ìn nì múɛ kè hwɔɖɔ ɓɛ́ ɔ taɓa Bounɓoɔ̀ hwìɖǐǐ kóɖó-kóɖóɛɛ ɖáìn.”

²⁷ Zádyɔún-hwɔ̀ɖɔ̀ɔ̀ mu gbǎà-gbǎà dyéìn dyììn ɖé jǎà-ɖɛ̀-wɔ̃-po-po mú. Ɔ nyɔ ɓě ɓɛ́ wa táà waà nàmàǔn ɓěɔ̀ dyiɛɛ mu gbǎà-gbǎà dyéìn dyììn ɖé dyí-sɛ́ɖɛ́ìn-sɛ́ɖɛ́ìn mú.

²⁸ Kɛɛ Bounɓoɔ̀ mu ɔ kɛ́ɛ́-mú-nyu-nyɔ̀ ɓěɔ̀ kè nàmàǔn-nyɔ̀ ɓěɔ̀ dyi wàìn ɓó ti dyúáɖò xwíníín. Nyɔ séín ɓě ɓɛ́ wa táà Bounɓoɔ̀ dyiɛɛ mu mú gbɔɔ̀ùn.

²⁹ Dɛ̃ mu ɓě nyuùn ɓó óò-cù ɓě ɓɛ́ ɓě dèìn kà hwòɖǒǔn dyi ɓó ɓiè jèɛɛ jè, ké ɓě mu zùǔn sɔ̀ìn ɓó ɓáá-ɖɛ̀-pà ɓě ɓɛ́ ɓě gãà ɓó ɓiè jèɛɛ jè.

³⁰ Sepóɛɖé ɓě mu nììn kà óò-cù ɓɛ́ ɔ wáɖá míɛ kè ɓáá-ɖɛ̀-pà ɓɛ́ wa ní nyí níɛɛ nìà kɛ.

³¹ Kpé-ɓéɖé-nyɔ̀ ɓěɔ̀ mu nììn kà mɔɔ́-fèɖè nìà kɛ, ké waà nyuu-ɖɛ̀ ɓěɔ̀ mu nììn kà nyɛɛ̀ ɖo-dyùà nìà kɛ. Wa kè waà nyuu-ɖɛ̀ ɓěɔ̀ mu sĩìn, ké nyɔ ɖò seɛ mɔ́ìn ɓɛ́ǐn mu.