3 Jɔ̃́ɔ́ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ìn mɔ̄ mɔ̀à nyɔ vɛ̀nɛ̀ɔ̀ kɛɛ gbo. Ḿ zà mɔ̀ mɔ̀à ní ɖɛ̀ɓɛ̀-nyɔ̀ Gédyà mɔ̀ nyɔ ɓɛ́ ḿ ɖɛ̀ɓɛ̀à mú jǎà kɛɛ nyíɔún.

² Ní ɖɛ̀ɓɛ̀-nyɔ̀, ḿ nì Gèɖèpɔ́ɔ̀ dyi dièɛ̌n, ɓɛ́ m̀ ké nɔ̀mɔ̀ dyíin dyé ɖé ɖɛ séín mú, ɔ kè ɓɛ́ nì dyɔɔ̀ ké mú wóɖó. Ḿ dyuòɛ̀ kà ɖɛ séín ɓá nì hwòɖǒ-dyùàɔ̀ dyíɛɛ nɔ̀mɔ̀ dyíin nyɛ.

³ Ḿ kpá ma múàǔn mìɔ ti ɓɛ́ à ɖíí ɓěɔ̀ dyi ma, ké wa cɛ̃ɛ ma ḿ gbo kà ɓɛ́ m̀ mɔ̀ jǎà-nyɔ̀ kɛ, ɔ kè kà ɓɛ́ m̀ nìǎ jǎàɔ̀ mú cĩ́ɛń nyɛ.

⁴ Ɖɛ ɖò se ḿ múàǔn poɛń zi ɓɛ́ ɔ ké ɖɛ nìà kɛ dyí zi. Ɔ mɔ̀, ɓɛ́ ḿ kéɛ wɔ̃́ kà ɓɛ́ ní dyú ɓěɔ̀ nì jǎàɔ̀ mú cĩ́ɛń nyɛ.

Ɔ ɓàìn Gédyà

⁵ Ní ɖɛ̀ɓɛ̀-nyɔ̀, kũ̀à ɓɛ́ m̀ nyu à ɖíí ɓěɔ̀ bìì, kɛbì wa mɛ jǔ ɖéè ɓěɛɛ, m̀ mɔ̀ hwòɖǒ-kɔ̃-dè-nyɔ̀ ɖé ɔ mú.

⁶ Wa cɛ̃ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ m̀ ɓéɖéɛɛ jè cɔ́cì-nyɔ̀ ɓě nìà nɔ̄ kɛɛ gbo. M̀ mɛ cuò wa. Kà nì mu wa cuòɛ̀ nyuùn wɛ̃ɛ, ɔ mɛ dè Gèɖèpɔ́ɔ̀ hwìɖǐi.

⁷ Sepóɛɖé wa kpá ma hwìè xwíníín ɓó Kɛ́ɖɛ́ì jè, ké wa se ma ɖɛ ɖò nyɔ ɓě seà Gèɖèpɔ́ɔ̀ dyí dyuò wɛɛ xwaún zà.

⁸ Ɔ jèɛɛ, à ɓéɖé ɓɛ́ à ké nyɔ nì kà ɓěa gbo kpá, ɓɛ́ à kè wa ké jǎà-kũ̀à ɓɛ́ wa nìà nyuɛń nyɛɛ mú peɖeìn.

Dìɔ́tíɖífì vɔ̃ nyɔǔn gbo

⁹ Ḿ ɖǎ ɖɛ ɖò cɔ́cì-nyɔ̀ ɓěɔ̀ gbo céè, kɛɛ Dìɔ́tíɖífì mɔ̀ nyɔ ɖɛ̀ɓɛ̀ ɓɛ́ ɔ kéà wa nyɔ vɛ̀nɛ̀ jǔɛɛ se ní ti ɓéɖé.

¹⁰ Ɔ jèɛɛ, ḿ dyi ɖé dyiín, ní mu ɖɛ séín ɓě ɓɛ́ ɔ ɖǎ nyuɛɛ jè cɛ̃ìn. Ɔ cɛ̃ ɖɛ cá-cá kè wuɖu gbà ɓá à dyí. Ɔ seɛ ɖòùn, kɛɛ ɔ jǔ ké à ɖíí ɓěɔ̀ dyi ɖé dyiín, ɔ se mɔ́ ɓɛ́ ɔ ké wa jè dyi kpɔ̃. Ké nyɔ ɓě ɓɛ́ wa mɔ́ ɓɛ́ wa ké wa jè dyi kpɔ̃ɛɛ, ɔ po wa ɓɔ́í, ké ɔ kúmú wa cɔ́cìɔ̀ mú.

Dìmítìɔ̀ nyu ɖɛ nɔ̀mɔ̀ dyíin

¹¹ Ní ɖɛ̀ɓɛ̀-nyɔ̀, mɔ̀ǔn ɖá ɓɛ́ m̀ ké ɖɛ-gbà-nyu-nyɔ̀ dyéìn, ɓɛ́ m̀ ké ɖò nyu. Kɛɛ m̀ mɛ dyéìn ɖɛ-nɔ̀mɔ̀-dyíin-nyu-nyɔ̀, ɓɛ́ m̀ ké ɖò nyu. Nyɔ ɓɛ́ ɔ nyu nɔ̀mɔ̀ dyíin nyɛɛ mɔ̀ Gèɖèpɔ́ɔ̀ nyɔ. Nyɔ ɓɛ́ ɔ nyu ɖɛ gbà kɛɛ, ɔ séè Gèɖèpɔ́ɔ̀ dyé ɖò.

¹² Nyɔ séín ɖá Dìmítìɔ̀ nyɛ́nɛ́ín-nyɛ̀nɛ̀, ké jǎàɔ̀ mɔ̀ùn ɖáa ɖekè. À mɔ̀ùn nyuɛ zàse ɖekè, ké m̀ dyuòɛ̀ dyí kà ɖɛ à cɛ̃à kɛɛ mɔ̀ jǎà kɛ.

Cuò-wùɖù

¹³ Ḿ ɓéɖéɔ́ ɖɛ pàɖǎ ɓɛ́ ḿ kéɛ ɓě gbo céè, kɛɛ ḿ se mɔ́ ɓɛ́ ḿ kéɛ céèìn-ɖɛ̀ kè céèìn-nì céèìn.

¹⁴ Ḿ dèɛ̀ hwòɖǒ kɔ̃, ɓɛ́ ḿ ké m̀ dyéɛń fṹà, nìí, à mu gbo wuɖuìn wùɖùìn.

¹⁵ Gìɖìǐ mɛ nì m̀ kɔ̃. Nì ɓǎto ɓěɔ̀ zà m̀ nyíɔún. M̀ mɛ zà à ɓǎto ɓěɔ̀ nyíɔún ɖò-ɖò.