2 Kɔ̀ɖéíntĩ̀ɔ̀ 6 - Ɓǎsɔ́ɔ̀ Báɓòɔ̀

¹ À mɔ̀ nyɔ ɓɛ́ à kè Gèɖèpɔ́ɔ̀ nìà kũ̀à nyuɛń nyɛɛ, à ɓaà ɓě ní, ɓě mɔ̀ nyɔ ɓɛ́ ɓě ɖǎà Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ dyi kpɔ̃ɛɛ, ɓěǐn ɖá ɓɛ́ ɔ ké ná nì pídyi.

² Ɖɛ ɓɛ́ Gèɖèpɔ́ɔ̀ cɛ̃ɛ kɛà kɛ̀. Ɔ ɖá, “Ɖé ti ɓɛ̀ɖɛ̀ìn dyí ní hwòɖǒ ɖǎ gbɔ poɛ múɛɛ, ní mu m̀ gɔ̃̌ jǔùn. Nì póìn-tìɔ̀ dyi ɓó nyini ní, ní mu m̀ gbo kpáùn.” Ɓě tò ɖùǔ. Ti nìà kɛ mɔ̀ ti nɔ̀mɔ̀ dyíinɔ̀. Zɛ̃̌ɛ̀ mɔ̀ pó-wèɔ̀.

³ À ní po ɖɛ kéɛ nyu ɓɛ́ nyɔ ɖò ké gbǒ kɛɛ ɔ hwìèɔ̀ dyí, ɓɛ́ wa ní kɔ̃̀ ɖà à kũ̀àɔ̀ ɖɛ nyìnììn dyíin ɖò mú dyé.

⁴ Kɛɛ ɖɛ séín ɓě ɓɛ́ à nyuɛɛ, à tɛ̀mɛ̀ìn nyɔǔn dyí kà à mɔ̀ Gèɖèpɔ́ɔ̀ gbo-nì-nyɔ̀ kɛ. À ku hwòɖǒ mìɔ ɖé gǎ-dyé-dyé kè ti kàmàǔn-kàmàǔn ɔ kè fũ̀à-fṹá-ɖɛ̀ séín ɓě mú.

⁵ Wa ɖǎ à ɓaɖa, ké wa ɖǎ à kpɔɖɔ ɖeín po, ké wa ɖǎ à ɖe hwɛ̀ìn. À ɖǎ à mìɔùn sàìn ɖé kũ̀à-nyu-nyu mú. Ti ɖíɛ́ ɓě ɓaɖaín, à ní mɔ́, ké à ní ɖi ɖɛ ɖò.

⁶ À tɛ̀mɛ̀ìn nyɔǔn dyí kà à mɔ̀ Gèɖèpɔ́ɔ̀ gbo-nì-nyɔ̀ ɓěɛɛ ɖé à hwòɖǒ wáɖáá kè à hwòɖǒ-fɔ̀nɔ̀-fɔ̀nɔ̀ɔ̀ kè à hwòɖǒ-ku-kuɔ̀ kè à hwòɖǒ-kɔ̃in-nɔ̀mɔ̀-nɔ̀mɔ̀ɔ̀ kè Zùù Hwɛ̀ǐn-hwɛ̀ǐnɔ̀ kè à jǎà-ɖɛ̀ɓɛ̀ǐn-ɖɛ̀ɓɛ̀ǐnɔ̀

⁷ kè à jǎà-wùɖù ɓěɔ̀ ɔ kè Gèɖèpɔ́ɔ̀ kpéɔ̀ mú. À ɓéɖé dyí-sɛ́ɖɛ́ìn-sɛ́ɖɛ́ìn vɔ̃̀ìn-ɖɛ̀ ɖé à ɖiaún ɔ kè ɖé à kunuaún.

⁸ Wa dyé à kpéín, ké wa zàìn à zùǔn. Wa ɖá à nyɛ́nɛ́ gbà, ké wa ɖá à nyɛ́nɛ́ín-nyɛ̀nɛ̀. Wa kpɔ̃ à kà wa kpɔ̃à nyɔ-cá-nyɔ̀ ɓěɛ, kɛɛ à cɛ̃ ɖɛ mɔ̀ jǎà kɛ.

⁹ Wa kpɔ̃ à kà wa kpɔ̃à nyɔ wa se dyí dyuò wɛ, kɛɛ ɔ jèɛɛ, nyɔ séín dyuò à dyí. Wa nyu à kà à seà nyɔǔn-dyù ɓěɛ, kɛɛ wɛ̃́ɛ́ kɛɛ à cĩ́ kánáá pū. Wa dyéìn à gǎ dyɛo, kɛɛ à se mɛ́.

¹⁰ À kò wìì-ɓò, kɛɛ à kpá múàǔn ti séín ɓàɖà. À mɔ̀ gǎ-dyé-nyɔ̀ dyɛo, kɛɛ à nyuɛ ké nyɔ ɓáún-ɓáún bã. À se ɖɛ ɖò ɓéɖé dyɛo, kɛɛ à kɔ̃̀ ɖɛ séín.

¹¹ Kɔ́ɖèìn-nyɔ̀ ɓě, à ɖǎ ɓě gbo wùɖù wáɖáá. À ɖǎ à hwòɖǒ-dyùàà gbǒ-wɔ̃̀ ɓěɔ̀ kaà cá.

¹² À se à hwòɖǒ-dyùàà gbǒ-wɔ̃̀ ɓěɔ̀ ɓě dyí kã̀ìn. Ɓě mɔ̀ nyɔ kã̀ìn ɓěɛ̀ hwòɖǒ-dyùàɔ̀ gbǒ-wɔ̃̀ ɓěɔ̀ à dyí.

¹³ Ḿ wùɖù ɓě gbo kà ɓɛ́ ɓě mɔ̀ɔ̌ kà ní dyú ɓěɛ. Ɖɛ ɓě à ɖǎ ma kà ɓě bìì nyuɛɛ, ɓě mɛ nyu ɖò ɓó à mɔ̀ùn bìì. Ɓě kaà ɓěɛ̀ hwòɖǒ-dyùàɔ̀ gbǒ-wɔ̃̀ ɓěɔ̀ cá.

Ɓě mɔ̀ nì-nì Gèɖèpɔ́ɔ̀ gbǒ ɓě

¹⁴ Ɓěǐn ɖá ɓɛ́ ɓě kè nyɔ ɓě se Gèɖèpɔ́ɔ̀ hwìɖǐǐ taɓaa ké gbo kpɔ̃̀ìn. Xwɛ̌ ɓě ɓɛ́ìn ɖɛ mɔ̀ ɖɛ sɛ́ɖɛ́ìn dyíɛ ɔ kè ɖɛ se dyí sɛ́ɖɛ́ìn nyɛɛ dyí poɛ̀n nyɛ́? Xwɛ̌ tíe-kpò kè ce ɓɛ́ìn gbo kpɔ̃̀ìn nyuɛ kɛ́?

¹⁵ Xwɛ̌ Kɛ́ɖɛ́ì kè Nɔɔ́-nàmàǔn wuɖu ɓɛ́ìn dyúáɖò nìɛ̀ nyuɛ kɛ́? Ɖɛ́ nyɔ taɓa Gèɖèpɔ́ɔ̀ hwìɖǐǐɛ kè nyɔ se Gèɖèpɔ́ɔ̀ hwìɖǐǐ taɓaa ɓɛ́ìn dyí poɛ̀n nyɛ́?

¹⁶ Xwɛ̌ Gèɖèpɔ́ɔ̀ gbǒɔ̀ kè kũùn-kpò ɓɛ́ìn wuɖu táí poɛ nyuɛ kɛ́? Sepóɛɖé à mɔ̀ nì-nì Gèɖèpɔ́ɔ̀ gbǒ. Ɖɛ Gèɖèpɔ́ɔ̀ cɛ̃ɛ kɛà kɛ̀. Ɔ ɖá, “Ní mu ɖé wa mú cĩ́ìn, ké ní mu ɖé wa hwìɛ̀ nììn. Ní mu waà Gèɖèpɔ́ɔ̀ jǔùn, ké wa mu ní nyɔ ɓě jǔùn.”

¹⁷ Ɔ jèɛɛ, Bounɓoɔ̀ ɖá, “Ɓě mɛ sɔ̀ ɖé wa hwìɛ̀, ɓɛ́ ɓě kè wa ké gbo zaìn. Ɓěǐn ɖá ɓɛ́ ɓě ké se-mú-hwɛ̀-ɖɛ̀ ɓěɔ̀ ɖò dyi tìnììn, nìí, ní mu ɓě jè dyi kpɔ̃ùn.

¹⁸ Ní mu ɓěɛ̀ ɓǎ jǔùn, ké ɓě mu ní dyú-gàà kè dyú-màà ɓě jǔùn. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”