2 Kɔ̀ɖéíntĩ̀ɔ̀ 12 - Ɓǎsɔ́ɔ̀ Báɓòɔ̀

Dyí-tɛ̀mɛ̀ìn-ɖɛ̀ ɓě ɓɛ́ Pɔ́ɔ̀ dyé ma kɛ

¹ Kɛbì ɓɔ́ɖɔ́-ɓɔ́ɖɔ́ ɓɛ́ ḿ nyuà kɛɛ mɛ se ɖɛ nɔ̀mɔ̀ dyíin ɖò nyuɛ ɓɛ́ìn nyɛɛ, ḿ ɓéɖé ḿ ké ɓɔ́ɖɔ́ pū. Kɛɛ ní muá dyɛ ɖɛ ɓě ɓɛ́ Bounɓoɔ̀ nyu ké ḿ dyé ma, ké ɔ nyɔ ɓě ɓɛ́ ɔ tɛ̀mɛ̀ìn ma ḿ dyíɛɛ jè cɛ̃ìn.

² Ḿ dyuò Kɛ́ɖɛ́ì ɖeín-sí-nyɔ̀ ɖò ɓɛ́ Gèɖèpɔ́ɔ̀ bǎ ma ɓíɖíi, ké ɔ kpa ma ɔ dyɔɔ̀ tã nììnɔ̀ múɛɛ dyí. Ɔ zĩ̀àǐn zɔ̃ ɓaɖa-bùè sè hĩinyɛ. Ti ɖɛ nìàǒ wɛɛ kpá ma kɛɛ, ḿ se dyuò kɛbì ɔ nì ma ɔ kpóɖó-dyùàɔ̀ mú, mɔɔ ɔ seɛ ma mú nìǐn. Kɛɛ Gèɖèpɔ́ɔ̀ dyuòɛ̀.

³ Ké ḿ dyuòɛ̀ kà Gèɖèpɔ́ɔ̀ bǎ ma gàaɔ̀ ɓíɖíi, ké ɔ kpa ma ɔ ɖé pá nɔ̀mɔ̀ dyíin mɔ̀à dyɔún wɛ̃. Kɛbì ɔ nì ma ɔ kpóɖó-dyùàɔ̀ mú, mɔɔ ɔ seɛ ma mú nìǐn, ḿ se dyuò. Gèɖèpɔ́ɔ̀ dyuòɛ̀.

⁴ Ké gàaɔ̀ wɔ̃́ ma ɖé ɖɛ ɓě se cɛ̃ kà nìɛ kè ɖɛ ɓɛ́ nyɔǔn se kpé ɓéɖé ɓɛ́ wa ké cɛ̃ɛ.

⁵ Ní mu gàa nìà kɛ jè ɓɔ́ɖɔ́ùn, kɛɛ ḿ se ḿ mìɔùn jè ɓɔ́ɖɔ́ɔ mu. Ní mu ɖɛ ɓě tɛ̀mɛ̀ìn nyɔǔn dyí kà ɓɛ́ ḿ hwɛ̀ kpéíɛɛ jè ɓɔ́ɖɔ́ùn pū.

⁶ Kɛbì ḿ mɛ mɔ́ɔ́ ɓɔ́ɖɔ́ɔ dyiɛɛ, nìí, ḿ se zuɖuɛ́ mu, sepóɛɖé ní mu jǎàɔ̀ cɛ̃iń nììn. Kɛɛ ḿ se ɓɔ́ɖɔ́ɔ mu, sepóɛɖé ḿ se mɔ́ ɓɛ́ nyɔ ɖò ké ḿ jè ɖɛ ɓáún-ɓáún hwìɖǐi poìn, ɔ sèìn ɖɛ ɓɛ́ ɔ wɔ̃́à ḿ wĩín nyɛ ɔ kè ɖɛ ɓě ɓɛ́ ɔ dyéà ḿ nyuɛ kɛɛ ɖòùn.

⁷ Kɛɛ ɖɛ ɖò dyi ma ní kpóɖó-dyùàɔ̀ mú, ké ɔ nyùìn ma ḿ fũ̀à-fṹá kà wí nyùìn kà nyɔ fũ̀à-fṹá kɛ, ɓɛ́ ɔ kéɛ nyu ɓɛ́ ḿ ké se ḿ mìɔùn dyí ɓúáìn mìɔ ɓó ɖɛ zi dyíin nɔ̀mɔ̀ǔn séín ɓě ɓɛ́ ḿ dyé ma kà kɛɛ jè. Ké ɖɛɔ̀ nì ma kà Sétɔ̃̀ kíá nìà kɛ, ɓɛ́ ɔ ké ma ḿ ɓaɖa, ɓɛ́ mɔ́ún kɔ̃̀ ɖà ḿ mìɔùn dyí ɓúáìn mìɔ.

⁸ Ḿ nyu ma Bounɓoɔ̀ ɓaàìn-kpà tã ɓó ɖɛ nìà kɛ jè, ɓɛ́ ɔ kéɛ ḿ bũ̌ zà.

⁹ Kɛɛ ɔ cɛ̃ɛ ḿ gbo, ké ɔ ɖá, “Ní kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ɖòùn ɖé m̀ mɛ mɔ́ pū, sepóɛɖé kpé dyi m̀ dyí hwɛ̀ǐn, nìí, ní kpéɔ̀ zi dyí ɓúáuń mìɔ ɖé m̀ mú.” Ɔ jèɛɛ, ḿ kpá múàǔn mìɔ, ɓɛ́ ḿ ké ní kpéɛ̀ dyí hwɛ̀ jè ɓɔ́ɖɔ́, ɓɛ́ Kɛ́ɖɛ́ì kpéɔ̀ ké ḿ kɔ̃in ɓáìn.

¹⁰ Ké ɖɛ ɓě ní muà zɛɖɛìn nyɛɛ dè ní hwòɖǒ dyi ɓó Kɛ́ɖɛ́ì jè. Wa mɔ̀ kpéɛ̀-dyí-hwɛ̀-hwɛ̀ kè nyɔ-zùǔn-zàìn-zàìn kè ti kàmàǔn-kàmàǔn kè nyɔ-gǎ-dyéìn-dyéìn ɔ kè fũ̀à-fṹá-ɖɛ̀. Sepóɛɖé kpé dyi ḿ dyí hwɛ̀ǐn, nìí, kpé kpá ḿ dyí.

Pɔ́ɔ̀ kɔ̃̀ Kɔ́ɖèìn-nyɔ̀ ɓěɔ̀ jè gbo

¹¹ Ḿ nyu ɖɛ kà zuɖuu-nyɔ̀ nyuà kɛ, kɛɛ ɓě mɔ̀ nyɔ nyuɛ ké ḿ nyuà náa kɛ. Ɓě ɓéɖé ɓɛ́ ɓě kéɔ́ má ḿ nyɔǔn dyí tɛ̀mɛ̀ìn. Ḿ se ɖɛ kpa dyɛo, kɛɛ ḿ dyuòɛ̀ kà ḿ kpa ɖɛ kà ɓɛ́ àpɔ́sò zi dyíin nɔ̀mɔ̀ǔn ɓě nìàǒ wɛɛ kpaà ɖɛ kɛ.

¹² Ɖɛ tɛ̀mɛ̀ìn nyɔǔn dyí kà ɓɛ́ ḿ mɔ̀ àpɔ́sò jɛ́ɛ́ kɛɛ, ɓě dyé ma wa ɖé ɓě hwìɛ̀, ké wa nyùìn ma ɖé hwòɖǒ-ku-ku mú. Ɖàɓàìn-ɖɛ̀ kè ɖɛ dĩ́ín-dĩ̀ìn ɔ kè zɛ̃̀ìn-ɖɛ̀ ɓě nì ma ɓó.

¹³ Xwɛ̌ ḿ nyu ma cɔ́cì-nyɔ̀ ɓě nì dà tɔ̀ɔ̀ ɓěɛɛ kpɔ̃ɔ, ké ḿ se ná ɓě mɔ̀ùn kpɔ̃ɔ nyu kɛ́? Ɔ sèìn ḿ se ma ɓě fũ̀à-fṹá nyùìn, ɓɛ́ ɓě ké ma ḿ gbo kpá. Ɖɛ gbà nìà kɛ, ɔ jè mɛ hwɛ̀ wɛ́ɛ ɓě hwìɖǐi.

¹⁴ Gmɔ̀ nɔ̄, ḿ ɖǎ ti-dyéìn-kpà tã nyu ɖé ɓě gbo dyi jè. Ḿ se ɓě fũ̀à-fṹá nyùɛ̌n mu, sepóɛɖé ḿ mɔ́ ɓě mìɔùn, ké ɔ se ɖɛ ɓɛ́ ɓě ɓéɖéɛ. Sepóɛɖé dyú ɓěɔ̀ se ɓéɖé ɓɛ́ wa ké ɖɛ kɔ̃in mɔ́ìn ɓó waà nyɔ ɓěɔ̀ bìì, kɛɛ waà nyɔ ɓěɔ̀ mɔ̀ nyɔ ɓéɖé wa ké ɖɛ kɔ̃in mɔ́ìn ɓó waà dyú ɓěɔ̀ bìì.

¹⁵ Ní mu múàǔn kpáùn, ɓɛ́ ḿ ké ɖɛ séín ɓě ɓɛ́ ḿ ɓéɖéɛɛ peɖe ɓó ɓě jè, ɓɛ́ ḿ ké ḿ mìɔùn ɓě nyí ɖekè. Ḿ dyi kà ɓě mú ɖɛ̀ɓɛ̀ mìɔ ní, ɓě se ná mɔ́ún mú ɖɛ̀ɓɛ̀ɛ̌ mu ɖekèe?

¹⁶ Ɓě ɓɛ́ìn jǎà cɛ̃ɛ kà ḿ se ma ɓě fũ̀à-fṹá nyùìn nyɛ. Kɛɛ ɓě ɖá ḿ mɔ̀ ma nyɔ-cá-nyɔ̀, ké ḿ cá ma ɓě ɖé gbá-gbá nyu-nyu mú.

¹⁷ Ḿ zà ma ɓě ɖɛ ɖò xwa gbá-gbá-kà dyììn ɖé nyɔ ɓě ɓɛ́ ḿ tò ma kà ɖé ɓě gboɛɛ ɖò múù?

¹⁸ Ḿ ɓaà ma Tátɔ̀, ɓɛ́ ɔ ké ma ɖé ɓě gbo dyi, ké ḿ tò ma ɔ kè à ɖííɔ̀. Tátɔ̀ zà ma ɓě ɖɛ ɖò xwa gbá-gbá-kàà? Ḿ kèɔ̀ kè se ma hwòɖǒ dyúáɖòɔ̀ ɓéɖéè, ké à nyuu-ɖɛ̀ se ma dyúáɖò nìì?

¹⁹ Ɓě nìǎ hwìɖǐi poɛ̀n kà ɓɛ́ à nì ma à mìɔùn jè kɔ̃in zaìn ɖé ɓě mɔ̀ùn dyúa kɛɛ̀? À wùɖù ma kà Kɛ́ɖɛ́ì mɔ́ ɓɛ́ à ké wùɖùɛɛ ɖé Gèɖèpɔ́ɔ̀ mɔ̀ùn dyúa. À ɖɛ̀ɓɛ̀-nyɔ̀ ɓě, ɖɛ séín ɓě ɓɛ́ à nyuɛɛ, ɔ mɔ̀ ɓɛ́ à ké ɓě dyi kùìn.

²⁰ Ḿ fɛ̃̀ìn, ti ɖòɛ̀ ɓaɖaín, ḿ dyi ɖé dyiín, ḿ se ɖé ɓě dyi dyɛ̀ǐn mu kà ɓɛ́ ḿ mɔ́ ɓɛ́ ḿ kéɔ́ ɓě dyi dyɛ̀ìn nyuɛ, ké ɓě se mɔ́ún dyéɛ mu kà ɓɛ́ ɓě kɔ̃̀ ɓɛ́ ɓě kéɔ́ ḿ dyéɛ nyuɛ. Ḿ fɛ̃̀ìn, ti ɖòɛ̀ ɓaɖaín, mɔ́ún kɔ̃̀ ɖà ɖɛín-zà-zà mɔɔ hwɛ̀nɛ̌ mɔɔ dyoɖo mɔɔ nyɔ-mìɔùn-bìì-vɔ̃-vɔ̃ mɔɔ nyɔǔn-nyɛ́nɛ́-zeɖe-zeɖe mɔɔ wĩin-cɛ̃̀-cɛ̃̀ mɔɔ nyɔǔn-dyí-ɓúáìn-ɓúáìn ɔ kè zàǔn-zàǔn ɖé ɓě hwìɛ̀ dyi dyɛ̀ìn.

²¹ Ḿ fɛ̃̀ìn kà ti ní mu ɖé ɓě gbo dyiìn ɖeɛɛ, ní Gèɖèpɔ́ɔ̀ mu ḿ ɓíɖíi dyàùn ɓó ɓě dyúa kɛ. Ké ní mu vĩ̌ìn ɓó nyɔ pàɖǎ ɓě ɓɛ́ wa nyu ma nàmàǔn kĩ́ín, ké wa se ma waà nàmàǔn-kpèɖè ɓě mɔ̀à kpeɖe gbà kè gbàɖàùn-po-po ɔ kè jíí-zi-zi, ɓɛ́ wa ɖǎ ma nyuɛɛ dyi táà kɛɛ jè.