2 Kɔ̀ɖéíntĩ̀ɔ̀ 11 - Ɓǎsɔ́ɔ̀ Báɓòɔ̀

Pɔ́ɔ̀ kè nyɔ ɓě ɖáìn wa mìɔùn àpɔ́sò ké wa seɛ mɔ̀ɛ

¹ Ní mɔ́ ɓɛ́ ɓě ké ní kpeɖeɔ̀ hwòɖǒ kùìn, kɛbì ḿ mɛ nyu zuɖuu-ɖɛ̀ tííwè kɛ. Ɓě mɛ kùìn wɛ́ɛ ní kpeɖeɔ̀ hwòɖǒ.

² Ḿ kpá hwɛ̀nɛ̌ǐn ɓó ɓě jè kà ɓɛ́ Gèɖèpɔ́ɔ̀ mɔ̀ùn kpáà hwɛ̀nɛ̌ǐn ɓó ɓě mɔ̀ùn jèɛ. Ɓě nì kà màa se toɖo kɔ̃ jè dyí dyuò, ké ɔ se múàǔn vòɛɛ nìà kɛ. Ké ḿ ɖǎa ɓě nyɛ́nɛ́ín ɖáìn, ɓɛ́ ɓě ké gàa dyúáɖò nyɛ̀nɛ̀ɛ̀ dyi kpɔ̃. Gàaɔ̀ mɔ̀ Kɛ́ɖɛ́ì.

³ Kɛɛ ḿ fɛ̃̀ìn ɓɛ́ ɓěɛ̀ hwìɖǐi-poìn-ɖɛ̀ ɓěɔ̀ ní kɔ̃̀ ɖà dyíin nyìnììn, ɓɛ́ ɔ kéɛ nyu ɓɛ́ ɓě ké ɓě ɖɛ̀ɓɛ̀ǐn-ɖɛ̀ɓɛ̀ǐn nɔ̀mɔ̀ dyíin sɔ̀ ɓě hwòɖǒ bũ̌, ɓɛ́ ɓě ɓéɖéà ɓó Kɛ́ɖɛ́ì bììɛɛ dyi táà kà dyúáɖò kà sɛɔ̀ cá ma kà Íì sɛ́ɖɛ́-kà kɛ.

⁴ Sepóɛɖé nyɔ ɖò dyi dyi, ké ɔ dyi Jízɛ̀ kà kò ɖò kɔ̃̀ jè ɓɛ́ à mɔ̀ùn seà cɛ̃ɛ jè zio mú pòìn ní, nìí, ɓě kùìn ɔ kpeɖeɔ̀ hwòɖǒ cá. Ké ɓě kpɔ̃ zùù kò-kò ɖò kè bɔ̃̌ nɔ̀mɔ̀ dyíin kò-kò ɓɛ́ ɔ kè Zùùɔ̀ nyɔ ɔ kè Gèɖèpɔ́ɔ̀ bɔ̃̌ nɔ̀mɔ̀ dyíinɔ̀ nyɔ sɔ̀ìn ma kà à xwaún wɛ̃ɛ seà hwɔìn nyɛɛ dyi.

⁵ Ḿ poɛ̀n hwìɖǐi kà ɓɛ́ ḿ kpa ɖɛ ɖekè kà ɓɛ́ àpɔ́sò ɓě ɖá wa zià dyíin nɔ̀mɔ̀ǔn wɛ̃ɛ kpaà ɖɛ kɛ.

⁶ Kɛbì ḿ mɛ jǔ ɖɛ-gbɔ-dè-nyɔ̀ ɖé wùɖù-wùɖù múɛɛ, ḿ se ɖɛ-gbɔ-dè-nyɔ̀ ɖé hwòɖǒ-fɔ̀nɔ̀-fɔ̀nɔ̀ mú. À ɖǎ ɓě ɖɛ nìà kɛ dyí tɛ̀mɛ̀ìn wáɖáá ti séín ɓàɖà, ɖé ɖɛ séín mú.

⁷ Ti ḿ cɛ̃ ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ jè dyíɛɛ ɓě gboɛɛ, ḿ seɛ ma ɓě gbo cɛ̃, ɓɛ́ ɓě ké ma ɖɛ ɖò pɛ́ɛ̀. Ḿ dyà ma ḿ mìɔùn ɓíɖíi, ɓɛ́ ɓě mɔ̀ùn ké dyií ɖú. Nyuɛ ḿ nyuɛ ma kà náa kɛɛ mɔ̀ ma ɖɛ gbàe?

⁸ Ti ḿ nì ma ɖé ɓě gbo kũ̀à nyuɛń nyɛɛ, ḿ kpɔ̃ ma pɛ́ɛ̀-ɖɛ̀ sɔ̀ìn ma ɖé cɔ́cì-nyɔ̀ kà kò ɖò ɓě nì dà tɔ̀ɔ̀ ɓěɛɛ xwaún wɛ̃ɛ dyi. Ɔ nì ma pū kà ḿ nì ma wa ɖɛ gana xwa zàǐn, ɓɛ́ ḿ ké ma ɓě gbo kpáa.

⁹ Ké ti ḿ nì ma ɖé ɓě gbo, ké ḿ se ma ɖɛ ɖò ɓéɖéɛɛ, ḿ se ma ɓě fũ̀à-fṹá nyùìn ɓó ní gbo kpá jè, sepóɛɖé ɖíí ɓě sɔ̀ ma ɖé Màsèdónìà-ɓòɖòɔ̀ kɔ̃ɛɛ dyà ma ḿ ɖɛ ɓě ḿ kɔ̃̀ ɓɛ́ ḿ ké ma dyéɛ. Kà ḿ nyuɛ ma kà kĩ́ín nyɛɛ, kǎà ní muɛ nyuùn ɖé dyúa. Ḿ se gbɛ̌ jǔɛ mu, ɓɛ́ ḿ ké ɓě ma.

¹⁰ Kà ɓɛ́ Kɛ́ɖɛ́ì jǎàɔ̀ nìà ɖé ḿ mú jɛ́ɛ́ cáa, ɓɔ́ɖɔ́-ɓɔ́ɖɔ́ ɓɛ́ ḿ nìà nyuɛń nyɛɛ, ɔ se ɓɔ́í kpáa mu ɖé Àkédyà-ɓòɖòɔ̀ dà séín.

¹¹ Ɖɛ́ kɔ̃̀ jè ḿ cɛ̃à náa kɛ́? Ɔ mɔ̀, sepóɛɖé ḿ se ɓě mú ɖɛ̀ɓɛ̀ jèè? Hée, Gèɖèpɔ́ɔ̀ dyuòɛ̀ dyí kà ḿ ɖɛ̀ɓɛ̀ ɓě múɛ.

¹² Ké ɖɛ ḿ nìà nyuɛń nyɛɛ, ní muɛ nyuùn kánáá pū, ɓɛ́ ḿ ké se nyɔ ɓě ɓɛ́ wa mɔ́ ɓɛ́ wa kéà cɛ̃ kà ɓɛ́ à kè wa hwɔìn ɖé kũ̀à kɔ̃̀ jè wa ɓɔ́ɖɔ́à kɛ múɛɛ ti nyí.

¹³ Nyɔ ɓě nìà kɛ se jǎà àpɔ́sò ɓě. Wa cá nyɔǔn ɖé waà kũ̀à-nyu-nyu mú, ké wa nyu wa mìɔùn kà Kɛ́ɖɛ́ì àpɔ́sò ɓě nìà kɛ.

¹⁴ Ɖɛ nìà kɛ se ɓéɖé ɓɛ́ ɔ ké à hwìɖǐi kpèìn, sepóɛɖé Sétɔ̃̀ mìɔùn nyu ɔ mìɔùn kà ínjà nyɔ ɓɛ́ ɔ dyàà ceɛɛ nìà kɛ.

¹⁵ Ɔ jèɛɛ, ɔ gbo-nì-nyɔ̀ ɓěɔ̀ dyi wa mìɔùn nyu kà dyí-sɛ́ɖɛ́ìn-ɖɛ̀-nyu-nyɔ̀ ɓě nìà kɛɛ ní, nìí, ɔ se ɖɛ vɛ̀nɛ̀ ɖò. Ɖé mánáín nyɛɛ, kà wa nyuu-ɖɛ̀ ɓě nìà kɛɛ, kǎà ɖɛ wa mu dyéìn nyɛɛ mu nììn.

Gǎ-dyé-dyé ɓě ɓɛ́ Pɔ́ɔ̀ nyu ɖé ɔ àpɔ́sò-kũ̀àɔ̀ nyu-nyu múɛ

¹⁶ Ḿ nìɛ̀ ɓě gbo cɛ̃iń ɖe. Nyɔ ɖò ní poìn hwìɖǐi kà ḿ mɔ̀ zuɖuu-nyɔ̀ kɛ. Kɛɛ ɔ jǔ ké ɓě dyiɛ náa nyuín, ɓě mɛ kpɔ̃ dyɛ ḿ kà nyɔ kpɔ̃à zuɖuu-nyɔ̀ kɛ. Ɓě mɛ wɔ̃́ ɓɛ́ ḿ ké ɓɔ́ɖɔ́ tííwè ɖekè.

¹⁷ Ɖɛ ḿ nìà cɛ̃iń kàǔn wɛ̃ɛ, ɔ se ɖɛ ɓɛ́ Bounɓoɔ̀ mɔ́ ɓɛ́ ḿ ké cɛ̃ɛ. Ɖé ɓɔ́ɖɔ́-ɓɔ́ɖɔ́ jè nìà kɛ múɛɛ, ḿ nì wùɖùɛ̌n pū kà zuɖuu-nyɔ̀ nìà kɛ.

¹⁸ Nyɔ ɓáún-ɓáún ɓě mɔ̀ùn ɓɔ́ɖɔ́ ɓó ɓóɖó-kpàà nììn ɖɛ ɓě jè. Ɔ jèɛɛ, mɔ́ún mu ɖɛ dyúáɖòɔ̀ nyuùn ɖekè.

¹⁹ Ɓě mɔ̀ùn zi hwòɖǒ fɔ̀nɔ̀ǔn jèɛɛ, ɓě kpá múàǔn, ké ɓě kùìn zuɖuu-nyɔ̀ ɓěɔ̀ kpeɖe hwòɖǒ.

²⁰ Nyɔ ɖò dyi ɓě kɔ̃in ɓáìn, ké ɔ dyi ɓěɛ̀ ɖɛ ɓěɔ̀ ɖi, ké ɔ dyi ɖɛ ɔ mɔ́ ɓě mú nyùɛ̀n dyiɛɛ ɓě mú nyùìn, ké ɔ dyi ɔ mìɔùn nyɔ vɛ̀nɛ̀ mú nyu, ké ɔ dyi ɓě kpá dyúa taɓaín, nìí, ɓě kùìn ɔ kpeɖeɔ̀ hwòɖǒ.

²¹ Dɛ̃ nyu ḿ, ɓɛ́ ḿ kéɛ ɓě gbo cɛ̃ kà kpé zi ma à dyí hwɛ̀ǐn mìɔ ɓó ɖɛ nìà kɛ jèɛ. Kɛɛ ɖɛ kã̀ìn séín kɔ̃̀ jè nyɔ ɖò se fɛ̃̀ǐn mu ɓó ɓɔ́ɖɔ́ jèɛɛ, mɔ́ún se fɛ̃̀ǐn mu ɖekè. (Ḿ nì zuɖuu-kà wùɖùɛ̌n.)

²² Wa mɔ̀ Híìbúɖúù-nyɔ̀ ɓěe? Kǎà mɔ́ún nì ɖekè. Wa mɔ̀ Éézùɖùɛ̀-nyɔ̀ ɓěe? Kǎà mɔ́ún nì ɖekè. Wa mɔ̀ Ééɓòɖòhɛ̃́ɛ̀ nyúà-dyú ɓěe? Kǎà mɔ́ún nì ɖekè.

²³ Wa mɔ̀ Kɛ́ɖɛ́ì gbo-nì-nyɔ̀ ɓěe? Ḿ mɔ̀ gbo-nì-nyɔ̀ nɔ̀mɔ̀ dyíin ké ḿ zi wa mɔ̀ùn dyí. (Ḿ wùɖù kà sã̀à-nyɔ̀ wùɖùà kɛɛ ɖé ɖɛ nìà kɛ mú.) Ḿ ɖǎ kũ̀à nyuɛń zi mìɔ. Ḿ ɖǎ kpɔɖɔ ɖeín kpá ɓó ti pàɖǎ xwíníín. Wa ɖǎ ḿ ɓaɖauń hwèɖèìn. Ti ɓáún-ɓáún xwíníín nyɛɛ, ɔ nì kà ḿ ɖǎ ma mɛ́ɛ.

²⁴ Júù-nyɔ̀ ɓěɔ̀ ɖǎ ḿ gbàtò-wùɖù kpáɖá-nyɔ ɓaɖa-bùè sè mɛ̀nɛ̌ìn-hĩinyɛ kɔ̃ún zàìn kpa hm̀m̌.

²⁵ Nyɔ ɓě ɖǎ ḿ ɓà-cù ɓàɖàìn kpa tã. Ti ɖòɛ̀ ɓaɖaa, wa taɓaìn ma ḿ sɔ́ɔ́-kpò dyi. Méè ɖǎ ḿ wáɖáìn kpa tã. Ti ɖòɛ̀ ɓaɖaa, méè wáɖáìn ma ḿ, ké ḿ nyu ma máaún-hwùɖù dyúáɖò kè dyóɖóaún-wè dyúáɖò ɖé dyóóɔ̀ kɔ̃.

²⁶ Ḿ ɖǎ nà-nà ɓáún-ɓáún nyu mìɔ. Ḿ táà ma níɔ sèɛ̀. Nyɔ-ɖɛ-gana-xwa-zàìn-nyɔ̀ ɓěɔ̀ kè ḿ mìɔùn nììn ɓíɖí-nyɔ̀ ɓěɔ̀ ɔ kè ɓóɖó-dù kà kò ɖò ɓěɛ̀ nyɔ ɓěɔ̀ táà ma ḿ ɖáɓáa. Ḿ táà ma mɛ́ɛ ɖé hwɔɖɔ vɛ̀nɛ̀ ɓěɔ̀ mú, kè ɖé gbǎùn-fúɖúá ɓěɔ̀ kɔ̃, ɔ kè ɖé dyóóɔ̀ kɔ̃. Nyɔ ɓě ɖá wa mɔ̀ ma kà ní ɓǎto ɓěɛɛ, wa táà ma ḿ ɖáɓáa.

²⁷ Kũ̀à ɓě ḿ nyu ma kɛɛ wɛ́ìn ma ḿ ní. Ḿ dyé ma ti kàmàǔn-kàmàǔn. Ti ɖíɛ́ ɓě ɓaɖaín, mɔ́ún mɔ́ ma fɔɔ. Mɔ́ kè ní-ná-tò nyu ma ḿ. Ké ti ɖíɛ́ ɓě ɓaɖaín, ḿ se ma ɖii-ɖɛ̀ ɖò dyéɛ ɓɛ́ìn. Sɔ̃̀ɔ̀ nyu ma ḿ, ké ḿ se ma mú-po-ɖɔ̀ ɓéɖé.

²⁸ Ɓó ɖɛ tɔ̀ɔ̀ ɓě nìà kɛ wáún wɛ̃ɛ, cɔ́cì-nyɔ̀ ɓě nì dà séín nyɛɛ, wa dyí gmɔ̀ jè nì ḿ hwòɖǒ bũ̌ ti séín.

²⁹ Nyɛ́ mɔ̀ùn hwɛ̀ kpéí, ké kpé se mɔ́ún dyí hwɛ̀ɛ́? Ɖɛ́ nyu ké nyɔ tɔ̀ɔ̀ ɖò mɔ̀ùn ɓuɖu, ké ní hwòɖǒ-dyùà ní sĩɛ́?

³⁰ Ɔ jǔ ké ḿ dyi ɓéɖé ɓɛ́ ḿ ké ɓɔ́ɖɔ́ín, nìí, ní mu ɓɔ́ɖɔ́ùn ɓó ɖɛ ɓě tɛ̀mɛ̀ìn nyɔǔn dyí kà ḿ hwɛ̀ kpéíɛɛ jè.

³¹ Gèɖèpɔ́ɔ̀ mɔ̀à Bounɓo Jízɛ̀ Ɓǎa mɔ̀ nyɔ muà ɓàìn-ɓàìn dyéìn kánáá pūɛɛ dyuòɛ̀ kà ḿ se se tɔ́mɔ́uń nìɛ.

³² Ti ḿ nì ma Dìmásìkɔ̀-hwɔ̀ɖɔ̀ɔ̀ múɛɛ, gàa mɔ̀ ma hwɔɖɔɔ̀ ɓǎ ɓó Kã́á Àwéɖétɔ̀ xwíɖíiɛɛ po ma nyɔ ɓě hwɔɖɔɔ̀ gmɔ-wɔ̃̀ɔ̀ dyí, ɓɛ́ wa ké ma ḿ kpɔ̃.

³³ Kɛɛ wa po ma ḿ tìě-ɓò ɖò mú, ké wa zĩ̀ìn ma ḿ ɓí ɖò nì ma gmɔɔ̀ múɛɛ mú, ké wa síìn ma ḿ ɓíɖíi ɖé gmɔɔ̀ ɖeín. Ké ḿ sɔ̀ ma ɔ xwaún.