2 Kɔ̀ɖéíntĩ̀ɔ̀ 10 - Ɓǎsɔ́ɔ̀ Báɓòɔ̀

Pɔ́ɔ̀ zaìn ɔ kũ̀àɔ̀ jè kɔ̃in

¹ Ḿ mɔ̀ Pɔ́ɔ̀, mɔ̀ nyɔ ɓɛ́ wa ɖá ḿ dyi ɓě dyúa wùɖùǐn, ḿ dyàà ḿ mìɔùn ɓíɖíi, kɛɛ ḿ se ɖé ɓě gbo nìǐn, ḿ wùɖùà gana-kà kɛɛ, mɔ̄ nìà ɓě ɓaàǔn wɛ̃̀. Ḿ ɓaà ɓě ɓó Kɛ́ɖɛ́ì mɔ̀à pɛ̀ɛ̀-pɛ̀ɛ̀-nyɔ̀, ké ɔ kɔ̃̀ kpeɖe nɔ̀mɔ̀à dyíin nyɛɛ jè.

² Ní ɓaà ɓě ní, ɓěǐn ɖá ɓɛ́ ɓě kéɛ nyu, ɓɛ́ ḿ dyi ɖé dyiín, ḿ ké wùɖù gana-kà. Sepóɛɖé ḿ dèɛ̀ hwòɖǒ kɔ̃ kà ɓɛ́ ḿ ɓɛ́ìn wùɖùɛ̀ gana-kà ɖé nyɔ ɓě cɛ̃à kà ɓɛ́ à nyu ɓóɖó-kpàà nììn kpeɖeɛɛ gboɛ.

³ À cĩ́ ɓóɖó-kpàà kɔ̃ dyɛo, kɛɛ à se ɓóɖó-kpàà to vɔ̃uń nì.

⁴ Ɖɛ ɓě ɓɛ́ à vɔ̃̀ìn à nììn toɔ̀ kɛɛ, ɔ se ɓóɖó-kpàà nììn toún-vɔ̃̀ìn-ɖɛ̀ ɓěɔ̀. Wa mɔ̀ Gèɖèpɔ́ɔ̀ nììn toún-vɔ̃̀ìn-ɖɛ̀ ɓéɖé gana ɓě ɓɛ́ wa ké to-pèɖèìn-naín ɓě dyíin nyìnììn.

⁵ À nyìnììn nyɔǔn-dyùɛ̀ hwìɖǐi-poìn-ɖɛ̀ ɓěɔ̀ kè nyɔǔn dyí-ɓúáìn-ɖɛ̀ séín ɓɛ́ wa kã̀ìn nyɔǔn hwìè dyí, ɓɛ́ wa kéɛ nyu ɓɛ́ nyɔǔn ké se Gèɖèpɔ́ɔ̀ dyí dyuò wɛɛ dyíin. Ké à kɔ̃̀ hwìɖǐi-poìn-ɖɛ̀ séín wuɖuí kóɖó-kóɖó, ɓɛ́ wa ké Kɛ́ɖɛ́ì xwíɖíi nì.

⁶ Ɓěɛ̀ wuɖu-nyu-nyuɔ̀ ɖǎ gbɔ hwɛ̀ǐn, nìí, à ɖǎ ti dyé ɓɛ́ à ké ɖɛ séín ɓě ɓɛ́ wa se wuɖu nyuɛ́ muɛɛ gǎ kɔ̃ tò.

⁷ Ɓě mɛ dè ɖɛ ɓě nì ɓě dyúa kɛɛ dyéɖé gbo. Nyɔ ɖò dyiɛ hwòɖǒ kɔ̃ dè kà ɓɛ́ ɔ mɔ̀ Kɛ́ɖɛ́ì ɖeín-sí-nyɔ̀ kɛɛ ní, nìí, ɔ mɛ poìn ɔ mìɔùn jè hwìɖǐi ɖe. Ɔ mɛ poɛ̀n hwìɖǐi kà ɓɛ́ à mɔ̀ùn mɔ̀ Kɛ́ɖɛ́ì ɖeín-sí-nyɔ̀ ɓě kà ɓɛ́ ɔ mɔ̀ùn mɔ̀à Kɛ́ɖɛ́ì ɖeín-sí-nyɔ̀ kɛ.

⁸ Ḿ ɓɛ́ìn ɓɔ́ɖɔ́ɔ ɓó à kpéɔ̀ jè pū, ké dɛ̃ se ḿ nyuɛ́ mu. Ɔ mɔ̀ kpé ɓɛ́ Bounɓoɔ̀ nyí à, ɓɛ́ à ké ɓě dyi kùìn nyɛ, kɛɛ ɔ se ɖɛ ɓɛ́ à ké ɓě dyíin nyìnììn nyɛ.

⁹ Ḿ se mɔ́ ɓɛ́ ɔ ké nì kà ḿ nìɛ̀ nyuɛń ɓɛ́ ɓě ké fɛ̃̀ìn ɖé ní céè-ɖɛ̀ ɓěɔ̀ múɛ.

¹⁰ Sepóɛɖé ɖɛ nyɔ ɖíɛ́ ɓě cɛ̃ɛ kɛà kɛ̀. Wa ɖá, “Wuɖu ɓě nìà ɖé ɔ céè-ɖɛ̀ ɓěɔ̀ múɛɛ ku wɔ̃, ké wa mɔ̀ gana-wùɖù ɓě. Kɛɛ ɔ jǔ ké ɔ mìɔùn dyi à gbo nìǐn, nìí, ɔ hwɛ̀ kpéí, ké ɔ wuɖu ɓěɔ̀ se ɖɛ ɖò mú nì fɔɔ.”

¹¹ Nyɔ mɔ̀ nyɔ cɛ̃à ɖɛa kɛɛ, ɔ mɛ wɔ̃́ ɖɛ nìà kɛ múin. Ɔ mɔ̀ ɖɛ ɓě ɓɛ́ à se ɖé ɓě gbo nìǐn, à cɛ̃à à céè-ɖɛ̀ ɓěɔ̀ múɛɛ, ɔ mɔ̀ ɖɛ ɓɛ́ à mu nyuùn ɔ jǔ ké à dyi ɖé dyiín nyɛ.

¹² Ḿ seɛ cɛ̃ɛ ɓɛ́ìn, ɓɛ́ ḿ ké níiń, à kè nyɔ ɓě ɓɛ́ wa ɓàìn wa mìɔùn wɛ̃ɛ nì wáká dyúáɖò kɔ̃. Ké ḿ se wa ḿ mìɔùn dyí poɛ̀n ɓɛ́ìn. Wa poìn wa mìɔùn jè hwìɖǐi kà wa mɔ́ɔ nyuɛ dyiɛ, ké wa dyi ɖɛ wa ɓɛ́ìn nyuɛ kɛɛ jè hwìɖǐi poìn ní, nìí, wa nyuɛ kà wa ɓɛ́ìn nyuɛ kɛ. Wa se ɖɛ-múin-wɔ̃́-wɔ̃́ ɖò ɓéɖé fɔɔ.

¹³ Kɛɛ à nììn ɓɔ́ɖɔ́-ɓɔ́ɖɔ́ se dɛ̀ ɓɛ́ ɔ ɓéɖé ɓɛ́ ɔ kéɔ́ sèìn nyɛɛ ziɛ́ mu. Kũ̀à ɓɛ́ à kéà nyuɛɛ, Gèɖèpɔ́ɔ̀ ɖǎ ɔ sèìn-naín nyu, ké kũ̀à ɓɛ́ à nyu ma kà ɖé ɓě gboɛɛ kpá ɖé ɖekè. Ké ɓóɛ̀ à ɓɔ́ɖɔ́-ɓɔ́ɖɔ́ɔ̀ mu sèìn nyɛ̀nɛ̀ɛ̀.

¹⁴ Ké kà ɓɛ́ kũ̀à ɓɛ́ à nyu ma ɖé ɓě hwìɛ̀ kɛɛ kpáà ɖé ɖekèɛɛ, ti à dyi ma ɖé ɓě gbo, ké à dyà ma bɔ̃̌ nɔ̀mɔ̀ dyíin ɓá Kɛ́ɖɛ́ì dyíɛɛ ɓě gboɛɛ, à se ma à bã̀àɔ̀ péɖé.

¹⁵ Ɔ jèɛɛ, kũ̀à ɓɛ́ nyɔ tɔ̀ɔ̀ ɓě ɖǎà nyuɛɛ, à ní ɓɔ́ɖɔ́ ɓóɛ jè. Ɔ nì bã̀à ɓɛ́ Gèɖèpɔ́ɔ̀ ɖǎà à bìì nyuɛɛ ɖé ɖeín. Kɛɛ à dèɛ̀ hwòɖǒ kɔ̃ kà ɓěɛ̀ hwìɖǐǐ-taɓa-taɓaɔ̀ mu dyí ɓúáùn wɛ̃, ɓɛ́ à ké kũ̀à vɛ̀nɛ̀ ɖé ɓě hwìɛ̀ nyuɛ ɓɛ́ìn. Kɛɛ à se à bã̀àɔ̀ péɖéɛ mu.

¹⁶ Nìí, à ɓɛ́ìn bɔ̃̌ nɔ̀mɔ̀ dyíinɔ̀ cɛ̃ɛ ɖé ɓóɖó tɔ̀ɔ̀ nì ɖé ɓě mɔ̀ùn ɖeín nyɛɛ kɔ̃, ɓɛ́ à ké se ɖɛ ɓɛ́ nyɔ ɖò mɔ̀ùn ɖǎ ɖé ɔ kũ̀à-nyu-naínɔ̀ nyuɛɛ jè ɓɔ́ɖɔ́.

¹⁷ Kɛɛ Gèɖèpɔ́ɔ̀-cèè-ɖɛ̀ɔ̀ ɖá, “Nyɔ ɓɛ́ ɔ ɓɔ́ɖɔ́ɛɛ mɛ ɓɔ́ɖɔ́ ɓó Bounɓoɔ̀ jè.”

¹⁸ Sepóɛɖé nyɔ kɔ̃̀ mú ɓɛ́ Bounɓoɔ̀ hwòɖǒ dèìn dyiɛɛ, ɔ mɔ̀ nyɔ ɖé ɔ kpɔ̃ dyi. Ɔ se nyɔ ɓɛ́ ɔ hwòɖǒ dèàìn ɔ mìɔùn múin nyɛ.