2 Kánáníkɔ̀ 8 - Ɓǎsɔ́ɔ̀ Báɓòɔ̀

Kã́á Sã́ɖómàà nyuu-ɖɛ̀ ɓě

¹ Ti Kã́á Sã́ɖómà pòìn Bounɓoɔ̀ gbǒɔ̀ kè ɔ mìɔùn nììn mú-cĩ́-gbòɔ̀ kɛɛ mɔ̀ ma zɔ̃ kpáɖá-nyɔ.

² Sɔ̀ìn ɓóɛ gboɛɛ, ɔ po ma hwɔɖɔ ɓě ɓɛ́ Híwàɖàùn mɔ̀à Táà-kã̀ǎɔ̀ kɛɛ nyí ma ɔ kɛɛ ɖe ɖie, ké ɔ po ma ɖé Éézùɖùɛ̀-nyɔ̀ ɖíɛ́ ɓě, ɓɛ́ wa ké ɖé cĩ́.

³ Ké Sã́ɖómà kpa ma Hámà-Zóɓà-hwɔ̀ɖɔ̀ɔ̀ to kɔ̃, ké ɔ ɖuɛ ma toún.

⁴ Ké Sã́ɖómà po ma Támà-hwɔ̀ɖɔ̀ nìà ɖé Júɖà Gbǎùn-fúɖúáɔ̀ kɔ̃ɛ kè ɖɛ-mú-dyi-dèìn-hwɔ̀ɖɔ̀ ɓě ɓɛ́ ɔ dè ma ɖé Hámà-ɓòɖòɔ̀ kɔ̃ɛ.

⁵ Ké ɓó kɔ̃in ɖeɛɛ, ɔ po ma Bɛ̀-Hówɔ̀nɔ̀-hwɔ̀ɖɔ̀ɔ̀ ɖé xwía kè ɖé ɓíɖíi. Ɔ nyu ma ɔ toún-pèɖèìn-hwɔ̀ɖɔ̀ mú. Ɔ cɛ̃̀ìn ma ɔ gmɔ ɖei, ké ɔ po ma ɓó gmɔ-wɔ̃̀ ɓě kèɛ̀ gbǎìn-ɖɛ̀ ɓě.

⁶ Ké ɔ po ma Bááɖɔ̀-hwɔ̀ɖɔ̀ɔ̀ kè hwɔɖɔ ɓě kɔ̃̀ mú ɔ dèìn ɔ ɖɛ ɓě dyiɛ ɔ kè hwɔɖɔ ɓě nì ɓó, kɔ̃̀ mú ɔ sǒ ɓěɔ̀ kè ɔ hwíì-sǒ ɓěɔ̀ dèìn dyiɛ. Ké ɔ po poo-ɖɛ̀ tɔ̀ɔ̀ ɓě ɓɛ́ ɔ mɔ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Ɖɛ́ɓèɖɔ́ùn-ɓòɖòɔ̀ kɔ̃ ɔ kè ɖé ɔ kã́á-ɓòɖòɔ̀ wáká tɔ̀ɔ̀ ɓě kɔ̃ poɛ dyiɛ.

^7-8 Nyɔ ɓě ɓɛ́ Sã́ɖómà nyu ma kà pɔ́ɖɔ́sɔ́ múɛɛ mɔ̀ Kénà-ɓòɖòɔ̀ nyɔ ɓě ɓɛ́ wa sè ma ɖé ɓóɖóɔ̀ mú, ɓɛ́ Éézùɖùɛ̀-nyɔ̀ ɓěɔ̀ se zɔ̃̌ɔ̀ kà ɖáɓá ti ɓɛ́ wa ɖú zɔ̃̌ɔ̀ kà ɓóɖóɔ̀ dyíɛɛ nììn xwíníín-dyù ɓě. Nyɔ ɓěɔ̀ mɔ̀ Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀. Waà xwíníín-dyù ɓě mɔ̀ pɔ́ɖɔ́sɔ́ kánáá pū.

⁹ Kɛɛ Sã́ɖómà se ma Éézùɖùɛ̀-nyɔ̀ ɖò gǐì mú nyu ɓó ɔ kũ̀àɔ̀ jè. Wa mɔ̀ ma ɔ sójà ɓě kè sójà-nàìn-nyɔ̀ ɓě kè hwíì-sǒ-nàìn-nyɔ̀ ɓě ɔ kè sǒ-nàìn-nyɔ̀ ɓě.

¹⁰ Ɓó kɔ̃in ɖeɛɛ, Sã́ɖómà ɓéɖé ma gɔ̌mànà-nyɔ̀ hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké wa mɔ̀ ma nyɔ ɓěɔ̀ wuɖuí-kɔ̃̀-nyɔ̀.

¹¹ Ké Sã́ɖómà zà ma ɔ gmàà mɔ̀à Íjè-kã̀ǎɔ̀ dyú-mààɔ̀ kɛɛ ɖé Dèɓé ɓíɖí-hwɔ̀ɖɔ̀ɔ̀ mú, ké ɔ dyà ma ɔ ɖé gbǒ ɓɛ́ ɔ ɖǎ ma kà po ɓó ɔ bììɛɛ mú, sepóɛɖé ɔ cɛ̃ɛ ma, ké ɔ ɖá, “Ní gmààɔ̀ se ɖé Dèɓé mɔ̀à Éézùɖùɛ̀-nyɔ̀ ɓěɔ̀ kã́áɔ̀ kɛɛ ɓíɖí-gbǒɔ̀ mú cĩ́ɛ mu, sepóɛɖé Bounɓoɔ̀ gbɔ̀ɖɔ̀ɔ̀ nì ma ɖé Dèɓé ɓíɖí-hwɔ̀ɖɔ̀ɔ̀ mú, ké dɛ̀ kã̀ìn séín ɓɛ́ Bounɓoɔ̀ gbɔ̀ɖɔ̀ɔ̀ nì kɛɛ hwɛ̀ mú.”

¹² Ɓó tia ɓaɖaa, Sã́ɖómà nyu ma fɔ̃ɔ-sàǎ-zàìn-ɖɛ̀ ɓě ɓó Bounɓoɔ̀ bìì ɓó Bounɓoɔ̀ sáa-kɔ̃-zàìn-gbàà ɓɛ́ ɔ po ma kà ɓó Bounɓoɔ̀ gbǒɔ̀ dyúa kɛɛ kɔ̃.

¹³ Sã́ɖómà nyu ma sáa-zàìn-ɖɛ̀ ɓě dyììn ɖé kà Mózèɛ̀ gmaɔ̀ nyuɛ ma cɛ̃ɛ ɓá wé séín kè hwɔ-wè ɓěɔ̀ ɖò-ɖò jè dyíɛɛ mú. Hwɔ-dù kò-kò ɓěɔ̀ mɔ̀ Gèɖèpɔ́ɔ̀ fɔ̀-wèɔ̀ kè Dɛ̀nɛ̀-Ɖìè-Hwèɖè-hwɔ̀ɔ̀ ɔ kè hwɔ-dù tã ɓɛ́ wa pa ɓó zɔ̃ séín xwíníín nyɛ. Hwɔ-dù tã ɓěɔ̀ mɔ̀ Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ kè Wíkì-hwɔ̀ɔ̀ ɔ kè Ɓeè-Dyù-hwɔ̀ɔ̀.

¹⁴ Ké ɔ po ma sáa-zà-nyɔ̀ ɓěɔ̀ kpoo ɓě mú ɓó wa nììn kũ̀à ɓěɔ̀ nyu jè dyììn ɖé kà ɔ ɓǎ Dèɓé nyuɛ ma cɛ̃ɛ kɛɛ mú. Ké kà dyúáɖòɔ̀ kǎà ɔ po ma Ɖíìváà-nyɔ̀ ɓěɔ̀ kpoo ɓě mú ɓó wa nììn kũ̀à mɔ̀ Gèɖèpɔ́ɔ̀ gbo-ɓèɖèìn-ɓèɖèìn kè sáa-zà-nyɔ̀ ɓěɔ̀ gbo-kpá-kpá ɓó wé kè wé xwíníín nyɛɛ jè. Ké Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ nì wa nììn kpoo ɓě mú ɓó gmɔ-wɔ̃̀ ɓěɔ̀ gbo. Ɔ nyuɛ ma náa, sepóɛɖé kǎà Dèɓé mɔ̀à Gèɖèpɔ́ɔ̀ gbo-nì-nyɔ̀ɔ̀ kɛɛ nyuɛ ma cɛ̃ɛ.

¹⁵ Ké ɖɛ ɖò se ma hwìǐ sɔ̀ìn ɓá ɖɛ séín ɓě ɓɛ́ Dèɓé cɛ̃ ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ gbo ɓá ɖɛ-mú-dyi-dèìn-naín ɓěɔ̀ kè ɖɛ tɔ̀ɔ̀ ɓěɔ̀ jè dyíɛɛ dyí.

¹⁶ Kǎà Sã́ɖómà nyu ma Bounɓoɔ̀ gbǒɔ̀ kũ̀à séín ɓěɔ̀ dyí hwɔɔ sɔ̀ìn ɖé ti ɓɛ́ wa dè ma ɔ gbǒɔ̀ hìɖì-kpàa kéɛ dyí-hwɛ̀-hwɛ̀ dyɛ̀ìn nyɛ.

¹⁷ Sɔ̀ìn ɓóɛ gboɛɛ, Sã́ɖómà mu ma ɖé Ɛ́zìɔ̀ùn-Géɓɛ̀-hwɔ̀ɖɔ̀ɔ̀ kè Éɖàà-hwɔ̀ɖɔ̀ ɓɛ́ wa nì ma ɖé Dyóó Zĩ-zãɔ̀ wĩín, ɖé Íɖɔ̀ùn-ɓòɖòɔ̀ kɔ̃ɛɛ mú.

¹⁸ Ké Híwàɖàùn tò ma ɔ méè ɓě kè méèǐn-gɔ̀ɖɔ̀ɔ̀ ɓě gbo, ké wa kè Sã́ɖómà nììn gbo-nì-nyɔ̀ ɓěɔ̀ kpá ma méè ɓěɔ̀ mú, ké wa mu ma ɖé Ófì-ɓòɖòɔ̀ kɔ̃. Ké wa dyà ma Kã́á Sã́ɖómà góò ɓɛ́ ɔ xwa-ku-ku ɓɛ́ìn ma pṹá-dyèɖè táázĩ̀ìn kpáɖá-nyɔ ɓaɖa-bùè sè tã kè hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ sɔ̃́ ɓaɖa-bùè ɖuɛ kɛ.