2 Kánáníkɔ̀ 6 - Ɓǎsɔ́ɔ̀ Báɓòɔ̀

Sã́ɖómà wùɖù Éézùɖùɛ̀-nyɔ̀ ɓěɔ̀ gbo

¹ Ti ɓɛ́ Bounɓoɔ̀ dĩ́ín-dĩ̀ìnɔ̀ ɖǎ ma ɖé ɔ gbǒɔ̀ múin dyíìn nyɛɛ, Sã́ɖómà ɓaà ma, ké ɔ ɖá, “Bounɓo, m̀ ɖǎa gã, ɓɛ́ m̀ ké ní-kpò kpɛ̃̀ ɖò mú cĩ́.

² Ɓó kàǔn wɛ̃ɛ, ḿ ɖǎ m̀ bìì gbǒ kpa ɖɛ nìà kɛ po. Ɔ mɔ̀ pá ɓó m̀ bìì, ɓɛ́ m̀ ké ɖé cĩ́ kánáá pū.”

³ Ti ɓɛ́ Kã́á Sã́ɖómà ɖǎ ma ɓaà-wùɖùɔ̀ dúí jaɖaa, ɔ cɛ́ɛ̀ ma xwa, ké ɔ gmɔ̀ìn ma ɖé Éézùɖùɛ̀-nyɔ̀ ɓě nyànà ma kà ɓó dyiɛɛ gbo, ké ɔ po ma wa mana kɔ̃,

⁴ ké ɔ ɖá, “Ḿ po Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ zùo, sepóɛɖé ɔ ɖǎ ɖɛ ɔ ɖáìn ma ḿ ɓǎ Dèɓé nyɛ́nɛ́ín nyɛɛ nyu. Bounɓoɔ̀ cɛ̃ɛ ma ḿ ɓǎ Dèɓé gbo, ké ɔ ɖá,

⁵ ‘Sɔ̀ìn ɓó wé kɔ̃̀ ɓaɖa ɓɛ́ ḿ zà zɔ̃̌ɔ̀ kà ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ ɖé Íjè-ɓòɖòɔ̀ kɔ̃ɛɛ, ḿ se ma hwɔɖɔ ɖò gã ɖé waà xwéɖé-dù ɓěɔ̀ ɖò hwìɛ̀, ɓɛ́ wa ké ɖé ḿ bìì gbǒ ɖò po. Ké ḿ se ma nyɔ ɖò gã, ɓɛ́ ɔ ké ní nyɔ ɓěɔ̀ wuɖuí-kɔ̃̀-nyɔ̀ jǔ.

⁶ Kɛɛ ḿ ɖǎ Jùɖúsɛ̀ɖɛ̀ìn-hwɔ̀ɖɔ̀ɔ̀ gã, ɓɛ́ nyɔǔn ké ɖé ḿ ɓièìn, ké ḿ ɖǎ mɔ̀ Dèɓé gã, ɓɛ́ m̀ ké ní nyɔ ɓěɔ̀ wuɖuí kɔ̃̀.’ ”

⁷ Ké Sã́ɖómà kpa ma wuɖu dyúa, ké ɔ ɖá, “Ḿ ɓǎ Dèɓéɛ̀ hwòɖǒ poɛ ma gbɔ, ɓɛ́ ɔ ké ma gbǒ ɖò po ɓó Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ bìì.

⁸ Kɛɛ Bounɓoɔ̀ cɛ̃ɛ ma ḿ ɓǎ Dèɓé gbo, ké ɔ ɖá, ‘Ɖɛ nì hwòɖǒ poà gbɔ ɓá ḿ bìì gbǒ ɖò po jè dyíɛɛ mɔ̀ ɖɛ sɛ́ɖɛ́ìn dyí.

⁹ Kɛɛ mɔ̀ seɛ poɛ́ mu. Nì xwíníín-zà-dyù-gàà mɔ̀ nyɔ muɛ poùn.’

¹⁰ “Ɓó kàǔn wɛ̃ɛ, Bounɓoɔ̀ ɖǎ ɖɛ ɔ cɛ̃ ma kà kɛɛ nyu. Ḿ ɖǎ ḿ ɓǎ bɛ̃̌ǐn sè, ké mɔ̄ mɔ̀ǎ Éézùɖùɛ̀-ɓòɖòɛ̀ kã́á. Ké ḿ ɖǎ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ bìì gbǒ nìà kɛ po.

¹¹ Ké ɓó kɔ̃in ɖeɛɛ, ḿ ɖǎ gma-gbɔ̀ɖɔ̀ɔ̀ kɔ̃̀ mú ɓɛ́ dèè-wùɖù nìà ɓó Bounɓoɔ̀ kè Éézùɖùɛ̀-nyɔ̀ ɓěɔ̀ pṹa kɛɛ nìà kɛɛ ɖé dè.”

Sã́ɖómàà ɓaà-wùɖù

^12-13 Ɓó tia ɓaɖaa, Sã́ɖómà nyànà ma gbàà ɖò kɔ̃ dyi. Ɔ mɔ̀ gbàà ɓɛ́ Sã́ɖómà nyu ma kɛ. Gbààɔ̀ mɔ̀ ma bàɖàsǐ. Ɔ tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́, ké ɔ xwíɖí-kù mɔ̀ ma ɓáɖáa dyúáɖò kè jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ mɛ̀nɛ̌ìn-ɖò. Ɔ nyànàìn ma gbààɔ̀ ɖé Bounɓoɔ̀ gbǒɔ̀ kɔ̃̀pã́ùnɔ̀ mú dyi, ɓó sáa-kɔ̃-zàìn-gbààɔ̀ dyéɖé zɔ̃̌. Ké ɔ taɓa ma kɔ́-dù hwuɖu ɓó nyɔ séín ɓěɔ̀ dyéɖé waí, ké ɔ tò ma ɔ sɔ̃ sɔ̃́ɔ̀ dyií.

¹⁴ Ké ɔ ɖú ma ɓaà-wùɖù dyí, ké ɔ ɖá, “Óó Bounɓo, mɔ̀ mɔ̀à Éézùɖùɛ̀ Gèɖèpɔ́ɔ̀ kɛɛ, gèɖèpɔ́ɔ̀ kà kò ɖò se ɖé dyɔún mɔɔ nɔ̄ ɓóɖó-kpàà kɔ̃ nì, ɓɛ́ ɔ ké nì kà m̀ nìà kɛ. M̀ kpɔ̃ dèè-wùɖù ɓá ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ ɓɛ́ m̀ ɓéɖéà ɓó nì nyɔ ɓě ɓɛ́ wa nyu nì wuɖu hwòɖǒɛ̀-ɖé-hwɛ̀-kà kɛ bììɛɛ jè dyíɛɛ dyi.

¹⁵ M̀ ɖǎ ɖɛ m̀ ɖáìn ma kà ḿ ɓǎ Dèɓé mɔ̀à nì gbo-nì-nyɔ̀ɔ̀ kɛɛ nyɛ́nɛ́ín nyɛɛ nyu. Ɖɛ ɓě ɓɛ́ m̀ cɛ̃ ma kà kɛɛ séín ɖǎ ná kpáa hwɛ̀ ɓó zɛ̃̌ɛ̀.

¹⁶ Ɓó kàǔn wɛ̃ɛ, Bounɓo, mɔ̀ mɔ̀à Éézùɖùɛ̀ Gèɖèpɔ́ɔ̀ kɛɛ, ní ɓaà m̀ ní, nyu ɖɛ tɔ̀ɔ̀ ɓɛ́ m̀ ɖáìn ma kà ḿ ɓǎ nyɛ́nɛ́ín nyɛ. Ɖɛɔ̀ mɔ̀, m̀ cɛ̃ɛ ma ɔ gbo, kà ɔ jǔ ké ɔ xwíníín-dyù ɓěɔ̀ dyi nì wuɖu dyi kpɔ̃ kóɖó-kóɖó kà ɔ mɔ̀ùn nyuɛ ma kà kɛɛ ní, nìí, wa ɖò mɔ̀ nyɔ mu Éézùɖùɛ̀-ɓòɖòɔ̀ kã́á jǔùn kánáá pūɛ.

¹⁷ Óó Bounɓo, mɔ̀ mɔ̀à Éézùɖùɛ̀ Gèɖèpɔ́ɔ̀ kɛɛ, ɓó kàǔn wɛ̃ɛ, m̀ mɛ nyuɛ ɓɛ́ ɖɛ séín m̀ ɖáìn ma kà nì gbo-nì-nyɔ̀ Dèɓé nyɛ́nɛ́ín nyɛɛ ké ná kpá.

¹⁸ “Óó Gèɖèpɔ́ɔ̀, ḿ ɖǎ gbǒ nìà kɛ po ɓó m̀ bìì. Kɛɛ nì mu nɔ̄ nyɔǔn hwìɛ̀ cĩ́ìn nɔ̄ ɓóɖó-kpàà kɔ̃ jɛ́ɛ́ cáà? Dyéɛ, ɖé dyɔún ɓúá dyí mìɔ cá, kɛɛ ɖé ɓíè dyí ɓó m̀ bìì. Kà ɔ nìà náa, nìí, xwɛ̌ m̀ ɓɛ́ìn gbǒ nìà kɛ mú ɓɛ́ìn nyɛ́?

¹⁹ Bounɓo, mɔ̀ mɔ̀à ní Gèɖèpɔ́ɔ̀ kɛɛ, ḿ mɔ̀ nì gbo-nì-nyɔ̀. M̀ mɛ tò ní ɓaà-wùɖùɔ̀ gbo ɖùǔ, ɓɛ́ m̀ ké ɖɛ ḿ nìà m̀ zɔ̀ǐn nyɛɛ nyu.

²⁰ M̀ mɛ gmɔ̀ gbǒ nìà kɛ dyí ɓó dyóɖóaún kè máaún, sepóɛɖé ɔ mɔ̀ pá ɓɛ́ m̀ ɖǎ gã, ɓɛ́ nyɔǔn ké ɖé m̀ ɓièìn nyɛ. Ti ɓɛ́ ní mu nɔ̄ gbǒ nìà kɛ gbo gmɔ̀ìn, ɓɛ́ ḿ ké ɓaà kɛɛ, nìí, m̀ mɛ wɔ̃́ ní ɓaà-wùɖùɔ̀.

²¹ Ti ɓɛ́ ḿ kè nì nyɔ ɓěɔ̀ mu nɔ̄ pá nìà kɛ gbo gmɔ̀ìn, ɓɛ́ à ké ɓaà kɛɛ, mɔ̀ nìà ɖé dyɔún, dɛ̀ mɔ̀à nì cĩ́-naínɔ̀ kɛɛ, m̀ mɛ wɔ̃́ à wuɖuɔ̀, ɓɛ́ m̀ ké à nàmàǔn ɓěɔ̀ kɔ̃in zĩ̀ìn.

²² “Ɔ jǔ ké wa dyi nyɔ ɖò zaa kpɔ̃̀ìn ɓá ɖɛ gbà ɖò ɓɛ́ ɔ nyu ɔ mǔè ɖò bũ̌ɛɛ jè dyí, ké wa dyi ɔ nɔ̄ nì sáa-kɔ̃-zàìn-gbààɔ̀ gbo dyà, nɔ̄ nì gbǒ nìà kɛ gbo, ɓɛ́ ɔ ké gboò kà ɔ se ɖɛɔ̀ nyuɛɛ ní,

²³ nìí, mɔ̀ nìà ɖé dyɔún wɛ̃ɛ, m̀ mɛ wɔ̃́ ɖɛ séín ɓěɔ̀, ɓɛ́ m̀ ké nì gbo-nì-nyɔ̀ ɓěɔ̀ zaa wɔ̃ po, ɓɛ́ m̀ ké nyɔ zaaɔ̀ kpɔ̃ɛɛ gǎ ɔ ɓéɖé ɔ ké dyéɛɛ ɔ kɔ̃ tò, ɓɛ́ m̀ kéɛ nyu ɓɛ́ nyɔ seà ɖɛ gbà ɖò nyuɛɛ ké buɛ̀.

²⁴ “Ɔ jǔ ké nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ mú-nyɛ́-nyɔ̀ ɓě dyi wa toún ɖu ɓó nàmàǔn ɓɛ́ wa nyu m̀ bũ̌ɛɛ jè, ké wa dyi wa mìɔùn ɓíɖíi dyà, ké wa dyi waà nàmàǔnɔ̀ dyi táà, ké wa dyi nɔ̄ gbǒ nìà kɛ mú dyi, ké wa dyi m̀ ɓaà, ɓɛ́ m̀ ké waà nàmàǔnɔ̀ kɔ̃in zĩ̀ìn ní,

²⁵ nìí, mɔ̀ nìà ɖé dyɔún wɛ̃ɛ, m̀ mɛ wɔ̃́ waà ɓaà-wùɖùɔ̀. M̀ mɛ zĩ̀ìn nì nyɔ ɓěɔ̀ nàmàǔnɔ̀ kɔ̃in, ɓɛ́ m̀ ké wa ɓóɖó ɓɛ́ m̀ nyí zɔ̃̌ɔ̀ kà wa kè wa ɓǎ nììn ɓǎ ɓěɛɛ kɔ̃ dyà ɖe.

²⁶ “Ɔ jǔ ké m̀ dyi dyɔɔ̀ dyí kã ɓó nàmàǔn ɓɛ́ nì nyɔ ɓěɔ̀ nyu m̀ bũ̌ɛɛ jè, ké níɔ̀ se ɖaɓa, ké wa dyi wa mìɔùn ɓíɖíi dyà, ké wa dyi nàmàǔnɔ̀ dyi táà, ké wa dyi nɔ̄ gbǒ nìà kɛ gbo gmɔ̀ìn, ké wa dyi m̀ ɓaà ɓó gǎ ɓɛ́ m̀ tò wa kɔ̃ɛɛ jè ní,

²⁷ nìí, mɔ̀ nìà ɖé dyɔún wɛ̃ɛ, m̀ mɛ wɔ̃́ waà ɓaà-wùɖùɔ̀. Ɓɔ̌ɔ̀, m̀ mɛ zĩ̀ìn nì nyɔ ɓěɔ̀ nàmàǔnɔ̀ kɔ̃in, sepóɛɖé m̀ ɖǎa wa tɛ̀mɛ̀ìn kà wa ké cĩ́ɛ nyuɛ. Ɔ ɖǎ ná nìǐn, nìí, m̀ mɛ tò ní ɓó ɓóɖó ɓɛ́ m̀ nyí zɔ̃̌ɔ̀ kà nì nyɔ ɓěɔ̀ ɓɛ́ ɔ kéà waà kɔ̃̀ɔ̀-ɖɛ̀ jǔɛɛ kɔ̃.

²⁸ “Ɔ jǔ ké mɔ́ dyi ɓóɖóɛ̀ kɔ̃ kpá, mɔɔ ké gǎ ɖò dyi nì nyɔ ɓěɔ̀ kɔ̃ dyi, mɔɔ ké ɓáá-ɖɛ̀ dyíin-nyìnììn-ɖɛ̀ kò-kò ɓě dyi waà ɓáá-ɖɛ̀ ɓěɔ̀ dyíin nyìnììn dyììn ɖé ɓáá-ɖɛ̀ ɓěɔ̀ kpã-kpã kè waà mí ɓěɔ̀ kɔ̃in-páɖáìn-páɖáìn mú, mɔɔ kpã̌ùn-tò dyi ɓóɖóɛ̀ kɔ̃ dyi, mɔɔ ké nì nyɔ ɓěɔ̀ mú-nyɛ́-nyɔ̀ ɓě dyi wa to kɔ̃ dyà, mɔɔ ké wɛ́ tɔ̀ɔ̀ ɓě ɖò dyi wa kpɔ̃,

²⁹ ké wa dyi m̀ ɓaà ní, nìí, m̀ mɛ jǔ waà ɓaà-wùɖùɔ̀ gɔ̃̌. Ɔ jǔ ké nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ ɖò dyi nyɔ-bũ̌in-puà-ɖɛ̀ ɖò mɔɔ wìì-ɖɛ̀ ɖò dyí dyé, ké ɔ dyi nɔ̄ gbǒ nìà kɛ gbo sɔ̃ tòìn, ké ɔ dyi ɓaà ní,

³⁰ nìí, mɔ̀ nìà ɖé dyɔún mɔ̀à nì cĩ́-naínɔ̀ kɛɛ, m̀ mɛ jǔ nyɔɔ̀ ɓaà-wùɖùɔ̀ gɔ̃̌, ɓɛ́ m̀ ké ɔ kɔ̃in zĩ̀ìn, ɓɛ́ m̀ ké ɔ gbo kpá. M̀ ɖòùn mɔ̀ nyɔ dyuò nyɔǔn-dyùɛ̀ hwìɖǐi-poìn-ɖɛ̀ dyí. Ɔ jèɛɛ, m̀ mɛ pɛ́ɛ̀ nyɔ ɖò-ɖò séín kà ɔ kũ̀à-sɔ̃̀ nyu nìɛ̀ kɛ,

³¹ ɓɛ́ nì nyɔ ɓěɔ̀ hwòɖǒ ké m̀ dyi fɛ̃̀ìn, ɓɛ́ wa ké nì wuɖu nyu kánáá pū ɓó ti séín wa mu ɓóɖó ɓɛ́ m̀ nyí zɔ̃̌ɔ̀ kà wa ɓǎ nììn ɓǎ ɓěɛɛ kɔ̃ cĩ́ìn nyɛ.

³² “Ɔ jǔ ké ɖíà ɖò ɓɛ́ ɔ cĩ́ ɖé ɓóɖó vɛ̃in ɖò kɔ̃ɛɛ dyi ɖɛ ku kɔ̃in ɓě ɓɛ́ m̀ ɖǎ nì nyɔ ɓěɔ̀ bìì nyuɛɛ bɔ̃̌ wɔ̃́, ké ɔ dyi nɔ̄ gbǒ nìà kɛ mú dyi, ké ɔ dyi m̀ ɓaà ní,

³³ mɔ̀ nìà ɖé dyɔún mɔ̀à nì cĩ́-naínɔ̀ kɛɛ, m̀ mɛ jǔ ɔ ɓaà-wùɖùɔ̀ gɔ̃̌, ɓɛ́ m̀ ké ɖɛ ɔ zɔ̀ìn kà m̀ kɛɛ ɔ bìì nyu, nìí ɓɛ́ nyɔ séín nì ɓóɖó-kpàà kɔ̃ɛɛ ké m̀ dyí dyuò, ɓɛ́ wa ké nì wuɖu nyu, kà dyúáɖò kà nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ nyuà kɛ. Ɔ dyi ná nìǐn, nyɔǔn muɛ dyuòùn kà nì gbǒ ɓɛ́ ḿ ɖǎà poɛɛ mɔ̀ pá kɔ̃̀ mú ɓɛ́ wa ké m̀ ɓièìn nyɛ.

³⁴ “Ɔ jǔ ké nì nyɔ ɓěɔ̀ dyi waà mú-nyɛ́-nyɔ̀ ɓěɔ̀ to kɔ̃ kpa, dɛ̀ kã̀ìn séín nì mu wa tòìn nyɛ, ké wa dyi nɔ̄ hwɔɖɔ ɓɛ́ m̀ ɖǎà gã kɛ kè gbǒ ɓɛ́ ḿ ɖǎà m̀ bìì poɛɛ gbo gmɔ̀ìn, ké wa dyi m̀ ɓaà ní,

³⁵ nìí, mɔ̀ nìà ɖé dyɔún wɛ̃ɛ, m̀ mɛ wɔ̃́ waà ɓaà-wùɖùɔ̀, ɓɛ́ m̀ kéɛ nyu ɓɛ́ wa ké toɔ̀ ɖu.

³⁶ “Ɔ jǔ ké nì nyɔ ɓěɔ̀ dyi m̀ nàmàǔn bũ̌ nyu, kà ɓɛ́ nyɔ ɖò seà ɓóɖó-kpàà kɔ̃ nì ɓɛ́ ɔ ké seà nàmàǔn nyuɛ, ké waà nàmàǔnɔ̀ dyiɛ nyu ké m̀ dyi wa dyoɖoún kpáìn, ké m̀ dyiɛ nyu ké waà mú-nyɛ́-nyɔ̀ ɓěɔ̀ dyi wa toún ɖu, ké waà mú-nyɛ́-nyɔ̀ ɓěɔ̀ dyi wa toɛ̀-kpɔ̃-nyɔ̀ mú nyu, ké wa dyi wa ɓóɖó kà kò ɖò kɔ̃ kpa ní, kɛbì ɔ mɛ mɔ̀ ɓóɖó tɔ̀mɔ̀ gboɛ mɔɔ ɓóɖó xwɛ̃́ìn dyiɛ,

³⁷ ké wa dyi waà nàmàǔnɔ̀ mú wɔ̃́ìn ɖé m̀ gbo ɖé ɓóɖó ɖìàǔnɔ̀, ké wa dyi waà nàmàǔnɔ̀ dyi táà, ké wa dyi m̀ ɓaà, ké wa dyiɛ cɛ̃ kà wa ɖǎ hwòɖǒ-kɔ̃in-nyìnììn-ɖɛ̀ m̀ bũ̌ nyuɛɛ ní, ɓɔ̌ɔ̀, m̀ mɛ jǔ waà ɓaà-wùɖùɔ̀ gɔ̃̌.

³⁸ Ɔ jǔ ké wa dyi waà nàmàǔnɔ̀ dyi táà jɛ́ɛ́ cá ɖé ɓóɖó ɖìàǔnɔ̀, ké wa dyi nɔ̄ ɓóɖó ɓɛ́ m̀ nyí zɔ̃̌ɔ̀ kà wa ɓǎ nììn ɓǎ ɓěɛ kè hwɔɖɔ ɓɛ́ m̀ ɖǎà gã kɛ ɔ kè gbǒ ɓɛ́ ḿ ɖǎà m̀ bìì poɛɛ gbo gmɔ̀ìn, ké wa dyi m̀ ɓaà ní,

³⁹ nìí, mɔ̀ nìà ɖé dyɔún mɔ̀à nì cĩ́-naínɔ̀ kɛɛ, m̀ mɛ wɔ̃́ waà ɓaà-wùɖùɔ̀, ɓɛ́ m̀ ké ɖɛ nɔ̀mɔ̀ dyíin nyɛɛ nyu ɓó wa bìì, ɓɛ́ m̀ ké nàmàǔn ɓɛ́ wa nyuà m̀ bũ̌ɛɛ kɔ̃in zĩ̀ìn.

⁴⁰ “Óó ní Gèɖèpɔ́ɔ̀, ɓó kàǔn wɛ̃ɛ, tò ḿ gbo ɖùǔ, ɓɛ́ m̀ ké ɓaà-wùɖù ɓɛ́ ḿ nìà nyuɛń nɔ̄ pá nìà kɛ múɛɛ wɔ̃́.

⁴¹ Ɓó kàǔn wɛ̃ɛ, Bounɓo Gèɖèpɔ́ɔ̀, sɔ̀ dyí, ɓɛ́ m̀ kéá ɖé nì cĩ́-naínɔ̀ dyá, m̀ kè nì gbɔ̀ɖɔ̀ɔ̀ ɓɛ́ ɔ mɔ̀à nì kpéɔ̀ dyí-dyuòìn-ɖɛ̀ɔ̀ kɛ. Bounɓo Gèɖèpɔ́ɔ̀, m̀ mɛ po nì sáa-zà-nyɔ̀ ɓěɔ̀ mana kɔ̃ kánáá pū, ké nì nyɔ ɓěɔ̀ mɛ kpáìn nì kpeɖeɛ̀-dyíin-nɔ̀mɔ̀-nɔ̀mɔ̀ɔ̀ jè múàǔn dyi.

⁴² Óó Bounɓo Gèɖèpɔ́ɔ̀, mɔ̀ǔn ɖá ɓɛ́ m̀ ké nyɔ ɓɛ́ m̀ ɖǎà gã ɓɛ́ ɔ kéà kã́á jǔɛɛ dyúa xwáɖáún pòìn. Ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ ɓɛ́ m̀ ɖáìn zɔ̃̌ɔ̀ kà nì gbo-nì-nyɔ̀ Dèɓé nyɛ́nɛ́ín nyɛɛ jè mɛ nì m̀ hwìɖǐi.”