2 Kánáníkɔ̀ 3 - Ɓǎsɔ́ɔ̀ Báɓòɔ̀

¹ Ké Sã́ɖómà dè ma Bounɓoɔ̀ gbǒɔ̀ poɛ gbɔ ɖé Mɔ̀wíɖíà-tòɖòɔ̀ dya, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ mɔ̀ dɛ̀ ɓɛ́ Bounɓoɔ̀ wóɖóìn zɔ̃̌ɔ̀ kà ɔ ɓǎ Dèɓé dyíɛ. Ɔ mɔ̀ pá ɓɛ́ Dèɓé ɖǎ zɔ̃̌ɔ̀ gã ɓó gbǒɔ̀ jè kɛ. Ɔ mɔ̀ dɛ̀ mɔ̀ zɔ̃̌ɔ̀ kà Àwáɖánà mɔ̀à Jɛ́ɓù-nyɔ̀ɔ̀ kɛɛ mɔɔ́-dyí-síìn-naínɔ̀ kɛ.

² Ɔ dè ma gbǒɔ̀ poɛ gbɔ ɖé ɔ Éézùɖùɛ̀-ɓòɖòɔ̀ wuɖuí-kɔ̃̀-zɔ̃̀ɔ̀ hĩinyɛ nììnɔ̀ dɛ̀nɛ̀ sɔ̃́ nììnɔ̀ xwíníín.

³ Kà Sã́ɖómà nyu ma Gèɖèpɔ́ɔ̀ gbǒɔ̀ ɖàɓàìn nyɛɛ kɛà kɛ̀. Ɔ tɔ̀mɔ̀-tɔ̀mɔ̀ mɔ̀ ma ɓáɖáa ɓaɖa-bùè sè hm̀m̌, ké ɔ xwíɖí-kù mɔ̀ ma ɓáɖáa hm̀m̌.

⁴ Gbǒɔ̀ sí-xwíníín hwɔà ɓó dyúa dyíɛɛ xwíɖí-kù mɔ̀ ma ɓáɖáa hm̀m̌. Ɔ xwíɖí-kùɔ̀ kè gbǒɔ̀ mìɔùn cɛ̃ìn ma mú. Ké ɔ dya-tɔ̀mɔ̀-tɔ̀mɔ̀ mɔ̀ ma ɓáɖáa hm̀m̌. Ké ɖé sí-xwíníínɔ̀ mú dà séín nyɛɛ, ɔ po ma ɖé góò hwɛ̀ zɛ̀nɛ̌ǐn dyi.

⁵ Ké ɔ dè ma pã́ìn-cù-pĩ̀à ɓě ɖé ɓí-dyù vɛ̀nɛ̀ nì ma ɖé gbǒɔ̀ múɛɛ xwíníín dyi dà séín, ké ɔ sɛ ma ɖɛ hwɔìn hwɛ̃-cù ɓě kè cɛ̃́ɛ̀ ɓáìn mú ɓěɛɛ ɓóɛ dyéɖéín dyi, ké ɔ poɛ ma góò hwɛ̀ zɛ̀nɛ̌ǐn bũ̌in.

⁶ Ké ɔ bɛ̃̀ìn ma gbǒɔ̀ sɔ́ɔ́ nɔ̀mɔ̀ kɔ̃in. Góò ɓɛ́ ɔ nyùìn ma kà kũ̀à múɛɛ mɔ̀ ma góò ɓɛ́ ɔ sɔ̀ ɖé Pàváìn-ɓòɖòɔ̀ kɔ̃ɛ.

⁷ Ɔ sɛ ma ɖɛ hwɔìn cɛ́ɖɔ̀ ɓě ɖé gbǒɔ̀ dyéɖéín dyi. Ké ɔ po ma gbǒɔ̀ xwíníín dà séín góò dyi. Dà ɓě ɓɛ́ ɔ po ma kà góò dyiɛɛ mɔ̀ ɖé gbǒɔ̀ xwíníín dyií dyi kèɛ̀ gbǒ-wɔ̃̀ ɓěɔ̀ kèɛ̀ dyéɖéín dyi ɓěɔ̀ ɔ kèɛ̀ gbǒ-kĩ̀ǐn ɓěɔ̀.

⁸ Ké ɔ nyu ma ɓí-dyù ɖò ɓɛ́ wa ɖáìn Pá Hwɛ̀ Mú Mìɔ kɛɛ ɖé gbǒɔ̀ gbɔ. Ɔ tɔ̀mɔ̀-tɔ̀mɔ̀ mɔ̀ ma ɓáɖáa hm̀m̌, ké ɔ xwíɖí-kù mɔ̀ ma ɓáɖáa hm̀m̌. Ɔ tɔ̀mɔ̀-tɔ̀mɔ̀ɔ̀ kè gbǒɔ̀ xwíɖí-kùɔ̀ ɓɛ́ìn ní. Ké ɔ po ma góò hwɛ̀ zɛ̀nɛ̌ǐn ɖéɛ xwíníín dyi. Góòɔ̀ xwa-ku-ku mɔ̀ ma pṹá-dyèɖè táázĩ̀ìn kpáɖá-nyɔ sɔ̃́ sè hm̀m̌.

⁹ Ké góò ɓɛ́ wa po ma túu-dyùà ɓěɔ̀ bũ̌in nyɛɛ xwa-ku-ku zi ma pṹá-dyèɖè dyúáɖò kɔ̃. Ké ɔ po ma ɓí-dyùɔ̀ sáɖáún góò dyi.

¹⁰ Ké ɔ ɖú ma cu dyí, ké ɔ sɛɛ ma ɖɛ hwɔìn cɛ́ɖɔ̀ sɔ̃́ mú, ké ɔ po ma wa góò bũ̌in, ké ɔ po ma wa ɖé Pá Hwɛ̀ Mú Mìɔɔ̀ mú.

^11-13 Wa ɖò-ɖò ɓéɖé ma pìɔ̌ sɔ̃́, ké pìɔ̌ ɖò-ɖòɛ̀ tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́. Wa deìn ma wáún ɖé Pá Hwɛ̀ Mú Mìɔɔ̀ mú, ké waà pìɔ̌ pɛ́ɛ̀ kɔ̃in ɓěɔ̀ sɔ̃́ tóìn ma dyi ɓó ɓí-dyùɔ̀ hwòɖǒǔn, ké pìɔ̌ sɔ̃́ tɔ̀ɔ̀ kɔ ɓí-dyùɔ̀ dyéɖéín. Cɛ́ɖɔ̀ sɔ̃́ ɓěɔ̀ pìɔ̌ pɛ́ɛ̀ kɔ̃in ɓěɔ̀ tɔ̀mɔ̀-tɔ̀mɔ̀ mɔ̀ ma ɓáɖáa hm̀m̌, ké wa gmɔ̀ìn ma ɖé ɓí-dyù vɛ̀nɛ̀ɔ̀ mú.

¹⁴ Ké ɔ nyu ma faà-ɖɔ̀ ɖò ɖé gbǒɔ̀ mú. Faà-ɖɔ̀ɔ̀ mɔ̀ ma ɖénì-ɖɔ̀ nɔ̀mɔ̀ dyíin kɔ̃̀ kɔ̃ ɓɛ́ ɔ ɖaɓa ma ɖɛ hwɔìn cɛ́ɖɔ̀ ɓě kɛ. Cɛ́ɖɔ̀ ɓěɔ̀ mɔ̀ ma dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã.

Bàɖàsǐ-cùè-ɓò sɔ̃́ ɓěɔ̀ jè

¹⁵ Ké Sã́ɖómà nyu ma cúè-ɓò sɔ̃́ ɓó Gèɖèpɔ́ɔ̀ gbǒɔ̀ dyúa. Wa ɖò-ɖòɛ̀ dya-tɔ̀mɔ̀-tɔ̀mɔ̀ mɔ̀ ma ɓáɖáa hĩinyɛ kè fá-kɛ́ín. Ké cúè-ɓò ɓěɔ̀ ɖò-ɖò dú-hwìɛ̀-dè-ɖɛ̀ dya-tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ sɔ̃́.

¹⁶ Ké ɔ nyu ma cɛ̃́ɛ̀ ɓáìn mú ɓě, ké ɔ po ma wa ɖé cúè-ɓò ɓěɔ̀ dúún. Ké ɔ nyu ma ɖɛ hwɔìn pɔ́mɛ́gàɖànɛ̀-ɓò kɛɛ hɔ̃dɛ̀ɖɛ̀ ɖò, ké ɔ ɓáìn wa cɛ̃́ɛ̀ ɓáìn mú ɓěɔ̀ bũ̌in.

¹⁷ Ké ɔ nyànàìn ma cúè-ɓò ɓěɔ̀ dyi ɓó gbǒɔ̀ gã sɔ̃́ ɓěɔ̀ kɔ̃, ɖé gbǒɔ̀ dyúa. Cúè-ɓòɔ̀ nyɔ hwɔà ɖé gã hwɔà ɖé zɔ̃̌ìn dyíɛ kɔ̃ɛɛ nyɛ́nɛ́ mɔ̀ ma Jákììn, ké nyɔ hwɔà ɖé xwía dyíɛɛ nyɛ́nɛ́ mɔ̀ Bóà.