2 Kánáníkɔ̀ 1 - Ɓǎsɔ́ɔ̀ Báɓòɔ̀

Sã́ɖómà zɔ̀ìn Gèɖèpɔ́ɔ̀ fɔ̀nɔ̀-hwòɖǒ

¹ Ti ɓɛ́ wa ɖǎ ma Sã́ɖómà mɔ̀à Dèɓéɛ̀ dyú-gààɔ̀ kɛɛ Éézùɖùɛ̀-ɓòɖòɔ̀ kã́á mú nyuɛɛ, ɔ dè ma ɔ kã́á-ɓòɖòɔ̀ dyi, sepóɛɖé Bounɓo mɔ̀à ɔ Gèɖèpɔ́ɔ̀ kɛɛ nì ma ɓó ɔ gbo, ké ɔ nyuɛ ké Sã́ɖómàà nyɛ́nɛ́ mu ma mìɔ cá.

² Wé ɖòɛ̀ ɓaɖaa, Sã́ɖómà poìn ma sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ kè tɔ̀ɔ̀-ɓìɔ̀ ɓěɔ̀ kè gbǒ-xwíníín ɖò-ɖò ɓěɔ̀ nyɔ vɛ̀nɛ̀ ɓěɔ̀ ɔ kè nyɔ tɔ̀ɔ̀ séín ɓěɔ̀ dyí.

³ Ké Sã́ɖómà kè nyɔ séín ɓěɔ̀ sɔ̀ ma dyí, ké wa mu ma ɖé Gèɖèpɔ́ɔ̀ ɓièìn-naín nìà toɖo nìà ɖé Gíɓìɔ̀ùn-hwɔ̀ɖɔ̀ɔ̀ múɛɛ dya kɛ. Ɔ mɔ̀ dɛ̀ ɓɛ́ jàɖàìn-gbò kɔ̃̀ mú Gèɖèpɔ́ɔ̀ kè ɔ nyɔ ɓěɔ̀ dyéàìn, ɓɛ́ Mózè mɔ̀à Gèɖèpɔ́ɔ̀ gbo-nì-nyɔ̀ɔ̀ kɛɛ nyu zɔ̃̌ɔ̀ kà ɖé gbǎùn-fúɖúáɔ̀ kɔ̃ɛɛ nì ma kà kɛ.

⁴ Ɔ nì ná kɛɛ, Dèɓé ɖǎ ma Gèɖèpɔ́ɔ̀ gbɔ̀ɖɔ̀ɔ̀ ɖé Kíjà-Jáwìɖììn-hwɔ̀ɖɔ̀ɔ̀ mú zà, ké ɔ ɖǎa ma pá ɖò ɓɛ́ ɔ naɓaà ma ɓóɛ jèɛɛ mú kpa. Ɔ ɖǎ ma jàɖàìn-gbò ɖò dyi nyànàìn ɓóɛ jè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

⁵ Ɖé Gíɓìɔ̀ùn-hwɔ̀ɖɔ̀ɔ̀ múɛɛ, sáa-kɔ̃-zàìn-gbàà mɔ̀ bàɖàsǐ ɓɛ́ Bèzáɖèò mɔ̀à Húɔ̀ɛ̀ nyúà-dyú, kɔ̃̀ ɓǎ mɔ̀à Dyúwìɖì kɛɛ nyu ma kà kɛɛ nì ma ɓó Bounɓoɔ̀ jàɖàìn-gbòɔ̀ dyúa. Ké Sã́ɖómà kè nyɔ séín ɓěɔ̀ ɓièìn ma ɓó Bounɓoɔ̀.

⁶ Ké Sã́ɖómà mu ma ɓó bàɖàsǐ-gbààɔ̀ dyéɖé zɔ̃̌, ɓó jàɖàìn-gbò kɔ̃̀ mú Bounɓoɔ̀ kè ɔ nyɔ ɓěɔ̀ dyéàìn nyɛɛ dyúa, ké ɔ nyu ma fɔ̃ɔ-sàǎ-zàìn-ɖɛ̀ táázĩ̀ìn ɖò ɓó gbààɔ̀ kɔ̃.

⁷ Ɓó máaún-hwùɖùɔ̀ múɛɛ, Gèɖèpɔ́ɔ̀ wóɖóìn ma Sã́ɖómà dyí, ké ɔ diè ma Sã́ɖómà dyi, ké ɔ ɖá, “Ɖɛ́ nì mɔ́ ɓɛ́ ḿ ké m̀ nyíɛ́?”

⁸ Ké Sã́ɖómà cɛ̃ɛ ma Gèɖèpɔ́ɔ̀ gbo, ké ɔ ɖá, “M̀ ɖɛ̀ɓɛ̀ ma ḿ ɓǎ Dèɓé mú mìɔ, ké m̀ ɖǎ ḿ kã́á mú nyu ɓó ɔ bɛ̃̌ǐn.

⁹ Óó Bounɓo Gèɖèpɔ́ɔ̀, ɖɛ ɓɛ́ m̀ ɖáìn zɔ̃̌ɔ̀ ḿ ɓǎ Dèɓé nyɛ́nɛ́ín nyɛɛ mɛ kpá ná ɓó kàǔn, sepóɛɖé m̀ ɖǎ ḿ kã́á mú nyu ɓó ɓóɖó-dù ɖòɛ̀ nyɔ ɓě ɓɛ́ wa vò dyí kà pĩ́ɔ nìà dyóóɔ̀ wĩin nyɛɛ vòà dyíɛɛ kɔ̃in.

¹⁰ Ɔ ná nì jèɛɛ, nyí ḿ fɔ̀nɔ̀-hwòɖǒ kè ɖɛ-múin-wɔ̃́-wɔ̃́, ɓɛ́ ḿ ké nì nyɔ ɓěɛ̀ nàìn dyuò, sepóɛɖé nyɛ́ ɓɛ́ìn nì nyɔ kpa ɖɛ ɓěɛ̀ wuɖuí kɔ̃̀ɔ̀ kɛ́?”

¹¹ Ké Gèɖèpɔ́ɔ̀ jǔ ma Sã́ɖómà gɔ̃̌, ké ɔ ɖá, “Kà ɓɛ́ ɖɛ nìà kɛ ɖǎà ɖé m̀ hwòɖǒ bũ̌ nì, ké m̀ seà kɔ̃̀ɔ̀-ɖɛ̀ ɓě mɔɔ kɔ́mɔ́ mɔɔ dya-dè-dè mɔɔ hwèɖèìn-fɛ̀ɛ̀ zɔ̀ ɓó m̀ mìɔùn bìì, mɔɔ ké m̀ seà gĩɔ zɔ̀ ɓó nì mú-nyɛ́-nyɔ̀ ɓěɔ̀ bìì, ké m̀ zɔ̀à fɔ̀nɔ̀-hwòɖǒ kè ɖɛ-múin-wɔ̃́-wɔ̃́, ɓɛ́ m̀ ké ní nyɔ ɓě kɔ̃̀ kɔ̃in ɓɛ́ ḿ ɖǎà m̀ kã́á mú nyuɛɛ wuɖuí kɔ̃̀ɔ̀ dyuòɛ jèɛɛ,

¹² ní mu m̀ fɔ̀nɔ̀-hwòɖǒ kè ɖɛ-múin-wɔ̃́-wɔ̃́ nyíìn. Ké ɓó kɔ̃in ɖeɛɛ, ní mu m̀ kɔ́mɔ́ kè kɔ̃̀ɔ̀-ɖɛ̀ ɓě kè dya-dè-dè ɓɛ́ kã́á ɓě nì ma ɓó m̀ dyúa kɛ kè kã́á ɓě mu ɓó m̀ ɖeín dyí kɔùn wɛ̃ɛ séè ɓéɖé ɖò mɔɔ ké wa se ɓéɖéɛ muɛɛ nyíìn.”

¹³ Hwɛ̀ ké Sã́ɖómà sɔ̀ ma ɖé Bounɓoɔ̀ ɓièìn-naínɔ̀ ɖé toɖoɔ̀ dya, ɖé Gíɓìɔ̀ùn-hwɔ̀ɖɔ̀ɔ̀ mú, ɓó jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ dyúa, ké ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké ɔ kɔ̃̀ ma Éézùɖùɛ̀-nyɔ̀ ɓěɔ̀ wuɖuí.

Kã́á Sã́ɖómàà kpéɔ̀ kè ɔ kɔ́mɔ́ɔ̀

¹⁴ Sɔ̀ìn ɓóɛ gboɛɛ, Sã́ɖómà dɔ̃ ma hwíì-sǒ táázĩ̀ìn ɖò kè hɔ̃dɛ̀ɖɛ̀ hĩinyɛ, ké ɔ ɓéɖé ma sǒ-nàìn-nyɔ̀ táázĩ̀ìn ɓaɖa-bùè sè sɔ̃́. Ɔ dèìn ma ɖíɛ́ ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, ké ɔ tɔɔ sè ɓóɛɛ, ɔ dèìn ma wa ɖé hwɔɖɔ ɖò-ɖò ɓě múin.

¹⁵ Ti ɓɛ́ Sã́ɖómà mɔ̀ ma kà kã́á kɛɛ, séɓàɖà kè góò se ma ɖɛ kpa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kà sɔ́ɔ́-kpò ɓě seà ɖɛ kpa ɓóɛ dyí vò jèɛ. Ké síɖà-cù ɓě hwɔ ma dyi púu kà síkímɔ̀-cù ɓě hwɔà dyi ɖé Júɖà Toɖo-ɓòɖòɔ̀ kɔ̃ kɛ.

¹⁶ Sã́ɖómàà sǒ ɓěɔ̀, wa zà wa ɖé Íjè-ɓòɖòɔ̀ kè Kúè-ɓòɖòɔ̀ kɔ̃. Kã́áɔ̀ ɖɛ-dɔ̃-nyɔ̀ ɓěɔ̀ mɔ̀ nyɔ dɔ̃ ma wa ɓó kã́áɔ̀ bìì.

¹⁷ Wa zà ma hwíì-sǒ ɓě ɖé Íjè-ɓòɖòɔ̀ kɔ̃. Wa dɔ̃̀ìn ma hwíì-sǒ ɓěɔ̀ ɖò-ɖò séɓàɖà-cɛ̀kò hɔ̃dɛ̀ɖɛ̀ mɛ̀nɛ̌ìn-ɖò mú, ké wa dɔ̃̀ìn ma sǒ dyúáɖò séɓàɖà-cɛ̀kò hɔ̃dɛ̀ɖɛ̀ ɖò kè kpáɖá-nyɔ sɔ̃́ ɓaɖa-bùè mú. Ké wa pèɖèìn ma hwíì-sǒ ɓěɔ̀ kè sǒ ɓěɔ̀ Hítì-ɓòɖòɔ̀ kã́á ɓě kè Síwíɖíà-ɓòɖòɔ̀ kã́á ɓě gbo.