1 Jɔ̃́ɔ́ 1 - Ɓǎsɔ́ɔ̀ Báɓòɔ̀

Wuɖuɔ̀ nyuɛ ké nyɔǔn ɓéɖé fɛ̀ɛ̀

¹ À céè ɓě gbo ɓá fɛ̀ɛ̀-wùɖùɔ̀ jè dyí. Ɔ ɖǎ ma nì sɔ̀ìn ɖé ɖɛ-gbɔ-dè-dè mú. À ɖǎa wɔ̃́. À ɖǎa dyéɖé kɔ̃ po jɛ́ɛ́. À ɖǎa dya gmɔ̀, ké à ɖǎa sɔ̃ dyi tóìn.

² Ti ɓɛ́ nyɔ mɔ̀à fɛ̀ɛ̀ɔ̀ kɛɛ wóɖó ma xwáɖáún wɛ̃ɛ, à dyé ma ɔ ní. Ɔ jèɛɛ, à nyu ɔ zàse, ké à cɛ̃ sè-ná-sèɛ̀ fɛ̀ɛ̀ nì ma kà ɖé Ɓǎɔ̀ gbo, ɓɛ́ ɔ wóɖóìn ma kà à dyíɛɛ jè ɓě gbo.

³ Ɖɛ ɓɛ́ à dyé ma, ké à wɔ̃́ ma kɛɛ, ɖé à cɛ̃à ɓě gbo ɖekèɛ̀, ɓɛ́ à kè ɓě ké gbo-kpɔ̃ìn-kpɔ̃ìn ɓéɖé. Gbo-kpɔ̃ìn-kpɔ̃ìn ɓɛ́ à ɓéɖéà kɛɛ mɔ̀ nyɔ ɓɛ́ à kè Ɓǎɔ̀ kè ɔ Dyú-gàà Jízɛ̀ Kɛ́ɖɛ́ì ɓéɖéà kɛ.

⁴ À nì ɖɛ ɓě nìà kɛ céèɛ̌n, ɓɛ́ à múà ké mú dyí.

Gèɖèpɔ́ɔ̀ mɔ̀ ce

⁵ Bɔ̃̌ ɓɛ́ à wɔ̃́ ma sɔ̀ìn ɖé ɔ gbo, ké à cɛ̃à ɓě gboɛɛ kɛà kɛ̀. Ɔ mɔ̀, Gèɖèpɔ́ɔ̀ mɔ̀ ce, ké tíe-kpò ɖò se ɔ mú nì fɔɔ.

⁶ Ɔ jǔ ké à dyiɛ cɛ̃, ké à dyi níiń, “À kèɔ̀ kè ɓéɖé gbo-kpɔ̃ìn-kpɔ̃ìn,” ké à dyi tíe-kpò mú cĩ́ín, nìí, ɖɛ ɓě ɓɛ́ à cɛ̃à kɛɛ mɔ̀ se, ké ɖɛ ɓě ɓɛ́ à nyuɛɛ, jǎà ɖò se wa mú nì.

⁷ Kɛɛ ɔ jǔ ké à dyi ceɔ̀ mú cĩ́ kà ɓɛ́ ɔ mɔ̀ùn nìà ɖé ceɔ̀ múɛɛ ní, nìí, à ɓéɖé gbo-kpɔ̃ìn-kpɔ̃ìn, ké ɔ Dyú-gàà Jízɛ̀ Kɛ́ɖɛ́ì nyɔmɔɔ̀ wɔɔ̀ à nàmàǔn séín ɓěɔ̀ bũ̌in.

⁸ À dyiɛ cɛ̃, ké à dyi níiń, “À se nàmàǔn ɖò ɓéɖé” ní, nìí, à cá à mìɔùn, ké jǎà ɖò se à mú nì.

⁹ Kɛɛ à dyi à nàmàǔn ɓěɔ̀ mú wɔ̃́ìn ɖé Gèɖèpɔ́ɔ̀ gbo ní, nìí, à ɓɛ́ìn ɔ hwòɖǒ kɔ̃ dèɛ̀, sepóɛɖé ɔ mɔ̀ dyí-sɛ́ɖɛ́ìn-nyɔ̀, ké ɔ mu à nàmàǔn ɓěɔ̀ kɔ̃in zĩ̀ìn, ké ɔ mu à se-dyí-sɛ́ɖɛ́ìn-ɖɛ̀ séín bũ̌in wɔɔ̀ùn.

¹⁰ À dyiɛ cɛ̃ kà à séè nàmàǔn nyu ɖòɛɛ ní, nìí, à nyu Gèɖèpɔ́ɔ̀ se-nyɔ̀ mú, ké ɔ wuɖuɔ̀ se ɖé à mú nì.