1 Kánáníkɔ̀ 9 - Ɓǎsɔ́ɔ̀ Báɓòɔ̀

Nyɔ ɓě ɓɛ́ wa kɔ́ìn ma ɖe sɔ̀ìn to-xwàɖàǔn wɛ̃

¹ Wa céè ma Éézùɖùɛ̀-nyɔ̀ ɓěɔ̀ ɖò-ɖò séín nyɛ́nɛ́ ɖé Éézùɖùɛ̀-ɓòɖòɔ̀ kã́á ɓěɔ̀ kpáá-ɖɛ̀-sùà-cèè-ɖɛ̀ɔ̀ mú kà wa ɖò-ɖò séínɛ̀ gbǒ-xwíníín nyu nìɛ̀ kɛ. Ɖɛ kɔ̃̀ jè wa kpɔ̃̀ìn zɔ̃̌ɔ̀ kà Éézùɖùɛ̀-nyɔ̀ ɓěɔ̀ ganaún sɔ̀ìn ɖé Júɖà-ɓòɖòɔ̀ kɔ̃, ɓɛ́ wa dyi zɔ̃̌ɔ̀ kà wa ɖé Báɓèɖɔ́ùn-ɓòɖòɔ̀ kɔ̃ kpaa mɔ̀ ɖɛ gbà ɓě ɓɛ́ wa nyu ma kɛɛ jè.

² Toɛ̀-kpɔ̃-nyɔ̀ ɓěɔ̀ nyɔ kĩ́ín-kĩ́ín ɓě ɓɛ́ wa dyi ma ɖé waà pá ɓěɔ̀ kɔ̃ ɖe, ɓɛ́ wa dyi ma waà hwɔɖɔ ɓěɔ̀ mú cĩ́ ɖeɛɛ mɔ̀ ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kè Gèɖèpɔ́ɔ̀ gbǒɔ̀ mú-kũ̀à-nyu-nyɔ̀ ɓěɔ̀ ɔ kè Éézùɖùɛ̀-nyɔ̀ tɔ̀ɔ̀ ɖíɛ́ ɓě.

³ Nyɔ ɖíɛ́ ɓě ɓɛ́ wa sɔ̀ ɖé Júɖà nììn xwéɖé-dùɔ̀ kè Bɛ̃́címà nììn xwéɖé-dùɔ̀ kè Ífèɖèìn nììn xwéɖé-dùɔ̀ ɔ kè Mànásì nììn xwéɖé-dùɔ̀ múɛɛ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

^4-6 Nyɔ ɓě sɔ̀ ɖé Júɖà nììn xwéɖé-dùɔ̀ mú, ké wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mɔ̀ ma nyɔ-kpò hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ hĩinyɛ ɓaɖa-bùè. Wa ɖíɛ́ ɓě mɔ̀ ma Dyúfàì kè Àsádyà kè ɔ dyú-gàà ɓě ɔ kè Jɛ̀dyúò. Dyúfàì ɓǎ ɓěɛ̀ gbǒ-xwíníínɔ̀ kɛà kɛ̀. Bánì ɓɛ́ ɔ mɔ̀ Pɛ́wɛ̀ɖɛ̀ɛ̀ xwíníín-dyù ɓěɔ̀ ɖòɛɛ wóɖóìn ma Ímìnì, ké Ímìnì wóɖóìn ma Ɔ̃́wìɖì, ké Ɔ̃́wìɖì wóɖóìn ma Àmíhù, hwɛ̀ ké Àmíhù wóɖóìn ma kà Dyúfàì kɛ̀. Ké Àsádyà mɔ̀ ma ɔ wóɖóìn-nyɔ̀ ɓěɔ̀ nyíɔ́-dyù, ké ɔ mɔ̀ ma Séɖàà xwíníín-dyù ɓěɔ̀ ɖò. Ké Jɛ̀dyúò mɔ̀ ma Zɛ́wàɖàà xwíníín-dyù ɓěɔ̀ ɖò.

^7-9 Nyɔ ɓě ɓɛ́ wa sɔ̀ ma ɖé Bɛ̃́címà nììn xwéɖé-dùɔ̀ mú, ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, kɔ̃̀ nyɛ́nɛ́ wa céè ma kɛɛ mɔ̀ ma nyɔ-kpò hɔ̃dɛ̀ɖɛ̀ mɛ̀nɛ̌ìn-hĩinyɛ kè kpáɖá-nyɔ sɔ̃́ ɓaɖa-bùè sè mɛ̀nɛ̌ìn-ɖò. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀. Wa ɖíɛ́ ɓě mɔ̀ ma Sáɖù kè Ìnɛ́dyà ɓɛ́ ɔ mɔ̀ ma Jɛ̀ɖóhã̀à dyú-gàà kɛ kè Éɖà ɓɛ́ ɔ mɔ̀ ma Míkìɖìɛ̀ nyúà-dyú, kɔ̃̀ ɓǎ mɔ̀ ma Dyúzì kɛ ɔ kè Mɛ̀súɖàùn. Sáɖù ɓǎ ɓěɛ̀ gbǒ-xwíníínɔ̀ kɛà kɛ̀. Hásɛ̀núà wóɖóìn ma Hòɖàvíà, ké Hòɖàvíà wóɖóìn ma Mɛ̀súɖàùn, hwɛ̀ ké Mɛ̀súɖàùn wóɖóìn ma kà Sáɖù kɛ̀. Ké Mɛ̀súɖàùn ɓǎ ɓěɛ̀ gbǒ-xwíníínɔ̀ kɛà kɛ̀. Ìníjà wóɖóìn ma Wɛ̀ɖɛ̀dyúò, ké Wɛ̀ɖɛ̀dyúò wóɖóìn ma Sɛ̀fátìà, hwɛ̀ ké Sɛ̀fátìà wóɖóìn ma kà Mɛ̀súɖàùn kɛ̀.

Sáa-zà-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ

¹⁰ Sáa-zà-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɖíɛ́ ɓě kɛà kɛ̀. Wa mɔ̀ Jɛ̀ɖádyà kè Jɛ̀hòdyáwìɖì kè Jákììn

^11-12 kè Ázàwíɖíà ɓɛ́ ɔ kɔ̃̀ ma kũ̀à ɓě ɓá Gèɖèpɔ́ɔ̀ gbǒɔ̀ jè dyíɛɛ wuɖuíɛ kè Àɖádyà ɔ kè Máásàì. Ázàwíɖíà ɓǎ ɓěɛ̀ gbǒ-xwíníínɔ̀ kɛà kɛ̀. Àhítù wóɖóìn ma Mɛ̀wáɖádyò, ké Mɛ̀wáɖádyò wóɖóìn ma Záɖò, ké Záɖò wóɖóìn ma Mɛ̀súɖàùn, ké Mɛ̀súɖàùn wóɖóìn ma Hìòkíà, hwɛ̀ ké Hìòkíà wóɖóìn ma kà Ázàwíɖíà kɛ̀. Ké Àɖádyà ɓǎ ɓěɛ̀ gbǒ-xwíníínɔ̀ kɛà kɛ̀. Mààkíjà wóɖóìn ma Páhù, ké Páhù wóɖóìn ma Jɛ̀ɖóhã̀, hwɛ̀ ké Jɛ̀ɖóhã̀ wóɖóìn ma kà Àɖádyà kɛ̀. Ké Máásàì ɓǎ ɓěɛ̀ gbǒ-xwíníínɔ̀ kɛà kɛ̀. Ímè wóɖóìn ma Mɛ̀síɖèmì, ké Mɛ̀síɖèmì wóɖóìn ma Mɛ̀súɖàùn, ké Mɛ̀súɖàùn wóɖóìn ma Jázèwàɖà, ké Jázèwàɖà wóɖóìn ma Áɖìè, hwɛ̀ ké Áɖìè wóɖóìn ma kà Máásàì kɛ̀.

¹³ Sáa-zà-nyɔ̀ ɓěa kè waà ɖíí ɓě mɔ̀ ma nyɔ-kpò táázĩ̀ìn ɖò hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ tã. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀, ké wa ɓɛ́ìn ma kpé ɓó kũ̀à ɓě ɓá Gèɖèpɔ́ɔ̀ gbǒɔ̀ dyíɛɛ nyu jè.

Ɖíìváà-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ

^14-16 Ɖíìváà-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ kɛà kɛ̀. Wa mɔ̀ Sɛ̀mádyà kè Bàbákà kè Hɛ́wɛ̀ɖɛ̀sì kè Gáɖàò kè Màtánìà kè Òbòdádyà ɔ kè Bɛ̀wéɖékìà ɓɛ́ ɔ cĩ́ ma ɖé Nɛ̀tófà-hwɔ̀ɖɔ̀ɔ̀ hwɔɖɔ-kpàǎ ɓěɔ̀ ɖò mú kĩ́ín nyɛ. Sɛ̀mádyà ɓǎ ɓěɛ̀ gbǒ-xwíníínɔ̀ kɛà kɛ̀. Hàsáɓíà ɓɛ́ ɔ mɔ̀ ma Mɛ̀wáɖáwìɖìɛ̀ xwíníín-dyù ɓěɔ̀ ɖòɛɛ wóɖóìn ma Àzíɖíkàùn, ké Àzíɖíkàùn wóɖóìn ma Hásù, hwɛ̀ ké Hásù wóɖóìn ma kà Sɛ̀mádyà kɛ̀. Ké Màtánìà ɓǎ ɓěɛ̀ gbǒ-xwíníínɔ̀ kɛà kɛ̀. Ásàfì wóɖóìn ma Zíkìɖì, ké Zíkìɖì wóɖóìn ma Míkà, hwɛ̀ ké Míkà wóɖóìn ma kà Màtánìà kɛ̀. Ké Òbòdádyà ɓǎ ɓěɛ̀ gbǒ-xwíníínɔ̀ kɛà kɛ̀. Jɛ̀ɖúfùùn wóɖóìn ma Gáɖàò, ké Gáɖàò wóɖóìn ma Sɛ̀mádyà, hwɛ̀ ké Sɛ̀mádyà wóɖóìn ma kà Òbòdádyà kɛ̀. Ké Bɛ̀wéɖékìà mɔ̀ ma Ɛ̀kínàà nyúà-dyú kɔ̃̀ ɓǎ mɔ̀ Ásà kɛ.

Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ

¹⁷ Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ kɛà kɛ̀. Wa mɔ̀ Sáɖùùn kè Ákù kè Táámɔ̀ kè Àhímà ɔ kè waà ɖíí ɓě. Sáɖùùn mɔ̀ ma waà nyɔ vɛ̀nɛ̀.

¹⁸ Ɓó tia ɓaɖaa, Sáɖùùn mɔ̀ ma Gèɖèpɔ́ɔ̀ gbǒɔ̀ gmɔ-wɔ̃̀ hwɔà ɖé dyóɖó-xwáɖáún-wóɖóìn-naínɔ̀ dyí kɔ̃̀ nyɛ́nɛ́ mɔ̀à Kã́á-gmɔ̀-wɔ̃̀ɔ̀ kɛɛ dyí-gmɔ̀-nyɔ̀. Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɛ̀ sɔ̀ ma ɖé Ɖíìváà-nyɔ̀ ɓěɔ̀ hwìɛ̀.

¹⁹ Sáɖùùn ɓǎ ɓěɛ̀ gbǒ-xwíníínɔ̀ kɛà kɛ̀. Kówàɖà wóɖóìn ma Ɛ́ɓìásàfì, ké Ɛ́ɓìásàfì wóɖóìn ma Kówèɖè, hwɛ̀ ké Kówèɖè wóɖóìn ma kà Sáɖùùn kɛ̀.

²⁰ Ɖé ti sùà múɛɛ, Fíníhà mɔ̀à Ɛ̀ɖɛ̀ázàà dyú-gààɔ̀ kɛɛ mɔ̀ ma Gèɖèpɔ́ɔ̀ jàɖàìn-gbòɔ̀ dyí-gmɔ̀-nyɔ̀ ɓěɔ̀ nyɔ vɛ̀nɛ̀, ké Bounɓoɔ̀ nì ma ɓó ɔ gbo.

²¹ Sɔ̀ìn ɓó ɔ gboɛɛ, Zɛ́kɔ̀wáɖádyà ɓɛ́ ɔ mɔ̀ ma Mɛ̀sɛ́ɖɛ̀míàà dyú-gàà kɛɛ mɔ̀ ma jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ dyí-gmɔ̀-nyɔ̀ ɓěɔ̀ nyɔ vɛ̀nɛ̀.

²² Ɓó Sáɖùùn nììn Gèɖèpɔ́ɔ̀ gbǒɔ̀ dyí-gmɔ̀-tìɔ̀ múɛɛ, nyɔ séín ɓě ɓɛ́ wa gã ma, ɓɛ́ wa ké ma kà Gèɖèpɔ́ɔ̀ gbǒɔ̀ gmɔ-wɔ̃̀-dyí-gmɔ̀-nyɔ̀ jǔɛɛ mɔ̀ ma nyɔ-kpò hɔ̃dɛ̀ɖɛ̀ sɔ̃́ kè ɓaɖa-bùè sè sɔ̃́. Wa céè ma waà nyɛ́nɛ́ céè-ɖɛ̀ ɖò mú dyììn ɖé kà waà gbǒ-xwíníín ɓěɔ̀ nyu nìɛ̀ kɛɛ mú, ɖé waà hwɔɖɔ ɓěɔ̀ mú. Kã́á Dèɓé kè Sámíò mɔ̀à kpáá-ɖɛ̀-cɛ̃-nyɔ̀ɔ̀ kɛɛ mɔ̀ nyɔ po zɔ̃̌ɔ̀ wa ɓǎ ɓěɔ̀ kũ̀à kɔ̃ún kĩ́ín.

²³ Ɔ jèɛɛ, wa kè waà dyú-gàà ɓěɔ̀ kɔ̃̀ ma kũ̀à ɓá Bounɓoɔ̀ gbǒɔ̀ gmɔ-wɔ̃̀ ɓěɔ̀ dyí gmɔ̀ jè dyíɛɛ kpé gbo. Maa kĩ́ín nyɛɛ, Bounɓoɔ̀ gbǒɔ̀ mɔ̀ ma jàɖàìn-gbò.

²⁴ Gmɔ-wɔ̃̀-dyí-gmɔ̀-nyɔ̀ vɛ̀nɛ̀ hĩinyɛ ɓě nì ma gmɔɔ̀ wáká hĩinyɛ ɓěɔ̀ kɔ̃. Wa nì ma ɖé gmɔɔ̀ dyóɖó-xwáɖáún-wóɖóìn-naínɔ̀ kè ɖé ɔ dyóɖó-dyi-kpáìn-naínɔ̀ kè ɖé ɔ xwía ɔ kè ɖé ɔ zɔ̃̌in.

²⁵ Ké wa ɖíí ɓě ɓɛ́ wa nì ma ɖé wa ɓíɖí-hwɔ̀ɖɔ̀ ɓěɔ̀ múɛɛ ɓéɖé wa ké ma wa gbo kpáuń dyi. Wé mɛ̀nɛ̌ìn-sɔ̃́ séín xwíníín ní, wa kpoo ɖò dyi, ɓɛ́ wa ké wa mǔè ɓěɔ̀ gbo kpá.

²⁶ Gmɔ-wɔ̃̀-dyí-gmɔ̀-nyɔ̀ vɛ̀nɛ̀ hĩinyɛ ɓěɔ̀ mɔ̀ ma Ɖíìváà-nyɔ̀ ɓě, ké wa kɔ̃̀ ma Gèɖèpɔ́ɔ̀ gbǒɔ̀ ɓí-dyù ɓěɔ̀ kè ɖɛín-dyi-dèìn-naín ɓěɔ̀ jè kpé gbo.

²⁷ Wa cĩ́ ma Gèɖèpɔ́ɔ̀ gbǒɔ̀ ɖei, sepóɛɖé wa kɔ̃̀ ma gbǒɔ̀ dyí gmɔ̀ jè kpé gbo, ké wa mɔ̀ nyɔ kɔ̃̀ wa ké Gèɖèpɔ́ɔ̀ gbǒɔ̀ gmɔ-wɔ̃̀ ɓěɔ̀ kaà ɓó gànà-kṹún ti séín.

Ɖíìváà-nyɔ̀ ɓěɔ̀ kũ̀à

²⁸ Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ ɖíɛ́ ɓě kɔ̃̀ ma ɖɛ-fùù ɓě ɓɛ́ wa nyùìn ma kũ̀à mú ɖé gbǒɔ̀ múɛɛ jè kpé gbo. Wa ɓéɖé wa ké ma ɖɛ-fùù ɓěɔ̀ zɛɖɛ ti wa mu wa ɖé gbǒɔ̀ mú zàùn wɛ̃ kè ti wa mu wa ɖe dyàùn wɛ̃.

²⁹ Ké wa ɖíɛ́ ɓě kɔ̃̀ ma gbǒɔ̀ mú-dè-ɖɛ̀ ɓěɔ̀ kè ɖɛ-fùù hwɛ̀ǐn-hwɛ̀ǐn ɓěɔ̀ kè fáɖáɓà nìɛ̀-nìɛ̀ɔ̀ kè wã́ìnɔ̀ kè cánáɔ̀ ɔ kè nyɔ́ún-nɔ̀mɔ̀-ɖɛ̀ dú kò-kò ɓěɔ̀ jè kpé gbo.

³⁰ Kɛɛ sáa-zà-nyɔ̀ ɓěɔ̀ mɔ̀ ma nyɔ́ún-nɔ̀mɔ̀-ɖɛ̀ ɓěɔ̀ cáìn-nyɔ̀.

³¹ Ké Mátìfíà ɓɛ́ ɔ mɔ̀ Ɖíìváà-nyɔ̀ ɓěɔ̀ ɖò, ké ɔ mɔ̀ Sáɖùùn mɔ̀à Kówàɖàà xwíníín-dyùɔ̀ kɛ nyíɔ́-dyù kɛɛ mɔ̀ nyɔ ɓéɖé ma bɛɖɛɛ̀-kpò pɛɛ́-pɛɛ́ mɔ̀à ɖii-ɖɛ̀-sàǎ-zàìn-ɖɛ̀ɔ̀ kɛɛ nyu jè kpé gbo.

³² Ké Ɖíìváà-nyɔ̀ ɓě sɔ̀ ma ɖé Kóhàà gbǒ-xwíníínɔ̀ múɛɛ ɖíɛ́ ɓě mɔ̀ nyɔ ɓéɖé ma bɛɖɛɛ̀ kéà ɓó téɓèɖèɔ̀ kɔ̃ nì teeɛɛ nyu jè kpé gbo ɓó Gèɖèpɔ́ɔ̀ fɔ̀-wè séín ɓaɖa.

³³ Ɓeɖe-nyɔ̀ ɓě ɓɛ́ wa mɔ̀ ma Ɖíìváà gbǒ-xwíníín ɓěɔ̀ nyɔ vɛ̀nɛ̀ kɛɛ cĩ́ ma ɖé Gèɖèpɔ́ɔ̀ gbǒɔ̀ ɓí-dyù ɓěɔ̀ mú. Wa ní nyu ma kũ̀à kà kò ɖò, sepóɛɖé wa nì ma ɓɛ́ɖɛ́ kɔ̃ ɓó máaún kè dyóɖóaún ɓó waà kũ̀àɔ̀ jè.

³⁴ Ɖíìváà-nyɔ̀ séín ɓěɛ̀ mɔ̀ ma waà gbǒ-xwíníín ɓěɔ̀ nyɔ vɛ̀nɛ̀ kɔ̃̀ nyɛ́nɛ́ wa céè ma ɓíɖíiɛ. Wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

Kã́á Sɔ́ɔ̀ xwéɖé-dù deìn dúún ɓěɔ̀

³⁵ Jɛ̀dyíò cĩ́ ma ɖé Gíɓìɔ̀ùn-hwɔ̀ɖɔ̀ɔ̀ mú, ké ɔ mɔ̀ ma hwɔɖɔɔ̀ ɓǎ. Ɔ gmààɔ̀ nyɛ́nɛ́ mɔ̀ ma Máákà.

³⁶ Ɔ nyíɔ́-dyù-gààɔ̀ nyɛ́nɛ́ mɔ̀ ma Ɛ́bɔ̀nɔ̀. Ké ɔ dyú-gàà ɓě kɔ ma ɓó dyí ɖeɛɛ mɔ̀ Zúɔ̀ kè Kísì kè Béò kè Néɔ̀ kè Náɖà

³⁷ kè Géɖò kè Àhíò kè Zɛ́kɔ̀wáɖádyà ɔ kè Míkɔ̀ɖɔ̀.

³⁸ Ké Míkɔ̀ɖɔ̀ wóɖóìn ma Símìàùn. Wa ɖíɛ́ ɓě cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɖé waà ɖíí ɓěɔ̀ wáún.

³⁹ Ké Néɔ̀ wóɖóìn ma Kísì, ké Kísì wóɖóìn ma Sɔ́ɔ̀, ké Sɔ́ɔ̀ wóɖóìn ma Jònétɔ̃̀ kè Máákì-Súà kè Àbìnáɖà ɔ kè Ɛ̀béò.

⁴⁰ Ké Jònétɔ̃̀ wóɖóìn ma Mɛ́wìɖì-Béò, ké Mɛ́wìɖì-Béò wóɖóìn ma Mákà.

⁴¹ Ké Mákà wóɖóìn ma Pífàùn kè Mɛ́ɖɛ̀ kè Tàwéɖéà ɔ kè Áhàzì.

⁴² Ké Áhàzì wóɖóìn ma Jáwàɖà, ké Jáwàɖà wóɖóìn ma Àɖɛ́mɛ̀ kè Àmávɛ̀ ɔ kè Zĩ́wìɖì. Ké Zĩ́wìɖì wóɖóìn ma Mózà,

⁴³ Ké Mózà wóɖóìn ma Bínèà, ké Bínèà wóɖóìn ma Wɛ̀ɖɛ̀fádyà, ké Wɛ̀ɖɛ̀fádyà wóɖóìn ma Ɛ̀ɖìásà, ké Ɛ̀ɖìásà wóɖóìn ma Ázèò.

⁴⁴ Ké Ázèò wóɖóìn ma gàa-dyù mɛ̀nɛ̌ìn-ɖò. Waà nyɛ́nɛ́ mɔ̀ ma Àzíɖíkàùn kè Bókèwùɖù kè Ésìméò kè Sɛ́àwíɖíà kè Òbòdádyà ɔ kè Hánà. Nyɔ ɓěɛ̀ mɔ̀ ma Ázèòɛ̀ dyú-gàà ɓěɔ̀.