1 Kánáníkɔ̀ 29 - Ɓǎsɔ́ɔ̀ Báɓòɔ̀

Nyíí-ɖɛ̀ ɓě wa tò ɓó Gèɖèpɔ́ɔ̀ gbǒɔ̀ po jèɛ

¹ Ké Kã́á Dèɓé cɛ̃ɛ ma nyɔ séín ɓě poìn ma kà dyíɛɛ gbo, ké ɔ ɖá, “Ní dyú Sã́ɖómà mɔ̀ nyɔ ɓɛ́ Gèɖèpɔ́ɔ̀ ɖǎà gã kɛɛ mɔ̀ dyú-gbɔ́ɔ́, ké ɔ séè ɖɛ ɓěɛ̀ nyu ɖò. Ké kũ̀àɔ̀ se kũ̀à dyùwè, sepóɛɖé poo-ɖɛ̀ɔ̀ se nyɔǔn-dyùɛ̀ cĩ́-naín, kɛɛ ɔ mɔ̀ Bounɓo Gèɖèpɔ́ɔ̀ gbǒ.

² Ɔ jèɛɛ, ḿ ɖǎ ɖɛ ɓě naɓaà ɓó ní Gèɖèpɔ́ɔ̀ gbǒɔ̀ jè. Ḿ ɖǎ ɖɛ jĩ̀ kà ḿ ɓɛ́ìn dyí poɛ̀n nyɛɛ dyí poìn. Ɖɛ ɓěɔ̀ mɔ̀ góò ɓó góò-ɖɛ̀ ɓě jè, kè séɓàɖà ɓó séɓàɖà-ɖɛ̀ ɓě jè, kè bàɖàsǐ ɓó bàɖàsǐ-ɖɛ̀ ɓě jè, kè nɛɛ̀-kpà ɓó nɛɛ̀-kpà-ɖɛ̀ ɓě jè, ɔ kè cu ɓó cu-ɖɛ̀ ɓě jè. Ké ɓó kɔ̃in ɖeɛɛ, ḿ ɖǎ sɔ́ɔ́ kpa ɖɛ ɓáún-ɓáún wáká po. Wa mɔ̀ ɔ́nɛ̀-sɔ̀ɔ̌ ɓě kè tɔ́kɔ̀ì-sɔ̀ɔ̌ ɓě kè sɔ́ɔ́ púú ɓě kè sɔ́ɔ́ ɓéɖé dyéɖé kò-kò ɓěɛ ɔ kè sɔ́ɔ́ kpa ɖɛ dú kò-kò ɓě.

³ Ké ɓó ɖɛ séín ɓě ɓɛ́ ḿ ɖǎà naɓaà ɓó gbǒ hwɛ̀ǐn-hwɛ̀ǐnɔ̀ jèɛɛ kɔ̃in ɖeɛɛ, ḿ ɓéɖé ḿ mìɔùn nììn dyi-dè-ɖɛ̀ ɓě mɔ̀ góò kè séɓàɖà kɛ. Ké ḿ tò ḿ mìɔùn ɓó ní Gèɖèpɔ́ɔ̀ gbǒɔ̀ po jè jèɛɛ, ḿ nì ɖɛ ɓěa tòɛ̌n ɖekè ɓó ní Gèɖèpɔ́ɔ̀ gbǒɔ̀ jè.

⁴ Ɖɛ ɓěɔ̀ mɔ̀ góò sɔ̀ ɖé Ófì-ɓòɖòɔ̀ kɔ̃, kɔ̃̀ xwa-ku-ku mɔ̀ pṹá-dyèɖè táázĩ̀ìn hɔ̃dɛ̀ɖɛ̀ sɔ̃́ kè táázĩ̀ìn kpáɖá-nyɔ sè hm̀m̌ wɛ̃ kè séɓàɖà hwɛ̀ zɛ̀nɛ̌ǐn kɔ̃̀ xwa-ku-ku mɔ̀ pṹá-dyèɖè táázĩ̀ìn hɔ̃dɛ̀ɖɛ̀ hm̀m̌ kè táázĩ̀ìn kpáɖá-nyɔ sè hm̀m̌ wɛ̃, ɓɛ́ wa kéɛ gbǒɔ̀ dyéɖéín dyi po,

⁵ kè ɓɛ́ wa kéɛ kũ̀à séín ɓě ɓɛ́ sɛ́ɖɛ́-dyuò-nyɔ̀ ɓěɔ̀ kéà nyuɛɛ nyùìn. Góò nì ɓó góò-ɖɛ̀ ɓě jè, ké séɓàɖà nì ɓó séɓàɖà-ɖɛ̀ ɓě jè. Nyɛ́ mɔ̀ nyɔ nì dà, ké ɔ mɔ́ ɔ mìɔùn tòɛ̀ dyi ɓó Bounɓoɔ̀ kũ̀àɔ̀ jè ɓó zɛ̃̌ɛ̀ kɛ́?”

⁶ Ké gbǒ-xwíníín ɖò-ɖò ɓěɔ̀ nyɔ vɛ̀nɛ̀ ɓěɔ̀ ɖú ma waà hwòɖǒ-wáɖáá-nyìǐ-ɖɛ̀ ɓěɔ̀ tò kpàǐ. Kà dyúáɖòɔ̀ kǎà xwéɖé-dù ɖò-ɖò ɓěɔ̀ nyɔ vɛ̀nɛ̀ ɓěɔ̀ nyuɛ ma ɖekè. Ké kǎà sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ ɔ kè kã́áɔ̀ nììn kũ̀àɔ̀ kɔ̃in-nyɔ̀ ɓěɔ̀ tò ma nyíí-ɖɛ̀ ɖekè.

⁷ Ɖɛ jĩ̀ kà ɓɛ́ wa tò ma ɓó Gèɖèpɔ́ɔ̀ gbǒɔ̀ kũ̀àɔ̀ jèɛɛ mɔ̀ ma góò kɔ̃̀ xwa-ku-ku mɔ̀ pṹá-dyèɖè táázĩ̀ìn hɔ̃dɛ̀ɖɛ̀ tã kè kpáɖá-nyɔ tã ɓaɖa-bùè sè hm̀m̌ kè góò-pĩ̀à táázĩ̀ìn ɓaɖa-bùè kè séɓàɖà kɔ̃̀ xwa-ku-ku mɔ̀ pṹá-dyèɖè táázĩ̀ìn hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ sɔ̃́ ɓaɖa-bùè kɛ kè bàɖàsǐ kɔ̃̀ xwa-ku-ku mɔ̀ pṹá-dyèɖè méɔ̀ùn dyúáɖò táázĩ̀ìn hɔ̃dɛ̀ɖɛ̀ tã kè kpáɖá-nyɔ sɔ̃́ ɓaɖa-bùè kɛ ɔ kè nɛɛ̀-kpà kɔ̃̀ xwa-ku-ku mɔ̀ méɔ̀ùn mɛ̀nɛ̌ìn-sɔ̃́ kè táázĩ̀ìn hɔ̃dɛ̀ɖɛ̀ hm̀m̌ wɛ̃.

⁸ Ké nyɔ kã̀ìn séín ɓě ɓɛ́ wa ɓéɖé sɔ́ɔ́ kpa ɖɛ ɓě kɛɛ po ma wa ɖé Bounɓoɔ̀ gbǒɔ̀ ɖɛín-dyi-dèìn-naínɔ̀. Jɛ̀híò mɔ̀à Gésɔ̀ùnɛ̀ xwíníín-dyùɔ̀ kɛɛ mɔ̀ ma ɖɛ ɓěɔ̀ dyí-gmɔ̀-nyɔ̀.

⁹ Ké nyɔ ɓěɔ̀ kpá ma múàǔn, sepóɛɖé waà nyɔ vɛ̀nɛ̀ ɓěɔ̀ tò ma ɖɛ ɓěɔ̀ hwòɖǒ-wáɖáá-kà. Waà hwòɖǒ wɔ̃́, ké wa nyí ma Bounɓoɔ̀ ɖɛ ɓěɔ̀. Ké Kã́á Dèɓé kpá ma múàǔn mìɔ ɖekè.

Dèɓé ɓàìn Gèɖèpɔ́ɔ̀

¹⁰ Ké Dèɓé ɓàìn ma Bounɓoɔ̀ ɓó nyɔ séín ɓě poìn ma kà dyíɛɛ dyéɖé waí, ké ɔ ɖá, “Óó Bounɓo, ɓàìn-ɓàìn mɛ nì m̀ kɔ̃, mɔ̀ mɔ̀à à ɓǎ Éézùɖùɛ̀ɛ̀ Gèɖèpɔ́ɔ̀ kɛ. Ɓàìn-ɓàìn mɛ nì m̀ kɔ̃ ɓó kàǔn ɔ kè sɔ̀ìn dà ké dyúa muɛ.

¹¹ Bounɓo, m̀ gã̌ ní, ké mɔ̀ kɔ̃̀ kpéɔ̀ kè ganaɔ̀ kè dĩ́ín-dĩ̀ìnɔ̀ ɔ kè dya-dè-dèɔ̀, sepóɛɖé mɔ̀ kɔ̃̀ ɖɛ séín nì ɖé dyɔún ɔ kè nɔ̄ ɓóɖó-kpàà kɔ̃ɛ. Óó Bounɓo, mɔ̀ kɔ̃̀ kã́á-ɓòɖòɔ̀. Mɔ̀ mɔ̀ ɖɛ séínɛ̀ dú-hwìɛ̀-cùɔ̀.

¹² Kɔ́mɔ́ kè dya-dè-dè sɔ̀ ɖé m̀ gbo, ké mɔ̀ kɔ̃̀ nyɔ séín wuɖuí. Kpé kè gana nì ɖé m̀ xwaún, ké ɔ nì ɖé nì kpé mú, ɓɛ́ m̀ ké nyɔ séín dyií ɖú, ɓɛ́ m̀ ké wa kpé nyí.

¹³ Ké ɓó kàǔn wɛ̃ɛ, à Gèɖèpɔ́ɔ̀, à po m̀ zùo, ké à ɓàìn nì nyɛ́nɛ́ dĩ́ín-dĩ̀ìnɔ̀ ní.

¹⁴ “Kɛɛ Bounɓo, ḿ mɔ̀ nyɛ́ɛ̌, ké ɖɛ́ ní nyɔ ɓěɔ̀ kpa kɛ́, ɓɛ́ à kéà ɖɛ jĩ̀ kàà tòɛ̀ ɓɛ́ìn ɖé hwòɖǒ wáɖáá mú kɛ́? Sepóɛɖé ɖɛ séín sɔ̀ìn ɖé m̀ gbo, ké m̀ mìɔùn nììn kɔ̃̀ɔ̀-ɖɛ̀ɔ̀ ɖò à zàà ɓó, ké à nyíà m̀ wɛ̃̀.

¹⁵ À mɔ̀ ɖéè kè zii-nyɔ̀ ɓó m̀ dyúa kà à ɓǎ ɓěɔ̀ nì ma kà kɛ. À fɛ̀ɛ̀ɔ̀ zi kà gbǒ-dyéɖéín-zùù zià kɛ. À nì dà kpã́ún ní, à se nì ɖe.

¹⁶ Óó Bounɓo, mɔ̀ mɔ̀à à Gèɖèpɔ́ɔ̀ kɛɛ, ɖɛ kúɖúú ɓě ɓɛ́ à ɖǎà tò ɓó m̀ bìì gbǒ ɖò po jè ɓó nì nyɛ́nɛ́ hwɛ̀ǐn-hwɛ̀ǐnɔ̀ jèɛɛ sɔ̀ìn ɖé m̀ xwaún, ké mɔ̀ mɔ̀ nyɔ kɔ̃̀ wa séín.

¹⁷ Ní Gèɖèpɔ́ɔ̀, ḿ dyuòɛ̀ dyí kà m̀ ɖe nyɔǔn-dyùɛ̀ hwòɖǒ-dyùà múin, ké nì hwòɖǒ dèìn dyí-sɛ́ɖɛ́ìn-nyɔ̀ múin nyɛ. Ḿ nyí m̀ ɖɛ séín ɓěɛ̀ hwòɖǒ-wáɖáá-kà dyììn ɖé ní dyí-sɛ́ɖɛ́ìn-sɛ́ɖɛ́ìnɔ̀ mú. Ké ɓó kàǔn wɛ̃ɛ, ḿ ɖǎa dyé kà nì nyɔ ɓě ɓɛ́ wa nìà dà kɛɛ nì m̀ ɖɛ nyíɛń ɖé hwòɖǒ wáɖáá kè múà múɛ.

¹⁸ Óó Bounɓo, mɔ̀ mɔ̀à à ɓǎ Ééɓòɖòhɛ̃́ɛ̀ kè Áázè kè Éézùɖùɛ̀ɛ̀ Gèɖèpɔ́ɔ̀ kɛɛ, m̀ mɛ nyuɛ ɓɛ́ ɖɛ nìà kɛ ké nì nyɔ ɓěɔ̀ hwòɖǒ-kpɔ̃-ɖɛ̀ jǔ kánáá pū, ké m̀ mɛ nyuɛ ɓɛ́ waà hwòɖǒ-dyùàɔ̀ ké ɖé m̀ gbo gmɔ̀ìn kánáá pū.

¹⁹ Ké m̀ mɛ nyuɛ ɓɛ́ ní dyú Sã́ɖómà ké nì gma-dù kò-kò séín ɓěɔ̀ dyi kpɔ̃ hwòɖǒɛ̀-ɖé-hwɛ̀-kà, ɓɛ́ ɔ ké nì gbǒ kɔ̃̀ jè ḿ ɖǎà naɓaà kɛɛ po.”

²⁰ Ti ɓɛ́ Dèɓé ɖǎ ma Gèɖèpɔ́ɔ̀ zùo poɛ hwɔɛɛ, ɔ cɛ̃ɛ ma nyɔ séín ɓě poìn ma kà dyíɛɛ gbo, ké ɔ ɖá, “Ɓě ɓàìn Bounɓo mɔ̀à ɓěɛ̀ Gèɖèpɔ́ɔ̀ kɛ.” Ké nyɔ séínɔ̀ ɓàìn ma Bounɓo mɔ̀à waà ɓǎ ɓěɛ̀ Gèɖèpɔ́ɔ̀ kɛ. Ké wa taɓa ma dú hwuɖu ɖé Bounɓoɔ̀ kè kã́áɔ̀ kpéín-dyé-dyé mú.

²¹ Wéɔ̀ nyɔ kɔ ma ɓó dyíɛɛ, Éézùɖùɛ̀-nyɔ̀ vɛ̀nɛ̀ ɓěɔ̀ nyu ma fɔ̃ɔ-sàǎ-zàìn-ɖɛ̀ ɓě ɓó Bounɓoɔ̀ bìì. Wa zàìn ma ɓìɖǐ ɓíɔ́ táázĩ̀ìn ɖò kè ɓáɖáá ɓíɔ́ táázĩ̀ìn ɖò ɔ kè ɓáɖáá-dyù táázĩ̀ìn ɖò sáa. Ké wa nyu ma wa nììn náá-ɖɛ̀-sàǎ-zàìn-ɖɛ̀ ɓě kè sáa-zàìn-ɖɛ̀ kúɖúú tɔ̀ɔ̀ ɓě ɓó Éézùɖùɛ̀-nyɔ̀ séín ɓěɔ̀ bìì.

²² Ké wa ɖi ma ɖɛ, ké wa ná ma ɓó Bounɓoɔ̀ dyúa, ɓó wéa ɓaɖa, ké wa kpá ma múàǔn mìɔ. Ɓó wéa ɓaɖaa, wa nyu ma Sã́ɖómà mɔ̀à Dèɓéɛ̀ dyú-gààɔ̀ kɛɛ kã́á mú kpa sɔ̃́ nììn ɖe. Wa po ma ɔ cáná dúún ɓó Bounɓoɔ̀ dyúa, ɓɛ́ ɔ ké nyɔ ɓěɔ̀ wuɖuí-kɔ̃̀-nyɔ̀ jǔ. Ké wa po ma Záɖò cáná dúún, ɓɛ́ ɔ ké ma sáa-zà-nyɔ̀ vɛ̀nɛ̀ɔ̀ jǔ.

²³ Hwɛ̀ ké Sã́ɖómà sè ma kã́á-ɓòɖò ɓɛ́ Bounɓoɔ̀ ɖǎ ma kà dyi dèɛɛ dúí. Ɔ mɔ̀ ma kã́á ɓó ɔ ɓǎ Dèɓé bɛ̃̌ǐn, ké ɔ nyɔ-wuɖuí-kɔ̃̀-kpèɔ̀ kpá ma kɔ̃, ké Éézùɖùɛ̀-nyɔ̀ séín ɓěɔ̀ nyu ma ɔ wuɖu.

²⁴ Nyɔ vɛ̀nɛ̀ séín ɓěɔ̀ kè gàa-zà-nyɔ̀ séín ɓěɔ̀, dè Kã́á Dèɓéɛ̀ dyú-gàà séín ɓěɔ̀ kɔ̃, nì ma Kã́á Sã́ɖómà wuɖu xwíɖíi.

²⁵ Ké Bounɓoɔ̀ nyuɛ ké Éézùɖùɛ̀-nyɔ̀ séín ɓěɔ̀ dè ma Sã́ɖómà dya, ké Bounɓoɔ̀ nyí ma ɔ kã́á nììn dĩ́ín-dĩ̀ìn ɓɛ́ Éézùɖùɛ̀-kã̀ǎ ɖò séè ɓéɖé ɖòɛ.

Kà Dèɓéɛ̀ kã́á-kũ̀àɔ̀ jè nyu ma nìɛ̀ kɛ

²⁶ Kǎà Dèɓé mɔ̀à Jɛséɛ̀ dyú-gààɔ̀ kɛɛ nyu ma Éézùɖùɛ̀-ɓòɖò gànáɔ̀ wuɖuí kɔ̃̀ɔ̀.

²⁷ Ɔ kɔ̃̀ ma Éézùɖùɛ̀-ɓòɖòɔ̀ wuɖuí ɓó zɔ̃ kpáɖá-nyɔ sɔ̃́ xwíníín. Ɔ kɔ̃̀ ma wuɖuí ɖé Hɛ́bɔ̀nɔ̀-hwɔ̀ɖɔ̀ɔ̀ mú, ɓó zɔ̃ mɛ̀nɛ̌ìn-sɔ̃́ xwíníín, ké ɔ kɔ̃̀ ma wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ ɓaɖa-bùè sè tã xwíníín.

²⁸ Dèɓé nyɛ ma mìɔ hwɛ̀ ké ɔ mɛ́ ma. Ɔ bã ma mìɔ, ké ɔ ɓéɖé ma dya-dè-dè. Ké ɔ dyú-gàà Sã́ɖómà mɔ̀ ma kã́á ɓó ɔ bɛ̃̌ǐn.

²⁹ Ɖɛ séín ɓě ɓɛ́ Kã́á Dèɓé nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Sámíò mɔ̀à kpáá-ɖɛ̀-dyé-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ɔ̀ mú kè ɖé Nétɔ̃̀ mɔ̀à kpáá-ɖɛ̀-cɛ̃-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ɔ̀ mú ɔ kè ɖé Gáà mɔ̀à kpáá-ɖɛ̀-dyé-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ɔ̀ mú.

³⁰ Wa céè ɖɛ séín ɓá ɔ ɓóɖó-wuɖuí-kɔ̃̀-kɔ̃̀ɔ̀ kè ɔ kpéɔ̀ ɔ kè ɖɛ ɓě ɓɛ́ ɔ kè Éézùɖùɛ̀-nyɔ̀ ɓěɔ̀ kè ɓóɖó-dù tɔ̀ɔ̀ ɓěɔ̀ nììn kã́á-ɓòɖò ɓěɔ̀ dyé ma dyíɛɛ jè dyíɛ.