1 Kánáníkɔ̀ 19 - Ɓǎsɔ́ɔ̀ Báɓòɔ̀

Dèɓé ɖu Ámànà-nyɔ̀ ɓěɔ̀ kè Síwíɖíà-nyɔ̀ ɓěɔ̀ toún

¹ Sɔ̀ìn ɓóɛ gboɛɛ, Ámànà-nyɔ̀ ɓěɔ̀ kã́á mɔ̀à Náhàsì kɛɛ mɛ́ ma, ké ɔ dyú-gàà mɔ̀ Hánù kɛɛ mɔ̀ ma kã́á ɓó ɔ bɛ̃̌ǐn.

² Ké Dèɓé cɛ̃ɛ ma, ké ɔ ɖá, “Ní mu Hánù mɔ̀à Náhàsìɛ̀ dyú-gààɔ̀ kɛɛ nɔ̀mɔ̀ dyíin dyí nyuùn, sepóɛɖé ɔ ɓǎ nyu ma mɔ́ún nɔ̀mɔ̀ dyíin dyí.” Ɔ jèɛɛ, Dèɓé ɖoɓo ma ɔ gɔ̌mànà-nyɔ̀ ɓěɔ̀ ɖíɛ́ ɓě ɖé Hánù gbo, ɓɛ́ wa ké ma ɔ hwòɖǒ dyi dè ɓó ɔ ɓǎ mɛ́ jè. Ti ɓɛ́ Dèɓéɛ̀ gɔ̌mànà-nyɔ̀ ɓěɔ̀ nyini ma ɖé Hánù gbo, ɖé Ámànà-ɓòɖòɔ̀ kɔ̃, ɓɛ́ wa ké ma ɔ hwòɖǒ dyi dèɛɛ,

³ pūɛɛ, Ámànà-nyɔ̀ ɓěɔ̀ gɔ̌mànà-nyɔ̀ vɛ̀nɛ̀ ɓěɔ̀ cɛ̃ɛ ma Hánù gbo, ké wa ɖá, “Nì hwòɖǒ ɖá Dèɓé ɖoɓo nyɔ ɓěɛ̀, ɓɛ́ wa ké m̀ ɓǎ dya dè, ɓɛ́ wa ké nì hwòɖǒ dyi dèe? Má, ɔ gbo-nì-nyɔ̀ ɓěɔ̀ dyi m̀ gbo, ɓɛ́ wa ké à ɓóɖóɛ̀ kɔ̃in gmɔìn, ɓɛ́ wa kéɛ dyéɖé gboi kpaìn, nìí ɓɛ́ wa kéɛ dyí ɖúe?”

⁴ Ti ɓɛ́ wa cɛ̃ ma Hánù ɖɛ ɓěɛ̀ gboɛɛ, ɔ kpɔ̃ ma Dèɓéɛ̀ nyɔ ɓěɔ̀, ké ɔ kpana waà vɛ̃̌ ɓěɔ̀, ké ɔ cɛ̃̀ìn ma waà mú-po-ɖɔ̀ ɓěɔ̀ ɓó wa gbùà-dyèɖèǐ dyí, ké ɔ ɖoɓo ma wa ɖé wa ɓíɖí ɖe,

⁵ ké wa mu ma. Ti ɓɛ́ Dèɓé wɔ̃́ ma ɖɛ kpá ma kà ɔ gɔ̌mànà-nyɔ̀ ɓěɔ̀ gboɛ jèɛɛ, ɔ ɖoɓo ma kíá ɓě, ɓɛ́ wa ké wa hwìǐ mu, ké ɔ ɖá, “Ɓě mu ɖé Jɛ́ɖèkóò-hwɔ̀ɖɔ̀ɔ̀ mú, ɓɛ́ ɓě ké ɖé nì tee, ɓɛ́ ɓěɛ̀ vɛ̃̌ ɓěɔ̀ ké dyá ɖe, hwɛ̀ ɓɛ́ ɓě ké ɖe dyi.” Ɔ nyuɛ ma náa, sepóɛɖé dɛ̃ nyu ma ɔ gɔ̌mànà-nyɔ̀ ɓěɔ̀, ké wa se ma wa ɓíɖí ɖe dyiɛ ɓɛ́ìn.

⁶ Ti ɓɛ́ Hánù kè Ámànà-nyɔ̀ ɓěɔ̀ dyéɛ ma kà ɓɛ́ waà nyuu-ɖɛ̀ ɖǎa ma nyu ké wa jè ɖǎ ma Dèɓé dyi nyàìn nyɛɛ, púɛɛ, wa tò ma séɓàɖà kɔ̃̀ xwa-ku-ku mɔ̀ ma pṹá-dyèɖè táázĩ̀ìn kpáɖá-nyɔ tã ɓaɖa-bùè sè hm̀m̌ wɛ̃ɛ ɖé Mɛ̀sɔ̀pɔ̀témìà-ɓòɖòɔ̀ kè Síwíɖíà-ɓòɖò ɓě mɔ̀à Máákà kè Zóɓà kɛɛ kɔ̃, ɓɛ́ wa ké ma wa hwíì-sǒ ɓě kè hwíì-sǒ-nàìn-nyɔ̀ ɓě nyí.

⁷ Ké wa kpɔ̃ ma hwíì-sǒ táázĩ̀ìn kpáɖá-nyɔ ɓaɖa-bùè sè sɔ̃́ dyi. Wa kpɔ̃ ma Máákà-kã̀ǎɔ̀ kè ɔ sójà ɓěɔ̀ dyi ɖekè. Sójà ɓě ɓɛ́ wa kpɔ̃ ma kà dyiɛɛ dyi ma, ké wa nyànàìn ma waà jàɖàìn-gbò ɓěɔ̀ dyi ɓó Mɛ̀ɖéɓà-hwɔ̀ɖɔ̀ɔ̀ wĩín. Ké Hánù kè Ámànà-nyɔ̀ ɓěɔ̀ poìn ma sójà ɓě nì ma ɖé Ámànà-hwɔ̀ɖɔ̀ ɓěɔ̀ múɛɛ dyí, ké wa dyé ma ti ɓó to jè.

⁸ Ti ɓɛ́ Dèɓé wɔ̃́ ma wa jèɛɛ, ɔ ɖoɓo ma Jóà kè ɔ gàa-zà-nyɔ̀ séín ɓěɔ̀, ɓɛ́ wa ké ma wa gbo vɔ̃.

⁹ Ké Ámànà-nyɔ̀ ɓěɔ̀ sɔ̀ ma ɖé Mɛ̀ɖéɓà-hwɔ̀ɖɔ̀ɔ̀ mú, ké wa ɓá ma ɓó hwɔɖɔɔ̀ gmɔ-wɔ̃̀ɔ̀ gbo. Ké Síwíɖíà-kã̀ǎ ɓě ɓɛ́ wa kpɔ̃ ma kà dyiɛɛ cɛ̃ ma kpáún, ké wa poìn ma dyí ɖé gbǎùn-fúɖúá ɖò kɔ̃.

¹⁰ Ti ɓɛ́ Jóà dyéɛ ma kà ɓɛ́ nyɔ ɓě ɓɛ́ wa dyà ma kà ɔ to kɔ̃ɛɛ ɓá ma ɖé ɔ dyúa kè ɖé ɔ ɖeín nyɛɛ, ɔ zà ma gàa-zà-nyɔ̀ vɛ̀nɛ̀ ɓěɔ̀ ɖé Éézùɖùɛ̀-sòjà ɓěɔ̀ hwìɛ̀ dyi, ɓɛ́ wa ké ma Síwíɖíà-nyɔ̀ ɓěɔ̀ gbo vɔ̃.

¹¹ Ké ɔ nyu ma ɔ ɖíí-gàà Àbísàì sójà tɔ̀ɔ̀ ɓěɔ̀ ɓǎ mú, ɓɛ́ wa ké ma Ámànà-nyɔ̀ ɓěɔ̀ mɔ̀ùn gbo vɔ̃.

¹² Hwɛ̀ ké Jóà cɛ̃ɛ ma ɔ ɖíí-gàà Àbísàì gbo, ké ɔ ɖá, “Ɔ jǔ ké Síwíɖíà-nyɔ̀ ɓěɔ̀ dyi wɔ̃ ku, ké wa dyi ḿ toún ɖuɛń nìǐn, nìí, m̀ mɛ dyi, ɓɛ́ m̀ ké ḿ gbo kpá. Kɛɛ ɔ jǔ ké Ámànà-nyɔ̀ ɓěɔ̀ dyi wɔ̃ ku, ké wa dyi mɔ̀ùn toún ɖuɛń nìǐn, nìí, ní mu m̀ gbo kpáuń dyiìn.

¹³ M̀ mɛ ku hwòɖǒ, ɓɛ́ à ké vɔ̃ gǎ-kà ɓó à nyɔ ɓěɔ̀ kè à Gèɖèpɔ́ɔ̀ hwɔɖɔ ɓěɔ̀ bìì. Ké Bounɓoɔ̀ mɛ nyu ɖɛ dè ɔ hwìɖǐiɛ.”

¹⁴ Ké Jóà kè gàa-zà-nyɔ̀ vɛ̀nɛ̀ ɓě nì ma kà ɓó ɔ gboɛɛ mu, ɓɛ́ wa ké ma Síwíɖíà-nyɔ̀ ɓěɔ̀ gbo vɔ̃. Kɛɛ Síwíɖíà-nyɔ̀ ɓěɔ̀ gbǔ ma Jóà kè ɔ sójà ɓěɔ̀ dyúa.

¹⁵ Ti ɓɛ́ Ámànà-nyɔ̀ ɓěɔ̀ dyéɛ ma kà ɓɛ́ Síwíɖíà-nyɔ̀ ɓěɔ̀ ɖǎ ma toɔ̀ dyúa gbǔɛɛ, púɛɛ, wa mɔ̀ùn gbǔ ma Àbísàì mɔ̀à Jóàà ɖíí-gààɔ̀ kɛ kè ɔ sójà ɓěɔ̀ dyúa ɖekè, ké wa dyá ma ɖé waà hwɔɖɔɔ̀ gmɔɔ̀ mú. Hwɛ̀ ké Jóà kɔ́ìn ma ɖe, ké ɔ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.

¹⁶ Ti ɓɛ́ Síwíɖíà-nyɔ̀ ɓěɔ̀ dyéɛ ma kà ɓɛ́ Éézùɖùɛ̀-nyɔ̀ ɓěɔ̀ ɖǎ ma wa toún ɖuɛɛ, púɛɛ, wa ɖoɓo ma kíá, ké wa dyà ma Síwíɖíà-nyɔ̀ ɓě ɓɛ́ wa cĩ́ ma ɖé Dyùféɖétì-nìɔ̀ dyóɖó-xwáɖáún-wóɖóìn-naínɔ̀ kɛ, ɓɛ́ wa ké ma Éézùɖùɛ̀-nyɔ̀ ɓěɔ̀ gbo vɔ̃. Sóɓà ɓɛ́ ɔ mɔ̀ ma Háɖàɖɛ́zɛ̀ nììn sójà ɓěɔ̀ nyɔ vɛ̀nɛ̀ kɛɛ mɔ̀ ma waà nàìn-nyɔ̀.

¹⁷ Ti ɓɛ́ Dèɓé wɔ̃́ ma wa jèɛɛ, ɔ poìn ma Éézùɖùɛ̀-sòjà séín ɓěɔ̀ dyí, ɓɛ́ wa ké ma Síwíɖíà-nyɔ̀ ɓěɔ̀ gbo vɔ̃. Ké wa péɖé ma Jɔ́nì-nìɔ̀, ké wa dyɛ̀ìn ma wa. Ké Dèɓé ɓá ma ɔ sójà ɓěɔ̀, ké Síwíɖíà-nyɔ̀ ɓěɔ̀ vɔ̃ ma ɔ gbo.

¹⁸ Ké Éézùɖùɛ̀-nyɔ̀ ɓěɔ̀ ɖu ma Síwíɖíà-nyɔ̀ ɓěɔ̀ toún, ké Síwíɖíà-nyɔ̀ ɓěɔ̀ gbǔ ma wa dyúa. Ké Éézùɖùɛ̀-nyɔ̀ ɓěɔ̀ ɖáɓá ma Síwíɖíà-nyɔ̀ ɓěɔ̀ hwíì-sǒ-nàìn-nyɔ̀ ɓěɔ̀ táázĩ̀ìn mɛ̀nɛ̌ìn-sɔ̃́ kè waà sójà tɔ̀ɔ̀ ɓěɔ̀ táázĩ̀ìn kpáɖá-nyɔ sɔ̃́. Ké wa ɖáɓá ma Sóɓà mɔ̀à Síwíɖíà-sòjà ɓěɔ̀ nàìn-nyɔ̀ɔ̀ kɛɛ ɖekè.

¹⁹ Ti ɓɛ́ kã́á ɓě nì ma kà Háɖàɖɛ́zɛ̀ xwíɖíiɛɛ dyéɛ ma kà ɓɛ́ Éézùɖùɛ̀-nyɔ̀ ɓěɔ̀ ɖǎ ma wa toún ɖuɛɛ, púɛɛ, wa kè Dèɓé po ma wuɖu ɓíín ɓá gìɖìǐ jè dyí, ké wa nì ma Dèɓé xwíɖíi. Sɔ̀ìn ɓóɛ gboɛɛ, Síwíɖíà-nyɔ̀ ɓěɔ̀ se ma Ámànà-nyɔ̀ ɓěɔ̀ gbo kpáa mɔ́ ɖe ɓó to vɔ̃ jè fɔɔ cá.