1 Kánáníkɔ̀ 17 - Ɓǎsɔ́ɔ̀ Báɓòɔ̀

Bɔ̃̌ ɓɛ́ Nétɔ̃̀ dyà Dèɓé gboɛ

¹ Ti ɓɛ́ Dèɓé ɖǎ ma dyi kò nɔ̀mɔ̀ dyíin ɖé ɔ kã́á-gbòɔ̀ múɛɛ, wé ɖòɛ̀ ɓaɖaa, ɔ cɛ̃ɛ ma kpáá-ɖɛ̀-cɛ̃-nyɔ̀ ɖò mɔ̀ Nétɔ̃̀ kɛɛ gbo, ké ɔ ɖá, “Gmɔ̀ nɔ̄, kà ḿ cĩ́ gbǒ ɓɛ́ wa pòìn síɖà-cù kɛɛ mú, kɛɛ Bounɓoɔ̀ gma-gbɔ̀ɖɔ̀ɔ̀ nì ɖé jàɖàìn-gbò seà ɖɛ kpa kɛɛ múɛ.”

² Ké Nétɔ̃̀ cɛ̃ɛ ma Dèɓé gbo, ké ɔ ɖá, “Nyu ɖɛ séín nì hwòɖǒ mɔ́ ɓɛ́ m̀ ké nyuɛ, sepóɛɖé Gèɖèpɔ́ɔ̀ nì ɓó m̀ gbo.”

³ Kɛɛ ɓó máaún-hwùɖù dyúáɖòɔ̀ múɛɛ, Bounɓoɔ̀ wùɖù ma Nétɔ̃̀ gbo, ké ɔ ɖá,

⁴ “Mu, ɓɛ́ m̀ kéɛ Dèɓé mɔ̀à ní gbo-nì-nyɔ̀ɔ̀ kɛɛ gbo cɛ̃ kà ḿ ɖá ɔ mɔ̀ nyɔ se kɔ̃̀ ɓɛ́ ɔ ké ní gbǒ poɛ.

⁵ Sepóɛɖé ḿ ɖúó Éézùɖùɛ̀-dyù ɓěɔ̀ nàǐn dyí kéà zɛ̃̌ɛ̀ dyɛ̀ìn nyɛɛ, ḿ séè gbǒǔn-gbò ɖò mú cĩ́ ɖò. Kɛɛ ní cĩ́ jàɖàìn-gbò mú kánáá pū, dɛ̀ séín wa muɛ.

⁶ Dɛ̀ séín ɓě ɓɛ́ ḿ kè Éézùɖùɛ̀-dyù séín ɓěɔ̀ zĩ̀ìn kà dyiɛɛ, ḿ ɖǎa tɔ̀ɔ̀-ɓìɔ̀ ɓě ɓɛ́ ḿ gã, ɓɛ́ wa ké ní nyɔ ɓěɔ̀ nàìn nyɛɛ ɖò gbo cɛ̃ ɖò, ké ḿ ɖá, ‘Ɖɛ́ kɔ̃̀ jè m̀ se ḿ bìì síɖà-cù-gbò ɖò po kɛ́ɛ̀?’

⁷ “Ɔ jèɛɛ, cɛ̃ɛ Dèɓé mɔ̀à ní gbo-nì-nyɔ̀ɔ̀ kɛɛ gbo kà mɔ̄ mɔ̀à Bounɓo mɔ̀ nyɔ nìà ɖɛ séín kɔ̃in nyɛɛ zà ma ɔ ɓáɖáá-dyí-gmɔ̀-kũ̀à gbo ɖé gbǎùn-fúɖúáɔ̀ kɔ̃, ké ḿ nyu ɔ ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ nàìn-nyɔ̀ múɛ.

⁸ Ké dà séín ɔ muɛɛ, ḿ nì ɓó ɔ gbo, ké ḿ ɖu ɔ mú-nyɛ́-nyɔ̀ séín ɓěɔ̀ toún. Ní muɛ nyuùn ɓɛ́ ɔ nyɛ́nɛ́ ké mu kà ɓóɖó-nàìn-nyɔ̀ vɛ̀nɛ̀ ɓěɔ̀ nììn nyɛ́nɛ́ muà ɓóɖó-kpàà kɔ̃ɛ.

⁹ Ḿ ɖǎ ní nyɔ ɓěɔ̀ ɓóɖó ɖò nyí, ɓɛ́ wa ké ɖé cĩ́, ɓɛ́ ɓóɖóɔ̀ ké wa mìɔùn nììn ɓíɖí-ɓòɖò jǔ, ɓɛ́ nyɔ ɖò ké se wa dyi pĩ́à ɖe. Ɓó kàǔn wɛ̃ɛ, hwòɖǒ-kɔ̃in-nyìnììn-nyɔ̀ ɓěɔ̀ se ní nyɔ ɓěɔ̀ dyi pĩ́àǎ mu ɖe ɖé waà ɓóɖóɔ̀ kɔ̃ kà waà mú-nyɛ́-nyɔ̀ ɓěɔ̀ nyuɛ ma kà

¹⁰ ti wa dyi ma kà ɓóɖóɔ̀ múɛ. Ní mu Dèɓéɛ̀ mú-nyɛ́-nyɔ̀ séín ɓěɔ̀ toún ɖuùn. Ké ní mu ɔ xwíníín-dyù ɓěɔ̀ kã́á mú nyuùn, ké waà kã́á-kpèɔ̀ mu dyúa muùn kánáá pū.

¹¹ Ti ɓɛ́ ɔ mu mɛ́ìn, ké ɔ mu ɖé ɔ ɓǎ ɓěɔ̀ gbo muùn wɛ̃ɛ, ní mu ɔ xwíníín-dyù-gàà ɓěɔ̀ ɖò dyí ɖúùn, ɓɛ́ ɔ ké ɔ dúí sè. Ké ní mu ɔ dyúɔ̀ kã́á-ɓòɖòɔ̀ nyuùn, ɓɛ́ ɔ ké dúi ku.

¹² Ké ɔ dyúɔ̀ mɔ̀ nyɔ mu gbǒ ɖò poùn ɓó ḿ bìì, ké ní muɛ nyuùn ɓɛ́ ɔ dyúɔ̀ kã́á-kpèɔ̀ ké dyúa mu kánáá pū.

¹³ Ní mu ɔ ɓǎ jǔùn, ké ɔ mu ní dyú-gàà jǔùn. Ké ní mu ɔ ɖeín nììn, ɓɛ́ ɔ ké kã́á jǔ kánáá pū. Ḿ se ɔ kã́á-kpèɔ̀ xwa zàǎ mu kà ḿ nyu ma kà nyɔ sɔ̀à ɓó hwɛ̀ ɓɛ́ ɔ mɔ̀ùn dyià ɓó dyí kɔɛ.

¹⁴ Kɛɛ ní muɛ nyuùn ɓɛ́ ɔ ké ní nyɔ ɓěɔ̀ kè ní kã́á-ɓòɖòɔ̀ wuɖuí kɔ̃̀ ɓó sè-ná-sèɛ̀ tiín. Ɔ kã́á-kpèɔ̀ se sèìn-naín kɔ̃̀ɔ̌ mu.”

¹⁵ Hwɛ̀ ké Nétɔ̃̀ cɛ̃ ma ɖɛ séín ɓě ɓɛ́ Bounɓoɔ̀ ɖǎ ma kà ɔ gbo cɛ̃ɛ Dèɓé gbo.

Dèɓéɛ̀ zùo-po-ɓàà-wùɖù

¹⁶ Ké Dèɓé mu ma ɖé jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ mú, ké ɔ dèɖě ma ɖé dya, ké ɔ ɓaà ma Bounɓoɔ̀, ké ɔ ɖá, “Bounɓo Gèɖèpɔ́ɔ̀, ḿ kè ní gbǒ-xwíníín-nyɔ̀ ɓěɔ̀ se ɖɛ kpa, kɛɛ m̀ nyu à nɔ̀mɔ̀ dyíin pàɖǎ dyí tee.

¹⁷ Ɓó kàǔn wɛ̃ɛ, m̀ nìǎ à ɖɛ pàɖǎ dyí nyuɛń ɖe. M̀ ɖǎa cɛ̃ kà nì mu à gbǒ-xwíníín-nyɔ̀ ɓěɔ̀ ɖeín nììn kánáá pūɛ. Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ m̀ ɖǎa à dyí tɛ̀mɛ̀ìn nyɛɛ, kǎà nyɔǔn-dyù ɓéɖé ɓɛ́ wa kéɔ́ máa nyu.

¹⁸ Ké ɖɛ́ ḿ ɓéɖé ɓɛ́ ḿ ké m̀ gbo cɛ̃ ɖe ɓá dya-dè-dè ɓɛ́ kà m̀ ɖǎà mɔ̄ mɔ̀à nì gbo-nì-nyɔ̀ɔ̀ kɛ nyíɛɛ jè dyí kɛ́? Sepóɛɖé m̀ dyuò ní hwòɖǒ-dyùàɔ̀ dyí.

¹⁹ Óó Bounɓo, ɔ mɔ̀ ma nì hwòɖǒɛ̀-mɔ́ɔ́-ɖɛ̀, ɓɛ́ m̀ ké ma ɖɛ vɛ̀nɛ̀ nìà kɛ nyu ɓó mɔ̄ mɔ̀à nì gbo-nì-nyɔ̀ɔ̀ kɛɛ bìì, ké m̀ ɖǎa ḿ dyí tɛ̀mɛ̀ìn.

²⁰ Bounɓo, nyɔ ɖò se nì kà m̀ nìà kɛ. Ké à ɖǎa wɔ̃́, ké à dyuòɛ̀ kà m̀ ɖòùn mɔ̀ Gèɖèpɔ́ɔ̀ kɛ.

²¹ Nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛ kè ɓóɖó-dù kà kò ɖò ɓěɛ̀ nyɔ ɓě se hwɔìn. M̀ póìn ma wa sɔ̀ìn ɖé Íjè-ɓòɖòɔ̀ kɔ̃, ɓɛ́ wa ké nì nyɔ ɓě jǔ. Ké ti ɓɛ́ m̀ kúmú ma ɓóɖó-dù kà kò ɖò ɓěɛ̀ nyɔ ɓě ɓó wa dyúa kɛɛ, m̀ nyuɛ ma náa, ɓɛ́ wa ké ma wa mìɔùn nììn ɓíɖí-ɓòɖò ɓéɖé. M̀ nyu ma wa bìì ɖɛ vɛ̀nɛ̀ ɓě kè gã̌ǎ-ɖɛ̀ ɓě, ɓɛ́ nì nyɛ́nɛ́ ké ma mu.

²² M̀ ɖǎa nyu ɓɛ́ Éézùɖùɛ̀-nyɔ̀ ɓěɔ̀ ké m̀ mìɔùn nììn nyɔ ɓě jǔ kánáá pū, ké m̀ mɔ̀ waà Gèɖèpɔ́ɔ̀.

²³ “Ɓó kàǔn wɛ̃ɛ, Bounɓo, wuɖu ɓě ɓɛ́ m̀ ɖǎà cɛ̃ ɓá ḿ kè ní gbǒ-xwíníín-nyɔ̀ ɓěɔ̀ jè dyíɛɛ mɛ ku dúi kánáá pū. M̀ mɛ nyu ɖɛ m̀ ɖǎà à nyɛ́nɛ́ín ɖáìn nyɛ,

²⁴ ɓɛ́ nì nyɛ́nɛ́ ké mu kánáá pū. Nìí, wa muɛ cɛ̃ìn, ɓɛ́ wa ké níiń, ‘Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ Éézùɖùɛ̀-nyɔ̀ ɓěɔ̀ Gèɖèpɔ́ɔ̀ jǎà.’ Ké nì muɛ nyuùn ɓɛ́ mɔ̄ mɔ̀à nì gbo-nì-nyɔ̀ɔ̀ kɛ kè ní gbǒ-xwíníín-nyɔ̀ ɓěɔ̀ kã́á-kpèɔ̀ ké dyúa mu tee.

²⁵ Ní Gèɖèpɔ́ɔ̀, ní hwòɖǒ dè dyi mìɔ, ɓɛ́ ḿ ké ɓaà-wùɖù nìà kɛ nyu, sepóɛɖé m̀ ɖǎa ḿ gbo cɛ̃ kà ḿ kè ní gbǒ-xwíníín-nyɔ̀ ɓěɔ̀ kã́á-kpèɔ̀ mu dyúa muùn kánáá pūɛ.

²⁶ Bounɓo, m̀ mɔ̀ Gèɖèpɔ́ɔ̀ jǎà, ké m̀ ɖǎà ḿ ɖɛ nɔ̀mɔ̀ dyíin nìà kɛ nyɛ́nɛ́ín ɖáìn nyɛ̀.

²⁷ Ɔ jèɛɛ, po ní gbǒ-xwíníín-nyɔ̀ ɓěɔ̀ mana kɔ̃, ɓɛ́ wa ké dyúa mu kánáá pū, sepóɛɖé ɖɛ mɔ̀ Bounɓoɔ̀ po mana kɔ̃ɛɛ, mana nì ɔ kɔ̃ kánáá pū.”