1 Kánáníkɔ̀ 16 - Ɓǎsɔ́ɔ̀ Báɓòɔ̀

¹ Ti ɓɛ́ wa ɖǎ ma hwɔɖɔɔ̀ dyá kɛɛ, wa dè ma Gèɖèpɔ́ɔ̀ gbɔ̀ɖɔ̀ɔ̀ ɖé jàɖàìn-gbò ɓɛ́ Dèɓé nyànàìn ma kà dyi ɓóɛ bììɛɛ mú. Ké Dèɓé nyu ma fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě ɓó Gèɖèpɔ́ɔ̀ bìì.

² Ti ɓɛ́ ɔ ɖǎ ma sáa ɓěɔ̀ zàà hwɔɛɛ, ɔ po ma nyɔ ɓěɔ̀ mana kɔ̃ ɖé Bounɓoɔ̀ nyɛ́nɛ́ɔ̀ mú.

³ Ké ɔ geìn ma Éézùɖùɛ̀-nyɔ̀ séín ɓěɔ̀ ɖii-ɖɛ̀ múin. Ɔ nyí ma gàa kè màa ɖò-ɖò séín bɛɖɛɛ̀-kpò ɖò-ɖò kè suaɖɛ̀-kpò ɔ kè géɖéè-hwàɖà dyɛ-dyɛ ɓě.

⁴ Ké ɓó kɔ̃in ɖeɛɛ, Dèɓé gã ma Ɖíìváà-nyɔ̀ ɓěɔ̀ ɖíɛ́ ɓě, ɓɛ́ wa ké ɓiè-nyɔ̀ ɓě jǔ ɓó Bounɓoɔ̀ gbɔ̀ɖɔ̀ɔ̀ dyúa, ɓɛ́ wa ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖɛ zɔ̀, ɓɛ́ wa ké ɔ zùo po, ɔ kè ɓɛ́ wa ké ɔ ɓàìn.

⁵ Ásàfì mɔ̀ ma waà nyɔ vɛ̀nɛ̀, ké Zɛ́kɔ̀wáɖádyà mɔ̀ ma ɔ sɔ̃-xwíɖíi-dè-nyɔ̀. Ké nyɔ ɓě ɓɛ́ wa kɔ ɓó wa gbo dyíɛɛ mɔ̀ Jɛ̀dyíò kè Sɛ̀mìwáɖámɔ̀ kè Jɛ̀híò kè Mátìfíà kè Ɛ̀ɖíà kè Bɛ̀nádyà kè Óɓè-Íɖɔ̀ùn ɔ kè Jɛ̀dyíò ɖò ɖe. Ásàfì mɔ̀ nyɔ ké ma bàɖàsǐ-pĩ̀à ɓěɔ̀ dyí ɓaɖaìn, ɓɛ́ nyɔ tɔ̀ɔ̀ ɓěɔ̀ ké ma gbǎɖí-dù kò-kò ɓěɔ̀ ɓaɖa.

⁶ Ké Bɛ̀nádyà kè Jàházìè ɓɛ́ wa mɔ̀ ma sáa-zà-nyɔ̀ ɓěɛɛ mɔ̀ nyɔ ké gã̀à ɓěɔ̀ ɓaɖa-nyɔ̀ jǔ kánáá pū ɓó Gèɖèpɔ́ɔ̀ gbɔ̀ɖɔ̀ɔ̀ dyúa.

Bounɓoɔ̀ zùo-po-wɛ̀ɖɛ̀

⁷ Ti ɓɛ́ Dèɓé ɖǎ ma Ɖíìváà-nyɔ̀ ɓěɔ̀ gãa hwɔ ɓó wéa ɓaɖaa, ɔ gã ma Ásàfì kè ɔ mǔè Ɖíìváà-nyɔ̀ ɓěɔ̀, ɓɛ́ wa ké Bounɓoɔ̀ zùo-po-wɛ̀ɖɛ̀ nìà kɛ dyi ɓèɖèìn. Wɛ́ɖɛ́ɔ̀ wuɖu ɖá,

⁸ “Ɓě po Bounɓoɔ̀ zùo. Ɓě ɓiè ɔ. Ɓě nyuɛ ɓɛ́ ɓóɖó-dù ɓěɔ̀ ké ɖɛ ɓě ɓɛ́ ɔ ɖǎ nyuɛɛ jè dyuò.

⁹ Ɓě ɓèɖèìn ɔ gbo. Ɓě ɓèɖèìn ɔ ɓàìn-wɛ̀ɖɛ̀ gbo. Ɓě cɛ̃ ɔ dĩ́ín-dĩ̀ìn-ɖɛ̀ séín ɓěɔ̀ jè.

¹⁰ Ɓě mɛ kpá múàǔn kà ɔ mɔ̀ nyɔ kɔ̃̀ ɓěɛ. Nyɔ ɓě kɔ̃̀ hwòɖǒ ɖɛ̀ɓɛ̀ Bounɓoɔ̀ ɓiè jè múɛɛ mɛ kpá múàǔn.

¹¹ Ɓě mu ɖé Bounɓoɔ̀ gbo, ɓɛ́ ɓě ké ɔ kpéɔ̀ zɔ̀. Kǎà ɓě mɛ nyuɛ náa tee.

^12-13 Ɓě mɔ̀à Ééɓòɖòhɛ̃́ɛ̀ mɔ̀à ɔ gbo-nì-nyɔ̀ɛɛ dyú ɓěɛɛ, ɓě mɔ̀à Jékɔ̀ ɓɛ́ ɔ gã zɔ̃̌ɔ̀ kà kɛɛ xwíníín-dyù ɓěɛɛ, dĩ́ín-dĩ̀ìn-ɖɛ̀ ɓě Bounɓoɔ̀ nyu ma kà kɛ kè ɔ zɛ̃̀ìn-ɖɛ̀ ɓěɔ̀ ɔ kè kà ɔ nyu ɖɛ wɔ̃ poɛ dyí-sɛ́ɖɛ́ìn-kà kɛɛ jè mɛ nì ɓě hwìɖǐi.

¹⁴ “Bounɓoɔ̀ mɔ̀ à Gèɖèpɔ́ɔ̀. Ɔ gma ɓěɔ̀ nì ɓó ɓóɖó-kpà gànáà bìì.

¹⁵ Ɔ dèè-wùɖùɔ̀ jè nì ɔ hwìɖǐi kánáá pū. Ɔ mɔ̀ wuɖu ɔ ɖǎǒ zɔ̃̌ɔ̀ kà cɛ̃ ɓó xwéɖé-dù deìn dúún táázĩ̀ìn kúɖúú bììɛ.

¹⁶ Ɔ mɔ̀ ɖɛ ɓɛ́ ɔ ɖáìn zɔ̃̌ɔ̀ kà Ééɓòɖòhɛ̃́ɛ̀ nyɛ́nɛ́ín, hwɛ̀ ɓɛ́ ɔ dyià Áázè mɔ̀ùn nyɛ́nɛ́ín ɖáìn ɖekèɛ.

¹⁷ Ɔ kpaìn ma ɖɛ dyúáɖò nìà kɛ kɔ̃in ɓó Jékɔ̀ kɔ̃̀ nyɛ́nɛ́ tɔ̀ɔ̀ mɔ̀à Éézùɖùɛ̀ kɛɛ gbo, ɓɛ́ ɔ ké nì kánáá pū.

¹⁸ Ɔ ɖá, ‘Ní mu m̀ Kénà-ɓòɖòɔ̀ nyíìn, ɓɛ́ ɔ ké nì xwíníín-dyù ɓěɛ̀ kɔ̃̀ɔ̀-ɖɛ̀ jǔ kánáá pū.’

¹⁹ “Bounɓoɔ̀ ɖáìn zɔ̃̌ɔ̀ wa ɓóɖóɔ̀ nyɛ́nɛ́ín ti ɓɛ́ wa se ma xwaún dyi kpá, ké wa mɔ̀ ɖé ɖéèɛ.

²⁰ Wa nì ma dyi téɛń. Wa nì ma sɔ̀ ɓóɖó-dù ɖò kɔ̃ mu ɖò kɔ̃ nyuɛń.

²¹ Kɛɛ ɔ se ma wɔ̃́ ɓɛ́ nyɔ ɖò ké ma wa dyi pĩ́à. Ɔ wùɖù ma kã́á ɓě gbo ɓó wa jè, ké ɔ ɖá,

²² ‘Ɓěǐn ɖá ɓɛ́ ɓě ké ní nyɔ ɓě ɓɛ́ ḿ ɖǎà gã kɛɛ dyi tìnììn. Ɓěǐn ɖá ɓɛ́ ɓě ké ní kpáá-ɖɛ̀-cɛ̃-nyɔ̀ ɓěɔ̀ ɖò ɖɛ gbà ɖò bũ̌ nyu.’

²³ “Toɖo-kɔ̃-nyɔ̀ séín ɓě, ɓě ɓèɖèìn Bounɓoɔ̀ gbo. Ɓě po kà ɔ nyu nyɔ póɛ̀n nyɛɛ bɔ̃̌ dyi ɓó wé kè wé xwíníín.

²⁴ Ɓě po zio ɓá ɔ dĩ́ín-dĩ̀ìnɔ̀ jè dyí ɖé ɓóɖó-dù ɓěɔ̀ gbo. Ɓě zaìn ɖɛ koo-koo ɓě ɓɛ́ ɔ ɖǎ nyuɛɛ jè kɔ̃in ɖé nyɔ séín ɓěɔ̀ gbo.

²⁵ Bounɓoɔ̀ kpé ɓúá dyí mìɔ, ké ɔ ɓɛ́ìn kpé ɓɛ́ ɔ ké ɓàìn-ɓàìn vɛ̀nɛ̀ dyé. Ɔ mɔ̀ nyɔ ɓéɖé ɔ ké dya-dè-dè dyé ɖé gèɖèpɔ́ɔ̀ séín kɔ̃in.

²⁶ Ɓóɖó-dù kà kò ɖò ɓěɔ̀ nììn gèɖèpɔ́ɔ̀ ɓěɔ̀ mɔ̀ kũùn-kpò saá-saá nyɛ̀nɛ̀ɛ̀. Kɛɛ Bounɓoɔ̀ mɔ̀ nyɔ mɛ dyɔɔ̀.

²⁷ Dĩ́ín-dĩ̀ìn kè dya-dè-dè gbǎìn ɔ wɔ̃. Kpé kè múà dyíìn ɖé ɔ cĩ́-naínɔ̀ dyi.

²⁸ “Toɖo-kɔ̃-nyɔ̀ séín ɓě, ɓě ɓàìn Bounɓoɔ̀. Ɓě ɓàìn ɔ ɓó ɔ dĩ́ín-dĩ̀ìnɔ̀ kè ɔ ganaɔ̀ jè.

²⁹ Ɓě dè Bounɓoɔ̀ nyɛ́nɛ́ɔ̀ dya. Ɓě dyà nyíí-ɖɛ̀ ɓě ɓó ɔ dyúa. Ɓě ɓiè Bounɓo mɔ̀à Mú-hwɛ̀-nyɔ̀ɔ̀ kɛ, ti ɓɛ́ ɔ wóɖó xwáɖáún wɛ̃.

³⁰ Toɖo-kɔ̃-nyɔ̀ séín ɓě, ɔ dyi-fɛ̃̀ìn-fɛ̃̀ìn mɛ nyuɛ ɓɛ́ ɓě ké tɛɖɛ. Ɓóɖó-kpàà ɖǎ páún kpá, ké ɔ se daí sɔ̀ìn ɓɛ́ìn.

³¹ Ɖɛ séín nì ɖé dyɔún kè nɔ̄ ɓóɖó-kpàà kɔ̃ɛɛ mɛ kpá múàǔn. Wa mɛ cɛ̃ɛ ɓóɖó-dù ɓěɔ̀ gbo kà Bounɓoɔ̀ mɔ̀ kã́á kɛ.

³² Dyóóɔ̀ mɛ kuɖu, ké ɖɛ séín cĩ́ ɖéɛ gboɛɛ mɛ kpá múàǔn ɖekè. Geɖe ɓěɔ̀ kè ɖɛ séín nì ɖé wa gboɛɛ mɛ kpá múàǔn,

³³ ɓɛ́ cu-gɔ̃̀ ɓě nì ɖé xwáɖá xwíɖíiɛɛ ké múà-kùɖǔ-kuɖu nyu. Wa mɛ nì ɓeɖeɛń ɓó Bounɓoɔ̀ dyúa, sepóɛɖé ɔ nì dyiɛń, ɓɛ́ ɔ ké ɓóɖó-kpàà zaa wɔ̃ po.

³⁴ “Ɓě po Bounɓoɔ̀ zùo, sepóɛɖé ɔ kpeɖe nɔ̀mɔ̀ dyíin, ké ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ se sèìn-naín ɖò kɔ̃.

³⁵ Ɓě mɛ cɛ̃ɛ ɔ gbo, ɓɛ́ ɓě ké níiń, ‘Óó Gèɖèpɔ́ɔ̀, mɔ̀ mɔ̀à à póìn-nyɔ̀ kɛɛ, póìn à. Poìn à dyí ɖe sɔ̀ìn ɖé ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀, ɓɛ́ m̀ ké à póìn, ɓɛ́ à ké nì nyɛ́nɛ́ hwɛ̀ǐn-hwɛ̀ǐnɔ̀ ɓàìn, ɓɛ́ à ké múàǔn kpá ɖé nì ɓàìn-ɓàìn mú.’

³⁶ Ɓàìn-ɓàìn mɛ nì Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ kɔ̃. Ɓàìn-ɓàìn mɛ nì ɔ kɔ̃ ɓó kàǔn ɔ kè sɔ̀ìn dà ké dyúa muɛ.” Ti wa jaɖa ma wɛ́ɖɛ́ɔ̀ kɛɛ, nyɔ séín ɓěɔ̀ ɖá, “Kǎà ɔ mɛ nì! Ɓěà ɓàìn Bounɓoɔ̀!”

Wa ɓièìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè Gíɓìɔ̀ùn-hwɔ̀ɖɔ̀ɔ̀ mú

³⁷ Ké Dèɓé sè ma Ásàfì kè ɔ ɖíí-gàà ɓěɔ̀ ɓó Bounɓoɔ̀ gma-gbɔ̀ɖɔ̀ɔ̀ gbo, ɓɛ́ wa ké ɖɛ ɓě wa ɓéɖé wa ké nyu ɓó wé kè wé xwíníín nyɛɛ nyu.

³⁸ Ɔ sè ma ɓó Óɓè-Íɖɔ̀ùn ɓɛ́ ɔ mɔ̀ ma Jɛ̀ɖúfùùnɛ̀ dyú-gàà kɛ kè ɔ ɖíí-gàà kpáɖá-nyɔ tã sè mɛ̀nɛ̌ìn-tã ɓěɔ̀ ɖekè. Óɓè-Íɖɔ̀ùn kè Hósà mɔ̀ ma Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě.

³⁹ Ké ɔ sè ma Záɖò mɔ̀à sáa-zà-nyɔ̀ vɛ̀nɛ̀ɔ̀ kɛ kè ɔ mǔè sáa-zà-nyɔ̀ ɓěɔ̀ ɓó Bounɓoɔ̀ jàɖàìn-gbò ɓɛ́ ɔ nìà ɖé toɖoɔ̀ dya ɖé Gíɓìɔ̀ùn-hwɔ̀ɖɔ̀ɔ̀ múɛɛ gbo,

⁴⁰ ɓɛ́ wa ké fɔ̃ɔ-sàǎ-zàìn-ɖɛ̀ ɓě nyu ɓó Bounɓoɔ̀ bìì, ɓó gbàà kɔ̃̀ kɔ̃ mɔ̀à fɔ̃ɔ-sàǎ-zàìn-ɖɛ̀ nyùìn-naínɔ̀ kɛɛ kɔ̃ kánáá pū, ɓó gànà-kṹún kè hwìo, dyììn ɖé ɖɛ séín ɓě céè ma kà ɖé gma ɓɛ́ Bounɓoɔ̀ dè zɔ̃̌ɔ̀ kà Éézùɖùɛ̀-nyɔ̀ ɓěɔ̀ dyíɛɛ mú kɛ.

⁴¹ Ké Hémàùn kè Jɛ̀ɖúfùùn kè nyɔ tɔ̀ɔ̀ ɓě ɓɛ́ wa gã, ké wa síìn ma waà nyɛ́nɛ́ dɛ̀ǐn, ɓɛ́ wa ké ma Bounɓoɔ̀ zùo po, ɓó ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè kɛɛ nì ma ɓó wa gbo ɖekè.

⁴² Hémàùn kè Jɛ̀ɖúfùùn ɓéɖé ma gã̀à ɓě kè bàɖàsǐ-pĩ̀à ɓě ɔ kè ɓaɖaa-ɖɛ̀ tɔ̀ɔ̀ ɓěɔ̀ ɓó Gèɖèpɔ́ɔ̀-wɛ̀ɖɛ̀ɔ̀ jè. Ké wa gã ma Jɛ̀ɖúfùùnɛ̀ dyú-gàà ɓě ɓó Gèɖèpɔ́ɔ̀ gbǒɔ̀ dyí gmɔ̀ jè.

⁴³ Sɔ̀ìn ɓóɛ gboɛɛ, nyɔ séín ɓěɔ̀ mu ma wa ɓíɖí-taún ɖe, ké Dèɓé mu ma ɔ ɓíɖí-taún, ɓɛ́ ɔ ké ma ɔ ɓíɖí-taún-nyɔ̀ ɓěɔ̀ nyíɔún zà.