1 Kánáníkɔ̀ 15 - Ɓǎsɔ́ɔ̀ Báɓòɔ̀

Wa naɓaà ɓó Gèɖèpɔ́ɔ̀ gbɔ̀ɖɔ̀ɔ̀ jàɖàìn jè

¹ Ti ɓɛ́ Dèɓé ɖǎ ma gbǒ ɓě po ɓó ɔ mìɔùn bìì ɖé ɔ ɓíɖí Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, ɔ naɓaà ma pá ɖò ɓó Gèɖèpɔ́ɔ̀ gbɔ̀ɖɔ̀ɔ̀ jè. Ɔ nyànàìn ma jàɖàìn-gbò ɖò dyi ɓóɛ jè.

² Hwɛ̀ ké Dèɓé ɖá, “Nyɔ kà kò ɖò mɛ ɓɔ́ Gèɖèpɔ́ɔ̀ gbɔ̀ɖɔ̀ɔ̀ ɓéɖéɛ fɔɔ, ɔ sèìn Ɖíìváà-nyɔ̀ ɓěɔ̀ ɖòùn, sepóɛɖé wa mɔ̀ nyɔ Bounɓoɔ̀ ɖǎ gã ɓóɛ ɓéɖé jè, ké wa mɔ̀ nyɔ kɔ̃̀ wa ké ɓó Bounɓoɔ̀ dyúa kũ̀à nyu kánáá pū.”

³ Ké Dèɓé poìn ma Éézùɖùɛ̀-nyɔ̀ séín ɓěɔ̀ dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké Bounɓoɔ̀ gbɔ̀ɖɔ̀ɔ̀ ɖé pá ɓɛ́ ɔ ɖǎ naɓaà ɓóɛ jèɛɛ mú dyà.

⁴ Sáa-zà-nyɔ̀ ɓě ɓɛ́ wa sɔ̀ ma Eɖóúnɛ̀ gbǒ-xwíníínɔ̀ múɛ kè Ɖíìváà-nyɔ̀ ɓě ɓɛ́ Dèɓé poìn ma dyíɛɛ kɛà kɛ̀.

⁵ Ɖé Kóhà nììn xwíníín-dyù ɓěɔ̀ hwìɛ̀ kɛɛ, Dyúwìɖìè mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò hɔ̃dɛ̀ɖɛ̀ ɖò kè kpáɖá-nyɔ dyi ma.

⁶ Ɖé Mɛ̀wáɖáwìɖì nììn xwíníín-dyù ɓěɔ̀ hwìɛ̀ kɛɛ, Àsádyà mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò hɔ̃dɛ̀ɖɛ̀ sɔ̃́ kè kpáɖá-nyɔ dyi ma.

⁷ Ɖé Gésɔ̀ùn nììn xwíníín-dyù ɓěɔ̀ hwìɛ̀ kɛɛ, Jóɛ̀ mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò hɔ̃dɛ̀ɖɛ̀ ɖò kè kpáɖá-nyɔ ɓaɖa-bùè dyi ma.

⁸ Ɖé Ɛ̀ɖìzáfàùn nììn xwíníín-dyù ɓěɔ̀ hwìɛ̀ kɛɛ, Sɛ̀mádyà mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò hɔ̃dɛ̀ɖɛ̀ sɔ̃́ dyi ma.

⁹ Ɖé Hɛ́bɔ̀nɔ̀ nììn xwíníín-dyù ɓěɔ̀ hwìɛ̀ kɛɛ, Ɛ́ɖìè mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò kpáɖá-nyɔ hĩinyɛ dyi ma.

¹⁰ Ɖé Dyùzíè nììn xwíníín-dyù ɓěɔ̀ hwìɛ̀ kɛɛ, Ámìnáɖà mɔ̀ ma waà nyɔ vɛ̀nɛ̀ kɛ kè ɔ ɖíí-gàà ɓěɔ̀ nyɔ-kpò hɔ̃dɛ̀ɖɛ̀ ɖò kè ɓaɖa-bùè sè sɔ̃́ dyi ma.

¹¹ Hwɛ̀ ké Dèɓé ɖá ma sáa-zà-nyɔ̀ ɓě mɔ̀à Záɖò kè Ábìáfà kɛ kè Ɖíìváà-nyɔ̀ ɓě mɔ̀à Dyúwìɖìè kè Àsádyà kè Jóɛ̀ kè Sɛ̀mádyà kè Ɛ́ɖìè ɔ kè Ámìnáɖà kɛ.

¹² Ké ɔ cɛ̃ɛ ma wa gbo, ké ɔ ɖá, “Ɓě mɔ̀ Ɖíìváà-nyɔ̀ ɓěɔ̀ gbǒ-xwíníín ɖò-ɖò ɓěɔ̀ nyɔ vɛ̀nɛ̀. Ɓě kè ɓěɛ̀ ɖíí-gàà ɓěɔ̀ mɛ po ɓě mìɔùn wáká, ɓɛ́ ɓě ké ɓě mìɔùn mú hwɔ, nìí ɓɛ́ ɓě ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gbɔ̀ɖɔ̀ɔ̀ pá ɓɛ́ ḿ ɖǎà naɓaà ɓóɛ jèɛɛ mú dyà.

¹³ Ɓě mɔ̀ nyɔ seɛ ma ɓéɖé kĩ́ín jèɛɛ, Bounɓo mɔ̀à à Gèɖèpɔ́ɔ̀ kɛɛ tò ma à gǎ kɔ̃. Ɔ nyuɛ ma náa, sepóɛɖé à se ma ɔ gbɔ̀ɖɔ̀ɔ̀ ɓéɖé kà à ɓéɖé à kéɛ ma nyu kɛ.”

¹⁴ Ɔ jèɛɛ, sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ hwɔ ma wa mìɔùn mú, ɓɛ́ wa ké ma Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gbɔ̀ɖɔ̀ɔ̀ dyà.

¹⁵ Ké Ɖíìváà-nyɔ̀ ɓěɔ̀ ɓéɖéìn ma Gèɖèpɔ́ɔ̀ gbɔ̀ɖɔ̀ɔ̀ cu-kpóɖó ɓě kɔ̃, ké wa dèɛ̀ ma kɔún, kà Mózè nyuɛ zɔ̃̌ɔ̀ kà wa gbo cɛ̃ɛ dyììn ɖé wuɖu ɓɛ́ Bounɓoɔ̀ nyí zɔ̃̌ɔ̀ ɔ kɛɛ múɛ.

¹⁶ Ké ɓó kɔ̃in ɖeɛɛ, Dèɓé cɛ̃ɛ ma Ɖíìváà-nyɔ̀ ɓěɔ̀ nyɔ vɛ̀nɛ̀ ɓěɔ̀ gbo, ɓɛ́ wa ké waà ɖíí-gàà ɓěɔ̀ ɖíɛ́ ɓě gã, ɓɛ́ wa ké ɓeɖe, ɓɛ́ wa ké gbǎɖí-dù kò-kò ɓě ɓaɖa, ɓɛ́ wa ké bàɖàsǐ-pĩ̀à ɓě dyí ɓaɖaìn, nìí ɓɛ́ wa ké múàǔn kpá, ɓɛ́ wa ké kuɖu-kuɖu nyu.

¹⁷ Ɔ jèɛɛ, Ɖíìváà-nyɔ̀ ɓěɔ̀ gã ma Hémàùn mɔ̀ Jóɛ̀ɛ̀ dyú-gàà kɛ kè Ásàfì mɔ̀ Bɛ̀wéɖékìàà dyú-gàà kɛ ɔ kè Éfã̀ mɔ̀ Kùsádyàà dyú-gàà ɓɛ́ ɔ sɔ̀ ma ɖé Mɛ̀wáɖáwìɖìɛ̀ gbǒ-xwíníínɔ̀ múɛ, ɓɛ́ wa ké ɓeɖe-nyɔ̀ ɓěɔ̀ kɔ̃in nì.

¹⁸ Ké waà ɖíí-gàà ɓě kɔ ma ɓó wa gbo dyíɛɛ mɔ̀ Zɛ́kɔ̀wáɖádyà kè Jáázìè kè Sɛ̀mìwáɖámɔ̀ kè Jɛ̀híò kè Dyúnì kè Ɛ̀ɖíà kè Bɛ̀nádyà kè Mààsédyà kè Mátìfíà kè Ɛ̀ɖìfɛ́ɖèhù kè Mìnédyà ɔ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě mɔ̀ ma Óɓè-Íɖɔ̀ùn kè Jɛ̀dyíò kɛ.

¹⁹ Ké ɓeɖe-nyɔ̀ ɓě mɔ̀à Hémàùn kè Ásàfì ɔ kè Éfã̀ kɛɛ mɔ̀ nyɔ ké ma bàɖàsǐ-pĩ̀à ɓěɔ̀ dyí ɓaɖaìn.

²⁰ Ké Zɛ́kɔ̀wáɖádyà kè Jáázìè kè Sɛ̀mìwáɖámɔ̀ kè Jɛ̀híò kè Dyúnì kè Ɛ̀ɖíà kè Mààsédyà ɔ kè Bɛ̀nádyà mɔ̀ nyɔ ké ma gbǎɖí mɛ́nɛ́ɛ́ ɓěɔ̀ ɓaɖa dyììn ɖé gbǎɖí-wùɖù mɔ̀ Àɖámɔ̀ kɛɛ mú.

²¹ Ké Mátìfíà kè Ɛ̀ɖìfɛ́ɖèhù kè Mìnédyà kè Óɓè-Íɖɔ̀ùn kè Jɛ̀dyíò ɔ kè Ázàzíà mɔ̀ nyɔ ké ma gbǎɖí vɛ̀nɛ̀ ɓěɔ̀ ɓaɖa dyììn ɖé gbǎɖí-wùɖù mɔ̀ Sɛ̀mínì kɛɛ mú.

²² Ké Kɛ́nàníà ɓɛ́ ɔ mɔ̀ ma Ɖíìváà-nyɔ̀ ɓěɔ̀ nàìn-nyɔ̀ ɖòɛɛ mɔ̀ nyɔ nàìn ma wɛ́ɖɛ́ɔ̀, sepóɛɖé ɔ dyuòɛ̀ nyuɛ.

^23-24 Ké Bɛ̀wéɖékìà kè Ɛ̀kínà kè Óɓè-Íɖɔ̀ùn ɔ kè Jɛ̀híà mɔ̀ ma Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓó Gèɖèpɔ́ɔ̀ gbɔ̀ɖɔ̀ɔ̀ jè. Ké sáa-zà-nyɔ̀ ɓě mɔ̀ ma Sɛ̀bánìà kè Jòsáfà kè Nɛ̀fánìò kè Àmásàì kè Zɛ́kɔ̀wáɖádyà kè Bɛ̀nádyà ɔ kè Ɛ̀ɖìɛ́zɛ̀ kɛɛ mɔ̀ nyɔ ɓaɖa ma gã̀à ɓěɔ̀ ɓó Gèɖèpɔ́ɔ̀ gbɔ̀ɖɔ̀ɔ̀ dyúa.

Wa jàɖàìn gbɔ̀ɖɔ̀ɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú

²⁵ Ké Dèɓé kè Éézùɖùɛ̀-nyɔ̀ vɛ̀nɛ̀ ɓěɔ̀ kè sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ mu ma ɖé múà mú, ɓɛ́ wa ké ma Bounɓoɔ̀ gma-gbɔ̀ɖɔ̀ɔ̀ ɖé Óɓè-Íɖɔ̀ùn ɓíɖí-taún zà.

²⁶ Gèɖèpɔ́ɔ̀ kpá ma Ɖíìváà-nyɔ̀ ɓě ɓɛ́ wa ɓéɖé ma kà ɔ gma-gbɔ̀ɖɔ̀ɔ̀ kɛɛ gbo jèɛɛ, wa zàìn ma ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ sáa.

²⁷ Ɓó tia ɓaɖaa, Dèɓé po ma ɖénì-gã̀ùn nɔ̀mɔ̀ dyíin ɖò mú. Kà dyúáɖòɔ̀ kǎà Ɖíìváà-nyɔ̀ ɓě ɓɛ́ wa ɓéɖé ma kà gbɔ̀ɖɔ̀ɔ̀ kɛ kè ɓeɖe-nyɔ̀ ɓěɔ̀ ɔ kè Kɛ́nàníà ɓɛ́ ɔ mɔ̀à ɓeɖe-nyɔ̀ ɓěɔ̀ nàìn-nyɔ̀ɔ̀ kɛɛ nyuɛ ma ɖekè. Ké Dèɓé po ma ífɔ̀ ɖò ɓɛ́ ɔ mɔ̀ ma ɖénì-ɖɔ̀ɛɛ mú ɖekè.

²⁸ Ké Éézùɖùɛ̀-nyɔ̀ séín ɓěɔ̀ kpa ma múà nyuɛ, ké wa nì ma gã̀à-dù kò-kò ɓěɔ̀ kè bàɖàsǐ-pĩ̀à ɓěɔ̀ ɔ kè gbǎɖí-dù kò-kò ɓěɔ̀ ɓaɖauń, ké wa dyà ma Bounɓoɔ̀ gma-gbɔ̀ɖɔ̀ɔ̀.

²⁹ Ti ɓɛ́ wa nìǎ gbɔ̀ɖɔ̀ɔ̀ hwɔɖɔɔ̀ dyáǐn nyɛɛ, Mákò mɔ̀à Sɔ́ɔ̀ dyú-mààɔ̀ kɛɛ gmɔ̀ìn ma wúɖɛ̀-wɔ̃̀ ɖò mú, ké ɔ dyéɛ, ké Kã́á Dèɓé nì ma dyeɛń. Ɔ nì ma hwɔ pauń, ké Mákòɛ̀ hwòɖǒ zàìn ma ɔ zùǔn.