1 Kánáníkɔ̀ 14 - Ɓǎsɔ́ɔ̀ Báɓòɔ̀

Ɖɛ kò-kò ɓě ɓɛ́ Dèɓé nyu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛ

¹ Wé ɖòɛ̀ ɓaɖaa, Híwàɖàùn mɔ̀à Táà-hwɔ̀ɖɔ̀ɔ̀ kã́áɔ̀ kɛɛ ɖoɓo ma Dèɓé gbo kíá, ɓɛ́ wa ké ma ɖɛ-kɔ-nyɔ̀ ɓě kè sɔ́ɔ́-gbò-po-nyɔ̀ ɓě ɔ kè síɖà-cù ɓě ɖé Dèɓé gbo kpa, ɓɛ́ wa ké Dèɓé bìì gbǒ ɖò po.

² Púɛɛ, Dèɓé dyuòɛ̀ ma dyí jɛ́ɛ́ kà ɓɛ́ Bounɓoɔ̀ ɖǎ ma ɔ dyi dè, ɓɛ́ ɔ ké ma kã́á jǔ ɓó Éézùɖùɛ̀-ɓòɖòɔ̀ bìì ɔ kè kà ɓɛ́ Bounɓoɔ̀ nì ma ɓóɖóɔ̀ mú zaǐn ɓó ɔ nyɔ ɓěɔ̀ jèɛ.

³ Sɔ̀ìn ɓóɛ gboɛɛ, Dèɓé kpɔ̃ ma nyɔ́nɔ́ ɖíɛ́ ɓě dyi ɖe ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ wóɖóìn ma gàa-dyù kè màa-dyù ɖíɛ́ ɓě ɖe.

⁴ Dyú ɓě Dèɓé wóɖóìn ma kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ kɛà kɛ̀: Sàmúà kè Sóbà kè Nétɔ̃̀ kè Sã́ɖómà

⁵ kè Íhà kè Ɛ̀ɖísùà kè Ɛ̀páɖɛ̀

⁶ kè Nógà kè Nɛ́fɛ̀ kè Jàfíà

⁷ kè Ɛ̀ɖìsámà kè Bɛ́ɛ̀dyáɖà ɔ kè Ɛ̀ɖìfáɖɛ̀.

Dèɓé ɖu Féɖésìà-nyɔ̀ ɓěɔ̀ toún

⁸ Ti ɓɛ́ Féɖésìà-nyɔ̀ ɓěɔ̀ wɔ̃́ɔ ma kà ɓɛ́ Éézùɖùɛ̀-nyɔ̀ ɓěɔ̀ ɖǎ ma Dèɓé gã, ɓɛ́ ɔ ké ma kã́á jǔɛɛ, Féɖésìà-nyɔ̀ ɓěɔ̀ sójà séín ɓěɔ̀ dyi ma, ɓɛ́ wa ké ma Dèɓé gbo vɔ̃. Kɛɛ Dèɓé wɔ̃́ ma wa jè, ké ɔ mu ma wa wɔ̃.

⁹ Ké Féɖésìà-nyɔ̀ ɓěɔ̀ sójà ɓěɔ̀ dyi ma ɖé Wɛ̀ɖɛ̀fáìn Bɔɔ-kpàɔ̀ kɔ̃, ké wa ɖú ma nyɔ ɓěɔ̀ hwu kpàǐ.

¹⁰ Ɔ jèɛɛ, Dèɓé diè ma Gèɖèpɔ́ɔ̀ dyi, ké ɔ ɖá, “Ḿ mɛ mu, ɓɛ́ ḿ ké Féɖésìà-nyɔ̀ ɓěɔ̀ gbo vɔ̃ɔ̀? Nì mu wa ḿ xwaún dyi poùnǹ?” Ké Bounɓoɔ̀ jǔ ma ɔ gɔ̃̌, ké ɔ ɖá, “Mu, ɓɛ́ m̀ ké wa gbo vɔ̃. Ní mu wa m̀ xwaún dyi poùn.”

¹¹ Ké Dèɓé mu ma ɖé Béò-Pɛ̀wáɖázììn-pàɔ̀ mú, ké ɔ vɔ̃ ma Féɖésìà-nyɔ̀ ɓěɔ̀ gbo, ké ɔ ɖu ma ɖé wa toún. Ké ɔ cɛ̃ɛ ma, ké ɔ ɖá, “Kà dyíí-nì gbɔà ɖɛ múɛ, kǎà Gèɖèpɔ́ɔ̀ ɖǎ ní mú-nyɛ́-nyɔ̀ ɓěɔ̀ mú gbɔɔ̀ dyììn ɖé ní sɔ̃ɔ̀ mú.” Ɔ jèɛɛ, Dèɓé ɖáìn ma páɔ̀ Béò-Pɛ̀wáɖázììn kɔ̃̀ xwíníín mɔ̀à Gèɖèpɔ́ɔ̀ gbɔɔ̀ wa múɛ.

¹² Ti ɓɛ́ Féɖésìà-nyɔ̀ ɓěɔ̀ gbǔ ma toɔ̀ dyúa kɛɛ, wa wã ma waà kũùn-kpò-gèɖèpɔ́ɔ̀ ɓěɔ̀ kɔ̃, ké Dèɓé zà ma ɔ sójà ɓěɔ̀ wuɖu kɔ̃, ké wa fɔ̃ ma wa.

¹³ Sɔ̀ìn ɓóɛ gboɛɛ, Féɖésìà-nyɔ̀ ɓěɔ̀ dyi ma ɖé bɔɔ-kpàɔ̀ kɔ̃, ké wa hwu ma nyɔ ɓěɔ̀ ɖe.

¹⁴ Ké Dèɓé diè ma Gèɖèpɔ́ɔ̀ dyi ɖe, ké ɔ jǔ ma Dèɓé gɔ̃̌, ké ɔ ɖá, “M̀ mɛ ɓɔ́ wa wɔ̃ muɛ déín, ɓɛ́ m̀ ké wa gbo vɔ̃, kɛɛ m̀ mɛ ɓàɖàìn wa, ɓɛ́ m̀ ké wa kɔ̃ún gèìn, hwɔ ɖé bɔ́sɔ̃̀-cù ɓěɔ̀ wáún dyí.

¹⁵ Ti nì mu ɓó bɔ́sɔ̃̀-cù ɓěɔ̀ wáún nyiniìn nyɛɛ, nìí, m̀ mɛ fòìn. Ké nì mu sójà ɓěɛ̀ ɓo-jĩ̌ wɔ̃́ùn ɖé cu ɓěɔ̀ dya. Nìí, m̀ mɛ vɔ̃ Féɖésìà-nyɔ̀ ɓěɔ̀ gbo, sepóɛɖé, nìí, mɔ̄ Gèɖèpɔ́ɔ̀ ɖǎ m̀ dyúa zi, ɓɛ́ ḿ ké Féɖésìà-nyɔ̀ ɓěɔ̀ toún ɖu.”

¹⁶ Ké Dèɓé nyu ɖɛ Gèɖèpɔ́ɔ̀ cɛ̃ ma kà ɔ gboɛ. Ké ɔ kpa ma Féɖésìà-nyɔ̀ ɓěɔ̀ ɖáɓáa tee sɔ̀ìn ɖé Gíɓìɔ̀ùn-hwɔ̀ɖɔ̀ɔ̀ mú, ɓɛ́ ɔ kéà ɖé Gézɛ̀-hwɔ̀ɖɔ̀ɔ̀ wĩín nyiniɛ.

¹⁷ Ké Dèɓéɛ̀ nyɛ́nɛ́ mu ma ɖé ɓóɖó-dù séín kɔ̃, ké Bounɓoɔ̀ nyuɛ ké ɓóɖó séín fɛ̃̀ìn ma ɔ dyi.