1 Kánáníkɔ̀ 13 - Ɓǎsɔ́ɔ̀ Báɓòɔ̀

Wa zà Gèɖèpɔ́ɔ̀ gbɔ̀ɖɔ̀ɔ̀ ɖé Kíjà-Jáwìɖììn-hwɔ̀ɖɔ̀ɔ̀ mú

¹ Sɔ̀ìn ɓóɛ gboɛɛ, Dèɓé kè sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ séín dè ma dɔ́ɔ́.

² Ké ɔ cɛ̃ɛ ma Éézùɖùɛ̀-nyɔ̀ séín ɓěɔ̀ gbo, ké ɔ ɖá, “Ɔ jǔ ké ɓěɛ̀ hwòɖǒ dyi ɖɛ nìà kɛ múin dèìn ní, ké ɔ dyi Bounɓo mɔ̀à à Gèɖèpɔ́ɔ̀ kɛɛ mɔ́ɔ́-ɖɛ̀ jǔǐn, à mɛ toìn wuɖu dyi ɖé à ɖíí tɔ̀ɔ̀ ɓě nìà Éézùɖùɛ̀-ɓòɖòɛ̀ dà séín nyɛɛ gbo, ké à mɛ tò wuɖu ɖé sáa-zà-nyɔ̀ ɓě kè Ɖíìváà-nyɔ̀ ɓě ɓɛ́ wa cĩ́à ɖé Éézùɖùɛ̀-nyɔ̀ ɓěɔ̀ hwìɛ̀ ɖé waà hwɔɖɔ ɓěɔ̀ mú kè hwɔɖɔ ɓěɔ̀ ɖeiɛɛ gbo, ɓɛ́ wa ké nɔ̄ à gbo dyí poìn.

³ Ɔ ɖǎ ná nìǐn, nìí ɓɛ́ à ké à Gèɖèpɔ́ɔ̀ gbɔ̀ɖɔ̀ɔ̀ nɔ̄ à gbo ɖe dyà, sepóɛɖé à wãa ma kɔ̃ ɓó Sɔ́ɔ̀ nììn tiín.”

⁴ Ké nyɔ séín ɓěɔ̀ wɔ̃́ìn ma ɖɛ ɔ cɛ̃à kɛɛ gbo, sepóɛɖé ɔ mɔ̀ ma ɖɛ sɛ́ɖɛ́ìn dyí ɖé nyɔ séín dyéɖéín.

⁵ Ké Dèɓé poìn ma Éézùɖùɛ̀-nyɔ̀ séín ɓěɔ̀ dyí sɔ̀ìn ɖé Síhɔ̀-nì nìà ɖé Íjè-ɓòɖòɔ̀ bã̀àɔ̀ dyíɛɛ wĩín, nyinià ɖé Ɖíɓò-Hámà-hwɔ̀ɖɔ̀ɔ̀ múɛ, ɓɛ́ wa ké Gèɖèpɔ́ɔ̀ gbɔ̀ɖɔ̀ɔ̀ ɖé Kíjà-Jáwìɖììn-hwɔ̀ɖɔ̀ɔ̀ mú zà, ɓɛ́ wa kéɛ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyà.

⁶ Ké Dèɓé kè Éézùɖùɛ̀-nyɔ̀ séín ɓěɔ̀ mu ma ɖé Bááɖà-hwɔ̀ɖɔ̀ kɔ̃̀ nyɛ́nɛ́ tɔ̀ɔ̀ mɔ̀à Kíjà-Jáwìɖììn, ɓɛ́ ɔ nìà ɖé Júɖà-ɓòɖòɔ̀ kɔ̃ɛɛ mú, ɓɛ́ wa ké ɖé Gèɖèpɔ́ɔ̀ gbɔ̀ɖɔ̀ɔ̀ ɖé zà. Ɔ mɔ̀ gbɔ̀ɖɔ̀ɔ̀ kɔ̃̀ kɔ̃ ɓɛ́ Bounɓoɔ̀ dèɖěà dya ɓó cɛ́ɖɔ̀ sɔ̃́ nìà ɓó gbɔ̀ɖɔ̀ɔ̀ kɔ̃ɛɛ pṹa kɛ. Gbɔ̀ɖɔ̀ɔ̀ mùìn Bounɓoɔ̀ nyɛ́nɛ́ín.

⁷ Ké Dèɓé kè nyɔ ɓěɔ̀ zà ma gbɔ̀ɖɔ̀ɔ̀ ɖé Àbìnáɖàà gbǒɔ̀ mú, ké wa dèɛ̀ ma hwíì-ɓìɖǐ ɖìè ɖò kɔ̃. Ti wa nì ma Gèɖèpɔ́ɔ̀ gbɔ̀ɖɔ̀ɔ̀ kpauń wɛ̃ɛ, Dyúzàà kè Àhíò nì ma hwíì-ɓìɖǐ kɔ̃̀ kɔ̃ ɓɛ́ gbɔ̀ɖɔ̀ɔ̀ dè ma kà kɛɛ nàǐn.

⁸ Ké Dèɓé kè Éézùɖùɛ̀-nyɔ̀ séín ɓěɔ̀ nì ma dyeɛń, ké wa nì ma ɓeɖeɛń ɖé wa kpé séín mú, ɖé Gèɖèpɔ́ɔ̀ dya-dè-dè mú. Ké wa nì ma gbǎɖí-dù kò-kò ɓě kè ɖùǔ ɓě kè bàɖàsǐ-pĩ̀à ɓě ɔ kè gã̀à ɓě ɓaɖaa kpauń.

⁹ Ti ɓɛ́ wa nyini ma ɓó gàa ɖò mɔ̀ Kíɖɔ̀ùn kɛɛ mɔɔ́-dyí-síìn-naín nyɛɛ, ɓìɖǐ ɓěɔ̀ zɛ̀nɛ̌ ma, ké gbɔ̀ɖɔ̀ɔ̀ túò ma dyi, ké Dyúzàà kpɔ̃ ma gbɔ̀ɖɔ̀ɔ̀ dyi.

¹⁰ Ké Bounɓoɔ̀ kpáìn ma Dyúzàà dyoɖoún mìɔ, ké ɔ ɖáɓá ma ɔ. Ɖɛ nìà kɛ kpá ma ná, sepóɛɖé Dyúzàà kpɔ̃ ma Bounɓoɔ̀ gbɔ̀ɖɔ̀ɔ̀ hwɛ̀ǐn-hwɛ̀ǐn ɓɛ́ ɔ se kɔ̃̀ ɓɛ́ ɔ ké ma dyi kpɔ̃ɛɛ dyi jè. Dyúzàà mɛ́ìn ma ɓó gbɔ̀ɖɔ̀ɔ̀ wáún, ɓó hwìèɔ̀ gba.

¹¹ Ké Dèɓé kpá ma dyoɖoún, sepóɛɖé Bounɓoɔ̀ ɖǎ ma Dyúzàà ɖáɓá jè. Ké wa ɖáìn ma páɔ̀ Pɛ́wɛ̀ɖɛ̀-Dyúzàà kɔ̃̀ xwíníín mɔ̀à Dyúzàà ɖáɓá-ɖáɓá kɛ.

¹² Ɓó tia ɓaɖaa, Dèɓé fɛ̃̀ìn ma Gèɖèpɔ́ɔ̀ dyi ɓó ɖɛ Gèɖèpɔ́ɔ̀ ɖǎ ma kà nyuɛɛ jè, ké ɔ ɖá, “Ḿ se Gèɖèpɔ́ɔ̀ gbɔ̀ɖɔ̀ɔ̀ ɖé ḿ gbo kpaa ɓɛ́ìn ɓó kàǔn”

¹³ Ɔ jèɛɛ, Dèɓé se ma gbɔ̀ɖɔ̀ɔ̀ ɖé ɔ ɓíɖí Jùɖúsɛ̀ɖɛ̀ìn-hwɔ̀ɖɔ̀ɔ̀ mú kpa, kɛɛ ɔ kpa ma ɖéɛ gàa ɖò mɔ̀ Óɓè-Íɖɔ̀ùn mɔ̀ ma Gátì-nyɔ̀ ɖòɛɛ ɓíɖí-taún.

¹⁴ Ké Gèɖèpɔ́ɔ̀ gbɔ̀ɖɔ̀ɔ̀ nyu ma dɛ̀nɛ̀ tã ɖé Óɓè-Íɖɔ̀ùn ɓíɖí-taàɔ̀ mú. Ké Bounɓoɔ̀ po ma Óɓè-Íɖɔ̀ùnɛ̀ gbǒ-xwíníínɔ̀ kè ɔ kɔ̃̀ɔ̀-ɖɛ̀ séín mana kɔ̃.