1 Kánáníkɔ̀ 12 - Ɓǎsɔ́ɔ̀ Báɓòɔ̀

Nyɔ ɓě ɓɛ́ wa sɔ̀ ma ɖé Bɛ̃́címà nììn xwéɖé-dùɔ̀ mú, ɓɛ́ wa kè Dèɓé naìn ma mú kĩ́ín nyɛ

¹ Ti ɓɛ́ Dèɓé kpá ma kà Sɔ́ɔ̀ mɔ̀à Kísìɛ̀ dyú-gààɔ̀ kɛɛ xwaún xwáɖáún, ké ɔ nì ma kà vǐè-xwàɖàǔn ɖé Zíkàɖà-hwɔ̀ɖɔ̀ɔ̀ múɛɛ, gàa ɖíɛ́ ɓě dyi ma ɔ gbo, ké wa mɔ̀ ma ɔ gàa-zà-nyɔ̀ ɓě ɓɛ́ wa kpá ma ɔ gbo ɖé to gboɛɛ ɖíɛ́ ɓě.

² Wa dyuò ma pɔnɔ kè bǒ poɛ mìɔ. Wa ɓɛ́ìn ma sé-kpìì mɔɔ bǒ-ɖɛ̀-kpò waà ɖiaùn-sɔ̃̀ mɔɔ kunuà-sɔ̃̀ pòɛ̀n. Wa mɔ̀ ma Sɔ́ɔ̀ ɓíɖí-gbǒ-xwíníín-nyɔ̀. Wa séín sɔ̀ ma ɖé Bɛ̃́címàà xwéɖé-dùɔ̀ mú.

³ Waà wuɖuí-kɔ̃̀-nyɔ̀ mɔ̀ ma Áhìɛ́zɛ̀, ké Jóàsì mɔ̀ ma ɔ sɔ̃-xwíɖíi-dè-nyɔ̀. Wa mɔ̀ ma Sɛ̀máà ɓɛ́ ɔ mɔ̀ ma Gíɓèà-nyɔ̀ ɖò kɛɛ dyú-gàà ɓě. Ké gàa-zà-nyɔ̀ tɔ̀ɔ̀ ɓěɔ̀ mɔ̀ ma Jɛ́zìè kè Páɖɛ̀ ɓɛ́ wa mɔ̀ ma Àmávɛ̀ɛ̀ dyú-gàà ɓěɛ kè Bɛ̀wáɖákà kè Jɛ́hù ɓɛ́ wa mɔ̀ ma Ànáfò-nyɔ̀ ɓěɛ

⁴ ɔ kè Ìmádyà ɓɛ́ ɔ mɔ̀ ma Gíɓìɔ̀ùn-nyɔ̀ ɖò kɛ. Ìmádyà mɔ̀ ma gàa-zà-nyɔ̀ kpáɖá-nyɔ ɓaɖa-bùè ɓěɔ̀ nyɔ vɛ̀nɛ̀. Gàa-zà-nyɔ̀ ɓěɔ̀ ɖíɛ́ ɓě mɔ̀ ma Jɛ̀ɖèmádyà kè Jàházìè kè Jòhánà kè Jòzáɓà ɓɛ́ wa mɔ̀ ma Gèɖéwàɖà-nyɔ̀ ɓěɛ,

⁵ kè Ɛ̀ɖúzàì kè Jɛ̀wíɖímɔ̀ kè Bɛ́àɖíà kè Sɛ̀máwíɖídyà kè Sɛ̀fátìà ɓɛ́ wa mɔ̀ ma Háwìɖì-nyɔ̀ ɓěɛ,

⁶ kè Ɛ̀kínà kè Ìsíà kè Àzáwèɖèò kè Jòɛ́zɛ̀ kè Jàsóɓèàùn ɓɛ́ wa mɔ̀ ma Kówàɖà-nyɔ̀ ɓěɛ,

⁷ ɔ kè Jòéɖà kè Zɛ́ɓàɖíà ɓɛ́ wa mɔ̀ ma Jɛ̀ɖóhã̀ ɓɛ́ ɔ mɔ̀ ma Géɖò-nyɔ̀ ɖòɛɛ dyú-gàà ɓěɛ.

Nyɔ ɓě ɓɛ́ wa sɔ̀ ma ɖé Gáà nììn xwéɖé-dùɔ̀ mú, ɓɛ́ wa kè Dèɓé naìn ma múɛ

⁸ Gàa ɖíɛ́ ɓě sɔ̀ ma ɖé Gáà nììn xwéɖé-dùɔ̀ mú, ké wa zi ma ɖé Dèɓé gbo ɖekè, ti ɓɛ́ ɔ nì ma kà ɖé ɔ to-pèɖèìn-naín nì ma kà ɖé gbǎùn-fúɖúáɔ̀ kɔ̃ɛ. Wa mɔ̀ ma gàa-zà-nyɔ̀ ɓě ɓɛ́ wa dyuò dyí-zĩ̀ìn-ɖɛ̀ kè ɖí toún vɔ̃̀ìn nyɛ. Wa ku dyíin kà ganìǎ nìà kɛ, ké waà ɓo fɛ̃́ìn xwa kà déɖé nì ɖé xwáɖá xwíɖíiɛɛ nìà kɛ.

⁹ Waà nyɔ vɛ̀nɛ̀ mɔ̀ ma Ézɛ̀, ké nyɔ sɔ̃́ nììn kɔ ma ɓó ɔ gbo dyíɛɛ mɔ̀ Òbòdádyà, ké nyɔ tã nììn kɔ ma ɓó ɔ mɔ̀ùn gbo dyíɛɛ mɔ̀ Ɛ̀ɖíà,

¹⁰ ké nyɔ hĩinyɛ nììn kɔ ma ɓó ɔ gbo dyíɛɛ mɔ̀ Mìmánà, ké nyɔ hm̀m̌ nììn kɔ ma ɓó ɔ gbo dyíɛɛ mɔ̀ Jɛ̀ɖèmádyà,

¹¹ ké nyɔ mɛ̀nɛ̌ìn-ɖò nììn kɔ ma ɓó ɔ gbo dyíɛɛ mɔ̀ Átàì, ké nyɔ mɛ̀nɛ̌ìn-sɔ̃́ nììn kɔ ma ɓó ɔ gbo dyíɛɛ mɔ̀ Ɛ́ɖìè,

¹² ké nyɔ mɛ̀nɛ̌ìn-tã nììn kɔ ma ɓó ɔ gbo dyíɛɛ mɔ̀ Jòhánà, ké nyɔ mɛ̀nɛ̌ìn-hĩinyɛ nììn kɔ ma ɓó ɔ gbo dyíɛɛ mɔ̀ Ɛ̀záɓà,

¹³ ké nyɔ ɓaɖa-bùè nììn kɔ ma ɓó ɔ gbo dyíɛɛ mɔ̀ Jɛ̀ɖèmádyà ɖò ɖe, ké nyɔ ɓaɖa-bùè sè ɖò nììn kɔ ma ɓó ɔ gbo dyíɛɛ mɔ̀ Mábànàìn.

¹⁴ Gáà-nyɔ̀ ɓěɛ̀ mɔ̀ ma Dèɓéɛ̀ sójà ɓěɔ̀ nyɔ vɛ̀nɛ̀. Waà nyɔ dyùwè ɓě kɔ̃̀ ma sójà hɔ̃dɛ̀ɖɛ̀ ɓě wuɖuí, ké waà nyɔ vɛ̀nɛ̀ ɓě kɔ̃̀ ma sójà táázĩ̀ìn ɓě wuɖuí.

¹⁵ Gàa ɓěa mɔ̀ nyɔ péɖé ma kà Jɔ́nì-nìɔ̀ ɖé dɛ̀nɛ̀ kĩ́ín-kĩ́ínɔ̀ xwíníín, ti kɔ̃̀ ɓaɖa ɓɛ́ níɔ̀ dyí ma, ké ɔ wáɖá kpóó kɔ̃in nyɛ. Wa mɔ̀ nyɔ nyuɛ ké nyɔ séín ɓě cĩ́ ma kà ɖé bɔɔ-kpàɔ̀ kɔ̃, ɖé dyóɖó-xwáɖáún-wóɖóìn-naín kè ɖéɛ dyi-kpáìn-naín nyɛɛ gbǔ ma kà wa dyúa kɛ̀.

Nyɔ ɓě ɓɛ́ wa sɔ̀ ma ɖé Bɛ̃́címà kè Júɖà nììn xwéɖé-dù ɓěɔ̀ mú, ɓɛ́ wa kè Dèɓé naìn ma múɛ

¹⁶ Ké gàa ɖíɛ́ ɓě sɔ̀ ma ɖé Bɛ̃́címàà xwéɖé-dùɔ̀ mú ɖe, ké wa kè gàa ɖíɛ́ ɓě ɓɛ́ wa sɔ̀ ma ɖé Júɖà nììn xwéɖé-dùɔ̀ múɛɛ dyi ma ɖé Dèɓé gbo, ɖé ɔ to-pèɖèìn-naínɔ̀.

¹⁷ Ké Dèɓé mu ma wa hwìǐ, ké ɔ cɛ̃ɛ ma wa gbo, ké ɔ ɖá, “Ɔ jǔ ké ɓě dyi ḿ gbo dyi ɖé ɓǎto-kpàǔn, ɓɛ́ ɓě ké ḿ gbo kpáín, ní hwòɖǒ mu ɓó ɓě gbo kpɔ̃̀ìn. Kɛɛ ɓě dyi dyi ɓɛ́ ɓě ké ḿ ní mú-nyɛ́-nyɔ̀ ɓěɔ̀ xwáɖáún zàìn ní, nìí, kà ɓɛ́ ḿ seà ɖɛ gbà ɖò nyuɛɛ, à ɓǎ ɓěɛ̀ Gèɖèpɔ́ɔ̀ muɛ dyéìn, ké ɔ mu ɓě ɓɔ́í poùn.”

¹⁸ Hwɛ̀ ké Gèɖèpɔ́ɔ̀ Zùùɔ̀ dyi ma ɖé Àmásàì mu ma kà gàa-zà-nyɔ̀ kpáɖá-nyɔ ɓaɖa-bùè ɓěɔ̀ nyɔ vɛ̀nɛ̀ jǔùn wɛ̃ɛ mú, ké Àmásàì ɖá, “Óó Dèɓé, à mɔ̀ nì nyɔo. À zi m̀ gboo, Jɛséɛ̀ dyú-gàà. Mana mɛ nì m̀ kɔ̃. Mana mɛ nì m̀ kɔ̃, ké mana mɛ nì nyɔ ɓě ɓɛ́ wa kpá m̀ gboɛɛ kɔ̃, sepóɛɖé nì Gèɖèpɔ́ɔ̀ kpá m̀ gbo.” Hwɛ̀ ké Dèɓé kpɔ̃ ma wa jè dyi, ké ɔ nyu ma wa ɔ sójà ɓěɔ̀ nyɔ vɛ̀nɛ̀ ɓě mú.

Nyɔ ɓě ɓɛ́ wa sɔ̀ ma ɖé Mànásì nììn xwéɖé-dùɔ̀ mú, ɓɛ́ wa kè Dèɓé naìn ma múɛ

¹⁹ Ké gàa ɖíɛ́ ɓě sɔ̀ ɖé Mànásìɛ̀ xwéɖé-dùɔ̀ múɛɛ zi ma ɖé Dèɓé nììn wáká kɔ̃, ti ɓɛ́ Dèɓé kè Féɖésìà-nyɔ̀ ɓěɔ̀ ɖǎ ma ti dyé ɓɛ́ wa ké ma Sɔ́ɔ̀ to kɔ̃ kpa kɛ. Kɛɛ Dèɓé se ma Féɖésìà-nyɔ̀ ɓěɔ̀ gbo kpá, sepóɛɖé Féɖésìà-nyɔ̀ ɓěɔ̀ wuɖuí-kɔ̃̀-nyɔ̀ ɓěɔ̀ dyéìn ma dú, ké wa tò ma Dèɓé hwɔɖɔún ɖe. Wa cɛ̃ɛ ma, ké wa ɖá, “Gàa nìà kɛ mu ɔ gbo-nì-ɓǎ Sɔ́ɔ̀ gbo gbɔ poùn, ké à dú muɛ múin ziìn.”

²⁰ Ti ɓɛ́ Dèɓé kɔ́ìn ma ɖe, ké ɔ nì ma ɖé Zíkàɖà-hwɔ̀ɖɔ̀ɔ̀ mú ɖe muɛń nyɛɛ, gàa ɓě sɔ̀ ma kà ɖé Mànásìɛ̀ xwéɖé-dùɔ̀ mú, ɓɛ́ wa zi ma kà ɔ gboɛɛ kɛà kɛ̀. Wa mɔ̀ Áɖánàà kè Jòzáɓà kè Jɛ̀ɖíàè kè Makɔ́ kè Jòzáɓà ɖò ɖe kè Ɛ̀ɖíhù ɔ kè Zíɖɛ̀fàì. Gàa ɓěa ɖò-ɖò kɔ̃̀ ma sójà táázĩ̀ìn wuɖuí ɖé Mànásìɛ̀ xwéɖé-dùɔ̀ mú.

²¹ Wa kpá ma Dèɓé gbo ɓó nyɔ-hwu-nyɔ̀ ɓě gbo vɔ̃ jè, sepóɛɖé wa séín mɔ̀ ma gàa-zà-nyɔ̀ ɓě, ké wa kɔ̃̀ ma ɔ sójà ɓěɔ̀ wuɖuí.

²² Ɓó wé kè wé xwíníín nyɛɛ, gàa ɓě ɓɛ́ wa dyi ma Dèɓé gbo kpáùn wɛ̃ɛ nì ma kɔ̃ kpáuń kánáá pū, ké Dèɓéɛ̀ sójà ɓěɔ̀ ɖǎ ma dyí vòɛ̌n zi mìɔ kà Gèɖèpɔ́ɔ̀ sójà kúɖúú ɓěɔ̀ nyuà nìɛ̀ kɛ.

Dèɓéɛ̀ sójà kúɖúú ɓěɔ̀ jè

²³ Sójà jĩ̀ kà nì ma kpoo ɖò-ɖò ɓě ɓɛ́ wa bɛ̃̀ìn ma to-gbo-mu-kà, ké wa dyi ma Dèɓé gbo ɖé Hɛ́bɔ̀nɔ̀-hwɔ̀ɖɔ̀ɔ̀ mú, ɓɛ́ wa ké ma Sɔ́ɔ̀ nììn kã́á-ɓòɖòɔ̀ Dèɓé xwáɖáún zàìn kà Bounɓoɔ̀ nyuɛ ma kà cɛ̃ kɛɛ, wa kɛà kɛ̀.

²⁴ Gàa ɓě ɓɛ́ wa sɔ̀ ma ɖé Júɖà nììn xwéɖé-dùɔ̀ mú, ɓɛ́ wa ɓéɖé ma dyí-zĩ̀ìn-ɖɛ̀ kè ɖíɛɛ mɔ̀ ma nyɔ-kpò táázĩ̀ìn mɛ̀nɛ̌ìn-ɖò kè hɔ̃dɛ̀ɖɛ̀ mɛ̀nɛ̌ìn-tã.

²⁵ Gàa-zà-nyɔ̀ ɓě ɓɛ́ wa sɔ̀ ma ɖé Símìɔ̀ nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ ɖò.

²⁶ Gàa ɓě ɓɛ́ wa sɔ̀ ma ɖé Ɖíìváà nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn hĩinyɛ kè hɔ̃dɛ̀ɖɛ̀ mɛ̀nɛ̌ìn-ɖò.

²⁷ Jɛ̀hódyáɖà ɓɛ́ ɔ sɔ̀ ma ɖé Eɖóún nììn gbǒ-xwíníínɔ̀ múɛ kè gàa táázĩ̀ìn tã kè hɔ̃dɛ̀ɖɛ̀ mɛ̀nɛ̌ìn-sɔ̃́ nì ma gàa ɓěɛ̀ hwìɛ̀. Jɛ̀hódyáɖà mɔ̀ ma nyɔ-wuɖuí-kɔ̃̀-nyɔ̀.

²⁸ Ké Záɖò ɓɛ́ ɔ mɔ̀ ma gàa-dyù gmɔ̀ ɖò ɓɛ́ ɔ mɔ̀ ma gàa-zà-nyɔ̀ ɖòɛ kè sójà-wuɖuí-kɔ̃̀-nyɔ̀ kpáɖá-nyɔ sè sɔ̃́ ɓɛ́ wa sɔ̀ ɖé ɔ gbǒ-xwíníínɔ̀ múɛɛ nì ma wa hwìɛ̀ ɖekè.

²⁹ Gàa ɓě ɓɛ́ wa sɔ̀ ma ɖé Bɛ̃́címà nììn xwéɖé-dùɔ̀ mú dɛ̀ ɓɛ́ Sɔ́ɔ̀ sɔ̀ ma kà kɛɛ mɔ̀ ma nyɔ-kpò táázĩ̀ìn tã, sepóɛɖé Bɛ̃́címà-nyɔ̀ ɓáún-ɓáún po ma ɖé Sɔ́ɔ̀ nììn gbǒ-xwíníínɔ̀ gbo gbɔ.

³⁰ Gàa ɓě ɓɛ́ wa sɔ̀ ma ɖé Ífèɖèìn nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn kpáɖá-nyɔ kè hɔ̃dɛ̀ɖɛ̀ mɛ̀nɛ̌ìn-tã. Wa mɔ̀ ma gàa-zà-nyɔ̀ ɓě, ké waà nyɛ́nɛ́ mu ma mìɔ ɖé waà gbǒ-xwíníín ɓěɔ̀ mú.

³¹ Gàa ɓě ɓɛ́ wa sɔ̀ ma ɖé Mànásìɛ̀ xwéɖé-dù fáún-fáún nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ mɔ̀ nyɔ-kpò táázĩ̀ìn ɓaɖa-bùè sè mɛ̀nɛ̌ìn-tã. Wa gã ma wa, ké wa síìn ma waà nyɛ́nɛ́ dɛ̀ǐn, ké wa dyi, ɓɛ́ wa ké ma Dèɓé kã́á mú nyu.

³² Gàa ɓě ɓɛ́ wa sɔ̀ ma ɖé Ɛ́sàkà nììn xwéɖé-dùɔ̀ mú, ɓɛ́ wa wɔ̃́ ma ti ɓěɔ̀ jè múin ɓá ɖɛ Éézùɖùɛ̀-nyɔ̀ ɓěɔ̀ ɓéɖé wa ké nyuɛɛ jè dyíɛɛ mɔ̀ ma nyɔ vɛ̀nɛ̀ hɔ̃dɛ̀ɖɛ̀ sɔ̃́, dè wa nììn gbǒ-xwíníín-nyɔ̀ séín ɓě nì waà wuɖu xwíɖíiɛɛ kɔ̃.

³³ Gàa ɓě ɓɛ́ wa sɔ̀ ma ɖé Zɛ́ɓíúɖɔ̀ùn nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn kpáɖá-nyɔ sɔ̃́ ɓaɖa-bùè. Wa mɔ̀ nyɔ ɓě bɛ̃̀ìn ma wa mìɔùn toún-vɔ̃̀ìn-ɖɛ̀ kã̀ìn séín nyɛ. Wa po ma ɖé Dèɓé gbo gbɔ.

³⁴ Sójà-wuɖuí-kɔ̃̀-nyɔ̀ táázĩ̀ìn ɖò kè waà sójà táázĩ̀ìn kpáɖá-nyɔ ɓaɖa-bùè sè mɛ̀nɛ̌ìn-sɔ̃́ ɓɛ́ wa ɓéɖé ma dyí-zĩ̀ìn-ɖɛ̀ kè ɖíɛɛ sɔ̀ ma ɖé Náfátàɖì nììn xwéɖé-dùɔ̀ mú.

³⁵ Gàa ɓě ɓɛ́ wa sɔ̀ ma ɖé Dɛ̃́ìn nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn kpáɖá-nyɔ sè mɛ̀nɛ̌ìn-tã kè hɔ̃dɛ̀ɖɛ̀ mɛ̀nɛ̌ìn-ɖò ɓɛ́ wa bɛ̃̀ìn ma to-vɔ̃-kà kɛ.

³⁶ Gàa ɓě ɓɛ́ wa sɔ̀ ma ɖé Ásè nììn xwéɖé-dùɔ̀ múɛɛ mɔ̀ ma nyɔ-kpò táázĩ̀ìn kpáɖá-nyɔ sɔ̃́ ɓɛ́ wa dyé ti ɓó to vɔ̃ jèɛ.

³⁷ Gàa ɓě ɓɛ́ wa sɔ̀ ma ɖé Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáún tɔ̀ɔ̀ ɓɛ́ wa sɔ̀à ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ múɛɛ mɔ̀ ma nyɔ-kpò táázĩ̀ìn hɔ̃dɛ̀ɖɛ̀ ɖò kè táázĩ̀ìn kpáɖá-nyɔ. Wa bɛ̃̀ìn ma toún-vɔ̃̀ìn-ɖɛ̀ kã̀ìn séín.

³⁸ To-vɔ̃-gàà séín ɓěa bɛ̃̀ìn ma to-gbo-mu-kà, ké wa dyi ma ɖé Hɛ́bɔ̀nɔ̀-hwɔ̀ɖɔ̀ɔ̀ mú. Waà hwòɖǒ jìnìɛ̀n ma kɔ̃ xwéé, ɓɛ́ wa ké ma Dèɓé kã́á mú nyu ɓó Éézùɖùɛ̀-ɓòɖò gànáɔ̀ bìì, ké Éézùɖùɛ̀-nyɔ̀ tɔ̀ɔ̀ séín ɓěɔ̀ kpɔ̃̀ìn ma ɓó wa gbo.

³⁹ Wa nyu ma ɓó Dèɓé gbo wé tã. Wa nì ma ɖɛ ɖiɛń, ké wa nì ma náuń, sepóɛɖé waà ɖíí ɓěɔ̀ ɖǎ ma naɓaà ɓó wa bìì hwɛ̀ ké wa dyi ma kà kɛ̀.

⁴⁰ Ké ɓó kɔ̃in ɖeɛɛ, waà ɖíí ɓě sɔ̀ ma ɖé nya vɛ̃in ɖé Ɛ́sàkà nììn xwéɖé-dùɔ̀ kè Zɛ́ɓíúɖɔ̀ùn nììn xwéɖé-dùɔ̀ ɔ kè Náfátàɖì nììn xwéɖé-dùɔ̀ múɛɛ dyà ma ɖii-ɖɛ̀ kúɖúú ɖekè. Wa dyàìn ma ɖii-ɖɛ̀ ɓěɔ̀ jǎkasì-dù kò-kò ɓě kè sǒ-nì-gbu-kɔ̃ún ɓě ɔ kè ɓó ɓìɖǐ ɓě kɔ̃ún. Ké fáɖáɓà kè féè-ɓò dyɛ-dyɛ-kpò kè géɖéè-hwàɖà dyɛ-dyɛ kè wã́ìn kè cáná kè ɓìɖǐ ɔ kè ɓáɖáá hwɔ ma dyi púu, sepóɛɖé Éézùɖùɛ̀-nyɔ̀ ɓěɔ̀ kpá ma múàǔn.