1 Kánáníkɔ̀ 11 - Ɓǎsɔ́ɔ̀ Báɓòɔ̀

Wa nyu Dèɓé kã́á mú ɓó Éézùɖùɛ̀-ɓòɖòɔ̀ kè Júɖà-ɓòɖòɔ̀ kɔ̃in

¹ Sɔ̀ìn ɓóɛ gboɛɛ, Éézùɖùɛ̀-ɓòɖòɔ̀ nyɔ vɛ̀nɛ̀ séín ɓěɔ̀ poìn ma dyí ɖé Dèɓé gbo, ɖé Hɛ́bɔ̀nɔ̀-hwɔ̀ɖɔ̀ɔ̀ mú. Ké wa cɛ̃ɛ ma ɔ gbo, ké wa ɖá, “Ɓɔ̌ɔ̀, à mɔ́ ɓɛ́ m̀ ké à kã́á jǔ, sepóɛɖé ɓěà mɔ̀ ɓóɖó dyúáɖòɛ̀ dyú ɓě.

² Ké ti ɓɛ́ Sɔ́ɔ̀ mɔ̀ǒ zɔ̃̌ɔ̀ à kã́á keɛɛ, mɔ̀ mɔ̀ nyɔ kpaó zɔ̃̌ɔ̀ kà à mɔ̀ Éézùɖùɛ̀-nyɔ̀ ɓěɛ̀ to gboɛ̀. Ké Bounɓo mɔ̀à nì Gèɖèpɔ́ɔ̀ kɛɛ cɛ̃ɛ zɔ̃̌ɔ̀ m̀ gbo, ké ɔ ɖá, ‘Mɔ̀ mɔ̀ nyɔ mu ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ nàìn kà ɓáɖáá-dyí-gmɔ̀-nyɔ̀ nàìn ɔ ɓáɖáá ɓě kɛ, ɓɛ́ m̀ ké wa wuɖuí kɔ̃̀.’ ”

³ Ɔ jèɛɛ, ti ɓɛ́ Éézùɖùɛ̀-ɓòɖòɔ̀ nyɔ vɛ̀nɛ̀ séín ɓěɔ̀ poìn ma kà dyí ɖé Dèɓé gboɛɛ, ɔ kè wa po ma wuɖu ɓíín ɓó Bounɓoɔ̀ dyúa, ké wa po ma ɔ cáná dúún, ɓɛ́ ɔ ké ma Éézùɖùɛ̀-ɓòɖòɔ̀ kã́á jǔ kà Bounɓoɔ̀ nyuɛ zɔ̃̌ɔ̀ kà cɛ̃ɛ dyììn ɖé Sámíò múɛ.

⁴ Sɔ̀ìn ɓóɛ gboɛɛ, Kã́á Dèɓé kè Éézùɖùɛ̀-nyɔ̀ séín ɓěɔ̀ kpa ma Jùɖúsɛ̀ɖɛ̀ìn-hwɔ̀ɖɔ̀ kɔ̃̀ nyɛ́nɛ́ tɔ̀ɔ̀ mɔ̀ ma Jɛ́ɓù kɛɛ to kɔ̃. Ɓó tia ɓaɖaa, Jɛ́ɓù-nyɔ̀ ɓěɔ̀ cĩ́ ma ɖé hwɔɖɔɔ̀ mú.

⁵ Ké Jɛ́ɓù-nyɔ̀ ɓěɔ̀ cɛ̃ɛ ma Dèɓé gbo, ké wa ɖá, “Ɓě se nɔ̄ à gbo dyáa mu.” Kɛɛ wɛ̃́ɛ́ kɛɛ, Dèɓé vɔ̃ ma wa gbo, ké ɔ kpɔ̃ ma waà to-pèɖèìn-naín mɔ̀à Zádyɔún kɛ, ké sɔ̀ìn ɓóɛ gboɛɛ, wa ɖáìn ma hwɔɖɔɔ̀ Dèɓéɛ̀ hwɔɖɔ.

⁶ Ɓó wéa ɓaɖaa, Dèɓé cɛ̃ɛ ma ɔ sójà ɓěɔ̀ gbo, ké ɔ ɖá, “Nyɔ mɔ̀ nyɔ mu kĩ́ín-kĩ́ín-nyɔ̀ jǔùn ɓɛ́ ɔ ké Jɛ́ɓù-nyɔ̀ ɓěɔ̀ to kɔ̃ poɛɛ mu ní sójà ɓěɔ̀ wuɖuí-kɔ̃̀-nyɔ̀ jǔùn.” Ké Jóà kɔ̃̀ ɖe mɔ̀à Zɛ̀wúɖúdyà kɛɛ mɔ̀ nyɔ po ma wa to kɔ̃ kĩ́ín. Ɔ jèɛɛ, ɔ mɔ̀ ma sójà ɓěɔ̀ wuɖuí-kɔ̃̀-nyɔ̀.

⁷ Ti ɓɛ́ Dèɓé ɖǎ ma kà Jɛ́ɓù-nyɔ̀ ɓěɔ̀ to-pèɖèìn-naínɔ̀ kpɔ̃ɛɛ, ɔ cĩ́ ma ɖé páɔ̀ mú. Ɔ jèɛɛ, wa ɖáìn ma Dèɓé ɓíɖí-hwɔ̀ɖɔ̀.

⁸ Ké Dèɓé po ma hwɔɖɔɔ̀ kɔ̃. Ɔ dèɛ̀ ma poɛ gbɔ sɔ̀ìn ɖé pá ɖò mɔ̀ ma Míɖò kɛɛ mú. Ké Jóà po ma hwɔɖɔɔ̀ wáká tɔ̀ɔ̀ sè ɓóɛɛ ɖe.

⁹ Ké Dèɓéɛ̀ kpéɔ̀ nì ma kɔ̃ kpáuń ti séín, sepóɛɖé Bounɓo mɔ̀ nyɔ nìà ɖɛ séín kɔ̃in nyɛɛ nì ma ɓó ɔ gbo jè.

Dèɓéɛ̀ gàa-zà-nyɔ̀ ɓě

¹⁰ Dèɓéɛ̀ gàa-zà-nyɔ̀ vɛ̀nɛ̀ ɓě ɓɛ́ wa kpɔ̃̀ìn ma ɓó ɔ gbo kóɖó-kóɖó, ɖé ɔ kã́á-ɓòɖòɔ̀ mú, ɓɛ́ wa kè Éézùɖùɛ̀-nyɔ̀ tɔ̀ɔ̀ ɓěɔ̀ dyi ma kà ɔ kã́á mú nyu kà Bounɓoɔ̀ nyuɛ ma kà cɛ̃ɛ kɛɛ, wa kɛà kɛ̀.

¹¹ Nyɔ kĩ́ín-kĩ́ínɔ̀ mɔ̀ ma Jàsóɓèàùn ɓɛ́ ɔ mɔ̀ ma Hámɔ̀nì-nyɔ̀ ɖò kɛ. Ɔ mɔ̀ ma gàa-zà-nyɔ̀ vɛ̀nɛ̀ tã ɓěɔ̀ nììn nyɔ vɛ̀nɛ̀. Wé ɖòɛ̀ ɓaɖaa, ɔ ɖú ma ɔ ɖíɔ̀ dyí, ké ɔ ɖáɓá ma gàa hɔ̃dɛ̀ɖɛ̀ tã ɖé to dyúáɖò gbo.

¹² Gàa-zà-nyɔ̀ vɛ̀nɛ̀ tã ɓěɔ̀ sɔ̃́ nììnɔ̀ mɔ̀ ma Ɛ̀ɖɛ̀ázà ɓɛ́ ɔ mɔ̀ ma Dóɖòɛ̀ dyú-gàà kɛ. Ɔ mɔ̀ ma Àhóà-nyɔ̀ ɖò.

¹³ Wé ɖòɛ̀ ɓaɖaa, Féɖésìà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ poìn ma dyí ɖé Pàdámì-pàɔ̀ mú, ɓɛ́ wa ké ma vɔ̃, ké Ɛ̀ɖɛ̀ázà nì ma ɓó Dèɓé gbo. Ké wa vɔ̃̀ìn ma ɖé báɖè-gèɖè ɖò gbo, ké Éézùɖùɛ̀-nyɔ̀ gbǔ ma Féɖésìà-nyɔ̀ ɓěɔ̀ dyúa.

¹⁴ Kɛɛ Ɛ̀ɖɛ̀ázà nyànà ma geɖeɔ̀ hwòɖǒǔn dyi, ké ɔ vɔ̃ ma Féɖésìà-nyɔ̀ ɓěɔ̀ gbo, ké ɔ ɖáɓá ma Féɖésìà-nyɔ̀ ɓěɔ̀. Bounɓoɔ̀ nyí ma ɔ to-ɖu-ɖu vɛ̀nɛ̀.

¹⁵ Ti ɖòɛ̀ ɓaɖaa, Dèɓéɛ̀ gàa-zà-nyɔ̀ kpáɖá-nyɔ ɓaɖa-bùè ɓěɔ̀ nyɔ tã mu ma ɖé sɔ́ɔ́-kpò ɖò gbo, dɛ̀ ɓɛ́ Dèɓé nì ma kà ɖé wɔ-ɓì nìà ɖé Àdúɖàùn-hwɔ̀ɖɔ̀ɔ̀ wĩín nyɛɛ múɛ. Ké Féɖésìà-sòjà ɓěɔ̀ nì ma waà jàɖàìn-hwɔ̀ɖɔ̀ɔ̀ mú ɖé Wɛ̀ɖɛ̀fáìn Bɔɔ-kpàɔ̀ kɔ̃.

¹⁶ Ti ɓɛ́ Dèɓé nì ma ɖé wɔ-ɓìɔ̀ múɛɛ, Féɖésìà-nyɔ̀ ɓěɔ̀ sójà-nì-naínɔ̀ nì ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ wĩín.

¹⁷ Ké Dèɓé kpéɖé ma, ké ɔ ɖá, “Éé, nyɛ́ ɖá nyɔ ɖò nyíɔ́ má ḿ ní sɔ̀ìn ɖé ní-ɓì nìà ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ gmɔ-wɔ̃̀ɔ̀ gboɛɛ mú, ɓɛ́ ḿ kéɔ́ɔ náá?”

¹⁸ Ké gàa-zà-nyɔ̀ tã ɓěɔ̀ vɔ̃ ma, ké wa mùìn ma Féɖésìà-nyɔ̀ ɓěɔ̀ hwìɛ̀, ké wa píní ma ní sɔ̀ìn ɖé ní-ɓì nìà ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ gmɔ-wɔ̃̀ɔ̀ gboɛɛ mú, ké wa dyàà ma Dèɓé gbo. Kɛɛ Dèɓé nɔ́ɔ̀ ɓóɛ ná jè. Ɔ púèɛ̀ ma dyi ɓó Bounɓoɔ̀ dyúa, ɓɛ́ ɔ ké ma sáa-zàìn-ɖɛ̀ jǔ.

¹⁹ Ɔ cɛ̃ɛ ma, ké ɔ ɖá, “Ní Gèɖèpɔ́ɔ̀ mɛ kpɔ̃ ḿ dyi, ɓɛ́ ḿ ké se ní nìà kɛ ná. Ḿ se ní hwɔìn kà gàa ɓěɛ̀ nyɔmɔɔ kɛɛ náa ɓɛ́ìn, sepóɛɖé wa po waà fɛ̀ɛ̀ɔ̀ nàdǐ mú ɓó ní nìà kɛ dyà jè.” Ɔ jèɛɛ, Dèɓé se ma níɔ̀ ná. Ɖɛ nìà kɛɛ, ɖéɛ̀ gàa-zà-nyɔ̀ tã ɓěɔ̀ nyu ma.

²⁰ Ké Àbísàì mɔ̀à Jóàà ɖíí-gààɔ̀ kɛɛ mɔ̀ ma gàa-zà-nyɔ̀ kpáɖá-nyɔ ɓaɖa-bùè ɓěɔ̀ nyɔ vɛ̀nɛ̀. Wé ɖòɛ̀ ɓaɖaa, ɔ ɖú ma ɔ ɖíɔ̀ dyí, ké ɔ vɔ̃ ma gàa hɔ̃dɛ̀ɖɛ̀ tã gbo, ké ɔ ɖáɓá ma wa nyɛ̀nɛ̀ɛ̀. Ɔ jèɛɛ, ɔ nyɛ́nɛ́ mu ma ɖé gàa-zà-nyɔ̀ kpáɖá-nyɔ ɓaɖa-bùè ɓěɔ̀ hwìɛ̀.

²¹ Ɔ nyɛ́nɛ́ mu ma ké ɔ zi gàa-zà-nyɔ̀ kpáɖá-nyɔ ɓaɖa-bùè ɓěɔ̀ dyí, ké ɔ mɔ̀ ma waà nàìn-nyɔ̀. Kɛɛ ɔ nyɛ́nɛ́ se ma mu mìɔ kà gàa-zà-nyɔ̀ vɛ̀nɛ̀ tã ɓěɔ̀ nyɛ́nɛ́ mu ma kà kɛ.

²² Ké Bɛ̀nádyà mɔ̀à Jɛ̀hódyáɖàà dyú-gààɔ̀ kɛɛ mɔ̀ ma gàa-zà-nyɔ̀ ɖò ɖekè. Ɔ sɔ̀ ma ɖé Kàzéò-hwɔ̀ɖɔ̀ɔ̀ mú. Ɔ nyu ma ɖɛ vɛ̀nɛ̀ ɓě. Ɖɛ vɛ̀nɛ̀ ɓě ɓɛ́ ɔ nyu ma kɛɛ kɛà kɛ̀. Ɔ ɖáɓá ma Móà-ɓòɖòɔ̀ gàa-zà-nyɔ̀ sɔ̃́. Ké ɓó kɔ̃in ɖeɛɛ, ɔ pa ma ɓí ɖò mú ɓó sɔ̃̀ɔ̀-tìɔ̀ mú, ké ɔ ɖáɓá ma ɖé ganìǎ ɖò.

²³ Ké ɔ ɖáɓá ma Íjè-gàà ɓúá dyai ɖò kɔ̃̀ dya-tɔ̀mɔ̀-tɔ̀mɔ̀ mɔ̀ ma ɓáɖáa ɖò kè jìì-ɓàɖàǎ sɔ̃́ kɛɛ ɖekè. Íjè-gààɔ̀ ɓéɖé ma ɖí ɖò kɔ̃̀ ɖo kè sú ɓɛ́ìn ma kɛɛ xwa, kɛɛ ti ɓɛ́ Bɛ̀nádyà nì ma ɔ wɔ̃ muɛń nyɛɛ, ɔ kpa ma kpó-kpó-ɓà-cù ɖòùn nyɛ̀nɛ̀ɛ̀, ké ɔ zà ma Íjè-gààɔ̀ ɖíɔ̀ xwa, ké ɔ ɖáɓáìn ma Íjè-gààɔ̀ ɔ mìɔùn nììn ɖíɔ̀ dyí.

²⁴ Ɓó ɖɛ ɓě nìà kɛ jèɛɛ, Bɛ̀nádyà nyɛ́nɛ́ mu ma ɖekè ɖé gàa-zà-nyɔ̀ kpáɖá-nyɔ ɓaɖa-bùè ɓěɔ̀ hwìɛ̀.

²⁵ Ɔ nyɛ́nɛ́ mu ma ké ɔ zi ma gàa-zà-nyɔ̀ kpáɖá-nyɔ ɓaɖa-bùè ɓěɔ̀ dyí, kɛɛ ɔ nyɛ́nɛ́ se ma mu mìɔ kà gàa-zà-nyɔ̀ vɛ̀nɛ̀ tã ɓěɔ̀ nyɛ́nɛ́ mu ma kà kɛ. Ké Dèɓé nyu ma Bɛ̀nádyà ɔ dyí-gmɔ̀-nyɔ̀ ɓěɔ̀ nììn kɔ̃in-nyɔ̀ mú.

²⁶ Gàa-zà-nyɔ̀ tɔ̀ɔ̀ ɓě ɓɛ́ wa nì ma ɖé Dèɓéɛ̀ sójà ɓěɔ̀ hwìɛ̀ kɛɛ kɛà kɛ̀: Àsáhèò mɔ̀à Jóàà ɖíí-gààɔ̀ kɛ kè Ɛ̀hánà ɓɛ́ ɔ mɔ̀ ma Dóɖòɛ̀ dyú-gàà, ké ɔ sɔ̀ ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ múɛ

²⁷ kè Sámɔ̀ ɓɛ́ ɔ mɔ̀ ma Háwòɖò-nyɔ̀ ɖò kɛ kè Hɛ́ɖɛ̀ ɓɛ́ ɔ mɔ̀ ma Páɖɛ̀-nyɔ̀ ɖò kɛ

²⁸ kè Dyíwàɖà ɓɛ́ ɔ mɔ̀ ma Íkèɛ̀ dyú-gàà, ké ɔ sɔ̀ ma ɖé Tèkóà-hwɔ̀ɖɔ̀ɔ̀ múɛ kè Áɓìɛ́zɛ̀ ɓɛ́ ɔ mɔ̀ ma Ànáfò-nyɔ̀ ɖò kɛ

²⁹ kè Sìɓɛ́kàì ɓɛ́ ɔ mɔ̀ ma Húsà-nyɔ̀ ɖò kɛ kè Íɖàì ɓɛ́ ɔ mɔ̀ ma Àhóà-nyɔ̀ ɖò kɛ

³⁰ kè Màháwàɖàì ɓɛ́ ɔ mɔ̀ ma Nɛ̀tófà-nyɔ̀ ɖò kɛ kè Héɖɛ̀ ɓɛ́ ɔ mɔ̀ ma Báánàà dyú-gàà, ké ɔ sɔ̀ ma ɖé Nɛ̀tófà-hwɔ̀ɖɔ̀ɔ̀ múɛ

³¹ kè Ífàì ɓɛ́ ɔ mɔ̀ ma Wíɖíɓàìɛ̀ dyú-gàà, ké ɔ sɔ̀ ma ɖé Gíɓìà-hwɔ̀ɖɔ̀ nìà ɖé Bɛ̃́címà-ɓòɖòɔ̀ kɔ̃ɛɛ múɛ kè Bɛ̀nádyà ɓɛ́ ɔ mɔ̀ ma Pìwáɖáfàùn-nyɔ̀ ɖò kɛ

³² kè Húwàɖàì ɓɛ́ ɔ sɔ̀ ma ɖé Gáásì Bɔɔ-kpàɔ̀ kɔ̃ɛ kè Àbíè ɓɛ́ ɔ mɔ̀ ma Àwáɖáɓà-nyɔ̀ ɖò kɛ

³³ kè Àmávɛ̀ ɓɛ́ ɔ mɔ̀ ma Bàháwùɖùùn-nyɔ̀ ɖò kɛ kè Ɛ̀ɖìáɓà ɓɛ́ ɔ mɔ̀ ma Sááɓɔ̀ùn-nyɔ̀ ɖò kɛ

³⁴ kè Hásèìn ɓɛ́ ɔ mɔ̀ ma Gízɔ̀ùn-nyɔ̀ ɖò kɛ kè Jònétɔ̃̀ ɓɛ́ ɔ mɔ̀ ma Ságèɛ̀ dyú-gàà, ké ɔ sɔ̀ ma ɖé Háwàɖà-hwɔ̀ɖɔ̀ɔ̀ múɛ

³⁵ kè Àhíàùn ɓɛ́ ɔ mɔ̀ ma Sákàà dyú-gàà, ké ɔ sɔ̀ ma ɖé Háwàɖà-hwɔ̀ɖɔ̀ɔ̀ múɛ kè Ɛ̀ɖífàò ɓɛ́ ɔ mɔ̀ ma Ɔ́ɔ̀ dyú-gàà kɛ

³⁶ kè Héfɛ̀ ɓɛ́ ɔ mɔ̀ ma Mɛ̀kéwàɖà-nyɔ̀ ɖò kɛ kè Àhíjà ɓɛ́ ɔ mɔ̀ ma Páɖɛ̀-nyɔ̀ ɖò kɛ

³⁷ kè Hɛ́zòɖò ɓɛ́ ɔ mɔ̀ ma Kámɛ̀-nyɔ̀ ɖò kɛ kè Nááwàɖàì ɓɛ́ ɔ mɔ̀ ma Ɛ́ɓàìɛ̀ dyú-gàà kɛ

³⁸ kè Jóɛ̀ ɓɛ́ ɔ mɔ̀ ma Nétɔ̃̀ɛ̀ ɖíí-gàà kɛ kè Míhà ɓɛ́ ɔ mɔ̀ ma Hágìɖìɛ̀ dyú-gàà kɛ

³⁹ kè Zɛ́ɖɛ̀ ɓɛ́ ɔ mɔ̀ ma Ámànà-nyɔ̀ ɖò kɛ kè Nàháwàɖàì ɓɛ́ ɔ mɔ̀ ma Bééwòɖò-nyɔ̀ ɖò, ké ɔ mɔ̀ ma Jóà kɔ̃̀ ɖe mɔ̀à Zɛ̀wúɖúdyà kɛɛ toún-vɔ̃̀ìn-ɖɛ̀-ɓéɖé-nyɔ̀ kɛ

⁴⁰ kè Dyíwàɖà kè Gáwèɖè ɓɛ́ wa mɔ̀ ma Játì-nyɔ̀ ɓě kɛ

⁴¹ kè Dyùwáɖádyà ɓɛ́ ɔ mɔ̀ ma Hítì-nyɔ̀ ɖò kɛ kè Záɓà ɓɛ́ ɔ mɔ̀ ma Áɖàìɛ̀ dyú-gàà kɛ

⁴² kè Àɖínà mɔ̀ ma Sízà ɓɛ́ ɔ sɔ̀ ma ɖé Wuɖuɓíín nììn xwéɖé-dùɔ̀ múɛɛ dyú-gàà, ké ɔ mɔ̀ ma Wuɖuɓíín-nyɔ̀ ɓěɔ̀ nyɔ vɛ̀nɛ̀, ké ɔ ɓéɖé ma sójà kpáɖá-nyɔ ɓaɖa-bùè kɛ

⁴³ kè Hánà ɓɛ́ ɔ mɔ̀ ma Máákàà dyú-gàà kɛ kè Jòsáfà ɓɛ́ ɔ mɔ̀ ma Mífàùn-nyɔ̀ ɖò kɛ

⁴⁴ kè Dyùzídyà ɓɛ́ ɔ mɔ̀ ma Àtéwàɖà-nyɔ̀ ɖò kɛ kè Síámà kè Jɛ̀dyíò ɓɛ́ wa mɔ̀ ma Hófàùnɛ̀ dyú-gàà ɓě, ké wa sɔ̀ ma ɖé Àwóɖóè-hwɔ̀ɖɔ̀ɔ̀ múɛ

⁴⁵ kè Jɛ̀ɖíàè kè Jóhà ɓɛ́ wa mɔ̀ ma Sĩ́wìɖìɛ̀ dyú-gàà ɓě, ké wa sɔ̀ ma ɖé Tízì-hwɔ̀ɖɔ̀ɔ̀ múɛ

⁴⁶ kè Ɛ́ɖìè ɓɛ́ ɔ mɔ̀ ma Máhàvì-nyɔ̀ ɖò kɛ kè Jɛ̀wíɖíɓàì kè Jósàvíà ɓɛ́ wa mɔ̀ ma Ɛ̀náàùnɛ̀ dyú-gàà ɓě kɛ kè Ímà ɓɛ́ ɔ mɔ̀ ma Móà-nyɔ̀ ɖò kɛ

⁴⁷ kè Ɛ́ɖìè kè Óɓè ɔ kè Jáásìè ɓɛ́ wa mɔ̀ ma Mɛ̀zóɓà-nyɔ̀ ɓě kɛ.