1 Kánáníkɔ̀ 10 - Ɓǎsɔ́ɔ̀ Báɓòɔ̀

Kã́á Sɔ́ɔ̀ mɛ́ jè

¹ Wé ɖòɛ̀ ɓaɖaa, Féɖésìà-nyɔ̀ ɓěɔ̀ vɔ̃ ma Éézùɖùɛ̀-nyɔ̀ ɓěɔ̀ gbo, ké Éézùɖùɛ̀-nyɔ̀ ɓěɔ̀ gbǔ ma Féɖésìà-nyɔ̀ ɓěɔ̀ dyúa, ké wa ɓáún-ɓáún sè ma toɔ̀ ɖé Gìòɓóà-tòɖòɔ̀ gbo.

² Ké Féɖésìà-nyɔ̀ ɓěɔ̀ kpá ma Sɔ́ɔ̀ kè ɔ dyú-gàà ɓěɔ̀ kíɖíí cá, ké wa ɖáɓá ma Sɔ́ɔ̀ dyú-gàà ɓě mɔ̀à Jònétɔ̃̀ kè Àbìnáɖà ɔ kè Máákì-Súà kɛ.

³ Ké toɔ̀ nyìnììn ma Sɔ́ɔ̀. Ti ɓɛ́ sé-po-nyɔ̀ ɓěɔ̀ dyɛ̀ìn ma ɔ kɛɛ, wa puà ma ɔ gbà-kà mìɔ.

⁴ Hwɛ̀ ké Sɔ́ɔ̀ cɛ̃ɛ ma ɔ toún-vɔ̃̀ìn-ɖɛ̀-ɓéɖé-nyɔ̀ɔ̀ gbo, ké ɔ ɖá, “Zà nì gàsíàɔ̀ kpaɖaún, ɓɛ́ m̀ ké ḿ dyí hwɔ, ɓɛ́ Féɖésìà-nyɔ̀ ɓě se sàà mɛ́ ɓěa ní kɔ̃̀ ɖà ḿ wuɖu dyíin po.” Kɛɛ ɔ toún-vɔ̃̀ìn-ɖɛ̀-ɓéɖé-nyɔ̀ɔ̀ seɛ ma gbo wɔ̃́ìn, sepóɛɖé ɔ fɛ̃̀ìn ma ní mìɔ. Hwɛ̀ ké Sɔ́ɔ̀ ɖú ma ɔ mìɔùn nììn gàsíàɔ̀ dyí, ké ɔ taɓaa ma ɔ mìɔùn xwíníín, ké ɔ mɛ́ ma.

⁵ Ti ɓɛ́ Sɔ́ɔ̀ toún-vɔ̃̀ìn-ɖɛ̀-ɓéɖé-nyɔ̀ɔ̀ dyéɛ ma kà Sɔ́ɔ̀ ɖǎ ma mɛ́ɛ, púɛɛ, ɔ mɔ̀ùn taɓa ma ɔ mìɔùn nììn gàsíàɔ̀ xwíníín, ké ɔ mɔ̀ùn mɛ́ ma ɖekè.

⁶ Kǎà Sɔ́ɔ̀ kè ɔ dyú-gàà tã ɓěɔ̀ ɔ kè ɔ gbǒ-xwíníín-gàà tɔ̀ɔ̀ ɓěɔ̀ nyu ma mɛ́ɛ ɓó ti dyúáɖòɔ̀ xwíníín.

⁷ Ti ɓɛ́ Éézùɖùɛ̀-nyɔ̀ séín ɓě ɓɛ́ wa cĩ́ ma ɖé Jìzéɖéò Bɔɔ-kpàɔ̀ kɔ̃ɛɛ dyéɛ ma kà Éézùɖùɛ̀-nyɔ̀ ɓěɔ̀ ɖǎ ma toɔ̀ dyúa gbǔ, ké Sɔ́ɔ̀ kè ɔ dyú-gàà ɓěɔ̀ ɖǎ ma mɛ́ɛ, púɛɛ, wa wã ma waà hwɔɖɔ ɓěɔ̀ kɔ̃, ké wa pa ma xwíɖíi. Ké Féɖésìà-nyɔ̀ ɓěɔ̀ ɖú ma waà hwɔɖɔ ɓěɔ̀ dyí.

⁸ Wéɔ̀ nyɔ kɔ ma ɓó dyíɛɛ, Féɖésìà-nyɔ̀ ɓěɔ̀ mu ma xwɛ́ ɓěɔ̀ ɖɛ bũ̌in zàùn, ké wa dyé ma Sɔ́ɔ̀ kè ɔ dyú-gàà ɓěɔ̀ xwɛ́ ɖé Gìòɓóà-tòɖòɔ̀ gbo.

⁹ Ké wa cɛ̃ ma Sɔ́ɔ̀ dúí, ké wa zà ma ɔ toún-vɔ̃̀ìn-ɖɛ̀ ɓěɔ̀ bũ̌in, ké wa kpa ma ɔ dúɔ̀ kè ɔ toún-vɔ̃̀ìn-ɖɛ̀ ɓěɔ̀. Ké wa ɖoɓo ma kíá ɖé Féɖésìà-ɓòɖòɔ̀ dà séín, ɓɛ́ wa ké bɔ̃̌ nɔ̀mɔ̀ dyíinɔ̀ ɖé waà kũùn-kpò-gèɖèpɔ́ɔ̀ ɓěɔ̀ gbǒɔ̀ mú cɛ̃, ɔ kè ɓɛ́ wa kéɛ ɓóɖóɔ̀ nyɔ séín ɓěɔ̀ gbo cɛ̃ ɖekè.

¹⁰ Ké wa ɖú ma Sɔ́ɔ̀ toún-vɔ̃̀ìn-ɖɛ̀ ɓěɔ̀ dyí, ké wa kpaa ma ɖéɛ waà gèɖèpɔ́ɔ̀ ɓěɔ̀ gbǒɔ̀ mú. Ké wa ɓá ma ɔ dúɔ̀ dyií ɖé waà gèɖèpɔ́ɔ̀ mɔ̀à Dágɔ̃̀ kɛɛ gbǒɔ̀ mú.

¹¹ Ti ɓɛ́ nyɔ séín ɓě cĩ́ ma ɖé Jáɓè-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛ múɛɛ wɔ̃́ ma ɖɛ séín Féɖésìà-nyɔ̀ ɓěɔ̀ nyu ma kà Sɔ́ɔ̀ bũ̌ɛ jèɛɛ,

¹² waà gàa-zà-nyɔ̀ séín ɓěɔ̀ sɔ̀ ma dyí, ké wa mu, ké wa ɖú ma Sɔ́ɔ̀ kè ɔ dyú-gàà ɓěɔ̀ xwɛ́ ɓěɔ̀ dyí, ké wa kpa ma waà xwɛ́ ɓěɔ̀ ɖé Jáɓè-hwɔ̀ɖɔ̀ɔ̀ mú. Ké wa zà ma waà kpá ɓěɔ̀ dyóɖóún ɖé óò-cù ɖò xwíɖíi, ɖé Jáɓè-hwɔ̀ɖɔ̀ɔ̀ mú. Ké wa hwèɖè ma wɔ̃ kɔ̃ ɓó wé mɛ̀nɛ̌ìn-sɔ̃́ xwíníín.

¹³ Kǎà Sɔ́ɔ̀ nyu ma mɛ́ɛ ɓó ɔ Bounɓoɔ̀ wuɖuún jaɖa jè. Ɔ se ma Bounɓoɔ̀ gmaɔ̀ dyi kpɔ̃. Ké ɓó kɔ̃in ɖeɛɛ, ɔ mu ma wɔ-pa-nyɔ̀ ɖò gbo, ɓɛ́ wɔ-pa-nyɔ̀ɔ̀ ké ma ɖɛ ɔ ké nyuɛɛ ɔ gbo cɛ̃.

¹⁴ Ɔ se Bounɓoɔ̀ dyi diè. Ɔ jèɛɛ, Bounɓoɔ̀ ɖáɓá ma ɔ, ké Bounɓoɔ̀ hwɔ̀ìn kã́á-ɓòɖòɔ̀ ɖé Dèɓé mɔ̀à Jɛséɛ̀ dyú-gààɔ̀ kɛɛ gbo dyí.