युहन्ना 14 - बान्तावा राईयेसु निनाम्हाङ्एदा खात्खा लाम 1 “आम्नुओ साकोङ्वा चाअ़त्लो अ़लिनिन्ने। निनाम्हाङ्एदा साकोङ्छ़ङ त़मुन, अ़ङ्काएदाछाङ साकोङ्छ़ङ मुवानिन। 2 अ़ङ्पापाओ अ़चुखिम्दा युङ्खाचि ब़द्धे म़युङ्याङ। मोत्नि माआङ्ओ खाङ्दे दि अ़ङ्का ‘आम्नुओ निम्पाङ युङ्खाचि चुम्सि खात्ङाङा’नि खानानिन लोनानिन्ओ कि? 3 खोन्कि खात्ङाकि अ़ङ्का आम्नुओ निम्पाङ युङ्खा चुम्सुङ्कि अ़ङ्का लाङाताङा। खोन्कि अ़ङ्का खानानिन खात्नानिन। खादा अ़ङ्का युङ्ङा, मोदा खानानिन्छाङ त़युङिन। 4 खादा अ़ङ्का खात्ङाङा, खानानिन्आ मोदा खात्खा लाम त़सिन्तुम।” 5 थोमाआ खोक्को लो, “हाङ्पो, खानानिन खादा त़खारिन्येन्ओ, आन्कान्का अ़सिन्तिमिन्का। खोन्नालो आन्कान्का लाम देत्नि सिन्मा ऱम्का?” 6 येसुआ अ़लासालोवा, “लाम, अ़छ़ङ खोन्कि ह़ङ्म़ङ अ़ङ्काङा ओ। अ़ङ्काएदाङ्का नि साङ्लाम्पाछाङ अ़ङ्पापाएदु खात्मा अ़ऱनिन। 7 खानानिन्आ अ़ङ्का त़सिन्ताङ्ऩङ्ओ खाङ्दे, अ़ङ्पापाछाङ त़सिन्तुम्ओ। हान्दाङ्का मोह्यात्नि खोक्को त़सिन्तुम, खोन्कि खोक्को त़खाम्युङ्सुम।” 8 फिलिप्आ खोक्को अ़लोवा, “हाङ्पो, आन्कान्का पापा निनाम्हाङ खाङ्मेत्नि, खोन्कि आन्काओ सोम्स़।” 9 येसुआ अ़लासालोवा, “फिलिप, ओन्तारि अ़ङ्का खानानिन झाराएनान युङ्ङाङा खोन्नुछाङ खाना अ़ङ्का त़सिन्ऩङ? साङ्आ अ़ङ्का अ़खाङ्युङ्साङ, मोसाआ अ़ङ्पापा खायुङ्सु, मेन देकि खाना त़य़ङ्याङ, ‘आन्कान्का पापा निनाम्हाङ खाङ्मेत्नि’? 10 अ़ङ्का अ़ङ्पापाएदा याक्ङाङा, खोन्कि अ़ङ्पापा अ़ङ्काएदा म़याक्याङ्नि दि खाना साकोङ्छ़ङ त़मुनान? खाक्को य़ङ अ़ङ्का खानानिन लोनाङ्नानिन मो अ़ङ्का अ़ङ्पाङ्दा लोनानिन्ओ माआङ, मेन अ़ङ्काएदा कायाक्पा अ़ङ्पापाआ अ़चुकाचि अ़मु। 11 अ़ङ्का साकोङ्छ़ङ मुवाङ्ऩङ, अ़ङ्का पापाएदा याक्ङाङा, खोन्कि पापा अ़ङ्काएदा म़याक्याङ। माङ्नालो अ़ङ्का मुङ्च़ङ्ओ म़दोम्दाओ बुन्चि खानुम्च़म्कि साकोङ्छ़ङ मुवाङ्ऩङ। 12 अ़नुछ्याङा अ़ङ्का खानानिन लोनानिन, साङ्आ अ़ङ्का साकोङ्छ़ङ अ़मुङा, मोसाआ अ़ङ्का मुङ्च़ङ्ओ काचिचि हान मुचि, खोन्कि ओचिदाङ्का अ़धिवा काचिचिछाङ मुचि, देकिनालो अ़ङ्का अ़ङ्पापाएदा खात्ङाङा। 13 खानानिन्आ अ़ङ्ऩङ्दा दि त़दोरुम्नुछाङ अ़चुछालाम्पा अ़चुपाओ अ़चुऩङ लोङ्ने निम्पाङ अ़ङ्का मो मुङ। 14 खानानिन्आ अ़ङ्ऩङ्दा दि त़दोरुम, अ़ङ्का मो मेत्ना प़नानिन। सेङ्लावाओ हिप्माय़ङ 15 खानानिन्आ अ़ङ्का सोमात़तुक्ङाऩङ्नालो अ़ङ्लोमाय़ङ्चि त़मुम्च़म। 16 खोन्कि अ़ङ्का अ़ङ्पापा लोङ, खोन्कि खोक्कोसाआ आम्नुओ निम्पाङ नि यायोक काप़ ऩप़न, खोन्कि खोक्को खानानिन्एदा अ़धुन म़युङ। 17 खोक्को अ़छ़ङ ओ लावा म़मुयाङ, खोक्को हेन्खामाआ लोक्मा अ़ऱन, देकिनालो हेन्खामाआ खोक्को ना खा, ना सिन्तु। खानानिन्आ खोक्को त़सिन्तुम, देकिनालो खोक्को खानानिन्एनान म़याक, खोन्कि खोक्को खानानिन्एदा म़युङ्युङ। 18 अ़ङ्का खानानिन हेत्छाकुवावा अ़छित्नादानानिमिन। अ़ङ्का खानानिन्एदा ताङा। 19 हान अ़क्दुकि हेन्खामाआ अ़ङ्का देम्खाछाङ अ़खाङ्ऩङ, मेन खानानिन्आ अ़ङ्का त़खाङ्ङाऩङ। अ़ङ्का अ़ह़ङ लाङालिङाओसाआ खानानिन्छाङ अ़ह़ङ त़लासिन्लिसिन। 20 मो लेन खानानिन्आ त़सिन्तुम, अ़ङ्का अ़ङ्पापाएदा याक्ङाङा, खोन्कि खानानिन अ़ङ्काएदा, खोन्कि अ़ङ्का खानानिन्एदा याक्ङाङा ओ। 21 अ़ङ्का सोमाकातुक मोङा ओ, साङ्एदा अ़ङ्लोमाय़ङ्चि म़युङ्याङ खोन्कि मोचि मुचि। अ़ङ्का सोमाकातुक अ़ङ्पापाआछाङ सोमाअ़तुक। अ़ङ्काछाङ मो सोमातुक्तुङ, खोन्कि अ़ङ्का आप्पि मोएदा खाङ्मुङान्च़ङ।” 22 यहुदाआ खोक्को लो, “हाङ्पो, खानानिन देकि आप्पि आन्कान्काएदा खाङ्त़मुसिन्चिन्ओ, खोन्कि हेन्खामादाओ झारासोओ निम्पाङ माआङ?” (ओ काचेप यहुदा इस्करियोत माआङ।) 23 येसुआ अ़लासालोवा, “साङ्आ अ़ङ्का सोमाअ़तुक्ङा, मोसाआ अ़ङ्चेम्मा य़ङ्चि मुचि, खोन्कि अ़ङ्पापाआ मो सोमाअ़तुक, खोन्कि आन्काचिआ मोएदा ताच्या, खोन्कि मोएदा याक्च्या। 24 अ़ङ्का सोमामान्तुक्कादाआ अ़ङ्चिन्माय़ङ्चि अ़मुन्चिन। खानानिन्आ त़एनुम्योम्ओ य़ङ्चि अ़ङ्को आप्पिओ माआङ, मेन अ़ङ्का काछुत अ़ङ्पापादाङ्का ओ। 25 ओ य़ङ्चि खानानिन्एदा युङाङ्याङ्हिदाङा अ़ङ्का खानानिन लोनानिन्ओ। 26 मेन यायोक काप़पा सेङ्लावा, मो अ़ङ्पापाआ अ़ङ्ऩङ्दा अ़य़, खोक्कोसाआ खानानिन झारा य़ङ्चि ऩचिन्तिन, खोन्कि अ़ङ्का खानानिन लोनानिन्ओ झारा य़ङ खानानिन मित्ऩमेत्तिन। 27 सेवाङ्नि अ़ङ्का खानानिन छित्नादानाप़नानिन। अ़ङ्को अ़ङ्सेवाङ्नि खानानिन प़नानिन। हेन्खामाआ प़न्वा अ़ङ्का खानानिन अ़प़नानिमिन। आम्नुओ साकोङ्वा चाअ़त्लो अ़लिनिन्ने खोन्कि अ़क़मा अ़कात्निन्ने। 28 ‘अ़ङ्का ओदाङ्का खात्ङाङा खोन्कि अ़ङ्का खानानिन्एदा लाङाताङा’नि लोनानिन्ओ खानानिन्आ त़एनुम। खानानिन्आ अ़ङ्का सोमात़तुक्ताङ्ऩङ्ओ खाङ्दे अ़ङ्का अ़ङ्पापाएदा खात्ङाङाओ य़ङ त़एनुम्हिदा आम्नुओ ऩङानुवाओ, देकिनालो अ़ङ्पापा अ़ङ्कादाङ्का तोक्पो म़मुयाङ। 29 हान ओ लिमा बुया अ़ङ्का खानानिन लोनायुङ्नानिन, खोन्किना ओ देम्खा लि, खानानिन साकोङ्छ़ङ त़मुङाऩङ। 30 अ़ङ्का खानानिन्एनान हान ब़द्धे अ़चेप्ऩङ, देकिनालो ओ हेन्खामाओ हाङ्काचि कामु तायाङ। मोसोओ अ़सावा अ़ङ्काएदा दित्छाङ मात्द़ङ। 31 खोन्ओसा अ़ङ्का अ़ङ्पापा सोमातुक्तुङ्योङ्ओ ओ हेन्खामाआ सिन्मादोत देत्नि अ़ङ्पापाआ ऩलोवाङ्युङ्साङ मोत्निङा अ़ङ्का मुङ। पुवालोन्तानिन, आन्कान ओदाङ्का खारिन्ने।” |
© Wycliffe Bible Translators, Inc. All rights reserved.
Wycliffe Bible Translators, Inc.