गलाति 1 - बान्तावा राई1 अ़ङ्का पावल, ख्रिस्तओ अ़क्छा अ़चुछाम्माय़ङ, खोक्को म़नाचिएदाङ्का माङ्लो खोक्को म़नालाम्पा अ़छुत्ताओ माआङ, मेन येसु ख्रिस्त खोन्कि आन्निनाम्हाङ पापा, साङ्आ येसु ख्रिस्त म़सुवादाओदाङ्का अ़खोन्तालोइसा खोक्कोसाआङा ऩछुत्ताङ्ओ। 2 अ़ङ्का खोन्कि अ़ङ्काएनान कायुङ झारा साकोङ्छ़ङ कामुचिआ गलातियादाओ साम्भुङ्चिओ निम्पाङ ओ छाप्तुङ्योङ। 3 निनाम्हाङ पापा खोन्कि आन्हाङ्पा येसु ख्रिस्तदाङ्का खानानिन सोम्तुक्मा खोन्कि सेवाङ्नि लिसानिन। 4 आन्निनाम्हाङ पापाओ अ़चुमिन्मावा येसु ख्रिस्तआ आइमित्ओ अ़अ़त्पा हेन्खामादाङ्का आन्कान फोङ्लोइसि आन्हेवाचिओ अ़फान्दा खोक्को आप्पि म़पुवान्चिन। 5 अ़धुन-अ़धुन्तारि निनाम्हाङ्ओ अ़चुऩङ्लोङ्ने। ओवात्निङा लिने। अ़क्तात नुय़ङ्खान 6 अ़ङ्का अ़दोम्ताङ्दाङ, ख्रिस्तओ अ़चुसोम्तुक्मादा खानानिन काबुत ओन च़क्नि त़छिरुम्कि नि य़ङ्खान्चिह्यात्नि खानानिन त़वाङिन्येन। 7 अ़नुछ्याङा नि नुय़ङ्खान खाक्कोछाङ मात्द़ङ, मेन खा-खाक्को म़नाचिआ खानानिन ऩथेम्सिन्खाइसिन्येन खोन्कि मोचिआ ख्रिस्तओ अ़चुनुय़ङ्खान अ़हुखान्याङ। 8 मेन आन्कान्का माङ्लो निनाम्मादुङ्का काय़ निनाम्हाङ काफाआङा आन्कान्का खालुसुम्काओ नुय़ङ्खान्एनान अ़तोङ्निन्ओ नि नुय़ङ्खान खालुसुनालो मो म़ना माङ्हिम्ने। 9 आन्कान्का बुयाङा लोनियुङ्नि, खोन्किना हान्छाङ अ़ङ्का लाङाय़ङ्ङा। खानानिन्आ खाक्को नुय़ङ्खान त़लोउम्युङ्सुम, मो नुय़ङ्खान्एनान अ़तोङ्निन्ओ नि नुय़ङ्खान साङ्आ खानानिन खाऩएत्तिन्येन, मो माङ्हिम्ने। 10 दि अ़ङ्का म़नाचिओ अ़चुचोन्मा लामुङ्योङ ओ, हे निनाम्हाङ ओ? माङ्लो दि अ़ङ्का म़नाचिओ अ़चुऩङानुमा लाप्तुङ्योङ्च़ङ? मोवात्नि च़लोक हान्छाङ म़नाचिओ अ़चुऩङानुमा लाप्तुङ्योङ्च़ङ्नालो अ़ङ्का ख्रिस्तओ अ़चुहारुक मान्लिङा ओ। निनाम्हाङ्आ पावल अ़छेन्ताओ 11 ब़ब़, नाना खोन्कि निछाचि ओ, खानानिन्आ ओ सिन्मादोत्नि अ़ङ्का मिन्ङा, अ़ङ्का खालुसुङ्ओ नुय़ङ्खान म़नाओ अ़नुय़ङ्खान माआङ। 12 देकिनालो ओ दिवापाचिदाङ्का अ़ङ्का तोक्तुङ्ओ माआङ, ना ओ अ़ङ्का खाक्कोसाआ अ़चिन्ताङ्ओङा ओ, मेन ओ अ़ङ्का येसु ख्रिस्तओ अ़चुसाम्लाम्पा तोक्तुङ्ओ। 13 अ़ङ्का यहुदि साम्योक्दा याआङ्याङ्हिदा बुया अ़ङ्का द्याक्को मुवाङ्याङ्निओ य़ङ्ओ अ़तुक्वादा खानानिन्आ त़एनुम्युङ्सुम, देत्नि अ़ङ्का निनाम्हाङ्ओ अ़चुसाम्भुङ्चि चाअ़त्लो दुखा प़ङ्च़ङ, खोन्कि मोचि लुक्मा लाप्तुङ्च़ङ। 14 आन्काओ रावादा, अ़ङ्काएनान अ़क्निओचि ब़द्धेकापाङ्दा अ़ङ्का यहुदि साम्योक्दा बुया पोयाङ, खोन्किना अ़ङ्सुन्तुम्चिओ अ़चुच़माथाङ्मादा अ़ङ्का अ़न्नुनु राक़स़रिओ मुवाङ्याङ। 15 मेन अ़ङ्लिमा बुयाङा अ़ङ्का काछेन, खोन्कि अ़चुओ सोमातुक्मालाम्पा काबुत निनाम्हाङ, 16 निरावाचिओ अ़चुरादा खोक्कोसोओ अ़चुनुय़ङ्खान खालुमा निम्पाङ अ़चुछा अ़ङ्काएदा खाङ्मुमा खोक्कोसोओ अ़चुऩङानुवा। मोन्हिदा अ़ङ्का खाक्कोछाङ म़नाएनान यायोक मान्मुङा, 17 ना अ़ङ्कादाङ्का बुया छाम्माय़ङ म़लिसाओचिएदा यरुसलेम्दाङा खाराङ, मेन अ़ङ्का च़क्नि अरब हेन्कोप्दा खाराङ, खोन्कि आदेङ दमस्कस्दा लासाङ्ताङ। 18 खोन्किना सुम्कादोङ्कि केफास तुप्सि अ़ङ्का यरुसलेम्दा खाराङ, खोन्कि खोएनान पन्द्रकालेन्तारि युङाङ। 19 मेन हाङ्पाओ अ़चुनिछा याकुब्एदाङ्का नि खाक्कोछाङ छाम्माय़ङ्चि अ़ङ्का मान्धित्ङाच़ङ। 20 निनाम्हाङ्ओ अ़चुबुदा अ़ङ्का खानानिन दि छाप्नाङ्नानिन्ओ सोज्जे माआङ। 21 खोन्किना अ़ङ्का सिरिया खोन्कि किलिकियाओ धिखाहुप्चिदा खाराङ। 22 मोन्ग़रितारि यहुदियादाओ ख्रिस्तओ अ़चुसाम्भुङ्चिआ अ़ङ्का मान्खाङ्ऩयुक्ताङ। 23 मोचिआ ओन ओन्ङा अ़एनायुङ्सा, “बुया आन्कान चाअ़त्लो कामु म़ना, खोसाआ अ़क्दु दि लुक्मा लाप्तुङुओ मो साकोङ्छ़ङ ओन्ग़रि मो खालुसुङु!” 24 खोन्कि अ़ङ्का फान्ताङ्ओदा मोचिआ निनाम्हाङ अ़लोङ्सा। |
© Wycliffe Bible Translators, Inc. All rights reserved.
Wycliffe Bible Translators, Inc.