एफिसि 4 - बान्तावा राईख्रिस्तओ अ़चुपोक्दा अ़क्तात 1 खोन्ओसा अ़ङ्का हाङ्पाओ निम्पाङ अ़क्छा छेक्माय़ङ्आ, खानानिन राक प़नाङ्नानिन, खानानिन त़तोक्तुम्ओ बुत्माय़ङ खान्तुओ ह़ङ्म़ङ ह़ङानिन। 2 अ़धुन सिम्नान्चिन्सा, सोत्सोत्वालिसा खोन्कि हुङ्याङ्सा अ़क्छाआ नि सोमातुक्मादा आङ्याङ्सा, 3 सेवाङ्निओ अ़छुम्मादा सेङ्लावाएनान अ़क्भोम लिमा लामानिन। 4 पोक अ़क्तात्ङा ओ, खोन्कि सेङ्लावाछाङ अ़क्तात्ङा म़मुयाङ, मोवात्निङा खानानिन ऩबुत्तिन्हिदा अ़क्तात तामामिन्मादा ऩबुत्तिन्ओ। 5 अ़क्तात्ङा हाङ्पा, अ़क्तात्ङा साकोङ्छ़ङ खोन्कि अ़क्तात्ङा आन्बप्तिस्मा मुयाङ। 6 आन्कान झारासोओ अ़क्तात आन्निनाम्हाङ खोन्कि आन्पापा, खोक्को आन्कान झाराएदा हाङ म़मु खोन्कि झाराएदा काचि म़मु खोन्कि झाराएदा म़याक। 7 मेन ख्रिस्तओ छुक्तुप्मा अ़चुहाक्मावा आन्कान झारा सोमातुक्मा म़पुवायुङ्सा। 8 खोन्ओसा ओवात्नि म़य़ङायुङ्सा, “खोक्को झोन्याङ्ओदु म़वाङाखाराहिदा काछेक्चि म़छेक्तुखात्तुचि, खोन्कि म़नाचि आसिखा म़प़चि।” 9 हान ओ “झोन्याङ्ओदु म़वाङाखारा”निओ अ़तुप्माय़ङ, खोक्को हेन्खामाओ अ़ह्युक्को छान्युछाङ म़धान्तान्चिन्ओ माआङ? 10 खोक्को, ह्युना म़धान्तान्चिन, खोक्को झारा निनाम्माचिदाङ्का झोन्याङ्ओदु म़वाङाखारा, खोन्ओसा झारा हेन्खामा खोक्कोसाआ अ़भेप्ने। 11 खोन्कि खोक्कोसोओ अ़चुओ मोहामाय़ङ्चि ओचिङा ओ, खा-खाक्को छाम्माय़ङ्चि, खा-खाक्को निनाम्हाङ्य़ङ खाकालुचि, खा-खाक्को नुय़ङ्खान खाकालुचि, खा-खाक्को साम्भुङ्दाओ काखाङ्चि खोन्कि खा-खाक्को काचिन्चि म़छेन्तुचि। 12 खोन्ओसा, ख्रिस्तओ अ़चुपोक पोन्ने खोन्कि ब़त्माओ काचिचि कामु निनाम्हाङ्ओ अ़चुम़नाचि म़चुम्नान्चिन्ने निकिना खोक्कोसाआ ओवात्नि अ़मुवा। 13 मोवात्नि आन्कान झारा साकोङ्छ़ङ खोन्कि निनाम्हाङ्ओ अ़चुछाओ अ़चुतायादा अ़क्भोम लिसिन, खोन्कि म़ना साकोङ्छ़ङ्दा पोयिन खोन्कि ख्रिस्तओ झारा अ़चुकात्मादा तान्लान। 14 खोन्ओसा आन्कान लोङ्वात्आ देङ्सा बुसा तोन्माय़ङ, मोचिओ झारा सोज्जेओ चिन्माय़ङ्ओ अ़ह़क्आ खोन्कि म़नाचिओ अ़चुथालिआ, अ़चुचाप्चाआ खोन्कि अ़चुनामान्ल़क्आ ओह्यात्नि-मोह्यात्नि मुत्माखात्माय़ङ छाचिवात्नि अ़लिसिमिन्ने। 15 माङ्लो, सोम्तुक्माएनान अ़छ़ङ चेप्याङ्सा, झारा य़ङ्दा आन्कान खोक्कोएदातारि माङ्लो ख्रिस्तएदातारि पोयिन्ने, खोक्कोङा अ़छोङ ओ। 16 खोक्कोलाम्पाङा झारा आन्पोक काम्साओ खोन्कि छुम्साओ झारा अ़धाङ्आ तोङ्लो काचि मुयाङ्सा पोक्दा पोन खोन्कि सोमातुक्मादा पोन्याङ्सा खात। ख्रिस्तदा अ़ऩङ्वा ह़ङ्म़ङ 17 हान अ़ङ्का हाङ्पाओ अ़चुओ ऩङ्दा क़न्नान्चिन्सा य़ङ्ङा, खोन्कि हाङ्पादा सालुम्स़ङ प़ङ, निरावाचि देत्नि मोचिओ अ़चुमित्माचिओ सोज्जेदा म़ह़ङ, मोवात्नि खानानिन हान्दाङ्का मोह्यात्नि मान्ह़ङ्दानिन। 18 मोचिओ अ़चुसाकोङ्वाओ अ़छाक्माआ तारुओ अ़चुखामान्सिन्दामाआ मोचि निनाम्हाङ्ओ अ़चुह़ङ्मादाङ्का अ़थाया म़लिसायुङ्सा, खोन्कि मोचिओ अ़चुछेन्खाताया कुइयामा लिसायुङ्सा। 19 मोचिओ अ़चुलेजो अ़कात्निन्ओ म़लिसायुङ्सा, खोन्कि झाराकापाराओ पोप्माय़ङ काचि मुमा च़क्ख़य़दा मोचि आप्पि म़लासाकि अ़चुताकावा काच़ म़लिसायुङ्सा। 20 मेन ख्रिस्तओ अ़तुक्वादा खानानिन्आ मोवात्नि मान्सिन्त़युक्तुम। 21 येसुएदाओ अ़छ़ङ्वात्नि खोक्कोसोओ अ़चुतुक्वादा खानानिन्आ त़एनुम्ओ खोन्कि खोक्कोएदा ऩचिन्तिन्युङ्सिन्चिन्नि मिन्ङाङा। 22 म़प्मा मित्माआ अ़त्लो लिसाओ आम्नुओ बुयाओ ह़ङ्म़ङ्ओ च़माथाङ्माओ अ़तुक्वादा बुयाओ आम्नुओ ह़ङ्म़ङ छिरानुम, 23 खोन्कि निनाम्हाङ्ओ अ़चुलावाआ आम्नुओ मिन्मादा अ़ऩङ्वा लिसानिन। 24 खोन्कि निनाम्हाङ्ओ अ़चुकात्मादा अ़नुछ्याओ साम्योक्मि खोन्कि सेङ्माय़ङ्दा मुयाओ अ़ऩङ्वा च़माथाङ्मा लोआनुम। 25 खोन्ओसा खानानिन झारासा म़प्मा छिरानुम, खोन्कि आम्नुओ तेन्पाङ्चिएनान अ़छ़ङ चेवानिन, देकिनालो आन्कान झारा अ़क्तात पोक्ओ अ़फुत्चि ओ। 26 माइसुङ त़मुन्नुछाङ, हेवा मान्मुदानिन। नाम लुन्मा बुयाङा आम्नुओ माइसुङ सेम्ने, 27 खोन्कि सैताना अ़वाखाम मान्प़दानुम। 28 काख़पाआ हान्दाङ्का अ़ख़निन्ने, मेन खो काचि मुने। खोसोओ अ़छुक्आ काचि मुने, खोन्ओसा म़हाप्दिओचि प़मा ऱचिने। 29 आम्नुओ दोदाङ्का यासान्मा य़ङ अ़लोन्निन्ने, मेन ग़रिएनान तोङ्ओ खोन्कि अ़नुवाक यायोक अ़तोक्ओ ओन्ङा चेवानिन, ओ य़ङ्आ काएन्चिआ सोमातुक्मा अ़तोक्ने। 30 खोन्कि निनाम्हाङ्ओ अ़चुसेङ्लावा दुखा मान्प़दानुम, खोक्कोएदा लेन्माय़ङ लेन्ओ निम्पाङ खानानिन ऩसेप्तिन्युङ्सिन। 31 झारा ख़क्लेप्पा य़ङ, माइसुङ, च़ऱपा, काचेङ्वा, सुङ्मा खोन्किना झाराकाखालाओ ऩङ्च़ छिरानुम। 32 निनाम्हाङ्आ ख्रिस्तदा खानानिन ऩलेत्तिन्वात्निङा अ़क्छा निएदा लेत्मुवानिन, खोन्कि खानानिन अ़क्छा निएदा अ़नुवाक साकोङ्वा खोन्कि सोमाकातुक लिसानिन। |
© Wycliffe Bible Translators, Inc. All rights reserved.
Wycliffe Bible Translators, Inc.