एफिसि 1 - बान्तावा राई1 निनाम्हाङ्ओ अ़चुमिन्मालाम्पा ख्रिस्त येसुओ अ़चुछाम्माय़ङ अ़ङ्का पावल्दाङ्का एफिसस्दाओ ख्रिस्त येसुदा साकोङ्छ़ङ कामु निनाम्हाङ्ओ अ़चुम़नाचि, 2 आन्निनाम्हाङ पापा खोन्कि आन्हाङ्पा येसु ख्रिस्तदाङ्का सोमातुक्मा खोन्कि सेवाङ्नि लिसानिन। ख्रिस्तदा लावामि आसिखा 3 आन्हाङ्पा येसु ख्रिस्तओ अ़चुनिनाम्हाङ खोन्कि अ़चुपाओ अ़चुऩङ चोन्ने, खोक्कोसाआ आन्कान निनाम्मादुओ युङ्खाचिदा झारा लावामि आसिखा ख्रिस्तदा म़पुवायुङ्सा। 4 निनाम्हाङ्ओ अ़चुबुदा सेङ्याङ्ओ खोन्कि थुपि मात्द़ङ्ओ लिसिन्ने निकिना हेन्खामा मुन्मा बुयाङा आन्कान सोमाम़तुक्ताकि ख्रिस्तएदा आन्कान म़छेन्ता। 5 निनाम्हाङ्ओ अ़चुमिन्माओ मित्चिऩङ्वात्नि खोक्कोसाआ आन्कान ख्रिस्त येसुलाम्पा आन्कान अ़चुछाचि लिमा निम्पाङ बुयाङा अ़छ़ङ अ़मुवा। 6 खोन्ओसा खोक्कोसाआ सोमाअ़तुक्ताङाओ अ़चुछालाम्पा आन्कान मोहा म़पुवाओ साम्स़रिओ अ़चुसोमातुक्माओ निम्पाङ आन्कान निनाम्हाङ चोन्तुम्ने। 7 निनाम्हाङ्ओ अ़न्नुनु अ़चुसोम्तुक्माआ ख्रिस्तओ अ़चुहेन्खोक्वालाम्पा खोक्कोसाआ म़फोङ्सा खोन्कि आन्हेवाचि म़लेत्ता। 8 झारा खारु खोन्कि तुप्माय़ङ्दा खोक्कोसाआ आन्कान मो सोमातुक्मा च़लोक म़पुवा। 9 खोन्कि निनाम्हाङ्आ ख्रिस्तदा अ़युङ्साओ अ़चुमित्चिऩङ्वात्नि खोक्कोसाआ अ़चुकोङ्दुम आन्कान सिन्मा म़पुवायुङ्सा। 10 ग़रि तालाकिना निनाम्मा खोन्कि हेन्खामादाओ झारा य़ङ्चि ख्रिस्तओ अ़चुपाङ्दा म़ता। 11 खोक्कोसोओ अ़चुमित्चिऩङ्वा झारा य़ङ्चि खोक्कोसोओ अ़चुमिन्माओ यायोक्वा म़तासुलाचि। 12 आन्कान ख्रिस्तदा बुयादाङ्का सोम्कुवा कामुचि खोक्कोसाआ अ़चुसाम चोन्माओ निम्पाङ ह़ङ्मा ऱन्काने निम्पाङ खोक्कोएदा बुया अ़छ़ङ अ़मुवायुङ्सा खोन्कि ऩछेन्तिन्युङ्सिन्का। 13 खोन्कि खानानिन्आछाङ खोक्कोएदा अ़छ़ङ य़ङ आम्नुओ लेन्माय़ङ नुय़ङ्खान त़एनुम, खोन्कि खोक्कोएदा साकोङ्छ़ङ त़मुन। खोक्कोएदाङा खानानिन हिप्माय़ङ सेङ्लावाआ ऩसेप्तिन। 14 निनाम्हाङ्ओ अ़चुचासुम्छेन्बि माङ्लो आन्लेन्मा मान्तोक्युक्तुम्ओन खोक्कोसोओ अ़चुसाम चोन्माओ निम्पाङ सेङ्लावा आन्पाङ्यिओ अ़छ़ङ चिनोयाङ ओ। आलाङ खोन्कि यामात्मा 15 हाङ्पा येसुदा याक्याङ्ओ आम्नुओ साकोङ्छ़ङ खोन्कि झारा निनाम्हाङ्ओ अ़चुम़नाचिएदाओ आम्नुओ सोमातुक्माओ अ़तुक्वादा अ़ङ्का एनुङ्युङ्सुङ ओसाआङा, 16 अ़ङ्यामात्मादा खानानिन मित्याङ्सा आम्नुओ निम्पाङ आलाङ प़मा अ़ङ्का अ़छित्ऩङ। 17 अ़ङ्का यामात्ङा, आन्हाङ्पा येसु ख्रिस्तओ अ़चुनिनाम्हाङ, साम्स़रिओ निनाम्हाङ पापाआ खानानिन खोक्कोसोओ झारा अ़चुतायादा लावामि खारु खोन्कि साम ऩप़न्ने, खोन्ओसा खानानिन्आ खोक्को नुलोक सिन्मा त़ऱम्ने। 18 अ़ङ्का ओसोओ निम्पाङ्छाङ यामात्ङा, आम्नुओ साकोङ्वादाओ म़क छेङ्छेङ्छेङ्वा लिने, खोन्कि दिसु सोम्कुवाओ निम्पाङ खोक्कोसाआ खानानिन ऩबुत्तिन्युङ्सिन, खोन्कि निनाम्हाङ्ओ अ़चुम़नाचिएदा खोक्कोसोओ साम्स़रिओ पाङ्यि तोक्माओ चासुम्छेन्बि दि ओ, मो खानानिन्आ सिन्मा त़ऱम। 19 खोन्कि आन्कान साकोङ्छ़ङ कामुचिओ निम्पाङ खोक्कोसोओ तोङ्माखाङ्मा अ़ऱन्मिन्ओ तोक्पो अ़चुसावा दि ओ, खानानिन सिन्मा रुवानुम। मो सावाङा आन्कान्एदा तोक्पो सावापोरिओवात्नि काचि म़मुयाङ, 20 मो सावा खोक्कोसाआ ख्रिस्तदा अ़तासाला, देम्खा खोक्कोसाआ ख्रिस्त म़सुवादाओदाङ्का अ़खोन्तालोइसा, खोन्कि निनाम्मादुओ युङ्खाचिदा अ़चुचुप्ताङ्छुक्लिप्पा अ़युङ्सा। 21 झारा हाङ्काचि, पाङ, सावा खोन्कि हाङ्होन्दा खोन्कि ओ जुगादा ओन्ङा माआङ, मेन तायाङ्ओ जुगादाछाङ देम ऩङ्चि म़युङ्याङ, झारादा खोक्को अ़न्नुनु तोक्पो ऩङ ओ। 22 खोन्कि निनाम्हाङ्आ झारा य़ङ्चि खोक्कोसोओ अ़चुक़म्मादा म़युङ्सुयुङ्सुचि खोन्कि साम्भुङ्ओ निम्पाङ खोक्को झारा य़ङ्चिओ अ़छोङ अ़मुवा। 23 मो साम्भुङ खोक्कोसोओ अ़चुपोक ओ, मो खोक्कोसोओ अ़चुह़ङ्म़ङ्आ अ़भेम, खोन्कि खोक्कोसाआङा झारा य़ङ झाराकापाराआ अ़ताला। |
© Wycliffe Bible Translators, Inc. All rights reserved.
Wycliffe Bible Translators, Inc.