२ तिमोथि 3 - बान्तावा राईआदेङ्ओ लेन्चिदाओ क़माचि 1 मेन ओ सिन्तुयुङ्सु, आदेङ्ओ लेन्चिदा क़माकात्तुओ ग़रिचि म़ता। 2 मनाचि आप्पि ओन्ङा सोमाकातुक्नान्चिन, फेक्वा च़क्ख़य़ कामु, ऱफोक्वा, राखाङ्थेत, कासुङ, अ़चुमापाआ लोमावा मान्च़कादा, मान्आलाङ्मि खोन्कि ऩसेङ्निनिन्ओ म़मु। 3 मोचि सोमामान्तुक्कादा, मान्लेत्कादा, नि कासुङ, मान्क़म्कादान्चिन, ऱक्ऱक्ऱक्वा काच़, अ़नुवाक य़ङ ऩङाकाछित, 4 काधान्चि, मान्मित्माङ कामु, तोक्पो कालि, निनाम्हाङ सोमातुक्माओ अ़फान्दा ऩङानुमा सोमाकातुक्चि, 5 साम्योक्मिवात्नि लिमा म़लाम, मेन मोसोओ अ़सावा ऩङाअ़छित। ओवाको म़नाचिदाङ्का अ़थाया युङा। 6 देकिनालो मोचिदाओ खा-खाक्को खिम-खिम्दा म़वाङ्कि हेवाआ तिमुङुचिओ खोन्कि झाराकापाराओ मिन्माचिआ लाउचिओ मान्ऱकादा मेत्छामाचि म़क़म्तुचि। 7 मो मेत्छामाचि अ़धुन म़चिन्नान्चिन, मेन देम्खाछाङ अ़छ़ङ य़ङ लोक्मा ऩऱन। 8 यान्नेस खोन्कि याम्ब्रेस्आ मोसा फित्चि अ़मुवाचुवात्नि, ओ म़नाचिआछाङ अ़छ़ङ फित्चि अ़मु। ओ म़नाचिओ अ़चुखारु पोप्ताओ खोन्कि सोज्जेओ अ़चुसाकोङ्छ़ङ मुयाङ। 9 मेन मोचि ब़द्धे ऩयुङ्निन, देकिनालो मो ह़वाङ म़नाचिवात्नि मोचिओ अ़चुखामान्सिन झाराएदा छेङ्छेङ्छेङ्वा लि। पावल्आ तिमोथि अ़लोवाओ 10 हान खाना अ़ङ्चिन्माय़ङ, अ़ङ्च़माथाङ्मा, अ़ङ्ह़ङ्म़ङ्ओ मित्चिऩङ, अ़ङ्साकोङ्छ़ङ, अ़ङ्आङ्मा, अ़ङ्सोम्तुक्मा, अ़ङ्हुङ्मा त़खायुङ्सु। 11 खाना त़सिन्तुङु देम च़लोक अ़चाअ़त्माचि खोन्कि दुखाप़माय़ङ्चि एन्तिओखियादा, आइकोनियन्दा खोन्कि लुस्त्रादा अ़ङ्काएदा म़छुक्ता, खोन्कि दियाको अ़चाअ़त्माचि अ़ङ्का आङ्तुङ्च़ङ्नुछाङ मो झारादाङ्का हाङ्पाआ अ़ङ्का ऩलेइसाङ। 12 अ़नुछ्याङा ख्रिस्त येसुएदा साम्योक्मि ह़ङ्म़ङ ह़ङ्मा कालाम्चि झारा दुखादा म़छुक। 13 मेन अ़अ़त्पा म़नाचि खोन्कि काधान्चिआ निचि म़धान्तुचि खोन्कि मोचि आप्पि म़धान्नान्चिन्कि च़लोक अ़अ़त्पा लियाङ्सा म़खात। 14 मेन आम्तुक्वादा, त़चिन्तान्चिन्ओ खोन्कि नुलोक साकोङ्छ़ङ त़मुओ य़ङ्चि मुयुङ्सुचि। मो साङ्एदाङ्का त़चिन्तान्चिन्ओ, मो खाना आप्पि त़सिन्तुङु। 15 खाना आम्छायुङ्काङा सेङ्याङ्ओ साम्कालिन त़लेसुयुङ्सु, मोसाआ ख्रिस्त येसुदा त़मुओ साकोङ्छ़ङ्लाम्पा लेन्माओ निम्पाङ खाना ताया प़मा त़ऱ। 16 झारा सेङ्याङ्ओ साम्कालिन, निनाम्हाङ्ओ अ़चुराक्लाम्पा लिसाओ, खोन्कि ओ चिन्मा, यासान्मा, लाखाङ्मेत्मा, साम्योक्मिदा चिन्मा अ़नुवाक मु। 17 ओसाआ निनाम्हाङ्ओ अ़चुम़नाचि झारा अ़नुवाक काचिदा नुलोक मुमाओ निम्पाङ म़चुम्सुचि। |
© Wycliffe Bible Translators, Inc. All rights reserved.
Wycliffe Bible Translators, Inc.