२ तिमोथि 2 - बान्तावा राईयेसु ख्रिस्तओ अ़नुवाक रात्खामि 1 खोन्ओसा, अ़ङ्छा तिमोथि, ख्रिस्त येसुओ अ़चुसोम्तुक्मादा खाना काछो लिसा। 2 ब़द्धेकापाङ सालुम्स़ङ्चिओ अ़चुबुदा खाना अ़ङ्काएदाङ्का त़एनुओ य़ङ, निचिछाङ चिन्मा काऱ सोम्कुवा त़मुचिओ म़नाचि चिन्तुचि। 3 ख्रिस्त येसुओ अ़नुवाक रात्खामिवा लिसाकि खानाछाङ आन्कान्काएनान दुखा आङ्तु। 4 रात्खामि काचिदा वाङाओ रात्खामि निकाचिदा अ़वाङ्निन। देकिनालो खोसाआ खो कापाक अ़अ़धुवाओ अ़ऩङानुमाङा अ़मित्चिऩङ मु। 5 खेलादा य़ङ्हुप्वा अ़च़निन्नालो खाक्कोछाङ कालोत्आ सिरिफा अ़तोक्तुन। 6 चात्लो काचि कामुआ चा सिवाओ बुयाओ अ़लोक तोक्मादोत। 7 अ़ङ्का दे य़ङ्ङाङाओ मो मित्तु। ओ झारा य़ङ्चि हाङ्पाआ खाना तुप्मा ऩफाने। 8 म़सुवादाओदाङ्का म़खोन्तालोन्ताओ दाउद भुङ्दाओ येसु ख्रिस्त मित्तु, अ़ङ्का खालुसुङ्ओ नुय़ङ्खान ओक्कोङा ओ। 9 मो नुय़ङ्खान्ओ निम्पाङ अ़ङ्का दुखा आङ्तुङ्योङ, खोन्कि य़ङ्हुप काफिवात्नि चोक्माय़आ अ़ङ्का छ़साङ्युङ्साङ। मेन निनाम्हाङ्ओ अ़चुय़ङ चोक्माय़आ अ़छुम्निन। 10 खोन्ओसा निनाम्हाङ्आ म़छेन्तुचिओचिओ निम्पाङ झारा य़ङ अ़ङ्का आङ्तुङ, मोवात्नि मोचिआछाङ अ़धुन साम्एनान येसु ख्रिस्तएदा याक्याङ्ओ लेन्मा अ़तोक्ने। 11 ओ य़ङ्मा सोम्कुवा मुमा खान्तुओ मुयाङ, आन्कान खोक्कोएनान स़न्युङ्सिन्नालो आन्कान्छाङ खोक्कोएनान ह़ङिन। 12 आन्कान आङ्तुम्युङ्सुम्नालो आन्कान्छाङ खोक्कोएनान हाङ मुन। खोक्को आन्कान ऩङाछिरुम्नालो खोक्कोसाआछाङ आन्कान ऩङाम़छित। 13 आन्कान सोम्कुवा मान्मुकादा मुन्येन्नुछाङ खोक्को आन्कान्एदा सोम्कुवा कामु म़मुयाङ। देकिनालो खोक्कोसाआ आप्पि म़हिप्ताओ य़ङ ऩङाऩछिरुन। निनाम्हाङ्लाम्पा काचि कामु पाआओ 14 ओ य़ङ्चि साकोङ्छ़ङ कामुचि मित्मेतुचि। निनाम्हाङ्ओ अ़चुबुदा य़ङ्सिवाचिओ अ़तुक्वादा दुम मान्छ़न्दामा चाप्चेत्तुचि। मोसाआ नुलोक म़मुनिन, मेन काएन्चि ओन लुक्तुचि। 15 लेजोकात्मा अ़दोत्निन्ओ खोन्कि अ़नुछ्याओ य़ङ नुलोक कायाङ काचि कामुचिवात्नि खाना आप्पि निनाम्हाङ्दा लोक्मा त़खान्लो खाङ्मुमान्चिन अ़न्नुनु काचि मुवा। 16 मान्साम्योक्मि खोन्कि खामान्सिन दुम कालुदाङ्का अ़थाया युङा। देकिनालो ओसाआ म़नाचि च़लोक मान्साम्योक्मिदा तित्तुखात्तुचि। 17 मोचिओ अ़चुचिन्माय़ङ क़सावाङ्खात्ओ खोवावात्नि फे। मोचिएदाओ हुमेनियस खोन्कि फिलेतस ओ। 18 बुया लामाखोन्मालोन्मा लिसाचिआयुङ्सा निकिना ओचि अ़छ़ङ्दाङ्का फेलाखारायुङ्साचि। देम्पाङ्सोओ अ़चुसाकोङ्छ़ङ मोचिआ अ़भुङ्चुखान्चुङ्चु। 19 मेन निनाम्हाङ्ओ अ़चुम़नाचि अ़तुङ्निन्ओ छ़ङ्वात्नि म़युङ्युङ, खोन्कि मो छ़ङ्दा ओ ह्वातात य़ङ्चि म़छाप्तायुङ्सा। “हाङ्पाआ अ़चुम़नाचि म़सिन्तुचि,” खोन्कि “साङ-साङ अ़ङ्का हाङ्पाओ अ़म़नानि य़ङ, खो अ़त्लो काचिदाङ्का अ़थाया युङ्ने।” 20 अ़धिवा खिम्दा हाराक्वाओ खोन्कि रुपाओ ओन्ङा खाम्माचि ऩयुङ्निन, मेन स़ङ्ओ खोन्कि बाखाओछाङ म़युङ, खा-खाक्को साऩङ्वाओ मित्चिऩङ्ओ निम्पाङ खोन्कि खा-खाक्को साऩङ्वा मान्मेत्दामाओ निम्पाङ। 21 खाक्को साऩङ्वा मान्मेत्दामायु मुयाङ, साङ मोदाङ्का आप्पि सेङ्नान्चिन्नालो खो साऩङ्वा मित्चिऩङ्ओ निम्पाङ अ़क्छा खाम्मा लि, खोन्कि खिम्दाओ खिम्हाङ्पाओ निम्पाङ सेङ्साओ, याङ्मा खान्तुओ लि, खोन्कि खाक्कोछाङ अ़नुवाक काचिओ निम्पाङ चुम्युङ। 22 खोन्ओसा सावाछादाओ अ़अ़त्पा मिन्माचि छिरुचि, खोन्कि सेङ्याङ्ओ साकोङ्वाआ हाङ्पाओ अ़चुऩङ काब़क्चिएनान अ़क्नि साम्योक्मि, साकोङ्छ़ङ, सोमातुक्मा खोन्कि सेवाङ्निओ मित्चिऩङ्दा वाङा। 23 मेन खामान्सिन खोन्कि सोज्जेओ दुम्छ़न्माचि छिरुचि, देकिनालो खाना त़सिन्तुङु ओचिआ खिखा पुक्तु। 24 हाङ्पाओ अ़चुकाब़त्पा खिमा अ़नुनिन। मेन खो झारा सोमाकातुक, चिन्मा काऱ, खोन्कि काआङ लिमादोत। 25 खोन्कि सिम्नान्चिन्सा अ़चुमिन्मालामाकिना फित्चि कामुचि यायोक काप़ लिमादोत। मोवात्नि निनाम्हाङ्आ मोचि अ़छ़ङ तुप्मा मिन्मा म़प़चि हे। 26 सैतानाआ मोचि अ़मिन्मावा मुमा छेक्तुयुङ्सुचिओ, मेन मोचि अ़नुवाक मिन्मादा म़लाताकि सैतानाओ अ़वाय़दाङ्का म़लेत। |
© Wycliffe Bible Translators, Inc. All rights reserved.
Wycliffe Bible Translators, Inc.