२ युहन्ना 1 - बान्तावा राईअ़नुछ्या सोम्तुक्मा 1 ताङ्पाएदाङ्का छेन्माय़ङ मेत्छामा खोन्कि अ़छाचि, अ़ङ्का खानानिन अ़नुछ्या सोमातुक्नाङ्नानिन खोन्कि अ़ङ्का ओन्ङा माआङ, मेन अ़छ़ङ कासिन निचिआछाङ खानानिन सोमाऩतुक्तिन्येन। 2 देकिनालो अ़छ़ङ आन्कान्एदा याक्याङ, खोन्कि अ़धुन युङ्युङ। 3 निनाम्हाङ पापा खोन्कि अ़चुछा येसु ख्रिस्तदाङ्का सोमातुक्मा, सोम्कुवा खोन्कि सेवाङ्नि आन्कान्एदा अ़छ़ङ्दा खोन्कि सोमातुक्मादा युङ्ने। अ़छ़ङ्य़ङ्दा युङानिन 4 आम्छाचिएदा खा-खाक्कोचि निनाम्हाङ पापालाम्पा आन्कान म़लोवाओवा अ़छ़ङ्दा म़कोलाङाओ धिरुङ्च़ङ्कि अ़न्नुनु अ़ङ्ऩङानुवा। 5 खोन्कि मेत्छामा, अ़ङ्का खाना अ़क्तात अ़ऩङ्वा लोमाय़ङ छाप्तुङ्योङ्ओ माआङ, मेन मो बुयादाङ्काङा आन्कान्एदा युङाङा, आन्कान अ़क्छा निएदा सोमातुक्मुमादोत। 6 खोक्कोसोओ अ़चुलोमाय़ङ्वात्नि आन्कान च़माङा सोम्तुक्मा ओ। ओ लोमाय़ङ खानानिन्आ बुयादाङ्का त़एनुम्ओसा खानानिन अ़क्छा निएदा सोमातुक्मुमादोत। 7 देकिनालो हेन्खामादा ब़द्धेकापाङ काधान्चि झारादात्नि म़खारायुङ्सा, मोचिआ येसु ख्रिस्त अ़चुपोक्दा म़ताओनि ऩय़ङ्निन। मोवाको म़नाङा काधान खोन्कि ख्रिस्तओ अ़चुङेङ ओ। 8 खोन्ओसा चाप्चेत्तानिन्चिन, दिसु य़ङ्ओ निम्पाङ आन्कान काचि मुम्ओ मो मान्मादानुम, मेन झारा सिरिफा कातोक त़लिसिन्ने। 9 ख्रिस्तओ अ़चुचिन्मादा मान्युङ्कादा खोन्कि साङ अ़थाया खात, खोएदा निनाम्हाङ ऩयुङ्निन। मेन खोक्कोसोओ अ़चुचिन्मादा कायुङ निनाम्हाङ पापा खोन्कि अ़चुछा ह़वाङ्माङ युङ्चि। 10 खोन्ओसा साङ खानानिन्एदा ताकि ख्रिस्तओ अ़चुचिन्माय़ङ अ़तारुन्नालो खिम्दा खो मान्लोक्दानुम माङ्लो साया मान्मेत्दानुम। 11 देकिनालो मो साया मेत्माङा मोसोओ अ़अ़त्पा अ़काचिदा वाङ्माओ। 12 अ़ङ्का खानानिन छाप्मायु य़ङ्चि ना ब़द्धे म़याक्याङ, मेन छाप्लावा खोन्कि च़क्मावाआ अ़ङ्का छाप्मा मान्स़ङा। मेन अ़ङ्का खानानिन तुप्माकि आम्नुओ बुदाङा हान्मा स़ङाङा, खोन्ओसा आन्कान झारासोओ आन्ऩङानुमा तालाने। 13 निनाम्हाङ्आ अ़छेन्ताओ आम्निछामाओ अ़छाचिआछाङ खाना सेवा ऩछोक्तायुङ्सा। |
© Wycliffe Bible Translators, Inc. All rights reserved.
Wycliffe Bible Translators, Inc.