२ कोरिन्थि 4 - बान्तावा राईखाम्बाखाओ ब़दा छेन्बि 1 निनाम्हाङ्ओ अ़चुसोम्तुक्मालाम्पा ओ काचि आन्कान्का ऩप़न्काओसा आन्काओ राक अ़स़निन। 2 आन्कान्का लेजोकात्ओ खोन्कि कुम्याङ्सा मुमायु काचिचि ऩङाछिरुम्च़म्का। आन्कान्का चाप्चा मुमा माङ्लो निनाम्हाङ्ओ अ़चुय़ङ ऱक्मा छुन्तिन्का। मेन अ़छ़ङ्य़ङ नुलोक खालुयाङ्सा निनाम्हाङ्ओ अ़चुबुदा आन्कान्का झारा म़नाओ छेन्खातायादा लोक्मा अ़खान्तिन्काओ मुन्चिन्का। 3 आन्काओ नुय़ङ्खान मुन्जेत्आ दिप्तायुङ्साओनालो ओ म़लुक्याङ्ओचिओ निम्पाङ ओन्ङा दिप्तायुङ्सा। 4 ओ हेन्खामादाओ माङ्आ साकोङ्छ़ङ मान्मुकादाचिओ अ़चुमिन्माचि दोप्म़क म़मेत्तुप़युङ्सुचिओसा ख्रिस्तओ साम्स़रिओ अ़चुनुय़ङ्खान खाङ्मादाङ्का म़छेक्तुचि। ख्रिस्त निनाम्हाङ्ओ अ़चुकात्मावा म़कात्याङ। 5 आन्कान्का आन्काओ तुक्वादा खाअ़लुसिमिन्का, मेन येसुओ निम्पाङ आन्कान्का आम्नुओ हारुक्चिवा लिसिन्काकिना येसु ख्रिस्तङा हाङ्पा म़युङ्याङ्नि खालुसुम्का। 6 निनाम्हाङ्आ “कुन्चियाधेक्धेक्ओदा साम लेत्ने!”नि म़य़ङा। मो निनाम्हाङ्आङा येसु ख्रिस्तओ अ़चुङाइवादा निनाम्हाङ्ओ अ़चुसाम आन्कान सिन्मा ऱम्ने निकिना आन्साकोङ्वादा खोक्कोसोओ अ़चुसाम अ़लेइसायुङ्सा। 7 झारादाङ्का तोक्पो सावा आन्कान्काएदाङ्का माआङ, मेन निनाम्हाङ्एदाङ्काओनि नुलोक खाङ्मुमाओ निम्पाङ ओ अ़लुङ छ़ओ छेन्बि आन्कान्का खाम्बाखावाको ब़चिदा याक्याङ। 8 आन्कान्का झारादात्निङ्का चाअ़त्लो लिसिन्कानुछाङ मान्पेम्ऩयुक्तिन्का। हाक्हाक्किरा लिसिन्कानुछाङ, मेन आन्काओ राक मान्स़युक। 9 आन्कान्का दुखाऩप़न्कानुछाङ, निनाम्हाङ्आ मान्छित्ऩयुक्तिन्का। आन्कान्का ऩवेरिन्तेइसिन्कानुछाङ मान्लुक्खात्युक्तिन्का। 10 येसुओ अ़चुह़ङ्म़ङ आन्काओ पोक्दा दात्ने निकिना आन्कान्का खोक्कोसोओ अ़चुस़मा अ़धुन आन्काओ पोक्दा खुयुम्लुक्तुम्का। 11 देकिनालो आन्कान अ़ह़ङ युङिन्येन्हिदाछाङ येसुओ निम्पाङ अ़धुन स़माओ क़माकात्मादा छुक्तिन्युङ्सिन, खोन्ओसा येसुओ अ़चुह़ङ्म़ङ स़दाओ आन्पोक्दा दात्ने। 12 ओवात्नि आन्कान्का स़माओ अ़बुदा ह़ङिन्का, मेन खानानिन्आ अ़लुक्निन्ओ ह़ङ्म़ङ त़तोक्तुम। 13 साम्कालिन्दा “अ़ङ्का साकोङ्छ़ङ मुवाङ, खोन्ओसा अ़ङ्का चेवाङ”नि काय़ङ्ओ अ़चुलावा आन्कान्काएदा याक्याङ्ओसा आन्कान्काछाङ साकोङ्छ़ङ मुन्का, खोन्कि आन्कान्का चेविन्का। 14 आन्कान्का सिन्तुम्योम्का, हाङ्पा येसु अ़ह़ङ कामुआ, आन्कान्काछाङ येसुएनान अ़ह़ङ ऩमुन्का, खोन्कि खोक्कोसाआङा आन्कान्का खानानिन्एनान खोक्कोसोओ अ़चुबुदा ऩतारिन्का। 15 देकिनालो ओ झारा आम्नुओ निम्पाङ्ङा म़लिसाओ ओ, खोन्ओसा सोम्तुक्मा ब़द्धे म़नाचिएदा फेकि आलाङ प़माय़ङ पोन्याङ्सा खात्कि निनाम्हाङ्ओ अ़चुऩङ अ़लोङ्ने। साकोङ्छ़ङ्लाम्पा ह़ङ्मा 16 खोन्ओसा देम्खाछाङ आन्काओ राक अ़स़निन। आन्काओ बुङ्खालिप्पाओ पोक लुक्याङ्सा खात्याङ, खोन्नुछाङ आन्काओ लावामि ह़ङ्म़ङ अ़लेन्खिन्तुम अ़ऩङ्वा लियाङ्सा खात्याङ। 17 देकिनालो आन्काओ अ़क्दुओ खोन्कि अ़चुप्पो अ़चाअ़त्माआ आन्काओ निम्पाङ तोङ्माखाङ्का अ़ऱन्मिन्ओ खोन्कि अ़धुन्ओ तोक्पो ऩङ्लोङ्मा चुम्सुयुङ्सुङु। 18 खोन्ओसा, आन्कान्का दात्याङ्ओ सामाचि अ़खान्मिन्चिन्का, मेन ऩदात्निनिन्ओ सामाचि आन्कान्का खाम्च़म्का। देकिनालो दात्ओ सामा अ़क्दुओ ओन्ङा मु, मेन अ़दात्निन्ओ अ़धुन युङ्युङ। |
© Wycliffe Bible Translators, Inc. All rights reserved.
Wycliffe Bible Translators, Inc.