१ तिमोथि 5 - बान्तावा राईमेन्मित्मा, धिताङ्पा, हारुक्चिओ अ़चुतुक्वादा यायोक 1 बुवा म़ना चाअ़त्लो मान्रेन्दो, मो आप्पि आम्पापावात्नि यायोक प़। निछा सावाछाचि आम्निछाचिवात्नि मुचि। 2 नाना मेत्छामाचि आम्मामाचिवात्नि खोन्कि निछा मेत्छामाचि झारा सेङ्याङ्ओ मिन्माआ आम्निछाचिवात्नि मुचि। 3 साङ्चि अ़नुछ्याओ मेन्मित्माचि ओ, मोचि साया मेत्तानुम्च़म। 4 अ़क्छा मेन्मित्माओ अ़छाचि माङ्लो अ़छुन्छाचि म़युङ्याङ्नालो मोचिआ बुया अ़चुखिम्लुम्पादा अ़चुओ साम्योक्मि काचि मुमा म़चिन्नान्चिन्ने, खोन्कि मोवात्नि अ़चुमा पाचिओ खोन्कि अ़चुदिवादिमाचिओ अ़चुनाक अ़लाछोन्ने, देकिनालो ओ निनाम्हाङ्ओ अ़चुखाङ्मादा लोक्मा खान्तुओ मुयाङ। 5 मेन साङ अ़नुछ्या मेन्मित्मा ओ, खोन्कि मोसोओ साङ्छाङ मात्द़ङ्ओनालो मो निनाम्हाङ्दा सोम्कुवा मु, खोन्कि अ़खाखुत अ़खोलेन यामात्युङ खोन्कि निनाम्हाङ्एदा फालु। 6 मेन मोवात्नि मेन्मित्मा अ़ताकावा च़सा युङ्नालो मो ह़ङ्याङ्नुछाङ स़न्दान ओन्तेका ओ। 7 साम्भुङ्दा ओ यायोक्चि प़चि, खोन्ओसा मोचि साङ्छाङ लाहि पाक्ऩमुनिन्ने। 8 साङ्आ अ़म़नाचिओ खोन्कि च़लोक्वा अ़खिम्लुम्पा अ़खान्चिन्नालो मोसाआ अ़साकोङ्छ़ङ ऩङाछिरु, खोन्कि साकोङ्छ़ङ मान्मुकादादाङ्का अ़अ़त्पा लि। 9 साथिकादोङ्दाङ्का धात्निओ मेन्मित्मा मोसोओ अ़क्दु ओन्ङा अ़साया काम्सायुङ्साओनालो मो ओन्ङा मेन्मित्मा रुहुप्दा पाआनुम। 10 मो अ़नुवाक काचि मुवाओसा झारासाआ साया अ़मेत्ताओ मुमादोत। अ़छाचि नुलोक पोइसुचिओ, तावाङ्चि साऩङ्वा मेत्तुचिओ, निनाम्हाङ्ओ अ़चुम़नाचिओ अ़चुलाङ वास़त्तुचिओ, दुखा कातोक्चि फासुचिओ खोन्कि झारा अ़नुवाक काचिदा अ़मिन्मा कापाक काइसाओ मुमादोत। 11 मेन साथिकादोङ्दाङ्का अ़खुक्दाओ मेन्मित्माचि मो रुहुप्दा मान्युङ्दानुम्च़म, देकिनालो मोचिओ अ़चुपोक मित्माआ मोचि ख्रिस्तदाङ्का अ़थाया म़लि, खोन्कि मोचि साया लामाकाम्मा म़स़। 12 ओवात्नि मोचिआ बुयाओ अ़चुहिप्माय़ङ अ़भुङ्खान्ओसा मोचि दन्दादा म़छुक। 13 मोन्ओन्ङा माआङ, मोदाङ्का च़लोक मोचि खिम-खिम्दा काकोन म़लिकि सोसे लिमा म़चिन्नान्चिन। खोन्कि सोसे लिमा ओन्ङा माआङ, मेन दुम्कालु खोन्कि नि म़नाओ अ़काचिदा छुक कापाक, चेप्मा अ़नुनिन्ओ य़ङ्चि म़चेप। 14 खोन्ओसा साथिकादोङ्दाङ्का अ़खुक्दाओ मेन्मित्माचि साया म़लाकाम्ने, छा म़तोक्ने, खोन्कि अ़चुखिम्चि म़खाचिनेनि अ़ङ्का यायोक प़ङ्च़ङ। मोवात्नि आन्ङेङ्चिआ आन्कान सुङ्मा अ़वाखाम ऩतोक्तुन। 15 देकिनालो खा-खाक्को मेन्मित्माचि बुयाङा सैतानाह्यात्नि म़लासायुङ्सा। 16 अ़क्छा साकोङ्छ़ङ कामुमा मेत्छामाओ खा-खाक्को अ़म़नाचि मेन्मित्मा म़युङ्याङ्नालो मोसाआ मोचि फामाचिदोत। खोन्ओसा साम्भुङ्आ पाङ्खुन्मा अ़दोत्निन्ने, खोन्कि साम्भुङ्आ अ़नुछ्याओ मेन्मित्माचि खाङ्मा ऱचिने। 17 साम्भुङ नुलोक कातित ताङ्पाचि ह्वास़रो सायामेत्मा खान्तुचि। साङ्आ नुय़ङ्खान खालुमा खोन्कि चिन्मादा च़लोक काचि मु, खो च़लोक्वा साया मेत्मा खान्तु। 18 देकिनालो साम्कालिन य़ङ्याङ, “चा नुक्याङ्ओ गोङ्दोक्ओ अ़दो बोप्योङ्आ मान्बोप्दानुम,” खोन्कि “काचि कामुआ अ़काचिलुङ तोक्मा खान्तु।” 19 ह़वाङ माङ्लो सुम्पाङ सालुम्स़ङ्चि मात्द़ङ साम्भुङ्दाओ ताङ्पाओ अ़देङ्सालाप्पादाओ लाहि मान्एन्दानुम। 20 हेवा कामुचि, झारा साम्भुङ्ओ अ़बुदा रेन्तानुम्च़म, खोन्ओसा निचिछाङ म़क़ने। 21 निनाम्हाङ खोन्कि ख्रिस्त येसु खोन्कि छेन्माय़ङ निनाम्हाङ काफाचिओ अ़चुबुदा अ़ङ्का खाना चात्लो लोना, ओ झारा यायोक्चि लिप्पा मान्वाङ्माङ माङ्लो साङ्छाङ नुलोक अ़त्लो मान्मुमाङ मुचि। 22 साङ्एदाछाङ छुक युङ्मादा मान्हेङ्दा, खोन्कि साङ्कोछाङ अ़हेवादा मान्होन्दान्चिन। खाना आप्पि अ़च़क़ल़क लिसा। 23 बुयावात्नि चाक्वा ओन्ङा मान्दुङ्दा, मेन आम्बुक्ओ निम्पाङ खोन्कि अ़धुन तुक्युङ्याङ्ओसा अ़चिचित अङ्गुरा माङ्वा दुङा। 24 खा-खाक्को म़नाचिओ अ़चुहेवाचि छेङ्छेङ्छेङ्वा म़दात, खोन्कि मोचि बुयाङा छ़ङ म़छेन, मेन निचिओ अ़चुहेवाचि आदेङ्माङ ओन्ङा म़दात। 25 मोवात्निङा, खा-खाक्को म़नाचिओ अ़नुवाक काचिचि छेङ्छेङ्छेङ्वा म़मु, खोन्कि खाक्कोचि छेङ्छेङ्छेङ्वा ऩमुनिन मोचि कुम्मायुङ्मा ऩऱनिन। |
© Wycliffe Bible Translators, Inc. All rights reserved.
Wycliffe Bible Translators, Inc.