१ पत्रुस 4 - बान्तावा राईनिनाम्हाङ्ओ निम्पाङ ह़ङ्मा 1 ख्रिस्तआ अ़चुपोक्दा दुखा अ़आङ्ताओसा खानानिन्छाङ येसुआवात्नि मिनानिन। देकिनालो साङ्आ अ़पोक्दा दुखा आङ्तुयुङ्सु, मोसाआ हेवा मुमा छिरुयुङ्सु। 2 खोवात्निओसा खो अ़पोक्दा ह़ङ्याङ्तारि हान्दाङ्का म़नाओ अ़अ़त्पा मिन्मावा माआङ, मेन निनाम्हाङ्ओ अ़चुमिन्मावा ह़ङ। 3 खाराओ लेन्चिदा निरावाचिआवात्नि खानानिन्आ ताङ्लान, अ़अ़त्पा मिन्मा, खाबात्सेत्चाले, ताकावा च़मा, खाबात्दुङ्खा रुहुप्दा खोन्कि चिप्माकात्तुओ सेम्पोक ब़क्मादा आम्नुओ ग़रि च़लोक त़क़प्तुम्युङ्सुम। 4 खानानिन मोचिएनान अ़क्नि अ़अ़त्पा काचिदा मान्कोन्त़दान्ओ ऩखान्कि मोचि दोम्तुदाङुचि, खोन्कि खानानिन रुऩफोक्तिन। 5 मेन अ़ह़ङ खोन्कि म़सुवादाओचिओ अ़चुछ़ङ्काछेन निनाम्हाङ्ओ अ़चुबुदा, मोचिआ अ़मुवाओ अ़चुकाचिओ अ़तुक्वादा खाएत्मादोत। 6 खोन्ओसा पोक्दा मोचि म़नाचिवात्नि छ़ङ्छेन्मादा म़छुक्तानुछाङ लावादा मोचि निनाम्हाङ्वात्नि म़ह़ङ्ने निम्पाङ म़सुवादाओचिओ निकिछाङ नुय़ङ्खान खाअ़लुसाओ। 7 झारा य़ङ्चिओ अ़चुलुक्माखात्मा च़क्दा ताचिआयुङ्सा। खोन्ओसा खारुच़ङ्तानुम खोन्कि आम्नुओ यामात्माओ निम्पाङ चाप्चेत्तानिन्चिन। 8 झारादाङ्का बुया आम्नुओ रादा अ़क्छा निएदा साकोङ्वादाङ्का सोम्तुक्मुवानिन। देकिनालो सोम्तुक्माआङा खिप्मा अ़ऱन्मिन्ओ हेवाचि दिप्तुचि। 9 छुऩङ्वा मान्मुमाङ अ़क्छाआ नितावाङ्चि ब़रानुम्च़म। 10 झारासा दियाको सावा त़तोक्तुम्युङ्सुम, अ़नुवाक कातोङ्पावा निनाम्हाङ्ओ अ़चुसोमातुक्माओ अ़खाला-अ़खालाओ अ़चुआसिखा अ़क्छा निएदा मो नुलोक याङानुम। 11 साङ चेप्नालो निनाम्हाङ्ओ अ़चुय़ङ खालुसिन्वा चेप्ने। काब़त निनाम्हाङ्आ प़माय़ङ्ओ सावालाम्पा ब़रुने। ओवात्नि झारा य़ङ्दा येसु ख्रिस्तलाम्पा निनाम्हाङ्ओ अ़चुऩङ चोन्ने। तोक्पो सावा खोन्कि अ़चुऩङ्चोन्मा अ़धुन-अ़धुन्तारि खोक्कोसोओ लियुङ्ने। मोवात्निङा लिने! ख्रिस्तियान लिमादा दुखा आङ्मा 12 सोमातुक्निङ्निओ यावाचि ओ, अ़न्नुनु अ़चाअ़त्मा चिन्माखाङ्मा खानानिन्एदा ताहिदा मान्सिन्त़युक्तुम्ओ य़ङ लियाङ्वात्नि खानानिन त़दोम्तिन्दान्मिन्ने। 13 मेन ख्रिस्तओ अ़चुदुखा आङ्मादा खानानिन त़वाङिन्येन्हिदा ऩङानुसानिन्चिन। खोन्नालो खोक्कोसोओ अ़चुसाम दात्हिदा खानानिन्छाङ अ़न्नुनु आम्नुओ ऩङानुने खोन्कि छेमाकात्ने। 14 ख्रिस्तओ अ़चुऩङ्दा खानानिन ऩसुङ्तिन्नालो खानानिन आसिखा कातोक ओ! देकिनालो निनाम्हाङ्ओ साम्स़रिओ अ़चुलावा खानानिन्एदा म़याक। 15 मेन खानानिन साङ्आछाङ म़नाकासेत माङ्लो काख़, माङ्लो अ़अ़त्पा काचि कामु माङ्लो नि म़नाओ अ़काचिदा छुक कापाक्आवात्नि दुखा आङ्मा अ़दोत्निन्ने। 16 मेन साङ ख्रिस्तियान लिकि दुखा आङ्तुङुनालो मोसोओ अ़लेजो अ़कात्निन्ने। मेन म़नाचिआ ख्रिस्तओ अ़चुऩङ्लाम्पा खानानिन ऩबुत्तिन्ओदा निनाम्हाङ्ओ अ़चुऩङ चोन्तानुम। 17 देकिनालो छ़ङ्छेन्मा निनाम्हाङ्ओ अ़चुम़नाचिदाङ्का पुङ्मा ग़रि ताचिआयुङ्सा। खोन्कि ओ छ़ङ्छेन्मा आन्कान्एदाङ्काङा पुङ्नालो निनाम्हाङ्ओ अ़चुनुय़ङ्खान्दा लोमावा मान्च़कादाचिओ अ़चुछ़ङ्छेन्मा देत्नि लि? 18 खोन्कि, “साम्योक्मि म़ना राक्काभाला लेत्नालो मान्साम्योक्मि खोन्कि हेवामि दे लि?” 19 खोन्ओसा निनाम्हाङ्ओ अ़चुमिन्मावा दुखा काआङ्चि नुलोक म़च़ने, खोन्कि मोचिआ अ़चुलावा साकोङ्छ़ङ मुमा खान्तुओ कामुन्पा अ़प़ने। |
© Wycliffe Bible Translators, Inc. All rights reserved.
Wycliffe Bible Translators, Inc.