१ पत्रुस 1 - बान्तावा राई1 येसु ख्रिस्तओ अ़चुछाम्माय़ङ पत्रुस्दाङ्का, पोन्तस, गलातिया, कापादोकिया, एसिया खोन्कि बिथिनियादा कायुङ लोन्माखान्माय़ङ फात्ताफेला म़लिसाओचि निनाम्हाङ्आ म़छेन्तुचिओचिओ निम्पाङ ओ छाप्लावा छाप्तुङ्योङ। 2 निनाम्हाङ पापाआ बुयादाङ्का खानानिन ऩसिन्तिन्कि ऩछेन्तिन, खोन्कि अ़चुलावालाम्पा खानानिन सेङानिन। खोन्ओसा निनाम्हाङ्ओ अ़चुलोमाय़ङ्वा खानानिन चुवानिन, खोन्कि येसु ख्रिस्तओ अ़चुह़आ रेप्तानिन्चिन। खानानिन्एदा सोम्तुक्मा खोन्कि सेवाङ्नि च़लोक पोन्याङ्सा खात्ने। अ़ह़ङ सोम्कुवा निम्पाङ निनाम्हाङ्ओ अ़चुऩङ्चोन्मा 3 आन्हाङ्पा येसु ख्रिस्तओ अ़चुपा, निनाम्हाङ्ओ अ़चुऩङ्लोङ्ने! खोक्कोसोओ तोक्पो अ़चुसोम्तुक्माआ म़सुवादाओदाङ्का येसु ख्रिस्तओ अ़चुलामाखोन्मालोन्मालाम्पा आन्कान अ़ऩङ्वा ह़ङ्म़ङ तोक्तुम। हान आन्कान अ़ह़ङ सोम्कुवादा आन्कान अ़क्तात लिसिन्युङ्सिन। 4 आम्नुओ निकि देम्खाछाङ अ़लुक्निन्खात्निन्ओ खोन्कि मान्पोप्ओ खोन्कि अ़युन्निन्खात्निन्ओ पाङ्यि निनाम्मादु युङ्सायुङ्सा। 5 खानानिन्आ आम्नुओ साकोङ्छ़ङ्लाम्पा अ़चुसावादा लेन्मा मान्तोक्त़युक्तुम्तारि निनाम्हाङ्आ खानानिन ऩरात्तिन। मो लेन्मा आदेङ्माङ्ओ लेन्दा खाङ्मेत्मा निम्पाङ खोक्कोसाआ अ़चुम्सायुङ्सा। 6 ओन्ग़रि थुत्मेत्लोतारि खानानिन्आ अ़खाला-अ़खालाओ चिन्माखाङ्माचि त़आङ्तुम्च़म्नुछाङ ओ य़ङ्चिदा अ़न्नुनु ऩङानुसानिन्चिन। 7 ओ चिन्माखाङ्माचिआ आम्नुओ साकोङ्छ़ङ अ़नुछयाओनि अ़छ़ङ अ़मु, खोन्कि मिलाम्पा हेङ्नुछाङ लुक्खात्ओ हाराक्वादाङ्काछाङ च़लोक अ़च़वाङ निकिना खाङ्म़मु। ओ येसु ख्रिस्त खाङ्म़मुनान्चिन्हिदा ऩङ्चोन्मा, ऩङ्लोङ्मा खोन्कि साया तोक्मा खान्तुओ लिने। 8 खानानिन्आ खोक्को मान्खाङ्त़युक्तुम्नुछाङ सोमात़तुक्तुम। खोन्कि ओन्ग़रि खानानिन त़खान्मिन्नुछाङ खोक्कोएदा साकोङ्छ़ङ त़मुन, खोन्किना य़ङ्मा अ़ऱन्मिन्ओ खोन्कि साम्स़रिओ छेमाआ आम्नुओ ऩङानु। 9 देकिनालो आदेङ आम्नुओ साकोङ्छ़ङ्ओ सिरिफा, माङ्नालो आम्नुओ लावा लेन्मा त़तोक्तुम। 10 खानानिन्आ त़तोक्तुम्ओ लेन्माओ अ़तुक्वादा निनाम्हाङ्य़ङ खाकालुचिआ नुलोक अ़लामा खोन्कि अ़सेना, खोन्किना खानानिन ऩप़न्ओ निनाम्हाङ्ओ अ़चुसोम्तुक्माओ अ़तुक्वादा बुयाङा खाअ़लुसायुङ्सा। 11 ख्रिस्तआ दुखा आङ्मादोत खोन्कि आदेङ साया अ़तोक निकिना बुयादाङ्काङा ख्रिस्तओ अ़चुलावाआ मोचि खाङ्म़मेत्तुङुचिहिदा, देम्खा खोन्कि देत्नि मोवात्नि लि निकिना सिन्मा खोचि म़लामा। 12 खोचि ओ य़ङ खाम़एत्ताओ आप्पि मोचि ब़त्मान्चिन निकिना माआङ, मेन खानानिन ऩब़रिन्येन निकिना निनाम्हाङ्आ खोचि तुप्म़मेत्तुचि। ओ य़ङ्चि निनाम्मादुङ्का अ़य़साओ सेङ्लावाओ अ़सावादा खानानिन खाऩएत्तिन्ओ नुय़ङ्खान खाकालुचिआ खाअ़लुसाओ य़ङ खानानिन खाऩएत्तिन्युङ्सिन। निनाम्हाङ काफाचिछाङ ओ य़ङ्चि खाङ्मा अ़न्नुनु अ़चुऩङानुयाङ। सेङानिन 13 खोन्ओसा आम्नुओ मिन्मा चुम्सानुम, क़म्तानिन्चिन, खोन्कि हाङ्पा येसु ख्रिस्त खाङ्म़मुनान्चिन्हिदा खानानिन सोमाऩतुक्तिन्ओदा झारा सोम्कुवा मुवानिन। 14 खानानिन लोमावा काच़ छाचिओसा बुया मान्सिन्त़दोम्योम्हिदाओ अ़अ़त्पा मिन्माचिदा मान्वाङ्दानिन। 15 मेन खानानिन काबुत सेङ्लो म़मुयाङ्वा खानानिन्छाङ झारा आम्नुओ च़माथाङ्मादा सेङानिन। 16 देकिनालो ओवात्नि छाप्तायुङ्सा, “खानानिन सेङानिन, देकिनालो अ़ङ्का सेङ्ङाङा।” 17 साङ्लिप्पाछाङ मान्वाङ्माङ झारासोओ काचिदा छ़ङ्काछेन निनाम्हाङ खानानिन्आ “आपो”नि य़ङ्सा त़ब़क्तुम्नालो ओ हेन्खामादा निहेन्कोप्दाओवा त़युङिन्येन्हिदा आम्नुओ च़माथाङ्मादा खोक्को साया मेत्तानुम। 18 खानानिन त़सिन्तुम्योम, आम्नुओ सुन्तुम्चिदाङ्का त़तोक्तुम्ओ सोज्जेओ च़माथाङ्मादाङ्का खानानिन ऩफोङ्सिन। ओ फोङ्मा ना हाराक्वा खोन्कि रुपावाको लुक्खात्ओ सामालाम्पा आम्नुओ लुङ अ़छोराकि त़तोक्तुम्ओ माआङ। 19 मेन खेन मान्वान्माय़ङ खोन्कि थुपि मात्द़ङ्ओ अ़क्तात थुबाछावाको ख्रिस्तओ छ़ओ अ़चुह़आ खानानिन ऩफोङ्सिन्ओ। 20 खोक्को हेन्खामा मुन्मादाङ्का बुयाङा निनाम्हाङ्आ अ़छेन्तायुङ्सा, मेन आम्नुओ निकिना आदेङ्माङ खोक्को खाङ्अ़मुसा। 21 येसुलाम्पा खानानिन निनाम्हाङ साकोङ्छ़ङ त़मुम। निनाम्हाङ्आ येसु ख्रिस्त म़सुवादाओदाङ्का अ़खोन्तालोइसा खोन्कि खोक्को साया अ़मेत्ता। खोन्ओसा आम्नुओ साकोङ्छ़ङ खोन्कि सोम्कुवा निनाम्हाङ्एदा याक्याङ। 22 हान खानानिन अ़छ़ङ य़ङ्दा लोमाय़ङ्वा त़च़न्किना आम्नुओ मिन्मा त़सेङ्सुम्ओसा आम्नुओ साकोङ्छ़ङ कामु यावाचि सोमातुक्तानुम्च़म। अ़क्छा निएदा साकोङ्वादाङ्का राक्एनान सोम्तुक्मुवानिन। 23 निनाम्हाङ्ओ अ़ह़ङ खोन्कि अ़धुन युङ्युङ्ओ अ़चुय़ङ्लाम्पा, लुक्खात्ओ माआङ, मेन देम्खाछाङ अ़लुक्निन्ओ बिउलाम्पा खानानिन अ़ऩङ्वा त़लासिन्पुक्तिन्युङ्सिन्चिन। 24 देकिनालो, “झारा म़नाचि घासावात्नि म़मुयाङ, खोन्कि मोसोओ अ़खान्नुमाछाङ घासाओ अ़बुङ्वावात्निङा मुयाङ। घासा युन्खात खोन्कि अ़बुङ्वा धाखात, 25 मेन हाङ्पाओ अ़चुय़ङ अ़धुन युङ्याक।” खोन्कि ओ य़ङ नुय़ङ्खान ओ, मो खानानिन खाएत्निओ। |
© Wycliffe Bible Translators, Inc. All rights reserved.
Wycliffe Bible Translators, Inc.