१ युहन्ना 4 - बान्तावा राईअ़नुछ्याओ खोन्कि सोज्जेओ लावा 1 सोमातुक्नाङ्नानिन्ओ यावाचि ओ, झारा लावाचि साकोङ्छ़ङ मान्मुदानुम्च़म, मेन लावाचि निनाम्हाङ्दाङ्का म़ताओ हे माआङ, मोचि सिन्मा निम्पाङ चिन्ताखानुम्च़म, देकिनालो सोज्जेओ निनाम्हाङ्य़ङ खाकालुचि ओ हेन्खामादा झारादात्नि म़खारायुङ्सा। 2 ओदाङ्काङा खानानिन निनाम्हाङ्ओ अ़चुलावा सिन्मा त़ऱम, झारा लावाआ येसु ख्रिस्त म़ना म़लिसाकि म़तायुङ्सानि कालोक्ङा निनाम्हाङ्दाङ्काङा ओ। 3 खोन्कि येसु मान्लोक्कादा झारा लावा निनाम्हाङ्दाङ्काओ माआङ। मेन मो लावा ना ख्रिस्तओ अ़चुङेङ्दाङ्का ओ। मो तायाङ्ओ अ़तुक्वादा खानानिन्आ त़एनुम्युङ्सुम, खोन्कि ओन्ग़रि मो हेन्खामादा ताचिआयुङ्सा। 4 सोमातुक्नाङ्नानिन्ओ छाचि ओ, खानानिन निनाम्हाङ्दाङ्का ओ, खोन्कि सोज्जेओ निनाम्हाङ्य़ङ खाकालुचिएदा त़छोसिन्युङ्सिन। देकिनालो खानानिन्एदा कायुङ सेङ्लावा हेन्खामादाओ लावादाङ्का तोक्पो म़मुयाङ। 5 मोचि हेन्खामादाङ्काओचि ओ, खोन्ओसा हेन्खामादाओ य़ङ म़चेप, खोन्कि मोचि म़चेप्ओ य़ङ हेन्खामादाओ म़नाचिआ अ़एन। 6 आन्कान ना निनाम्हाङ्दाङ्का ओ। साङ्आ निनाम्हाङ सिन्तु मोसाआ आन्य़ङ एनु, खोन्कि साङ निनाम्हाङ्दाङ्काओ माआङ, मोसाआ आन्य़ङ अ़एनुन। ओदाङ्काङा आन्कान अ़छ़ङ लावा खोन्कि सोज्जेओ लावा सिन्मा ऱम। निनाम्हाङ सोमाकातुक म़मुयाङ 7 सोमातुक्नाङ्नानिन्ओ यावाचि ओ, आन्कान अ़क्छा निएदा सोमातुक्मुन्ने, देकिनालो सोम्तुक्मा निनाम्हाङ्एदाङ्का ता। खोन्कि झारा साङ खासोमातुक, खो निनाम्हाङ्एदाङ्का लिसाओ, खोन्कि मोसाआ निनाम्हाङ सिन्तु। 8 साङ खासोमाअ़तुक्निन, मोसाआ निनाम्हाङ अ़सिन्तुन, देकिनालो निनाम्हाङ सोमाकातुक म़मुयाङ। 9 ओवात्नि निनाम्हाङ्आ अ़चुसोमातुक्मा आन्रादा खाङ्अ़मुसा, आन्कान येसुलाम्पा ह़ङिन्ने निकिना खोक्कोसाआ अ़क्छा ओन्ङा ओ अ़चुछा हेन्खामादा अ़य़सा। 10 सोमातुक्मानिओ ओङा ओ, आन्कान निनाम्हाङ सोमातुक्तुम्ओ माआङ, मेन खोक्कोसाआ आन्कान सोमाम़तुक्ता ओ, खोन्कि आन्हेवा लेत्मा निम्पाङ हेन्खोक्वा लिसि अ़चुछा अ़य़सा। 11 सोमातुक्नाङ्नानिन्ओ यावाचि ओ, ओवात्नि निनाम्हाङ्आ ओन च़लोक आन्कान सोमाम़तुक्तानालो आन्कान्छाङ अ़क्छा निएदा सोमातुक्मुमादोत। 12 साङ्आछाङ निनाम्हाङ देम्खाछाङ मान्खाङ्युक्तु। मेन आन्कान अ़क्छा निएदा सोमातुक्मुन्नालो निनाम्हाङ आन्कान्एदा म़युङ, खोन्कि खोक्कोसोओ अ़चुसोम्तुक्मा आन्कान्एदा ताला। 13 ओदाङ्काङा आन्कान सिन्तुम, आन्कान खोक्कोएदा युङिन, खोन्कि खोक्को आन्कान्एदा म़युङ। देकिनालो खोक्कोसाआ अ़चुओ लावा आन्कान म़पुवायुङ्सा। 14 निनाम्हाङ पापाआ अ़चुओ छा हेन्खामादाओ म़नाचि लेइसि अ़य़साओ आन्कान्का खाम्का खोन्कि अ़चुसालुम्स़ङ प़म्योम्च़म्का। 15 साङ्आ येसु निनाम्हाङ्ओ अ़चुछा निकिना लोउ, मोएदा निनाम्हाङ म़युङ, खोन्कि मो निनाम्हाङ्एदा युङ। 16 खोन्कि ओवात्नि निनाम्हाङ्आ आन्कान सोमाम़तुक्ताओ आन्कान सिन्तुम्योम, खोन्कि साकोङ्छ़ङ मुन्येन। निनाम्हाङ सोमाकातुक म़युङ्याङ, खोन्कि साङ सोमातुक्मादा युङ, मो निनाम्हाङ्एदा युङ, खोन्कि निनाम्हाङ मोएदा म़युङ। 17 छ़ङ्छेन्माओ लेन्दा आन्कान क़मा अ़दोत्निन निकिना ओवात्निङा आन्कान्एदा अ़छ़ङ सोम्तुक्मा अ़तासाला, देकिनालो ख्रिस्त दियाको म़मुयाङ आन्कान्छाङ ओ हेन्खामादा मोवाकोङा मुन्येन। 18 सोम्तुक्मादा क़मा अ़याक्निन, मेन अ़छ़ङ सोम्तुक्माआ क़मा माङ्सुखाइसु। देकिनालो क़मादा दन्दा याक, खोन्किना काक़ म़नाएदा अ़छ़ङ सोम्तुक्मा अ़याक्निन। 19 आन्कान सोमातुक्मुन्येन, देकिनालो बुया निनाम्हाङ्आ आन्कान सोमाम़तुक्ता। 20 साङ “अ़ङ्का निनाम्हाङ सोमातुक्तुङ”नि य़ङ, मेन अ़निछा अ़ऩङाछिरुनालो मो काम़प ओ, देकिनालो खोसाआ खाओ अ़निछाङा सोमामान्तुक्कादाआ मान्खाङ्युक्तुओ निनाम्हाङ सोमातुक्मा अ़ऱन। 21 खोन्कि आन्कान खोक्कोएदाङ्का ओ लोमाय़ङ तोक्तुम्युङ्सुम, साङ्आ निनाम्हाङ सोमातुक्तु, मोसाआ अ़निछाछाङ सोमातुक्मादोत। |
© Wycliffe Bible Translators, Inc. All rights reserved.
Wycliffe Bible Translators, Inc.