१ कोरिन्थि 9 - बान्तावा राईछाम्माय़ङ पाङ 1 दि अ़ङ्का अ़ङ्ताकावा च़मा अ़ऱऩङ कि? दि अ़ङ्का छाम्माय़ङ माआङ? दि अ़ङ्का आन्हाङ्पा येसु मान्खाङ्युक्तुङ? दि खानानिन हाङ्पाओ निम्पाङ अ़ङ्का मुङ्ओ काचि सिवा माआङ कि? 2 अ़ङ्का निचिओ निम्पाङ अ़चुछाम्माय़ङ माआङ्नुछाङ आम्नुओ ना अ़नुछ्याङा छाम्माय़ङ ओ! देकिनालो हाङ्पाओ अ़चुछाम्माय़ङ लिमा अ़ङ्को अ़ङ्बुत्माय़ङ्ओ अ़सालुम्स़ङ खानानिन त़याइन्येन। 3 अ़ङ्का काह़त्चिएदा अ़ङ्रात्खान्चिन ओङा ओ। 4 दि आन्कान्का चामा खोन्कि दुङ्मा पाङ मात्द़ङ? 5 दि नि छाम्माय़ङ्चिवात्नि हाङ्पाओ अ़चुनिछाचि खोन्कि केफास्आवात्नि आन्काच्याछाङ साकोङ्छ़ङ कामु खिम्हाङ्मा तित्माकि अ़क्नि कोन्मा आन्चुवाओ पाङ मात्द़ङ कि? 6 माङ्लो दि अ़ङ्का खोन्कि बारनाबास्आ ओन्ङा ह़ङ्माओ निकिना काचि मुमादोत्ओ कि? 7 आप्पिओ अ़फेक्वाआ खाक्को रात्खामि काचि मु? अङ्गुरा कालित्आ मोसोओ अ़सिवा अ़चान कि? भेरा काखाङ्आ मोसोओ अ़ओम्पिवा अ़दुङुन कि? 8 दि अ़ङ्का म़नाओ अ़मिन्माआ ओन्ङा ओ य़ङ्ङाङाओ कि? दि य़ङ्हुप्छाङ ओवात्नि य़ङ्याङ माआङ कि? 9 देकिनालो मोसाओ अ़य़ङ्हुप्दा छाप्याङ, “चा नुक्याङ्ओ गोङ्दोक्चि अ़दो बोप्योङ्आ मान्बोप्दानुम।” दि निनाम्हाङ गोङ्दोक्ओ अ़तुक्वादा ओन्ङा मिन्राक म़मु कि? 10 खोक्कोसाआ अ़नुछ्याङा आन्को निम्पाङ म़य़ङाओ माआङ कि? उवा, आन्को निम्पाङ्ङा छाप्ताओ। देकिनालो बोयोङ काछोआ तोक्मामिन्माआङा छोसु खोन्कि चा कानुक्आ चा तोक्मा मिन्माआङा नुउ। 11 आन्कान्का आम्नुओ रादा लावामिओ बिउ वेत्तुम्युङ्सुम्कानालो आन्कान्का खानानिन्एदाङ्का हेन्खामादाओ सामाचि कोउम्च़म्कानालो दि ओ ब़द्धे लामुम्योम्ओ कि? 12 निचिआ खानानिन्एदाङ्का सामाचि तोक्मा पाङ अ़तोक्तायुङ्सानालो आन्कान्काआ अ़क्चित च़लोक पाङ तोक्मादोत्ओ माआङ कि? खोन्नुछाङ आन्कान्का ओ पाङ मान्याङ्युक्तुम्का, मेन ख्रिस्तओ अ़चुनुय़ङ्खान खालुमादा लाम अ़छेक्निन्ने निकिना आन्कान्का झारा य़ङ आङ्तुम्का। 13 दि खानानिन त़सिन्तिमिन्येन, निनाम्हाङ ब़क्खाखिम्दा काचि कामुआ निनाम्हाङ ब़क्खाखिम्दाङ्काङा चामायु अ़तोक, खोन्कि हेन्खोक्वा धान्खादा काचि कामुचिआ हेन्खोक्वा धान्खादाङ्काङा अ़चुलोक अ़तोक? 14 मोवात्निङा नुय़ङ्खान खाकालुआछाङ नुय़ङ्खान्लाम्पाङा अ़ह़ङ्खालाम तोक्मादोत निकिना हाङ्पा म़य़ङायुङ्सा। 15 मेन अ़ङ्का ओ पाङ्चिदाङ्का खाक्कोछाङ मान्याङ्युक्तुङ्च़ङ। खोन्कि अ़ङ्को निकिना ओवाको सामाचि त़मेत्नि प़निने निम्पाङ छाप्तुङ्योङ्च़ङ्ओ माआङ। अ़ङ्का तोक्पो लिमाओ य़ङ्दाङ्का साङ्आछाङ छेक्मादाङ्का ना अ़ङ्का स़मा नुयाङ। 16 अ़ङ्का नुय़ङ्खान खालुसुङ्नुछाङ अ़ङ्का ऱक्भाक अ़मुऩङ, देकिनालो अ़ङ्का खालुमाङादोत। नुय़ङ्खान खाअ़लुऩङ्नालो अ़ङ्का चाअ़त्लो लिङाने! 17 ओ काचि अ़ङ्मिन्माआङा मुङ्नालो अ़ङ्का सिरिफा तोक्तुङ, मेन अ़ङ्मिन्मादाङ्का माआङ्नुछाङ अ़ङ्का अ़क्तात पाङ्खुन ऩपुवाङ्युङ्साङ। 18 खोन्नालो अ़ङ्सिरिफा दि ओ? अ़ङ्सिरिफा ओङा ओ, अ़ङ्का मोहाङा नुय़ङ्खान खालुमा तोक्मा। नुय़ङ्खान खालुमादा झारा पाङ अ़ङ्का तोक्मादोत्नि मान्य़ङ्ङा। 19 देकिनालो अ़ङ्का झारा म़नाचिदाङ्का अ़ङ्ताकावा च़मा ऱङानुछाङ ब़द्धे तात्मा ऱङ्च़ङ्ने निकिना अ़ङ्का झारासोओ अ़चुहारुक मुवाङ्च़ङ। 20 यहुदिचि तात्माचि निम्पाङ अ़ङ्का यहुदिचिएदा यहुदिचिवाङा लिसाङ। य़ङ्हुप्ओ अ़क़म्मादा कायुङ्चि तात्माचि निम्पाङ अ़ङ्का य़ङ्हुप्ओ अ़क़म्मादा मात्द़ङ्ङाङानुछाङ य़ङ्हुप्ओ अ़क़म्मादा म़याआङाओचि तात्माचि निम्पाङ य़ङ्हुप्ओङा अ़क़म्मादा याइन्वाङा लिसाङ। 21 य़ङ्हुप्दा मान्युङ्कादाचि तात्माचि निम्पाङ अ़ङ्का य़ङ्हुप्दा मान्युङ्कादाचिवाङा लिसाङ, खोन्नुछाङ निनाम्हाङ्ओ अ़चुय़ङ्हुप्दाङ्का अ़ङ्का अ़फोङ्ऩङ्ऩङ। मेन अ़ङ्का ख्रिस्तओ अ़चुय़ङ्हुप्ओ अ़चुक़म्मादा याक्ङाङा। 22 मान्ऱकादाचि तात्माचि निम्पाङ अ़ङ्का मान्ऱकादाचिएदा मान्ऱकादाचिवाङा लिसाङ। झाराकापाराआ झारा म़नाचि लेन्मा ऱङ्च़ङ्ने निम्पाङ अ़ङ्का झाराकापारा चुवाङ। 23 नुय़ङ्खान्ओ आसिखाचिदा वाङ्मा ऱङाने निकिना नुय़ङ्खान्ओ निम्पाङ अ़ङ्का ओ झारा मुङ्च़ङ। 24 दि खानानिन त़सिन्तिमिन्येन, लोत्मा होरादा झारा कालोत्चि म़लोत, मेन सिरिफा अ़क्छाआ ओन्ङा तोक्तु? मोवात्निङा खानानिन्छाङ सिरिफा तोक्मा निम्पाङ लोरानिन। 25 होरा मेत्मादा कावाङ झारा क़म्मान्चिन्दोत। मोचि लुक्खात्ओ ताङ्बोप्खा तोक्माओ निम्पाङ ओवात्नि म़च़याङ, मेन आन्कान देम्खाछाङ अ़लुक्निन्खात्निन्ओ ताङ्बोप्खा तोक्माओ निम्पाङ ओवात्नि च़न्येन। 26 खोन्ओसा अ़ङ्का अ़मित्चिऩङ मात्द़ङ्ओ म़नावात्नि अ़लोत्ऩङ। अ़ङ्का अ़क्छा ह़क काधात्वा अ़मुऩङ। 27 मेन अ़ङ्याम चाअ़त्लो क़म्तुङ खोन्कि ओ अ़ङ्हारुक मुङ। खोन्ओसा निचि नुय़ङ्खान खाएत्तुङ्च़ङ्नुछाङ अ़ङ्का आप्पि सिरिफाओ निम्पाङ अ़खान्ऩङ्लो अ़लिऩङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.