१ कोरिन्थि 8 - बान्तावा राईसेम्पोक प़माय़ङ्ओ चामायु 1 हान सेम्पोक्चि प़माय़ङ चामायुओ अ़तुक्वादा खाम्ने। आन्कान सिन्तुम्योम, आन्कान झाराएदा आन्खारु याक्याङ। खारुआ ऱक्भाक तारु, मेन सोम्तुक्माआ उन्निज़ङ्नि मुयाङ्सा खात्तु। 2 साङ अ़ङ्का सिन्ङाङानि मिन्नालो खोसाआ दि सिन्मादोराङा ओ, मो य़ङ दित्छाङ मान्सिन्युक्तु। 3 मेन निनाम्हाङ सोमाकातुक म़ना निनाम्हाङ्आ अ़सिन। 4 खोन्ओसा सेम्पोक प़माय़ङ्ओ चामायु चामाओ अ़तुक्वादा आन्कान सिन्तुम्योम, ओ हेन्खामादा सेम्पोक्चिओ अ़चुदित्छाङ मात्द़ङ, मेन अ़क्छा निनाम्हाङ्एदाङ्का नि मात्द़ङ। 5 मेन निनाम्मा माङ्लो हेन्खामादा अ़चुऩङ ओन्ङाओनुछाङ माङ्चि म़युङ्याङ। अ़नुछ्याङा ब़द्धे “माङ्चि” खोन्कि “हाङ्पाचि” म़युङ्याङ। 6 मेन आन्को निम्पाङ अ़क्छा ओन्ङा निनाम्हाङ पापा म़युङ्याङ। खोक्कोङा झारासोओ कामुन्पा म़युङ्याङ खोन्कि खोक्कोसोओ निम्पाङ आन्कान ह़ङिन। अ़क्छा ओन्ङा आन्हाङ्पा, येसु ख्रिस्त म़युङ्याङ। खोक्कोलाम्पाङा झारा य़ङ्चि अ़मुया खोन्कि खोक्कोलाम्पाङा आन्कान ह़ङिन। 7 मेन झारा साकोङ्छ़ङ कामुचिआ ओ अ़छ़ङ य़ङ ऩसिन्तुन। देम म़नाचि सेम्पोक ब़क्मा अ़चुओ च़माथाङ्मा युङायुङ्साओसा मोचि चामायु म़चायाङ्हिदा अ़नुछ्याङा सेम्पोक प़माय़ङ चामायु चोम्काओनि म़मिन। खोन्कि मोचिओ अ़चुछेन्खाताया मान्ऱओसा “अ़ङ्का पोप्ताङ”नि म़मिन। 8 मेन चामायुआ आन्कान निनाम्हाङ्ओ अ़चुच़क्दा म़तात्निन्लानिन। आन्कान अ़चान्मिनुछाङ अ़त्लो अ़लिसिमिन, आन्कान चाम्नुछाङ नुलोक अ़लिसिमिन। 9 मेन चाप्चेत्तानिन्चिन, आम्नुओ ओ ताकावा च़माआ साकोङ्छ़ङ्दा मान्ऱकादाचिओ निम्पाङ धुङ्खा अ़लिनिन्ने। 10 देकिनालो मान्ऱकादा छेन्खाताया कातोक साकोङ्छ़ङ कामुआ खाना कासिन कातुप्आ सेम्पोक ब़क्खा माङ्खिम्दा चासि त़युङ्ओ त़खाङ्नालो दि मोसाआ सेम्पोक प़माय़ङ चामायु चामा राक अ़मुनिन कि? 11 खोन्कि आम्खारुआ मो मान्ऱकादा साकोङ्छ़ङ कामु लुक, मोसोओ निकिनाछाङ ख्रिस्त म़सुवाओ। 12 ओवात्नि खानानिन आम्नुओ साकोङ्छ़ङ कामुचिओ अ़चुदेङ्सालाप्पादा हेवा त़मुन खोन्कि मोचिओ मान्ऱकादा छेन्खातायादा खेन त़वाइसुम्च़म्नालो खानानिन ख्रिस्तओ अ़चुदेङ्सालाप्पादा हेवा त़मुन। 13 खोन्ओसा अ़ङ्का चाङ्ओ साआ साकोङ्छ़ङ कामु हेवादा धाखा लाम लिनालो अ़ङ्का देम्खाछाङ सा अ़चाऩङ, मोवात्नि अ़ङ्का साकोङ्छ़ङ कामु हेवादा अ़धान्ऩङ। |
© Wycliffe Bible Translators, Inc. All rights reserved.
Wycliffe Bible Translators, Inc.