Ester 7 - Biblia ande chib Romani

E Ester cherel aver jape

¹ O charo o Asuero ta o Aman llele kote kai e Ester cherela o jape,

² ta i ande gua duito llive o charo phenda e Estereke gia: ¡Sogo ka mange mandar me ka dav tut, i te mangea mandar dopas katar mi charoina!

³ A e Ester phenda leke: Charo, te volia man ta te mangea tu, samo iek ezgoda ka mangav tutar: Te na muke te mundaren man ta ni me foro,

⁴ soke man ta me foro bichinde amen te ava mundarde saurre. Te avilama bichinde sargo sluge, me ni phendema niso katar gaia orba.

⁵ Ondaka o Asuero puchla la: ¿Ko si ta kaitalo gua lleno kai mangel te cherel goia ezgoda?

⁶ E Ester phenda: ¡Gua dusmano si o Aman! Kana o Aman asunda gaia orba, ni llanela so ka cherel daratar angla o charo ta e charoina.

⁷ Ondaka o Asuero ustilo but joliariko ta llelotar katar e soba kai saia e sinia, ta likisto kai e bar zeleni katar o cher e charoko. A o Aman, kana llangla kai o charo mangela te mundaren le, achilo ande soba te molilpe e Estereke te na mukel te mundaren le.

⁸ Kana o charo irisailo katar e bar zeleni, dia ande soba kai saia e sinia ta dikhla kai o Aman chudiaiape upral po kerveto kai inzola e Ester. Ondaka o charo phenda ando baro avazi: ¿Mange te de ando lallao e charoina angla mande ta isto ande mo cher? Samo phenda gua o charo, nesave eunukura ucharde e Amaneko soro.

⁹ Ta iek lendar kai ikhardola Jarbona, phenda: Ando cher e Amaneko si gotovo o than kai si o solo phanglo kai si le preko bis ta dui pole chak upre, kai isto vou lachardaia te mundaren e Mardokeo, gua kai cherdaia te na mundaren e charo. Ondaka o charo phenda: ¡Umblaven le isto kote!

¹⁰ Ta gia si sar umblade e Amane po than kai isto vou lachardaia te mundaren e Mardokeo. Ta gia llelitar e joli e charoki.