Ester 4 - Biblia ande chib Romani

E judiura tristonpe cheres o lil

¹ Kana o Mardokeo llangla gala ezgode, pharrada pe patave ta thoda patave zalosne te dikhol leki duk, ta chudia prajo iagako pe po soro, ta thoda te phirel o foro, ta kukila ta rovela.

² Ta avilo llik kai o udar katar o cher e charoko, soke nasti dela andre niko gia sar llala furiado vou.

³ Ta ande suako foro kai avela o lil katar o zakono e charoko, saia but zalba maskar e judiura, ni jana, ta rovena ta kukina, ta but lendar inzona po prajo iagako, ta thovena pe pete patave zalosne.

E Ester del orba e charoia

⁴ E sluge katar e charoina Ester, ta e eunukura kai arakhena la, phende lake so llalape. Ondaka e charoina bichalda patave kai o Mardokeo te premenilpe e patave zalosne kai sea pe lete, a vou ni kamla len.

⁵ Ondaka e Ester ikharda e Atake, iek katar e eunukura kai arakhena o cher e charoko, ta phenda leke te llal kai o Mardokeo ta te puchel le soke cherela gia.

⁶ O Atak llelo te del orba e Mardokeoia kai saia pe plasa e foroki angla o udar katar o cher e charoko,

⁷ ta o Mardokeo phenda leke sa e ezgode kai nakhlea, ta gachin rup phendaia o Aman kai ka del kai o lleno kai arakhel e love e charoke te mundarena e judionen.

⁸ Ta i dia lete o lil kai phenela te mundaren e judionen kai sikadea le e llenenge ande Susa te sai den le kai e Ester, ta gia te llanel voi sa e ezgode kai nakhlea. Ta i o Atak phenda e Mardokeoke te phenel e Estereke te del orba e charoia isto voi ta te molilpe leke te arakhel lake foro.

⁹ Ondaka o Atak irisailo ta phenda e Estereke sa so phendaia o Mardokeo.

¹⁰ Ta e Ester bichalda pale e Atake kai o Mardokeo te phenel leke gia:

¹¹ Sa gola kai radin e charoke ta e llene kai zivin tala leko va, llanen kai si iek zakono kai phenel kai varesavo murus o diskinia kai dela ande bar kai si andre ando cher te dikhel e charo a o charo te na ikharda le, trubul te merel. A o charo te inzarela karing lete pi rovli sunakuni pala o zao, ondaka ka avel prostime leko zivoto. A man, cherel tranda llive kai o charo ni ikharel man.

¹² Kana resli kai o Mardokeo e orba e Estereki,

¹³ vou bichalda te phenen lake gia: Na mislisar kai samo tu ni ka mere maskar e judiura, soke san ando cher e charoko.

¹⁴ Te achilan akana ta te na phendan niso, katar aver rig ka avel o braduipe e judionengo, a tu ta sa chi familia ka meren. ¡Sai avelpe kai tu cherdilan charoina, samo te pomozi amen pe gaia ezgoda!

¹⁵ Ondaka e Ester bichalda te phenen e Mardokeoke gia:

¹⁶ Lla ta chide sa e judionen kai si ando foro Susa, te allunin pala mande. Te na jan ni te pien niso ande trin llive ta trin racha, a me ta me sluge ka chera isto sargo tumen, ta mapalal ka llav kai o charo, i te phagava o zakono. A te mundarena man, ka mundaren man.

¹⁷ Ondaka o Mardokeo llelotar ta cherda sa so phenda leke e Ester.